Mesoriẹ Ame A Bọn I Kingdom Hall, Ne Marhẹ A Bọn Aye Lele?

Lele oborẹ odẹ na Kingdom Hall omevirhọ, uyono i Baibol re vi yono uvuẹn avwaye ọ tẹnrovi Uvie Osolobrugwẹ, ro rhiẹ urhomẹmro aghwoghwo i Jesu.—Luke 8:1.

Ọnana ekete ra ga ogame urhomẹmro uvuẹn amwa. Uvuẹn Kingdom Hall yẹ Iseri Jehova a hẹrote owian aghwoghwo na uvuẹn ekete rẹ aye e rhirhiẹ. (Matthew 24:14) Kingdom Hall ephian rhẹ aruo owu-u, jọrẹn aye ephian i rhorhomu. Buebun i vwo ghwẹ ukoko owu uvuien. Uvwre ẹgbukpe ezẹko ri vrẹn ne na, ame bọn iduduru i Kingdom Hall ekpokpọ neneyo na sabu nya mwu e bunrhọ ihworho uvuẹn ukoko ame. Marhẹ a sabu ru ọnana?—Matthew 19:26.

A bọn aye nyoma itetoro re toro rhẹ ekiri owu. A ha itetoro enana riẹ oghọn ukoko, neneyo a sabu ha igho na bọn, jeghwai kwaphiẹ i Kingdom Hall harẹn ikoko re guọlọre.

Ihworho ri nẹ ekete sansan rhe ri homakpanhotọre yẹ a bọn i Kingdom Hall, a vwa kwosa harẹn aye-e. Uvuẹn ẹkwotọre buebun, o vwo ẹkwaphiẹrhọ i Kingdom Hall Construction Groups. Umẹ ebanbọn ọrhẹ erẹ i homakpanhotọre e nẹ ukoko owu riẹ ọrọrọ uvuẹn ẹkwotọre na, jeghwai riẹ amwa rọ vwọ phẹrẹ e te, ya ha userhumu harẹn ikoko na bọn i Kingdom Hall aye. Uvuẹn ẹkwotọre ezẹko, Iseri Jehova ri mwuovwan a ha rẹ aye mwu ne hẹrote ẹbọn rhẹ ẹkwaphiẹ i Kingdom Hall uvuẹn ekete re dje rẹ aye nya. Dedevwo ewena buebun a homakpanhotọre wian owian ekete ebanbọn ephian, imizu ukoko re ha uvuẹn ekete ebanbọn na yẹ a mai homakpanhotọre wian owian na. Ẹhẹn ọfuanfon i Jehova rhẹ omẹdamo ro nẹ otọre ẹhẹn ihworho enẹyen rhe yẹ a sabu ru enana ephian.—Psalm 127:1; Colossians 3:23.

• Mesoriẹ e se ekete ame a ga ogame i Kingdom Hall?

• Marhẹ ame a sabu bọn i Kingdom Hall buebun lele ekete akpọ na okeri te?