Marhẹ Wu Ne Ru Sabu Ti Kẹrẹ Osolobrugwẹ?

1. Ẹrhomo ephian yẹ Osolobrugwẹ ọ kerhọ ye?

Osolobrugwẹ ọ riẹn abọ use vwe ihworho ephian. Nẹ aye ti kẹriẹ nyoma ẹrhomo ẹnẹ. (Psalm 65:2) Ọrẹn, ọ rhẹ ẹrhomo ephian yẹ ọ kerhọ ye-e. Jerẹ udje, Jehova ọ vwọ kerhọ ẹrhomo ọrẹ esa rọ djoma jojojo kpahen aniẹ-ẹ. (1 Peter 3:7) Habaye, okẹ itu Israel i vwe tiobọnẹ ubiobiomu, Osolobrugwẹ ọ kerhọ ẹrhomo aye-e. Ọrana o dje phia taghene, ẹrhomo ẹnẹ ọkpẹ uphẹn. Jọrẹn Osolobrugwẹ ọ kerhọ ẹrhomo irue edandan, aye rha ghwẹriẹ obọ.—Se Isaiah 1:15; 55:7.

Ni Ividio na Ẹrhomo ephian yẹ Osolobrugwẹ ọ kerhọ ye?

2. Marhẹ ọwan ena nẹ ẹrhomo lele?

Ẹrhomo usun ẹga ọwan a ha vwe Osolobrugwẹ, omaran na, ọrẹ ọmarọwan i Jehova ọvo ọyẹ ọwan ena nẹ ẹrhomo vwe. (Matthew 4:10; 6:9) Habaye, ọwan e rhiẹ ihworho ri vwa gba na, ọwan ne na nyoma odẹ i Jesu ha nẹ ẹrhomo, nime, o hwuru fọkiẹ ọdandan ọwan. (John 14:6) Jehova ọ guọlọ ẹrhomo ro nẹ ọmudu ọwan rhe. Orhiẹ ọrẹ a ya rhẹ uvuẹn ẹbe-e, yanghene ọrẹ a ta nẹ urhomu rhe-e.—Se Matthew 6:7; Philippians 4:6, 7.

Ọrẹ ọmarọwan o rhon ẹrhomo ra nẹ rhẹ uvuẹn ọmudu ọwan. (1 Samuel 1:12, 13) Ọye ọ riẹn abọ use vwe ọwan, na nẹ ẹrhomo ọke na ephian, jerẹ urhiọke ọrhẹ owọnwọn, ọke a sa mọ riẹ emaren kugbe ọke ọwan e vwo ebẹnbẹn.—Se Psalm 55:22; Matthew 15:36.

3. Mesoriẹ Ilelikristi e koko?

Nime ọwan enyerẹn uvuẹn erhẹrhẹ ihworho ri vwe vwo esegburhomẹmro kpahen Osolobrugwẹ, rhẹ ihworho a ha ive Osolobrugwẹ o veri kpahen ufuoma ro no rhirhiẹ otọrakpọ na ha djechẹẹ, omaran na, nẹ ọwan i sabu ti kẹrẹ Osolobrugwẹ, ọ vwọ samọ ghwai lọhọ vwa-an. (2 Timothy 3:1, 4; 2 Peter 3:3, 13) Fọkiẹ ọrana, no fori taghene ọwan i koko rhẹ imizu ọwan rhẹ aye agba ga kugbe, na sabu mẹrẹn urhebro miẹ aye, nẹ aye ji sabu mẹrẹn urhebro miẹ ọwan.—Se Hebrews 10:24, 25.

Ọwan e rhe kwomakugbe rhẹ ihworho ri vwo ẹguọlọ kpahen Osolobrugwẹ, ọnọ sa ọwan erhumu ti kẹrẹ Osolobrugwẹ. Iyono Iseri Jehova ena yẹ ọwan omamọ uphẹn ana mẹrẹn erere nẹ esegburhomẹmro ereva ọwan rhe.—Se Romans 1:11, 12.

4. Marhẹ wu ne ru sabu ti kẹrẹ Osolobrugwẹ?

Wu na sabu ti kẹrẹ i Jehova nyoma wu ne roro kpahen oborẹ wu yonorin nẹ Ẹmro ọnẹyen rhe. Ji roro kpahen ewian enẹyen, urhebro enẹyen, rhẹ ive enẹyen. Wu rhe roro kokodo kpahen oborẹ wu yonorin, wu rha je nẹ ẹrhomo nẹ uvuẹn ọmudu ọnọ rhe, ọnọ sa erhumu vwrurhe oborẹ ẹguọlọ rhẹ ẹghwanren Osolobrugwẹ ọ ghanren te.—Se Joshua 1:8; Psalm 1:1-3.

Wu na sabu ti kerẹ Osolobrugwẹ nyoma wu na hẹrọsuẹ, ji vwo esegburhomẹmro kpahiẹn. Jerẹ oborẹ onyerẹn ọ guọlọ ẹro-ete ọke ephian, esegburhomẹmro ọwan ọ guọlọ owian neneyo nọ sabu gbanhọn. Gbe rhe ruẹ esegburhomẹmro ọnọ gbanhan rhọ nyoma ekwakwa re wu yonorin re wu na karorhọ.—Se Matthew 4:4; Hebrews 11:1, 6.

5. Erere ọgo wu sa mọ mẹrẹn wu rhe ti kẹrẹ Osolobrugwẹ?

Jehova ọ hẹrote ihworho ri vwo ẹguọlo kpahiẹn. Ọye o ti aye nẹ kemrukemru rọ nọ sabu fi ọgbanrhọ rhẹ esegburhomẹmro aye kugbe ifiẹrorhọ arhọ ri bẹmẹdẹ aye i vwori. (Psalm 91:1, 2, 7-10) Ọye o ti ọwan erhọ kpahen izede akpọ-enyerẹn rọ nọ sabu ha ẹkuọn rẹn oma-ọkpokpọ rhẹ omamerhomẹ ọwan. Jehova o yono ọwan izede akpọ-enyerẹn rọ mai rhomu.—Se Psalm 73:27, 28; James 4:4, 8.