Ohworho Ọrọrọ ro Sun Emọ Israel Ọrhẹ Emẹse Awanva ri Fiudugbere

Ọke i Joshua o sun ihworho i Jehova te ẹgbukpe buebun ne, no hwuru ọke rọ ha uvwre ẹgbukpe 110. Uvwre ọke i Joshua ọ ha akpọ, emọ Israel a ha ẹga rẹn i Jehova. Ọrẹn, ogege Joshua o hwu hin, emọ Israel na ha ẹga rẹn ema jerẹ oborẹ itu i Canaan e ruẹ. Nime emọ Israel i vwa ha ẹga rẹn i Jehova-a, Jehova nọ ha uphẹn rẹn orodje i Canaan re se i Jabin nọ ha oja riẹ aye. Ihworho na, na rẹ i Jehova no simi aye. Omarana, Jehova nọ ha ohworho ọrọrọ mwu no sun aye, odẹ ye Barak. Ọye yọ nọ ha userhumu rẹn ihworho na nẹ aye i rharhumu bru i Jehova.

Deborah ro rhiẹ ọmẹraro ọmase, no dje urhomu vwe i Barak taghene o bruie rhe. Deborah nọ ta rẹn Barak kpahen ẹmro i Jehova: ‘Ha ehworhare ri te 10,000, ne wu ya vwa isodja i Jabin uvuẹn usurhẹn i Kishon. Avwaye yẹ are ine fi Sisera ro rhiẹ olotu isodja i Jabin kparobọ.’ Barak nọ ta rẹn i Deborah: ‘Mi na nya, wu rhe leli mẹ nya.’ Deborah nọ tare: ‘Mi ne leluo nya. Ọrẹn, rhe taghene rhẹ owẹwẹ yi ne kpe i Sisera-a. Jehova ọ tare taghene ọmase yo no kpe yi.’

Deborah no lele i Barak ọrhẹ isodja ye riẹ Ugbenu i Tabor ye mwuegbe hẹrhẹ uvweri na. Ogege i Siseria o rhon ọnana, no koko isodja ye ọrhẹ ekalokpọ owọnren enẹyen rhẹ obotọre ugbenu na. Deborah nọ ta rẹn i Barak: ‘Inyenana yẹ ẹdẹ i Jehova ọnọ yọ efikparobọ.’ Barak ọrhẹ isodja ye awan 10,000 ni rhenren nẹ oberun ugbenu na ya vwa isodja i Sisera.

Jehova no rurie nẹ usurhẹn i Kishon ọ vuọn. Ekalokpọ owọnren isodja i Sisera ne dimẹ rhẹ uvuẹn epẹtẹ. Sisera nọ zẹ nẹ okalokpọ owọnren rọ havwọ. Barak ọrhẹ isodja ye ni fi isodja i Sisera kparobọ, ọrẹn, Sisera nọ zẹre! Nọ zẹ ye tiomanu uvuẹn oghwọgbọ ọmase owu re se Jael. Ọmase na nọ yẹriẹ imiki da, jeghwai ha owẹn rhurhie. Nime oma ọ ghwọghọ i Sisera, nọ lẹrheriẹ merhẹn. Ọke oru, Jael nọ bẹbẹ nya ti kẹrẹ i Sisera, no kpe ighele rhẹ urhomie. No hwuru.

Barak nọ guọlọ i Sisera. Jael nọ ruẹ otafe nẹ oghwọgbọ ye, nọ tare: ‘Ruẹ oghwa. Mi ne dje ọhworhare wa guọlọ na wẹn.’ Barak nọ ruẹ uvuẹn oghwa, nọ mẹrẹn i Sisera ro hwu rhotọre. Barak ọrhẹ i Deborah na so ijoro jiri Jehova, nime ọ sa rẹ aye erhumu fi evwreghrẹn aye kparobọ ne. Israel no vwo ufuoma uvwre ẹgbukpe 40.