Jehova ọ Sẹrorẹ i Jesu

O vwo ẹkwotọre owu rọ ha obọrẹ ọren ọ va nẹ sa uvuẹn Israel, ihworho ri ha uvuẹn ẹkwotọre na i vwo imwẹro taghene ikereti, ina sabu sun aye. Ason owu, ehworhare ezẹko ri nẹ ẹkwotọre na rhe, ni mẹrẹn emru rọ họhọ ukereti ro lo omamọ rọ nya uvuẹn ivwrevwrede na, aye ne lelie. “Ukereti” na no sun rẹ aye riẹ i Jerusalem. Ehworhare na, na nọ ihworho: ‘Bọgo yẹ ọmọ ro no rhiẹ orodje i Jew na ọ havwọ? Ame i rhe mọ gburhomu rhotọre riẹn.’

Ọke i Herod ro rhiẹ orodje i Jerusalem o rhon kpahen orodje ọrọrọ, udu no bruie. Herod nọ nọ irherẹn na: ‘Bọgo ye ne vwiẹ orodje na?’ Aye ni ta riẹn: ‘Emẹraro na i tare taghene ene vwiẹ ye uvuẹn i Bethlehem.’ Omarana, Herod no se ehworhare ri lele “ukereti” na, nọ ta rẹn aye: ‘Are i riẹ i Bethlehem ya guọlọ ọmọ na. Are i ghwẹrioma rhe mọ ta mẹ ekete ọmọ na ọ havwọ. Mi ji guọlọ gburhomu rhotọre riẹn.’ Ọrẹn, ọrana ofian.

Ọgbọrọrọ, “ukereti” na nọ nya uvuẹn ivwrevwrede na. Ehworhare na ni lelirie riẹ i Bethlehem. “Ukereti” na no mevi oberun oghwa owu, ehworhare na ni ruẹ oghwa na. Aye ni mẹrẹn i Mary ọrhẹ i Jesu. Aye ni gburhomu rhotọre rẹn ọmọ na jeghwai yẹ ye ẹghẹlẹ oro, ajijan ọrhẹ ichiani. Jehova yo ghini dje ehworhare erana nẹ aye i ya guọlọ i Jesu? Ẹjo.

Uvuẹn ason ọrana, Jehova nọ ta rẹn i Joseph uvuẹn emena: ‘Herod ọ guọlọ kpe i Jesu. Ha anuọ ọrhẹ ọmọ na nẹ are i zẹ riẹ Egypt. Daji avwaye bọmọke mi na ta wẹn taghene o te ọke wu na ghwẹrioma ne.’ Ogege, Joseph ọrhẹ ekrun ọnẹyen ni zẹ riẹ Egypt.

Jehova ọ ta rẹn ehworhare ri lele “ukereti” na taghene aye i vwa ghwẹrioma bru Herod nya-a. Ọke i Herod ọ mẹrẹnvwrurhe taghene ehworhare na a ghwẹrioma rhe-e, nọ tuekwẹre ọgbogbanhon. Ra mẹriẹn taghene ọrhọ sabu mẹrẹn i Jesu-u, no jurhi taghene e kpe ọsoso emọboban ehworhare ri ha uvwre ẹgbukpe i Jesu ọ havwọ na uvuẹn i Bethlehem. Ọrẹn, a ha i Jesu zẹ riẹ Egypt ne.

Ọke oru, Herod no hwuru. Jehova nọ ta rẹn i Joseph: ‘Vwana, o te ọke wu na ghwẹrioma ne.’ Omarana, Joseph, Mary kugbe i Jesu ni ghwẹrioma riẹ Israel, aye ni rhirhiẹ i Nazareth.