Jesu ọ Rhọmọ i Lazarus nẹ Uhwu

Jesu o vwo igbehian awansa re rhirhiẹ i Bethany. Aye awansa na imizu, odẹ aye yi Lazarus, Mary ọrhẹ Martha. Ẹdẹ owu, ọke i Jesu ọ ha obọreva i Jordan, Mary ọrhẹ Martha ni dje urhomu okpakpa vwe yi, aye ni tare: ‘Lazarus o kpomẹ gbangbanhon. Biko, brokpakpa rhe!’ Ọrẹn, Jesu ọ nya ogege-e. Ọ hẹrhẹ te ẹdọke eva. Uvwre ọke ọrana Lazarus no hwuru. Ọke oru, nọ ta rẹn idibo yi: ‘Are i mọ ne riẹ i Bethany. Lazarus ọ merhẹn, mi na ya rhọmiẹ.’ Inyikọ na ni tare: ‘Orhianẹ i Lazarus ọ merhẹn, ọrana ọnọ lẹrhẹ omayen sasa.’ Omarana, Jesu no djeriẹ fiotọre rẹn aye: ‘Lazarus o hwu ne.’

Ọke i Jesu o te i Bethany, e sin i Lazarus te ẹdọke ẹne ne. Ihworho buebun i rhe mọ ha urhebro rẹn Martha ọrhẹ Mary. Ọke i Martha o rhon taghene i Jesu ọ rhe ne, nọ zẹ ya vwa ye. Martha nọ tare: “Ọrovwori, orhianẹ wu ha aran, manẹ omizu mẹ o vwo hwu-u.” Jesu nọ ta rẹn i Martha: ‘Omizuo ọnọ rharhumu nyerẹn. Martha, wu vwo esegburhomẹmro kpahen ọnana?’ Martha nọ tare: ‘Mi rheri taghene ono vẹnrẹn ọke ẹrhọmọnuhwu na.’ Jesu nọ ta riẹn: “Mẹmẹ yẹ ẹrhọmọnuhwu ọrhẹ arhọ na.”

Omarana, Martha nọ yọ ta rẹn i Mary taghene i Jesu ọ rhe ne. Mary nọ zẹ bru i Jesu, otu na ni ji lelie. Mary no sighwẹ rhẹ obaro i Jesu, nọ viẹ gbangbanhon. Mary nọ tare: ‘Ọrovwori, orhianẹ wu ha aran, manẹ omizu ame o vwo hwu-u!’ Jesu nọ mẹrẹn omiamiamo ro gbere i Mary, ọye nọ ji tuẹn oviẹ rhọ. Ọke otu na a mẹrẹn amioviẹ i Jesu, aye ni tare: ‘O ghini vwo ẹguọlọ kpahen i Lazarus.’ Ọrẹn, ezẹko ne roro: ‘Mesoriẹ o vwo simi ugbehian yen?’ Me yi Jesu o ruru?

Jesu no riẹ ekete usin na, a ha atita ọduado rhurhu unu usin na. Jesu nọ tare: ‘Are i ghonrien atita na nẹ avwaye.’ Martha nọ tare: ‘E sin rien te ẹdọke ẹne ne! Ugboma yen ono rho gbon ne.’ Udabọ ọrana, aye ni ghonrien atita na nẹ avwaye, Jesu nọ nẹrhomo: ‘Ọsẹ, wẹwẹ nobiruo we rhon mẹ. Mi rheri taghene we rhon mẹ ọke ephian, ọrẹn mia tẹmro enana phia neneyo ihworho enana i rhe taghene wẹwẹ yi djeri mẹ rhe.’ Omarana, Jesu no seri rhẹ uvwele gogori: “Lazarus, vẹnrẹn rhe!” Emru igbevwunu nọ phiare: Lazarus nọ ruẹ otafe nẹ ekete re sin rien rhọ rhẹ ewun ra ha fariẹ oma. Jesu nọ tare: “Rhan yen nọ nyarhẹn.”

Ihworho buebun ri mẹrẹn igbevwunu enana ni me vwo esegburhomẹmro kpahen i Jesu. Ọrẹn, ihworho ezẹko ni ya ta rẹn otu i Pharisee na. Nẹ ọke ọrana nyarhẹn, otu i Pharisee na, na guọlọ izede rẹ aye ine kpe i Lazarus ọrhẹ i Jesu. Judas Iscariot ro rhiẹ ọnyikọ i Jesu, nọ bẹbẹ bru otu i Pharisee na, nọ nọrẹn aye: ‘Emwa are ina yẹ mẹ, mi rhe dje ekete i Jesu ọ havwọ rẹn are?’ Aye ni tare taghene aye ina kwa idọlọ efuanfon 30 riẹn, Judas nọ guọlọ izede rọ nọ rhẹ i Jesu rẹn otu i Pharisee na.