“Paul ọ Kpẹmẹ Osolobrugwẹ Jeghwai Vwo Ẹhẹn rọ Gbanhonron”

Ọke ukoko rọ ha uvuẹn i Rome o rhon taghene i Paul ọ sa, ẹko imizu ezẹko ni nya ugbo onya ro te iroko 64 ya vwa ye uvuẹn izede. Marhẹ obọdẹn ẹguọlọ aye i djephia ọ hobọte i Paul lele? “Ọke i Paul ọ mẹrẹn aye, nọ kpẹmẹ Osolobrugwẹ jeghwai vwo ẹhẹn rọ gbanhonron.” (Ac 28:15) Dedevwo e rhe i Paul rhẹ ohworho ro ruẹ ikoko ro kiẹn gbanhan, uvuẹn erhirhiẹ ọnana ra kanriẹn na, ọye no rhiẹ ohworho ra yẹre uduẹharhaghwẹ.—2Co 13:10.

Inyenana iniruo okinhariẹ e nẹ ukoko owu riẹ ọrọrọ nẹ aye i sabu bọn imizu ehworhare ọrhẹ emẹse gbanhon. Jerẹ ihworho Osolobrugwẹ ephian, ọkezẹko aye a dẹrughwaroghwu ovwiẹlẹme, ọfiamu ọrhẹ ẹhẹn ro seriotọre. Oniruo okinhariẹ ọrhẹ aniẹ i rha rhiẹ ukoko wu havwọ, me wu na sabu ru nẹ aye i sabu vwo uduẹharhaghwẹ, neneyo a “sabu bọn omoma ọwan gbanhon”?—Ro 1:11, 12.

• 

  Riẹ ekete ra vwoma e ki riẹ aghwoghwo. Oma ọ merhen oniruo okinhariẹ ọke rọ mẹrẹn ighwoghwẹmro re ze izobo nẹ aye i sabu mẹrẹn erere nẹ ọkprughwre oghẹnrensan na. (1Th 1:2, 3; 2:20) Vwobọrhọ owian ọkobaro ibiọke uvuẹn ibiamo rọ nọ rhe. Wu na sabu homakpahontọre wu ne lelie ọrhẹ aniẹ wian uvuẹn owian aghwoghwo na? Wu na sabu ha owu usuẹn aye lele oma wa rha guọlọ ye yono ọmọ uyono i Baibol ọnọ? Oma ọ merhen aye ọke aye e lele ighwoghwẹmro sansan wian, tobọ te ighwoghwẹmro ekpokpọ yanghene eri vwe vwo ena uvuẹn owian aghwoghwo na.

• 

  Dje uruemru re dede epha phia. Wu na sabu fi oghwa rhotọre aye ine rhirhiẹ yanghene sere emaren aye ina riọ? Ọnana no djephia taghene wu vwo ẹguọlọ kpahen oniruo okinhariẹ na ọrhẹ aniẹ. Aye a guọlọ ekwakwa buebu-un.—Lu 10:38-42.

• 

  Kerhọ ọkpọvi ọrhẹ urhebro ọnẹyen ji ha aye wian. Oniruo okinhariẹ ọ nyoma izede ẹguọlọ ha userhumu rẹn ọwan mẹrẹn oborẹ ene ru sabu ru riaro uvuẹn ogame i Jehova. Ọkezẹko, ọnọ sabu yẹ ọwan ọkpọvi ọgbogbanhon. (1Co 5:1-5) Oma ọ merhiẹn arha huvwele jeghwai homariotọre.—Heb 13:17.

• 

  Dje ọdaremẹro phia. Ta rẹn oniruo okinhariẹ na ọrhẹ aniẹ kpahen erere wu mẹrẹn mie aye ne. Wu na sabu bru aye nya yanghene dje ileta yanghene ikadi vwe aye.—Col 3:15.