Oborẹ Ana ha Idje Ẹhaphia na Ruiruo Lele

Avwẹ January 2018 rhe, ye fiẹ idje ẹhaphia na rhẹ obaro Ọbe-Owian Uyono ọrẹ Akpenyerẹn Ọwan Ilele Kristi Ọrhẹ Iruo Uvie Na. Marhẹ ana ha aye ruiruo lele?

Ọke e Vwobọrhọ Ẹmro Emọ Isukuru: O fori ne wu ha onọ na, ekete i Baibol na, ọrhẹ onọ ra na ta kpahen ọke ọrọrọ ri ha uvuẹn idje ẹhaphia na ruiruo. Ọrẹn, ọnana o mevirhọ taghene wu na ghwai ta ọsoso oborẹ ọ ha uvuẹn udje ividio na ọke wa ha ẹmro ọnọ phia-a. Wu na sabu wene erhirhiẹ na, ọtonrhọ ẹmro na, oborẹ wu na haye phia lele ọrhẹ ekwakwa erọrọ. Wu na ji sabu ha ọbe owu phia nẹ usuẹn Ekwakwa ra ha Yono Ihworho na, ọrhọ tobọ rhianẹ a hunute yi uvuẹn ọbe owian na-a.

Uvuẹn Owian Aghwoghwo na: E ruẹ idje ẹhaphia na nẹ aye i ha userhumu rẹn ọwan uvuẹn owian aghwoghwo na. Ohworho orho dje ọdamẹ phia jeghwai guọlọ yono riaro rhọ, wu na sabu tẹmro na riaro rhọ, ọkezẹko wu na sabu ha udje ẹrharhumu bru na ruiruo. Wu na sabu wene udje ẹhaphia na ibiesuọn yanghene ha ọrọrọ ruiruo. Udje ẹhaphia ọrẹ ubiamo ro rieri na yanghene ekete i Baibol ọrọrọ, yọ nọ mai je ihworho uvuẹn okogho we ghwoghwo? Ihworho uvuẹn okogho ọnọ e vwo omamerhomẹ kpahen oborẹ ọ phiare ro vwo ji jiri na yanghene iyẹnrẹn ekpokpọ? Kizede kizede wu ha udje ẹhaphia na ruiruo lele, o fori ne wu karorhọ taghene owian ọnọ ọrẹ wu ne ru ‘kemru kemru fọkiẹ iyẹnrẹn esiri na, neneyo wu sabu ghwoghwie rẹn awọrọ.’—1Co 9:22, 23.