Ọke Ohworho re Vwo Ẹguọlọ Kpahen Ọrhọ Nyaji Jehova Vwo

1. Marhẹ ọ hobọte ohworho lele ọke erhe le ohworho re vwo ẹguọlọ kpahen nẹ ukoko?

E LE owuọwan uvuẹn ekrun ọnọ nẹ ukoko na? Ọ miama omamọ! Omizu ọmase owu re se Hilda ọrhọ ta, “Ọke esa mẹ o hwu ọke ame a rọnmọ ẹgbukpe ro te 41 hin, ni mie roro taghene ọrana yẹ oborẹ ọ mai miamoma kparobọ.b Ọrẹn, ọke ọmọ mẹ ọhworhare o nẹ ukoko na, ji nyaji aniẹ ọrhẹ emọyen vwo, ni mi mẹrẹnvwrurhe taghene ọrana yọ mai miame mẹ kparobọ.”

2-3. Lele oborẹ ọ ha Psalm 78:40, 41, marhẹ oma o ruẹ i Jehova ọke idibo yi i rha nyajevwo?

² Roro kpahen oborẹ ọ miamo i Jehova te, ọke emakashe ezẹko ri rhiẹ usuẹn ekruien a tiẹn! (Jude 6) Gbe ji roro kpahen oborẹ ọ miame riẹn te ọke rọ mẹrẹn ihworho yi ro vwo ẹguọlọ kpahen, emọ Israel, ri kparehasuiẹ ọgbọ buebun. (Se Psalm 78:40, 41.) Omarana, vwo imwẹro taghene oma ọ vwọ merhen i Jehova-a, ọke ọrhọ mẹrẹn ohworho ekrun ọnọ rọ nyajevwo. O vwẹruọ omiamiamo wa dẹrughwaroghwẹ. Ọnọ yọ urhebro ọrhẹ userhumu wu guọlọre.

³ Uvuẹn urhomu-ẹmro ọnana, ene yono kpahen oborẹ ana sabu ru na mẹrẹn userhumu i Jehova, ọke ohworho ekrun ọwan orho nẹ ukoko na. Ene ji yono kpahen oborẹ ene ru ha userhumu rẹn awọrọ uvuẹn ukoko na re rhiẹromẹrẹn ebẹnbẹn ọnana. Ọrukaro, jene yono kpahen iroro esọsọ ezẹko ro fori na kẹnoma riẹn.

WU VWE KPERI OMA-A

4. Marhẹ oma o ruẹ emiemọ buebun rẹ emọ aye i nyaji Jehova vwo?

⁴ Ọke emọ re vwo ẹguọlọ kpahen i rha nyaji Jehova vwo, emiemọ ina sabu rhe roro sẹ o vwo oborẹ aye arha sabu ru nẹ emọ na i daji urhomẹmro na. Ọke re le ọmọyen nẹ ukoko, omizu ọhworhare owu re se Luke nọ tare: “Ni mie kperi oma mẹ. Ni mia menemena ri mwuofẹn kpahiẹn. Ọkezẹko, mia viẹ, ẹhẹn mẹ o ji kpokpi mẹ.” Omizu ọmase re se Elizabeth, ro rhiẹromẹrẹn aruẹ erhirhiẹ ọrana, ọgbọ buebun no roro: “Me yẹ orusọ mẹ mie rhiẹ izu? Ni mie roro taghene mia dabu yono ọmọ mẹ ọhworhare urhomẹmro na-a.”

5. Ọrọmo ọyẹ ene kperi ọke ohworho ọrhọ nyaji Jehova vwo?

⁵ O fori na karorhọ taghene Jehova ọ yẹ ohworho owuowu ẹghẹlẹ ugbomọphẹ. Ọnana no mevirhọ taghene ana sabu djẹ odjẹ ra na huvwele i Jehova yanghene a huvwele yi-i. Iphuphẹn ezẹko rẹ eri vwiẹre aye i vwe rhiẹ omamọ udje, i djẹ odjẹ aye ina ga i Jehova, ji vwo atamwu kpahiẹn. Awọrọ rẹ eri vwiẹre aye i damoma yono aye iruemru-urhi Baibol na, i nyaji Jehova vwo ọke oru. Fọkiẹ ọrana, ọwan yi ne brorhiẹn omobọ sẹ ana ga i Jehova. (Josh. 24:15) Omarana, emiemọ ri mwuomarhọ, are i vwe roro taghene are yi soriẹ ọmọ na ọ nyaji Jehova vwo-o!

6. Marhẹ ọnọ hobọte uphuphẹn lele ọke ọsẹ ye yanghene izie ọrhọ nyaji Jehova vwo?

⁶ Ọkezẹko, izu yanghene ọsẹ ọnọ sabu nyaji Jehova ọrhẹ ekruien vwo. (Ps. 27:10) Ọnana ọ sabu lẹrhẹ ẹhẹn emọ re mwuọghọ rẹn eri vwiẹre aye, ji hẹrokele aye seriotọre. Esther, re le ọsẹ ye nẹ ukoko, nọ tare: “Mi viẹre ọgbọ buebun, fọkime mi mẹrẹnvwrurhe taghene o vwo nẹ ukoko na bibiesuọ-ọn. Ukpomaran, o brorhiẹn taghene ọ guọlọ ga i Jehova ghwomara-an. Mi vwo ẹguọlọ kpahen ọsẹ mẹ, omarana ọke re le yi nẹ ukoko, ọke ephian yi mie brudu kpahen oborẹ ono ru hẹrote omayen. Ni mia tobọ ghweghwe.”

7. Marhẹ oma o ruẹ i Jehova kpahen uphuphẹn re le ọsẹ ye yanghene izie nẹ ukoko?

⁷ Iphuphẹn, orhianẹ e le ọsẹ ọnọ yanghene izuo nẹ ukoko, ọ darẹ ame ha wẹn! Biko vwo imwẹro taghene Jehova o ji rhe kpahen omiamiamo ọnọ. Ọye o vwo ẹguọlọ ọrhẹ ọdaremẹro kpahen atamwu ọnọ, omaran ji te ame—ri rhiẹ imizu ukoko na. Karorhọ taghene orhiẹ owẹwẹ yi soriẹ eri vwiẹruọ, e brorhiẹn erana-a. Jerẹ oborẹ a hunute vrẹn ne, Jehova ọ yẹ ituakpọ ugbomọphẹ aye ine brorhiẹn. Habaye, ohworho owuowu rọ homakpahontọre ne ji bromarhame, “yọ nọ kpare ohwan ọnẹyen.”—Gal. 6:5.

8. Me yẹ imizu ra hẹrhẹ ihworho aye re le nẹ ukoko, ina sabu ru uvwre ọke aye a hẹrhẹ nẹ aye i ghwẹrioma bru i Jehova? (Se ekpeti na “Rharhumu Bru i Jehova.”)

⁸ Ọke ohworho ekruon ọrhọ nyaji Jehova vwo, ọ sọ wu ne roro taghene ọnọ ghwẹrioma bru i Jehova ẹdẹ owu-u. Me wu na sabu ru vwana ọke wa hẹrhẹ? Wu na sabu ruẹ esegburhomẹmro ọnọ gbanhonrhọ. Nyoma ọrana, wu ne dje omamọ udje rẹn ihworho ekrun enọ ọrhẹ ọre le nẹ ukoko dede. Wu ne ji vwo omẹgbanhon wu ne diẹn omiamiamo na. Jene yono kpahen irorẹdjẹ ezẹko ra na sabu ha ruiruo.

OBORẸ WU NA SABU RU NE WU SẸRORẸ ESEGBURHOMẸMRO ỌNỌ

9. Izede ego wu ne ru mẹrẹn omẹgbanhon mie i Jehova? (Se ekpeti na “Ekete i Baibol ri na yọ Urhebro Orhianẹ Ohworho Ekruon ọ Nyaji Jehova Vwo.”)

⁹ Damoma ruẹ esegburhomẹmro ọnọ gbanhonrhọ. Ọghanranren omamọ nẹ wu ruẹ esegburhomẹmro ọnọ ọrhẹ ọrẹ ihworho ekruon gbanhonrhọ. Marhẹ wu ne ru ruie? Vwo omẹgbanhon mie i Jehova nyoma wu ne se i Baibol na ọke ephian ji roro kodo kpahiẹn, jeghwai rhe riẹ uyono ukoko. Joanna, rẹ ọsẹ ye ọrhẹ omizie ọgbọtọ i nẹ ukoko na, ọrhọ ta: “Mie vwo omefuon rhọ, ọke mie se kpahen ihworho jerẹ Abigail, Esther, Job, Joseph, ọrhẹ Jesu uvuẹn i Baibol na. Idje aye ọ ha urhebro mẹ ji lẹrhẹ mẹ vwo iroro ri serhọ. Mia ji mẹrẹn uduẹharhaghwẹ nẹ ijoro JW Broadcasting.”

10. Me yẹ Psalm 32:6-8, o djephia kpahen oborẹ ene ru diẹn ebẹnbẹn?

¹⁰ Ta ebẹnbẹn enọ ephian rẹn Jehova. Ọke ẹhẹn ọnọ orho seriotọre, wu vwa dobọ ẹrhomo ẹnẹ ji-i. Rẹ i Jehova nọ ha userhumu wẹn ha ukẹro ro serhọ ni erhirhiẹ na, nọ ji “yọ ọmẹrẹnvwrurhe ọrhẹ ọkpọvi lele izede wu na nya.” (Se Psalm 32:6-8.) Itiọrurhomẹmro, ọnọ sabu bẹn wu na ta rẹn Jehova kpahen oborẹ ọ ghini ha ẹhọn. Ọrẹn, Jehova ọ dabu vwẹruọ omiamiamo ọnọ. O vwo ẹguọlọ kpahuọn omamọ, ji guọlọ taghene wu ta ọsoso ebẹnbẹn enọ riẹn.—Ex. 34:6; Ps. 62:7, 8.

11. Lele oborẹ ọ ha Hebrews 12:11, mesoriẹ o fo na hẹroso ọghwọghwu i Jehova? (Se ekpeti na “Erhe le Ohworho nẹ Ukoko o Dje Ẹguọlọ i Jehova Phia.”)

¹¹ Hobọtua orhienbro ekpako na. Ne le ohworho nẹ ukoko usuẹn ẹkwaphiẹrhotọre i Jehova. Ọkpọvi ọnẹyen ro dje ẹguọlọ phia, ọ havwiẹ fọkiẹ orhorhomu ihworho ephian, tobọ te oruọdandan na. (Se Hebrews 12:11.) Imizu ezẹko ina sabu ta taghene ekpako na a kwaphiẹ ẹmro na serhọ te-e, ọrẹn o fori na karorhọ taghene aruẹ ihworho erana, a guọlọ ta kpahen orusọ oruọdandan na-a. Ọwan e rhe kpahen ọsoso oborẹ ọ phiare-e. Omarana, ono rhiẹ emru ẹghwanren arha hẹroso ekpako ri brorhiẹn na taghene aye i nyalele iruemru-urhi Baibol, ji guẹnzọn na “rẹn Jehova.”—2 Chron. 19:6.

12. Erere ego yẹ imizu ezẹko i mẹrẹn ne fọkime aye i hobọtua ẹkwaphiẹrhotọre ọghwọghwu i Jehova?

¹² Wu rha hobọtua orhienbro ekpako na kpahen ọre le ohworho wu vwo ẹguọlọ kpahen nẹ ukoko, ọnọ sabu ha userhumu riẹn rharhumu bru i Jehova. Elizabeth ra hunute vrẹn ne, ọrhọ ta: “Ọ bẹnren omamọ taghene ame e lele ọmọ ame ọhworhare ru kugbe-e. Ọrẹn, ọke rọ rharhumu bru i Jehova, nọ tare taghene orhiẹ oborẹ oserhọ re le yi nẹ ukoko. Ọke oru, no dje ọdaremẹro phia kpahen ekwakwa ro yonorin. Ni mia ha ukẹro ọghoghanren ni ọghwọghwu i Jehova vwana.” Esa ye re se Mark, nọ habaye: “Ọke oru, ọmọ mẹ nọ ta mẹ taghene ọ guọlọ rharhumu rhe fọkime ame e lelie ru kugbe-e. Oma ọ merhenren mẹ omamọ taghene Jehova ọ ha userhumu rẹn ame huvwele.”

13. Me yọ nọ sabu ha userhumu wẹn diẹn omiamiamo enọ?

¹³ Tẹmro rẹn igbehian ri vwẹruọ erhirhiẹ ọnọ. Kwomakugbe imizu ri te edje ne, ri na sabu ha userhumu wẹn sẹrorẹ uruemru ro serhọ. (Prov. 12:25; 17:17) Joanna, ra hunute vrẹn ne, ọrhọ ta: “Ni mie roro taghene mẹmẹ ọvo yi havwiẹ. Ọrẹn, ọke mia tẹmro rẹn imizu ri te edje ne, nọ ha userhumu mẹ diẹn erhirhiẹ na.” Ọrẹn, me wu ne ruo orhianẹ imizu ezẹko ni ta oborẹ ọ lẹrheruọ mwuomarhọ?

14. Mesoriẹ o fo na “rha kwaphiẹrhọ jeghwai rha harhomu owuowọnwan nẹ ẹhẹn sa”?

¹⁴ Vwo erhionrin rhẹ imizu ukoko na. Itiọrurhomẹmro, orhiẹ kohworho kohworho yi na tẹmro ri serhọ-ọ. (Jas. 3:2) Ọwan ephian ihworho ri vwa gba, omarana o vwo gbo unu orhianẹ imizu ezẹko e rhe oborẹ aye ina ta-a, yanghene aye i rha tẹmro aye i vwa guọlọ ta. Karorhọ urhebro ọnyikọ Paul: “Are i rha kwaphiẹrhọ jeghwai rha harhomu owuowọnwan nẹ ẹhẹn sa, ọrhọ tobọ vwo oborẹ ọnọ lẹrhẹ ohworho biomevwan kpahen ọreva ye dede.” (Col. 3:13) Omizu ọmase owu re le omizie nẹ ukoko, ọrhọ ta: “Jehova ọ ha userhumu mẹ harhomu imizu ri damoma ha urhebro mẹ, ọrẹn aye ni ruẹ oborẹ ọ dare mẹ.” Me yẹ imizu ukoko na ina sabu ru nẹ aye i ha userhumu rẹn imizu enana?

UKOKO NA ỌNỌ SABU HA USERHUMU PHIA

15. Me yọ nọ sabu ha userhumu rẹn imizu re le ihworho ekrun aye nẹ ukoko ro vwo jijiri na?

¹⁵ Dede imizu ra fuevwan ga sasasa. Omizu ọmase owu re se Miriam, ọ tare taghene udu o brurie ro no riẹ uyono ukoko ọke re le omizie ọhworhare nẹ ukoko hin. “Ofẹn no mwu mẹ kpahen oborẹ ihworho ina ta. Ọrẹn, o vwo obọdẹn igbehian ri leliri mẹ mwuomarhọ, ọrẹn aye a ta erharhere ẹmro kpahen omizu mẹ re le nẹ ukoko-o. Fọkiẹ aye, mẹmẹ ọvo e mwuomarhọ-ọ.” Omizu ọmase ọrọrọ ọrhọ ta: “Ọke re le ọmọ ame ọhworhare nẹ ukoko hin, obọdẹn imizu ni ha urhebro rẹn ame. Ezẹko i ta rẹn ame taghene aye e rhe oborẹ aye ina ta-a. Aye i lelirẹ ame viẹ, yanghene ya ileta urhebro vwe ame. Oborẹ aye i ruru ọ ha userhumu rẹn ame omamọ!”

16. Marhẹ ukoko na ono ru rha ha urhebro rẹn ere le ihworho ekrun aye nẹ ukoko?

¹⁶ Rha hobọtua imizu ra fuevwan ga. Aye i guọlọ urhebro ọrhẹ ẹguọlọ mie ọwan vwana vrẹn ọke bi. (Heb. 10:24, 25) Ọkezẹko, imizu re le ihworho ekrun aye nẹ ukoko, i djokarhọ ye taghene imizu ezẹko i vwe lele aye ruẹ kugbe ghwomara-an. E vwe ru aye omara-an! Iphuphẹn rẹ eri vwiẹre aye i nẹ ukoko na, i guọlọ ekpẹmẹ ọrhẹ urhebro mie ọwan. Maria, re le esa ye nẹ ukoko, rẹ esa ye ọ ji nyaji ekruien vwo, nọ tare: “Imizu ezẹko ni rhiẹ oghwa mẹ, ji leli mẹ sere emaren, aye i ji lele ame ruẹ uyono ekrun kugbe. Aye rhe omiamiamo mẹ, ji leli mẹ viẹ kugbe. Aye i chochọn mẹ ọke ihworho a tẹmro efian kpahen mẹ. Aye i ghini ha urhebro mẹ!”—Rom. 12:13, 15.

17. Marhẹ ekpako ine ru rhe dje aruẹdọn phia rẹn erẹ ẹhẹn aye o seriotọre?

¹⁷ Ekpako, are i ha kuphẹn kuphẹn ruẹ imizu ra fuevwan ga gbanhon. Are i vwo owian oghẹnrensan are ina ha urhebro rẹn imizu ihworho ekrun aye i nyaji Jehova vwo. (1 Thess. 5:14) Kpare udjoghwẹ ọrukaro wu na ha urhebro rẹn aye bọmọke ana ki tuẹn uyono rhọ, ọrhẹ ọke o fuen ne. Kọn bru aye ji lele aye nẹrhomo kugbe. Lele aye wian uvuẹn aghwoghwo na, yanghene ha use rẹn aye homaba ruẹ ogame ekrun. O fori nẹ ekpako i hẹrote imizu ẹhẹn aye o seriotọre, ji dje aruẹdọn, ẹguọlọ ọrhẹ ọdamẹ phia rẹn aye.—1 Thess. 2:7, 8.

SẸRORẸ IFIẸRORHỌ JI HẸROSO I JEHOVA ỌKE EPHIAN

18. Lele oborẹ ọ ha 2 Peter 3:9, me yi Jehova ọ guọlọ mie iruedandan?

¹⁸ Jehova “ọ guọlọ nẹ ohworho owuorowu ọ ghwọghọ-ọ, ọrẹn ọ guọlọre nẹ ihworho ephian i ghwẹriẹ.” (Se 2 Peter 3:9.) Dedevwo ohworho ọnọ sabu ruẹ ọdandan ọghwaghwa, ọrẹn arhọ ye ọ ji ghanren rẹn Jehova. Roro kpahen osa ọghoghanren ri Jehova ọ kwa ne—izobo otan Ọmọyen ro vwo ẹguọlọ kpahen—fọkiẹ arhọ iruedandan. Jehova ọ nyoma izede ẹguọlọ ha userhumu rẹn eri nyaje vwo nẹ aye i ghwẹrioma rhe. O fiẹrorhọ taghene aye ina rharhumu bruie rhe, jerẹ oborẹ udje i Jesu kpahen ọmọ ro vruru na o djephia. (Luke 15:11-32) Imizu buebun ri nẹ ukoko na i rharhumu bru i Jehova. Imizu ukoko na i ji dabu dede aye sasasa. Oma ọ dabu merhen Elizabeth, ra hunute vrẹn ne, ọke ọmọyen ọ rharhumu rhiẹ ukoko na. Ọke rọ karorhọ oborẹ ọ phiare, nọ tare, “Mi dabu kpẹmẹ imizu ri ha urhebro rẹn ame taghene ame i vwe fiobọrhotọre-e.”

19. Mesoriẹ ana sabu rha hẹroso i Jehova?

¹⁹ Ana sabu hẹroso i Jehova ọke ephian. Ọ vwọ yẹ ọwan ọkpọvi rọ nọ suẹ ẹkuọn rẹn ọwa-an. Ọye Ọsẹ ro vwo uruemru ghwologhwolo, aruẹdọn ọrhẹ ẹguọlọ okokodo kpahen ihworho ri vwo ẹguọlọ kpahiẹn ra ga ye. Vwo imwẹro taghene Jehova o sẹrerhumuji owẹwẹ vwo uvuẹn ọke ebẹnbẹ-ẹn. (Heb. 13:5, 6) Mark ra hunute vrẹn ne, ọrhọ ta, “Jehova ọ sẹrerhumuji ame vwo-o. Ọ ha userhumu phia ọke ephian arha dẹrughwaroghwu ebẹnbẹn.” Jehova ọnọ rhọ yọ “omẹgbanhon rọ vrẹn ovwan.” (2 Cor. 4:7) Wu na sabu sẹrorẹ esegburhomẹmro ọrhẹ ifiẹrorhọ ọnọ ọke ohworho ekruon ọrhọ nyaji Jehova vwo.