Imizu Ukoko na i Dje Ẹguọlọ Rẹn Aye

YOMARA ọrhẹ imizie ehworhare awanva re se Marcelo ọrhẹ Hiver, e rhirhiẹ ibiẹ amwa owu uvuẹn Guatemala. Yomara no yono i Baibol na rhẹ iseri Jehova, ọke oru imizie ni homaba uyono na. Ọrẹn o vwo obẹnbẹn owu. Imizu awansa na ituẹro, aye i vwa ji sabu se edjadjẹ ituẹro re se braille-e. Omarana, omizu ro yono aye na no se eghwẹmro ọbe na ọrhẹ ekete i Baibol na rẹn aye.

Ọ ji bẹn rẹn aye rẹ aye ine riẹ uyono ukoko. Aye ọvo i vwa sabu nya ugbonya rọ nọ ha iminiti 40 riẹ Aghwẹlẹ Uvie rọ kẹrerẹ aye na-a. Ọrẹn, imizu uvuẹn ukoko ọrana ni ru ẹkwaphiẹrhotọre aye ina kpare aye riẹ iyono na ephian. Ọke imizu na a ha ẹmro phia uvuẹn uyono erhẹrhẹ ọkprughwre na, imizu ukoko na, na ha userhumu rẹn aye yono ẹmro aye ina haphia na rhẹ urhomu.

Uvuẹn May 2019, ne ruẹ uyono ukoko uvuẹn amwa aye. Ọke ọrana, esa ọrhẹ ane owu ri rhiẹ ọkobaro, i kwa riẹ amwa na ne. Aye ni brorhiẹn aye ine yono imizu awansa na oborẹ e se ji ya braille, dedevwo esa ọrhẹ ane ọnana e rhe oborẹ e se, ji ya ye-e. Aye ni riẹ ekete ra sẹrorẹ ẹbe rhọ, ji yono oborẹ a ha i braille ruiruo, ọrhẹ ena ra sabu haye yono.

Uvwre ibiamo ezẹko, imizu awansa na ni sabu se i braille phẹphẹrẹ, ọrana nọ ha uphẹn rẹn aye ru riarorhọ uvuẹn ogame i Jehova.a Vwana Yomara, Marcelo, ọrhẹ Hiver a ga ẹrhẹ ekobaro. Marcelo jẹ odibo owian. Aye a dabu vwobọrhọ ewian ukoko na. Oruru aye ọ ji hobọte awọrọ.

Oma ọ merhen imizu awansa enana fọkiẹ userhumu rẹ imizu ukoko na i yẹre aye. Yomara nọ tare: “Nẹ ọke ukaro mia vwa Iseri Jehova na, aye i dje obọdẹn ẹguọlọ Olele Kristi rẹn ame ne.” Marcelo nọ habaye: “Ame i vwo obọdẹn igbehian uvuẹn ukoko na, ame i ji ha usuẹn okugbe imizu akpọ ephian re dje ẹguọlọ phia.” Yomara ọrhẹ imizie ehworhare a hẹrhẹ ọke aye ina mẹrẹn otọrakpọ na re ru rhiẹ i paradais ne.​—Ps. 37:10, 11; Isa. 35:5.