Rhe Vwo Erhionrin Jerẹ i Peter

1. Marhẹ i Peter ọ kpahenrhọ igbevwunu irhenrin buebun ro kperi na lele?

UVWRE ọsoso ason na yi Peter ọ guọlọ irhenrin ro no kpe, ọrẹn o ji mwu owuorowu-u. Ọrẹ igbevwunu, Jesu nọ ta riẹn: “Ghwa riẹ ekete ro kodori, ne wu ha iriri enọ tan.” (Luke 5:4) Peter no vwo ẹhẹn eveva sẹ ono mwu irhenrin, ọrẹn no ruẹ oborẹ a ta riẹn. Iriri rọ ha tan na, nọ bẹrẹ fọkiẹ ọhiẹn irhenrin ro mwurun na. Ọke aye a mẹrẹnvwrurhe taghene emru igbevwunu yọ phiare na, no gbe i Peter ọrhẹ ihworho re lelie wian “unu omamọ.” Peter nọ tare: “Ọrovwori, nyaji mẹ vwo, fọkime mẹmẹ oruọdandan.” (Luke 5:6-9) Ọkezẹko, Peter no roro taghene o mwuovwan ro no mevi obaro i Jesu-u.

2. Mesoriẹ ọghanren ne roro kpahen udje i Peter?

² Ẹmro i Peter na ọgbare—ọye “oruọdandan.” Baibol na o djephia taghene Peter ọ tẹmro, ji ruẹ ekwakwa ezẹko rọ vioja ye ọke oru. Wu vwo aruẹ iroro i Peter na? O vwo uruemru owu wa wian kpahen, yanghene orusọ owu wa damoma wu ne tiobọnu? Orhiomaran, wu na sabu vwo ifiẹrorhọ nyoma wu ne yono nẹ udje i Peter. Izede ọgo? Roro kpahen ọnana: Manẹ a sabu tiẹ orusọ i Peter nẹ iyẹnrẹn i Baibol na. Ọrẹn, Jehova o mwu Peter ya aye rhotọre, neneyo a sabu yono nie. (2 Tim. 3:16, 17) Ọke re yono kpahen ọhworhare ọnana ro vwo ovwiẹlẹme sansan, ọrhẹ iroro ri họhọ erẹ ọwan na, ọnọ sabu ha userhumu rẹn ọwan mẹrẹnvwrurhe taghene Jehova ọ vwọ guọlọ oborẹ ana ja sabu ru mie ọwa-an. Ọ guọlọre ne rhe vwo erhionrin—na rha damoma—udabọ ovwiẹlẹme ọwan.

3. Mesoriẹ o fo ne vwo erhionrin?

³ Mesoriẹ ọghanren ne rhe vwo erhionrin? O vwo ẹmro owu ra ta, ‘Erhe ruẹ emru owu ọke ephian ne ruie rhomẹrhọ.’ Jerẹ udje: Ohworho ọrhọ guọlọ yono oborẹ ekporo igita, ọnọ haye ẹgbukpe buebun no ki rhe yi. Uvwrọke ro yonie na, ọnọ sabu kporie sọ ọgbọ buebun, ọrẹn orho kporo ọke ephian, no no ru rhomurhọ. Ọrhọ ji tobọ tẹn ona ikpekporo na ne, ono ji rhe ruẹ sọ ọkezẹko. Udabọ ọrana o vwo fiobọrhotọre-e. Nọ wian rhọ nọ sabu tẹn ona. Ọrẹ ohọhọme, ọrhọ tobọ rhianẹ e fiẹ ovwiẹlẹme owu kparobọ ne, ana ji sabu vwanriẹn yen. Ọrẹn, ana rha wian na sabu ru rhomurhọ. Ọwan ephian a tẹmro yanghene ruẹ ekwakwa ra vioja ye orho ru; udabọ ọrana, erhe fiobọrhotọre-e, Jehova ọnọ ha userhumu rẹn ọwan rhe ruẹ rhomẹrhọ. (1 Pet. 5:10) Jene yono kpahen udje erhionrin Peter. Aruẹdọn ri Jesu o dje riẹn udabọ ijẹgba ye, ọnọ sabu mwu ọwan rha ga i Jehova rhọ.

EBẸNBẸN I PETER ỌRHẸ EBRURHỌ RỌ MẸRẸNREN

4. Jerẹ oborẹ ọ ha Luke 5:5-10, marhẹ i Peter o dje omayen rhọ, ọrẹn marhẹ i Jesu o ru yẹ ye imwẹro?

⁴ Baibol na ọ ta rẹn ọwan oborẹ ọsoriẹ i Peter o djoma yen rhiẹ “oruọdanda-an,” yanghene edandan rọ ta kpaha-an. (Se Luke 5:5-10.) Ọrẹn, ọnọ sabu ruẹ orusọ eghwaghwa ezẹko ne. Jesu nọ djokarhọ ofẹn i Peter, ọkezẹko o roro taghene o mwuovwan te-e. Ọrẹn, Jesu o rheri taghene Peter ọnọ sabu vwo atamwu. Omarana, ọrẹ izede dẹndẹn, Jesu nọ ta rẹn Peter taghene ọ vwọ “zofẹ-ẹn.” Ẹruẹhaso ri Jesu o vwo kpahen Peter, ọ hobọte yi uvwrọke jijiri. Peter ọrhẹ omizie re se Andrew, ni nyaji eyi irhenrin ekpe vwo, ji rhiẹ ere leli Messiah na ọke ephian, orhienbro ọrana ọ ha ebrurhọ buebun vwe aye.—Mark 1:16-18.

5. Ebrurhọ ego yi Peter ọ mẹrẹnren ọke ro fi ofẹn yen kparobọ ji rhiabọ ha use i Jesu hin?

⁵ Peter o rhiẹromẹrẹn ekwakwa buebun ọke ro leli Kristi. Ọ mẹrẹn ọke i Jesu o simi ere kpomẹ, le ikpodje, ji tobọ rhọmọ eri hwuru.b (Matt. 8:14-17; Mark 5:37, 41, 42) Peter o ji rhiẹromẹrẹn emena arudo kpahen odidi Uvie i Jesu uvuẹn obaro na, rọ dabu hobọte yi omamọ. (Mark 9:1-8; 2 Pet. 1:16-18) Itiọrurhomẹmro, Peter ọ mẹrẹn ekwakwa buebun ro vwo fiẹrorhọ bi. Oma ọ ghini merhiẹn taghene ọ ha uphẹn rẹn iroro esọsọ kpahen omayen nọ lẹrhiẹ kpare ebrurhọ erana fughwẹ-ẹ!

6. Ogege yi Peter o fiẹ ovwiẹlẹme enẹyen kparobọ? Djeyi fiotọre.

⁶ Udabọ oborẹ i Peter o rhonrin ji mẹrẹn, ọ ji wọnrọn haso ovwiẹlẹme ọnẹyen. Roro kpahen idje ezẹko. Ọke i Jesu ọ ta kpahen oborẹ ọnọ rioja lele ọrhẹ uhwuie, neneyo aruẹmẹrẹn i Baibol ọ sabu te orugba, Peter nọ ghwọghwie. (Mark 8:31-33) Ọgbọ buebun, Peter ọrhẹ inyikọ ri hẹrhẹre i frẹfro kpahen ọrọ maido uvwre aye. (Mark 9:33, 34) Uvuẹn ason rọ kẹta ri Jesu o ki hwu, Peter nọ fian orhọ ọhworhare owu nie. (John 18:10) Uvuẹn ason ọrana, ofẹn no mwu i Peter rọ lẹrheriẹ tiẹn i Jesu ro rhiẹ ugbehian yen taghene o rhe yi-i. (Mark 14:66-72) Ọrana nọ lẹrhẹ i Peter viẹ gbangbanhon.—Matt. 26:75.

7. Uphẹn ọgo ya yi Peter ọke i Jesu ọ rhọmọnuhwu hin?

⁷ Jesu ọ sẹrerhumuji Peter rẹ ẹhẹn yen o seriotọre-e. Ọke ra rhọmọ Jesu nuhwu, nọ ha uphẹn rẹn Peter nọ rharhumu dje ẹguọlọ ro vwo kpahiẹn phia. Jesu nọ ha use rẹn Peter nọ homariotọre hẹrote igegede yi. (John 21:15-17) Peter no mwuegbe rọ nọ nyaleli Jesu. Omarana, no riẹ Jerusalem uvuẹn ẹdẹ Pentecost, ji rhiẹ usuẹn ihworho erukaro ra ha ẹhẹn ọfuanfon djẹha.

8. Orusọ ọghwaghwa ọgo yi Peter o ruru uvuẹn Antioch?

⁸ Ọke ra ha ẹhẹn ọfuanfon djẹ ye ha hin, Peter ọ ji wọnrọn haso ovwiẹlẹme sansan. Uvuẹn ẹgbukpe 36 C.E., Peter ọ havwiẹ ọke ra ha ẹhẹn ọfuanfon djẹ Cornelius ro rhiẹ ohworho agbamwa na ha, ro djephia taghene Jehova “o vwo ni ohworho ruẹ-ẹ,” omarana ihworho agbamwa na ina sabu rhiẹ usuẹn ukoko Ilele Kristi. (Acts 10:34, 44, 45) Ọke ọrana, Peter no vwo ugbomọphẹ ro no lele ihworho agbamwa na riẹ emaren kugbe, oborẹ o vwo ji ru dẹ. (Gal. 2:12) Ọrẹn, Ilele Kristi ezẹko ri rhiẹ itu i Jew ne roro taghene o fo nẹ aye ọrhẹ ihworho agbamwa na i riẹ emaren kugbe-e. Ọke itu i Jew ezẹko ri vwo ẹhẹn ọrana a rhiẹ Antioch, Peter orho kwe lele imizu ri rhiẹ ihworho agbamwa na riẹ emaren kugbe-e, ọkezẹko nẹ evwan o jo biomu itu i Jew ri rhiẹ Ilele Kristi. Ọnyikọ Paul nọ djokarhọ uruemru ra gemai ruẹ ri Peter o vwori na, nọ ji ghwọghwie ọrẹ afiede. (Gal. 2:13, 14) Udabọ orusọ ọrana, Peter o vwo erhionrin. Me yọ ha userhumu riẹn?

ME YỌ HA USERHUMU RẸN PETER VWO ERHIONRIN?

9. Marhẹ John 6:68, 69 o ru dje kpahen atamwu i Peter?

⁹ Peter o vwo atamwu; ọ ha uphẹn rẹn emru owuorowu nọ lẹrhiẹ fiobọrhotọre phẹlẹphẹlẹ-ẹ. O dje atamwuiẹn phia uvuẹn erhirhiẹ owu ọke i Jesu ọ tẹmro rẹ idibo yi, i vwa dabu vwẹruọ ye. (Se John 6:68, 69.) Ihworho buebun ni sẹrerhumuji Jesu, aye a hẹrhiẹ no djeyi fiotọre rẹn aye-e. Ọrẹn, Peter ọ hẹrhẹre. O rheri taghene Jesu ọvo yo vwo “ẹmro rọ yẹ ohworho arhọ i bẹmẹdẹ.”

10. Marhẹ i Jesu o ru vwo uduefigbere kpahen Peter? (Ni ifoto na.)

¹⁰ Jesu ọ sẹrerhumuji Peter vwo-o. Uvuẹn ason rọ kẹta uvuẹn akpenyerẹn yen, Jesu o rheri taghene Peter ọrhẹ inyikọ ri hẹrhẹre, ina sẹrerhumuji vwo. Ọrẹn, Jesu o fiudugbere taghene Peter ọnọ rharhumu rhe, ji sẹrorẹ atamwuiẹn. (Luke 22:31, 32) Jesu o vwẹruọ ye taghene “omwemẹ na ọ havwiẹ, ọrẹn ugboma na ọ vwiẹlẹre.” (Mark 14:38) Omarana, ọke i Peter ọ tobọ tiẹn Jesu hin, Jesu ọ sẹrerhumuji Peter vwo-o. Ọke ra rhọmọ i Jesu hin, nọ rharhumu homaphia rẹn Peter—ọke i Peter ọ ha ekete kologho. (Mark 16:7; Luke 24:34; 1 Cor. 15:5) Ọrana ọ ghini bọn Peter rẹ ẹhẹn yen o seriotọre gbanhon!

11. Marhẹ i Jesu o ru yẹ Peter imwẹro taghene Jehova ọnọ hobọtua ye?

¹¹ Jesu nọ yi Peter imwẹro taghene Jehova ọnọ hobọtua ye. Jesu ra rhọmọnuhwu nọ lẹrhẹ Peter ọrhẹ inyikọ na erọrọ mwu irhenrin ọgbọ ọrọrọ. (John 21:4-6) O vwo ẹfro-o, igbevwunu ọrana ọ yẹ Peter imwẹro taghene Jehova ọnọ sabu hẹrote edamẹ ugboma enẹyen. Ọkezẹko, Peter nọ karorhọ ẹmro ri Jesu ọ tare taghene Jehova ọnọ hẹrote ihworho ra “guọlọ Uvie na” vwẹre. (Matt. 6:33) Sekpahen ọrana, Peter nọ ha owian aghwoghwo na karo, ukperẹ ono rhiẹ eyi irhenrin ekpe. O fiudugbere ghwoghwo uvuẹn ẹdẹ Pentecost 33 C.E., ji ha userhumu rẹn ihworho buebun rhiabọ ha iyẹnrẹn esiri na. (Acts 2:14, 37-41) Ọke oru, nọ ji ha userhumu rẹn itu i Samaria ọrhẹ ihworho egbamwa na yono kpahen Kristi, ji nyalelie. (Acts 8:14-17; 10:44-48) Jehova ọ ghini ha i Peter wian ewian buebun, neneyo ọ sabu ha userhumu rẹn aruẹ ihworho ephian rhiẹ ukoko na.

ME YẸ ỌWAN I YONORIN?

12. Marhẹ udje i Peter ono ru ha userhumu rẹn ọwan orhianẹ e vwo ovwiẹlẹme ra wọnrọn hasua uvwrọke jijiri?

¹² Jehova ọnọ sabu ha userhumu rẹn ọwan vwo erhionrin. Ọnọ sabu bẹn re ne din, maido orhianẹ e nyerẹn ghele ovwiẹlẹme owu uvwrọke jijiri ne. Ọkezẹko, obẹnbẹn na ọnọ sabu gbanhon ghwẹ ọrẹ i Peter. Ọrẹn, Jehova ọnọ sabu yẹ ọwan omẹgbanhon re ne vwo edirien. (Ps. 94:17-19) Jerẹ udje, omizu ọhworhare owu ọ djọse rhẹ ehworhare emrẹ ẹgbukpe buebun, o ki rhe urhomẹmro na. No wene akpenyerẹn yen ji nyalele urhebro i Baibol na. Ọrẹn, ọkezẹko, ọ ji wọnrọn hasuẹ ojemẹ ọsọsọ. Me yọ ha userhumu riẹn vwo erhionrin? Nọ tare: “Jehova ọ yẹ ọwan omẹgbanhon.” Nọ habaye: “Nyoma userhumu i Jehova . . . , mi yonorin taghene mi na sabu [rhe] nyerẹn mwuẹ irhi Jehova . . . Jehova ọ sabu ha mẹ wian ne, udabọ ijẹgba mẹ, o ji ru mẹ gbanhan ọke ephian.”

13. Jerẹ oborẹ a ya rhẹ Acts 4:13, 29, 31, marhẹ ene ru hẹrokele udje i Peter? (Ni ifoto na.)

¹³ Jerẹ oborẹ e yonorin, Peter o ruẹ orusọ eghwaghwa ezẹko fọkiẹ ofẹn onyakpọ. Ọrẹn, fọkime ọ nẹrhomo no vwo omẹgbanhon, Peter nọ sabu fiudugbere kpare idjaghwẹ. (Se Acts 4:13, 29, 31.) Ana ji sabu fiẹ ofẹn kparobọ. Roro kpahen oborẹ ọ phia rẹn Horst, idama owu ro rhirhiẹ Germany uvwre Uvweri Akpọ Ephian Ọreva. Fọkiẹ ọhiẹn obẹ isukuru, no vwobọrhọ ẹmroma owu rọ tare: “Hitler yo no simi ame!” Ukperẹ eri vwiẹriẹ ine vanghwu Horst, aye ni lelirie nẹrhomo kugbe ni Jehova ọ yẹ ye uduefigbere rhọ. Nyoma userhumu eri vwiẹriẹ, ọrhẹ ẹruẹhaso ro vwo kpahen Jehova, Horst nọ sabu rharhumu vwo uduefigbere ro mevigbanhon. Ọke oru nọ tare: “Jehova ọ sẹrerhumuji mẹ vwo dẹ-ẹ.”c

14. Marhẹ ekpako ri vwo ẹguọlọ ine ru yẹ imizu rẹ ẹhẹn aye o seriotọre imwẹro?

¹⁴ Jehova ọrhẹ Jesu i sẹrerhumuji ọwan vwo dẹ-ẹ. Ọke i Peter ọ tiẹn i Jesu hin, ofori no brorhiẹn ọghoghanren uvuẹn akpenyerẹn yen. Ono fiobọrhotọre, gbinẹ ono vwo erhionrin rhiẹ odibo i Kristi? Jesu ọ nẹrhomo vwe i Jehova taghene esegburhomẹmro i Peter o vwo seriotọre-e. Jesu nọ ta rẹn Peter kpahen ẹrhomo ọrana, ji ta rhẹ uduefigbere taghene Peter ono ruẹ imizie gbanhon orho ru. (Luke 22:31, 32) Oma ọnọ ghini merhen i Peter ọke rọ karorhọ ẹmro i Jesu! Ọke ra guọlọ brorhiẹn eghoghanren uvuẹn akpenyerẹn ọwan, Jehova ọnọ sabu ha ekpako na yẹ ọwan imwẹro ra guọlọre ne vwo atamwu. (Eph. 4:8, 11) Omizu owu re se Paul ro rhiẹ ọkpako ukoko uvwrọke jijiri ne, ọ damoma tiobọnu aruẹ urhebro ọrana. Nọ ta rẹn imizu rẹ ẹhẹn aye o seriotọre, nẹ aye i roro kpahen oborẹ i Jehova o ru ti aye rhiẹ urhomẹmro na ọke ukaro. Orho ru, nọ yẹ aye imwẹro taghene ẹguọlọ atamwu i Jehova, ọ lẹrhiẹ sẹrerhumuji aye vwo-o. Nọ tare: “Mi mẹrẹn imizu buebun rẹ ẹhẹn aye o seriotọre ri vwo erhionrin ne nyoma userhumu i Jehova.”

15. Marhẹ udje i Peter ọrhẹ Horst i ru dje kpahen urhomẹmro rọ ha Matthew 6:33?

¹⁵ Jerẹ oborẹ i Jehova ọ hẹrote edamẹ ugboma i Peter ọrhẹ inyikọ ri hẹrhẹre na, Jehova ọnọ ji hẹrote edamẹ ọwan arha ha Uvie na karo uvuẹn akpenyerẹn ọwan. (Matt. 6:33) Ọke re fiuvweri Akpọ Ephian II hin, Horst ra hunute vrẹn ne, no roro kpahen owian ọkobaro. Ọye ovwiegbere, no ji vwo ẹhẹn eveva sẹ ọnọ sabu hẹrote omayen ji rhe vwobọrhọ owian ọkobaro na. Me yo no ruo? No brorhiẹn rọ nọ damu i Jehova ni sẹ ọnọ hẹrote yi, no vwobọrhọ owian aghwoghwo na ọsoso ọkprughwre oniruo okinhariẹ o kiẹn ukoko aye. Uvuẹn ehion ọkprughwre na, no gberie unu ọke oniruo okinhariẹ na ọ yẹ ye ẹvẹlopu ro vwo igho, ọrẹn ọ ta riẹn ohworho rọ yẹriẹ-ẹ. Igho rọ ha uvuien ono te yi ha ruiruo uvuẹn owian ọkobaro na uvwre ibiamo ezẹko. Horst o ni ẹghẹlẹ ọrana rhiẹ imwẹro ri Jehova ọ yẹriẹ taghene ọnọ hẹrote yi. Nọ ha ọsoso akpenyerẹn yen ha owian Uvie na karo.—Mal. 3:10.

16. Mesoriẹ ọghanren ne yono nẹ udje i Peter ọrhẹ ileta rọ yare?

¹⁶ Oma ọ ghini merhen i Peter taghene Jesu ọ nyajevwo jerẹ oborẹ ọ ta riẹn no ru-u! Kristi o yono i Peter no rhiẹ ọnyikọ rọ fuevwan, ro ji dje omamọ dje rẹn Ilele Kristi. Iyẹnrẹn uyono ọrana o vwo ihwẹnmro eghoghanren ri na yẹ ọwan ephian erere. Peter ọ ta kpahen iyono erana ezẹko ọrhẹ erọrọ uvuẹn ileta eva ri Jehova o mwurien ya vwe Ilele Kristi erukaro na. Urhomu-ẹmro rọ ha kpahen ọnana, ọnọ ta kpahen okarorhọ ezẹko ri ha uvuẹn ileta erana, ọrhẹ oborẹ ene ru ha aye ruiruo inyenana.