Wu Vwe Kpọke wu ne Bromarhame-e

1. Iroro ego yo mwu ọwan bromarhame?

WU VWO ẹgwọlọ kpahen i Jehova ro rhiẹ Osolobrugwẹ ro tiobọnu arhọ ọrhẹ ẹghẹlẹ irhorhomu ephian rẹn ọwan? Wu gwọlọ djephia riẹn taghene wu vwo ẹgwọlọ kpahiẹn? Izede rọ mai rhomu wu ne ruie, yẹ ọrẹ wu na homakpahontọre riẹn ji bromarhame. Idjaghwẹ enana ina lẹrhuọ rhiẹ usuẹn ekrun i Jehova. Wu rhe ruẹ omaran, Jehova ro rhiẹ Ọsẹ ọrhẹ Ugbehian, ọnọ sẹroruọ ji hẹroto, fọkime wẹwẹ ọmọyen. (Ps. 73:24; Isa. 43:​1, 2) Omẹhakpahontọre ọrhẹ omebrurhame, ọnọ ji yọ uphẹn wu na riamerhen akpenyerẹn bẹmẹdẹ.—1 Pet. 3:21.

2. Me ye ne yono kpahen uvuẹn urhomu-ẹmro ọnana?

² O vwo oborẹ ọ lẹrhuọ tiẹrierhumu wu ne bromarhame? Orhiomaran, orhiẹ owẹwẹ ọvo yi havwiẹ-ẹ. Ihworho buebun ri bromarhame ne i ji ruẹ ewene rhẹ uruemru ọrhẹ iroro aye, nẹ aye i sabu mwuovwan omebrurhame. Vwana, aye a ga i Jehova rhẹ aghọghọ ọrhẹ oruru. Me wu na sabu yono mie ihworho ezẹko ri bromarhame uvuẹn ọke Ilele Kristi erukaro na? Jene yono kpahen ebẹnbẹn aye i dẹrughwaroghwu ọrhẹ oborẹ ana sabu yono nẹ udje aye.

ITU I SAMARIA I BROMARHAME

3. Ebẹnbẹn ego yẹ itu i Samaria ezẹko i dẹrughwaroghwu rọ nọ sabu lẹrhẹ aye je bromarhame?

³ Itu i Samaria ri havwiẹ uvuẹn ọke i Jesu, e riẹ ẹga rọ vẹnẹ ọrẹ Ilele Kristi, habaye buebun aye e rhirhiẹ emwa ri kẹrẹ Shechem ọrhẹ Samaria, rọ ha obọrẹ o rierun i Judea. Bọmọke itu i Samaria ina ki sabu bromarhame, aye ine vi vwo irherhe ọgbagba ọrẹ Ẹmro Osolobrugwẹ. Genesis fiẹ Deuteronomy ọvo ri rhiẹ ẹbe i Baibol isionrin erukaro yẹ itu i Samaria i vwo imwẹro kpahen, ọkezẹko aye i ji vwo imwẹro kpahen ọbe i Joshua. Itu i Samaria i fiẹrorhọ taghene Messiah na ọnọ rhiọ sekpahen ive Osolobrugwẹ rọ ha uvuẹn Deuteronomy 18:​18, 19. (John 4:25) Omarana, nẹ aye i sabu bromarhame, aye ine vi vwo imwẹro taghene Jesu yẹ Messiah re vive kpahen na. “Itu i Samaria buebun” i ghini vwo imwẹro ọnana. (John 4:39) Erọrọ ina vi kpariroro vrẹn utuoma rọ ha uvwre aye ọrhẹ itu i Jew ọke ọrana.—Luke 9:​52-54.

4. Lele oborẹ ọ ha uvuẹn Acts 8:​5, 6, 14, marhẹ itu i Samaria ezẹko i kpahenrhọ aghwoghwo i Philip lele?

⁴ Me yọ ha userhumu rẹn itu i Samaria bromarhame? Ọke i Philip ro rhiẹ oghwoghwẹmro na o ghwoghwo kpahen “Kristi na rẹn aye,” itu i Samaria ezẹko ni “rhiabọ dede ẹmro Osolobrugwẹ.” (Se Acts 8:​5, 6, 14.) Dedevwo Philip onyẹ i Jew, ọrẹn aye i ji kerhọ ye. Ọkezẹko, aye i karorhọ ekete i Baibol ezẹko uvuẹn Genesis fiẹ Deuteronomy ri tare taghene Osolobrugwẹ o vwo ni awan ruẹ-ẹ. (Deut. 10:​17-19) Aye ni dabu “kpomavi rẹn oborẹ i Philip ọ tare” kpahen i Kristi na, ji mẹrẹn oka ro djephia taghene Osolobrugwẹ ọrhẹ Philip i gba havwiẹ. O ruẹ igbevwunu sansan, simi ere kpomẹ ji le ikpodje nẹ ihworho oma.—Acts 8:7.

5. Iyono ego ye wu na sabu yono mie itu i Samaria?

⁵ Manẹ itu i Samaria a sabu le i Philip no jo rho ghwoghwo rẹn aye fọkime ọye onyẹ i Jew. Ọrẹn, aye a lẹrhẹ ọrana da aye obọ ji-i. Ogege itu i Samaria e vwo imwẹro kpahen oborẹ i Philip o ghwoghwori, aye ni bromarhame. Iyẹnrẹn i Baibol na nọ tare: “Ọke aye e vwo imwẹro kpahen ẹmro i Philip, ro ghwoghwo iyẹnrẹn esiri Uvie Osolobrugwẹ ọrhẹ odẹ i Jesu Kristi, ehworhare ọrhẹ emẹse ne bromarhame.” (Acts 8:12) Wu vwo imwẹro taghene Ẹmro Osolobrugwẹ urhomẹmro? O mwuruon ẹro taghene Iseri Jehova e fiẹ utuoma kparobọ ji dje obọdẹn ẹgwọlọ phia rẹn owuowọnwan—ro rhiẹ oka ro dje Ilele Kristi urhomẹmro phia? (John 13:35) Orhiomaran, gba kpare udjoghwẹ ogege, rhẹ imwẹro taghene Jehova ọnọ ha ebrurhọ wẹn.

6. Erere ọgo ye wu mẹrẹn nẹ udje i Ruben?

⁶ Ruben ro rhirhiẹ ẹkwotọre i Germany, ọ ghwanranren uvuẹn ekrun Iseri Jehova. Ọrẹn ọke rọ ha uphuphẹn, no vwo ẹhẹn eveva sẹ Jehova ọ ghini havwiẹ. Marhẹ o ru fiẹ ẹhẹn eveva na kparobọ? Ọke rọ mẹrẹnvwrurhe taghene ọ gwọlọ userhumu, no ruẹ emru kpahiẹn. Nọ tare: “Uvuẹn uyono omobọ mẹ, ni mie yono irhomu-ẹmro mi vwo ẹhẹn eveva kpahen. Ọgbọ buebun, mi yono urhomu-ẹmro rọ ta kpahen ekwakwa ri varhe.” O se ọbe na Is There a Creator Who Cares About You? Ọbe ọrana ọ hobọte i Ruben omamọ. Nọ tare: ‘O mwurun mẹ ẹro ne dẹn! Jehova ọ havwiẹ.’ Habaye ọke ro kin esiri ukoko, ẹgwọlọ ri Ruben o vwo kpahen okugbe imizu na no kodorhọ. Ọke rọ ghwẹrioma rhiẹ ẹkwotọre i Germany, Ruben no bromarhame ọke rọ ha ẹgbukpe 17. Wu rhe vwo ẹhẹn eveva kpahen oborẹ wu yonorin, damoma gwọlọ iyẹnrẹn erọrọ uvuẹn ẹbe ukoko ọwan. “Irherhe ọgbagba” ọrẹ urhomẹmro na ọnọ sabu ha userhumu wẹn fi ẹhẹn eveva kparobọ. (Eph. 4:​13, 14) Habaye, wu rha mẹrẹn ẹgwọlọ ọrhẹ okugbe rọ ha uvwre ihworho i Jehova, uvuẹn ekete erọrọ uvuẹn akpọ na ọrhẹ uvuẹn ukoko wu havwọ, ọdaremẹro wu vwo kpahen okugbe imizu ọwan uvuẹn akpọ na ephian, nọ nọ gbanhonrhọ.

SAUL ỌRẸ TARSUS O BROMARHAME

7. Iroro ọsọsọ ọgo yo fori ni Saul ọ kpọvi?

⁷ Roro kpahen udje i Saul ọrẹ Tarsus. Ọ dabu ruẹ riaro uvuẹn uyono i Judaism, habaye o titiri omamọ uvwre itu i Jew na. (Gal. 1:​13, 14; Phil. 3:5) Ọke owu dede, Saul ọ ha usuẹn itu i Jew buebun ri kparehasuẹ Ilele Kristi gbangbanhon. Ọke ọrana, o rorori taghene o ruẹ ọhọre Osolobrugwẹ, ọrẹn iroro yi ọsọre. (Acts 8:3; 9:​1, 2; 26:​9-11) Ọrẹn, bọmọke i Saul ọnọ ki sabu rhiẹ odibo i Jesu ji bromarhame, ono vi vwo omwemẹ rọ nọ rioja ẹkparehaso.

8. (a) Me yọ ha userhumu rẹn Saul bromarhame? (b) Lele oborẹ ọ ha uvuẹn Acts 22:​12-16, marhẹ Ananias o ru ha userhumu rẹn Saul? (Ji ni ifoto na.)

⁸ Me yọ ha userhumu rẹn Saul bromarhame? Ọke Ọrovwori Jesu ọ homaphia rẹn i Saul, ikẹruiẹ ni turu. (Acts 9:​3-9) No zinrin orhọmo uvwre ẹdọke esa, ji ha ọke ọnana roro kodo kpahen oborẹ o rhiẹromẹrẹn na. Saul no vwo imwẹro taghene Jesu yẹ i Messiah na, idibo yi ya ji ga ogame urhomẹmro na. Itiọrurhomẹmro, ọnọ vi da i Saul omamọ taghene o vwobọrhọ uhwu i Stephen! (Acts 22:20) Ẹdọke esa na a vrẹn, odibo i Jesu owu re se Ananias no bru i Saul rhe, rhie ikẹruiẹ, ji ha urhebro riẹn no bromarhame ogege. (Se Acts 22:​12-16.) Saul no rhiabọ dede userhumu ọnana ji bromarhame.—Acts 9:​17, 18.

9. Iyono ego ye wu na sabu yono mie i Saul?

⁹ O vwo ekwakwa buebun ra na sabu yono mie i Saul. Manẹ ọ sabu ha uphẹn rẹn omẹkpare yanghene ofẹnzẹ onyakpọ nọ lẹrhiẹ je bromarhame. Ọrẹn, o kwe nẹ ọrana ọ phia-a. Saul ọ homariotọre wene akpenyerẹn yen, ji rhiabọ dede urhomẹmro ro sekpahen i Kristi na. (Acts 26:​14, 19) Saul o vwo omwemẹ ro no rhiẹ Olele Kristi dedevwo o rheri taghene ana kparehasuiẹ. (Acts 9:​15, 16; 20:​22, 23) Ọke ro bromarhame hin, ọ hẹroso i Jehova taghene ọnọ ha userhumu riẹn din ebẹnbẹn sansan rọ nọ dẹrughwaroghwu. (2 Cor. 4:​7-10) Wu rhe bromarhame rhiẹ Oseri Jehova, wu na sabu rhiẹromẹrẹn ẹkparehaso yanghene edamuni sansan, ọrẹn a sẹrerhumujo vwo-o. Vwo imwẹro taghene Osolobrugwẹ ọrhẹ Kristi ina hobọtua ọke ephian.—Phil. 4:13.

10. Erere ọgo ye wu mẹrẹn nẹ udje Anna?

¹⁰ A mọrẹn Anna ghwanren uvuẹn ekrun ra djẹ edjadjẹ i Kurdish ri ha obọrẹ ọren ọ va nẹ sa uvuẹn Europe. Ọke izu Anna o bromarhame hin, ọsẹ ye no kwenu rhọye na ha uyono i Baibol mwu rẹn Anna ọke rọ ha ẹgbukpe 9. Ọrẹn, ọnana nọ suẹ okpetu uvwre Anna ọrhẹ ihworho ekrun aye erọrọ re lele aye rhirhiẹ oghwa owu. Ihworho ekruien ni tare taghene emru aghwa ohworho ekrun na ọnọ sẹrerhumuji ogame esẹ aye ride vwo. Ọke Anna o te ẹgbukpe 12, nọ ta rẹn ọsẹ ye no kwenu rhọye no bromarhame. Ọsẹ yẹ nọ nọriẹn sẹ ọye ọvo yo brorhiẹn na gbinẹ ohworho yọ gbariẹ brorhiẹn ọrana. Nọ kpahenrhọ riẹn, “Mi vwo ẹgwọlọ kpahen i Jehova.” Ọsẹ ye no kwenu riẹn no bromarhame. Ọke oru, Anna no rhiẹromẹrẹn aruẹ ẹkparehaso ọrhẹ echẹdjẹ sansan. Owu usuẹn ihworho ekruien nọ ta riẹn, “Orhianẹ wa tobọ nyerakpọ igberadja ji phopho isigẹti, ọrana ọ tobọ rhomu ghwẹ ọrẹ we rhiẹ Oseri Jehova.” Marhẹ Anna o ru nyerẹn ghele erhirhiẹ na? Nọ tare, “Jehova ọ yẹre mẹ omẹgbanhon, eri vwiẹre mẹ i ji hobọtua mẹ omamọ.” Anna ọ djokarhọ oborẹ i Jehova o ru ha userhumu riẹn ne. No roro kpahiẹn ọke ephian neneyo ọ sabu rha karorhọ oborẹ i Jehova o ru ha userhumu riẹn ne. Orhianẹ wa zofẹn ẹkparehaso, karorhọ taghene Jehova ọnọ ji ha userhumu wẹn.—Heb. 13:6.

CORNELIUS O BROMARHAME

11. Erhirhiẹ ego yi Cornelius ọ dẹrughwaroghwu?

¹¹ Baibol na o ji vwo udje i Cornelius. Ọye “olotu isodja,” nọyẹ emrẹ isodja i Rome 100 yi ha otọriẹ. (Acts 10:​1, ekete ra djokarhọ) Omarana, o fiotọre taghene o titiri uvuẹn amwa yen ọrhẹ uvwre isodja na. O “ruẹ ẹghẹlẹ arodọmẹ buebun rẹn ihworho.” (Acts 10:2) Jehova no dje ọnyikọ Peter ye ghwoghwo iyẹnrẹn esiri na riẹn. Ẹrhẹ ọduado ri Cornelius ọ havwọ, ọ lẹrheriẹ kpọke ro no bromarhame?

12. Me yọ ha userhumu rẹn Cornelius bromarhame?

¹² Me yọ ha userhumu rẹn Cornelius bromarhame? Baibol ọ tare taghene ‘ọye ọrhẹ ọsoso ekrun ọnẹyen a zofẹn Osolobrugwẹ.’ Habaye, ọ jeghwai nẹrhomo vwe Osolobrugwẹ ọke ephian. (Acts 10:2) Ọke i Peter o ghwoghwo iyẹnrẹn esiri na rẹn Cornelius, ọye ọrhẹ ekruien ni rhiabọ dede i Kristi na ji bromarhame. (Acts 10:​47, 48) Itiọrurhomẹmro, Cornelius o vwo omwemẹ ro no ruẹ ewene ephian, takpu ọye ọrhẹ ekruien i mwuovwan aye ina ga i Jehova.—Josh. 24:15; Acts 10:​24, 33.

13. Iyono ego ye wu na sabu yono mie i Cornelius?

¹³ Erhirhiẹ i Cornelius ọ họhọ ọrẹ i Saul, fọkime o ji vwo ẹrhẹ ọduado, omarana, manẹ ọ sabu djikilo kpahen use re tiobọnu riẹn na. Ọrẹn, o ruẹ omara-an. O vwo ewene ro fori wu ru uvuẹn akpenyerẹn ọnọ, ne wu sabu mwuovwan omebrurhame? Orhiomaran, Jehova ọnọ ha userhumu wẹn. Wu rhe vwo omwemẹ wu na ha ẹga riẹn ji nyalele iruemru-urhi Baibol, ọnọ ha ebrurhọ wẹn.

14. Erere ọgo ye wu mẹrẹn nẹ udje i Tsuyoshi?

¹⁴ Tsuyoshi ro rhirhiẹ ẹkwotọre i Japan, ono vi ruẹ ewene uvuẹn iruo yi nọ sabu mwuovwan omebrurhame. Ọye yọ ha userhumu rẹn ọduado isukuru owu ro titiri omamọ, ra ha yono ihworho oborẹ a kwaphiẹ idodo rhọ. Arha ha use rẹn isukuru na nẹ aye i mwuegbe idodo ra na ha ruẹ irueruo orinmi esion, ọduado isukuru na nọ kpare idodo na nya ji ruẹ irueruo ẹga i Buddha, ọrẹn orho vwo uphẹ-ẹn, no dje i Tsuyoshi nya. Ọke i Tsuyoshi o yono urhomẹmro na kpahen uhwu, nọ mẹrẹnvwrurhe taghene ọnọ vi dobọ irueruo ọnana ji nọ ki sabu bromarhame. No brorhiẹn taghene orho vwobọrhọ orẹ owuorowu ro surhobọmwu irueruo ẹga i Buddha-a. (2 Cor. 6:​15, 16) Tsuyoshi nọ ta rẹn ọduado isukuru na kpahiẹn. Me yo nerhumie rhe? Na ta rẹn Tsuyoshi taghene e le yi nẹ iruo na-a, habaye erhe djeyi riẹ aruẹ irueruo erana-a. Ọke ro yono i Baibol na te ẹgbukpe owu, no bromarhame.a Ọrhọ tobọ rhianẹ wu ne vi ruẹ ewene sekpahen iruo ọnọ nẹ oma ọ sabu merhen Osolobrugwẹ, vwo imwẹro taghene ọnọ hẹroto ọrhẹ ekruon.—Ps. 127:2; Matt. 6:33.

ITU I CORINTH I BROMARHAME

15. Ebẹnbẹn ego yẹ itu i Corinth i dẹrughwaroghwu rọ nọ sabu lẹrhẹ aye je bromarhame?

¹⁵ Ihworho re rhirhiẹ amwa i Corinth ọke ahwanren, i vwo ẹgwọlọ kpahen ekwakwa ugboma ọrhẹ ọfanrhiẹn omamọ. Buebun aye e ruẹ ekwakwa ibiobiomu. Itiọrurhomẹmro, uvuẹn aruẹ ekete ọnana, ọnọ bẹn rẹ ohworho ono rhiabọ dede iyẹnrẹn esiri na. Ọrẹn, ọke ọnyikọ Paul ọ rhiẹ amwa ọrana ji ghwoghwo iyẹnrẹn esiri kpahen i Kristi na, “itu i Corinth buebun ri rhon ẹmro na ni vwo imwẹro ji bromarhame.” (Acts 18:​7-11) Ọke oru, Ọrovwori Jesu nọ homaphia rẹn i Paul, ji ta riẹn: “Mi vwo ihworho buebun uvuẹn amwa ọnana.” Omarana, Paul no ghwoghwo rẹn aye emrẹ ẹgbukpe owu gbe uphrophro.

16. Me yọ ha userhumu rẹn itu i Corinth ezẹko bromarhame? (2 Corinthians 10:​4, 5)

¹⁶ Me yọ ha userhumu rẹn itu i Corinth bromarhame? (Se 2 Corinthians 10:​4, 5.) Ẹmro Osolobrugwẹ ọrhẹ omẹgbanhon ẹhẹn ọfuanfon na, yọ ha userhumu rẹn aye ruẹ ewene eduado uvuẹn akpenyerẹn aye. (Heb. 4:12) Itu i Corinth ri rhiabọ dede iyẹnrẹn esiri kpahen i Kristi na, i sabu sẹrerhumuji akpenyerẹn ọrhẹ irueruo ibiobiomu jerẹ inyo ẹda vrẹn oma, uhieso, ọrhẹ uruemru ehworhare a gbẹ ehworhare yanghene emẹse a gbẹ emẹse.—1 Cor. 6:​9-11.b

17. Iyono ego ye wu na sabu yono mie itu i Corinth?

¹⁷ Dedevwo itu i Corinth buebun i ruẹ iruemru enana notọre rhe, aye i ji damoma ruẹ ewene ro fori nẹ aye i sabu rhiẹ Ilele Kristi. Aye i dje omẹdamu phia nẹ aye i sabu nya uvuẹn izede ro kenkenrin na, ro suẹn riẹ arhọ i bẹmẹdẹ. (Matt. 7:​13, 14) O vwo uruemru yanghene irueruo obiobiomu owuorowu wu gwọlọ dobọji ne wu sabu mwuovwan omebrurhame? Wu vwe fiobọrhotọre-e! Rẹ i Jehova nọ yọ ẹhẹn ọfuanfon ọnẹyen ne wu sabu fiẹ ojemẹ rọ sọre kparobọ.

18. Erere ọgo ye wu mẹrẹn nẹ udje i Monika?

¹⁸ Monika ro rhirhiẹ ẹkwotọre i Georgia, ọ wian gbanhon nọ sabu sẹrerhumuji erharhere ẹmro kugbe iruẹn ọrhẹ ughe ri vwe serhọ, nọ sabu mwuovwan omebrurhame. Nọ tare: “Ẹrhomo ẹnẹ ọ ha userhumu mẹ omamọ ọke mia ha uphuphẹn. Jehova o rheri taghene mi gwọlọ ruẹ oborẹ ọgbare, omarana, no sun mẹ ji sa mẹ erhumu ọke ephian.” Monika o bromarhame ọke rọ ha ẹgbukpe 16. O vwo iruemru ezẹko ro fori wu sẹrerhumuji, ne wu sabu ga i Jehova izede ro vwo ekwerhọ kpahen? Omarana, rha rẹ ye nọ ha userhumu wẹn ruẹ ewene na. Jehova o tiobọnẹ ẹhẹn ọfuanfon na ghwologhwolo.—John 3:34.

ESEGBURHOMẸMRO WU VWORI ỌNỌ HA USERHUMU WẸN FI EBẸNBẸN KPAROBỌ

19. Me yọ nọ ha userhumu wẹn fiẹ ebẹnbẹn eduado kparobọ? (Ji ni ifoto na.)

¹⁹ Vwo imwẹro taghene Jehova o vwo ẹgwọlọ kpahuọn, ọ ji gwọlọ ne wu rhiẹ usuẹn ekruien. O toro oborẹ erhirhiẹ ọnọ ọ havwọ-ọ, ọnọ ha userhumu wẹn mwuovwan omebrurhame. Jesu nọ ta rẹn idibo yi ezẹko ọke ahwanren: “Are i rhe vwo esegburhomẹmro rọ họhọ ukeri mustard, are ina ta rẹn ugbenu ọnana, ‘Ghwie nẹ aran riẹ oboran,’ no no ghwie, o ji vwo oborẹ are ina ja sabu ru-u.” (Matt. 17:20) Ẹgbukpe ezẹko ọvo yẹ ihworho ri Jesu ọ tẹmro ọnana riẹn i lelirie ne, omarana, aye i ji gwọlọ esegburhomẹmro. Ọrẹn, Jesu ọ yẹrẹ aye imwẹro taghene aye i rhe vwo ibiẹ esegburhomẹmro dede, Jehova ọnọ ha userhumu rẹn aye fiẹ ebẹnbẹn eduado kparobọ. Jehova ọnọ ji ha userhumu wẹn!

20. Marhẹ idje Ilele Kristi erukaro ọrhẹ ọke ọwan na re yono kpahen uvuẹn urhomu-ẹmro ọnana o ru yọ urhebro ne?

²⁰ Orhianẹ o vwo oborẹ ọ lẹrhuọ tiẹrierhumu wu ne bromarhame, brokpakpa fie kparobọ ne wu sabu mwuovwan omebrurhame. Idje Ilele Kristi erukaro ọrhẹ ọke ọwan na ọnọ yọ urhebro ọrhẹ omẹgbanhon. Jenẹ udje aye o ruo gbanhon ji mwuo homakpahontọre rẹn i Jehova ji bromarhame. Ọnana yẹ orhienbro rọ mai rhomu wu na sabu bru!