Orhomurun Omamọ re ne Tikẹrẹ Imizu Ukoko na!

1-2. Me yẹ emru owu rọ ghanranren rẹn i Jehova, me yọ gwọlọre ne ru?

JEHOVA ọ ha ukẹro ọghoghanren ni oborẹ e ruẹ awọrọ lele. Jesu o yonirin ọwan taghene ene vi vwo ẹgwọlọ kpahen ereva ọwan jerẹ oma ọwan. (Matt. 22:​37-39) Ọnana o mevirhọ taghene ene dje uruemru esiri rẹn ihworho ri vwa ga i Jehova. Erhe dje uruemru esiri phia, na hẹrokele i Jehova ro “ruẹ uvo yi lo mwu evwọkon ọrhẹ evwata jeghwai tiobọnu oso rẹn evwata ọrhẹ eri vwe rhiẹ evwata.”—Matt. 5:45.

² Dedevwo Jehova o vwo ẹgwọlọ kpahen ituakpọ ephian, ọrẹn, ihworho re ruẹ oborẹ ọgbare yọ mai vwo ẹgwọlọ kpahen. (John 14:21) Ọ gwọlọre na hẹrokelie. Ọ ha urhebro rẹn ọwan ne vwo “ẹgwọlọ okokodo” kpahen imizu ukoko na, ji dje “ẹgwọlọ imizu” phia rẹn aye. (1 Pet. 4:8; Rom. 12:10) Erhe vwo aruẹ ẹgwọlọ ọnana kpahen ohworho, ọnọ lẹrhẹ ọwan tikẹrẹ ọravwọ kamẹriẹn ọye ohworho ekrun yanghene ugbehian ọwan.

3. Me ya na vi karorhọ kpahen ẹgwọlọ?

³ Ẹgwọlọ ọ họhọ idodo, o fori na dabu hẹrote yi nọ sabu rha dua. Ọnyikọ Paul nọ ha urhebro ọnana rẹn Ilele Kristi: “Jenẹ ẹgwọlọ imizu are no rho rhirhiẹ ye.” (Heb. 13:1) Jehova ọ gwọlọre ne rhe dje ẹgwọlọ phia rẹn awọrọ. Urhomu-ẹmro ọnana ọnọ ha userhumu rẹn ọwan tikẹrẹ imizu ukoko na rhọ, ji rhe ruẹ onyerẹnkugbe na gbanhan.

OBORẸ ỌSORIẸ O FO NE TIKẸRẸ IMIZU UKOKO NA RHỌ

4. Lele oborẹ ọ ha uvuẹn Psalm 133:​1, marhẹ ene ru sẹrorẹ okugbe rọ ha ukoko na? (Ji ni ifoto na.)

⁴ Se Psalm 133:1. Ọwan i kwerhọ oborẹ ọbo ijoro na ọ yare taghene o “rhomurun jeghwai merhoma,” ne vwo ẹgwọlọ kpahen ihworho ri vwo ẹgwọlọ kpahen i Jehova. Jerẹ oborẹ ohworho ọnọ sabu rhe ni orhan ọduado sakamu fọkime ọ mẹriẹn kẹdẹkẹdẹ, ana sabu ha ukẹro sakamu ni okugbe rọ ha uvuẹn ukoko na. Itiọrurhomẹmro, ọwan a mẹrẹn imizu ọwan ọgbọ buebun uvuẹn ọkprughwre owuowu. Marhẹ ene ru djephia taghene e vwo ọdaremẹro kpahen aye? Ẹgwọlọ re vwo kpahen imizu ukoko na ono kodorhọ erhe roro kpahen oborẹ aye owuowu i ghanren te rẹn ọwan.

5. Me yẹ ẹgwọlọ re dje rẹn owuowọnwan ọnọ sabu mwu awọrọ ru?

⁵ Ihworho ezẹko ri tu rhiẹ uyono ukoko i rha mẹrẹn ẹgwọlọ rọ ha uvwre ọwan, no gbe aye unu. Ọnana ọvo ọnọ sabu mwu aye vwo imwẹro taghene aye i mẹrẹn urhomẹmro na ne. Jesu nọ tare: “Nyoma ọnana yẹ ihworho ephian ine rhe taghene are idibo mẹ—are i rhe vwo ẹgwọlọ kpahen omomare.” (John 13:35) Roro kpahen udje i Chaithra, ro riẹ isukuru ọduado owu ro ji lele Iseri Jehova yono i Baibol na. O rhiabọ dede use rhiẹ omẹvwa ẹkwotọre ọwan. Ọke rọ rhiẹ omẹvwa na ẹdẹ ọrukaro, nọ ta rẹn omizu rọ ha i Baibol yonie: “Eri vwiẹre mẹ a ji gbale mẹ omana dẹ-ẹ. Ọrẹn, uvuẹn omẹvwa ẹkwotọre are, a gbalere mẹ te ọgbọ 52 uvuẹn ẹdẹ owu ọvo! Mi mẹrẹn ẹgwọlọ i Jehova vwrurhe nyoma ihworho yi. Mi gwọlọ rhirhiẹ usuẹn ekrun ọrana.” Chaithra no ruriaro ji bromarhame uvuẹn ẹgbukpe 2024. Itiọrurhomẹmro, ihworho ekpokpọ i rha rhiẹ uyono ukoko na obọ, ji mẹrẹn emamọ ewian ọrhẹ ẹgwọlọ re dje rẹn owuowọnwan, ọnọ sabu mwu aye ma ga i Jehova.—Matt. 5:16.

6. Erhe tikẹrẹ imizu ukoko na, marhẹ aye ine ru sẹrorẹ ọwan?

⁶ Erhe tikẹrẹ imizu ukoko na, aye ina sẹrorẹ ọwan uvuẹn ọke ebẹnbẹn. Paul nọ ta rẹn Ilele Kristi: “Are i rha ha urhebro rẹn owuowọnwan kẹdẹkẹdẹ . . . neneyo are i je rhe rhiẹ iludu nyoma omẹgbanhon ọphiẹrhọ ọrẹ ọdandan.” (Heb. 3:13) Ẹhẹn ọwan orho seriotọre te erhirhiẹ ra gwọlọ ruẹ oborẹ o vwo serhọ, Jehova ọnọ sabu nyoma omizu ukoko na tiobọnu userhumu rẹn ọwan. (Ps. 73:​2, 17, 23) Aruẹ userhumu ọnana yẹ oborẹ a vi gwọlọ.

7. Marhẹ ẹgwọlọ ọrhẹ okugbe i ru surhobọmwu owuowọnwan? (Colossians 3:​13, 14)

⁷ Ọwan i ha usuẹn ẹko ihworho re dje ẹgwọlọ phia rẹn owuowọnwan, omarana, ọwan ne vwo ebrurhọ buebun. (1 John 4:11) Jerẹ udje, ẹgwọlọ o mwu ọwan “harhomu owuowọnwan,” ro toroba okugbe rọ ha uvwre ọwan. (Se Colossians 3:​13, 14; Eph. 4:​2-6) Itiọrurhomẹmro, ọwan a riamerhen ufuoma uvuẹn uyono ukoko ọwan, ra na ja sabu mẹrẹn uvuẹn ekete erọrọ.

RHA HỌGHỌ RẸN IMIZU UKOKO NA

8. Marhẹ i Jehova o ru ha userhumu rẹn ọwan vwo okugbe?

⁸ Okugbe rẹ ọwan a riamerhiẹn inyenana emru igbevwunu. Nyoma userhumu i Jehova, a riamerhen okugbe ọnana udabọ ijẹgba ọwan. (1 Cor. 12:25) Baibol na nọ tare, ‘Osolobrugwẹ o yonirin ọwan ne vwo ẹgwọlọ kpahen owuowọnwan.’ (1 Thess. 4:9) Ọnana o mevirhọ taghene Jehova ọ nyoma i Baibol na ta rẹn ọwan oborẹ ene vi ru na sabu tikẹrẹ owuowọnwan. ‘Osolobrugwẹ ọnọ sabu yono ọwan,’ nyoma ra na jomarhotọre yono i Baibol na ji haye ruiruo. (Heb. 4:12; Jas. 1:25) Ọnana yẹ oborẹ Iseri Jehova a damoma ruẹ.

9. Me yi Romans 12:​9-13 o yonirin ọwan kpahen ọghọ re ne djephia rẹn awọrọ?

⁹ Marhẹ Ẹmro Osolobrugwẹ o ru yono ọwan ne tikẹrẹ owuowọnwan? Djokarhọ oborẹ i Paul ọ ta kpahen ọnana uvuẹn Romans 12:​9-13. (Seyi.) Djokarhọ taghene ọ tare, “are i kobaro ọghọ e djephia rẹn owuowọnwan.” Me yẹ ọrana o mevirhọ? O fori na kpare idjaghwẹ re ne dje “ẹgwọlọ imizu” phia rẹn awọrọ, nyoma ra na harhomu aye, dje uruemru re dede epha phia, jeghwai rhe tiobọnẹ rẹn awọrọ. (Eph. 4:32) Wu vwa hẹrhẹ omizu ukoko na no tikẹruọ vwẹre-e. Wu na sabu “kobaro” ọnana eruo. Jesu ọ tare: “Omamerhomẹ ọ havwiẹ rẹn ọro tiobọnẹ ghwẹ ọra yẹre.”—Acts 20:35.

10. Marhẹ ene ru kobaro “ọghọ e djephia rẹn owuowọnwan”? (Ji ni ifoto na.)

¹⁰ Ọrẹ omamerhomẹ, ọke i Paul ọ ta rẹn ọwan na kobaro ọghọ e djephia rẹn owuowọnwan hin, nọ ha urhebro rẹn ọwan taghene “are i rha wian gbanhan, are i vwe rhiẹ evwiẹlẹ-ẹ.” Ohworho ro rhiẹ ọgba owian, ọ gbromarhọ owian ra yẹriẹ. Arha yẹ ye owian no tuẹdọn ruie. Proverbs 3:​27, 28 nọ tare: “Rhe ruẹ orhorhomu rẹn ihworho ro fori ne wu tiobọnie riẹn, orhianẹ omẹgbanhuọn o teri wu na ha userhumu phia.” Omarana, arha djokarhọ taghene ohworho ọ gwọlọ userhumu, o fori na damoma ha userhumu riẹn. Arha mẹrẹn aruẹ erhirhiẹ ọrana, o fo ne ru sikẹnsikẹ-ẹn; yanghene roro taghene awọrọ ine ruie-e.—1 John 3:​17, 18.

11. Me yọ nọ sa ọwan erhumu tikẹrẹ owuowọnwan?

¹¹ Izede ọrọrọ re ne dje ọghọ phia rẹn awọrọ, yẹ ọrẹ ana harhomu aye, aye i rhe ru ọwan sọ. Ephesians 4:26 nọ tare: “Are i vwe jenẹ ọke o se ghele erhirhiẹ ekwẹre are-e.” Mesoriẹ? Oghwẹmriẹn ọrẹ 27 ọ tare taghene ọrana ọnọ ‘ha uphẹn rẹn i Dẹbolo.’ Jehova ọ ta rẹn ọwan uvuẹn i Baibol na ọgbọ buebun, taghene a harhomu owuowọnwan. Colossians 3:13 ọ ha urhebro rẹn ọwan na “rha . . . harhomu owuowọnwan nẹ ẹhẹn sa.” Arha harhomu orusọ awọrọ, ọnana izede owu rọ mai rhomu re ne tikẹrẹ aye. Ọnana ono mwu ọwan “sẹrorẹ okugbe ọrẹ ẹhẹn na, uvuẹn erhirhiẹ ufuoma ro kuẹ” ọwan kuẹgbe. (Eph. 4:3) Itiọrurhomẹmro, arha harhomu awọrọ, ne toroba okugbe ọrhẹ ufuoma rọ ha ukoko na.

12. Marhẹ i Jehova o ru ha userhumu rẹn ọwan na harhomu awọrọ?

¹² Ọkezẹko, ọnọ sabu bẹn ra na harhomu ihworho ri ruru ọwan sọ. Ọrẹn, ana sabu ruie nyoma userhumu ẹhẹn ọfuanfon Osolobrugwẹ. Ọke i Baibol na ọ ha urhebro rẹn ọwan ne “dje ẹgwọlọ okokodo rẹn owuowọnwan” ji “rha wian gbanhan,” nọ habaye: “Jenẹ ẹhẹn ọfuanfon na lẹrhẹ are vwo oruru.” Ohworho ro vwo “oruru” ọ “damoma dje omwemẹ phia ọke ephian,” fọkiẹ userhumu ẹhẹn ọfuanfon na. (Se ẹmro re dje fiotọre ro sekpahen Romans 12:11.) Itiọrurhomẹmro, ẹhẹn ọfuanfon Osolobrugwẹ ọnọ sabu ha userhumu rẹn ọwan dje ẹgwọlọ imizu phia, ji harhomu owuowọnwan nẹ ẹhẹn rhe. Omarana, o fori na rẹ i Jehova nọ ha userhumu rẹn ọwan.—Luke 11:13.

“O FO NẸ OGHALẸ O RHIRHIẸ UVWRE ARE-E”

13. Me yọ nọ sabu suẹ oghalẹ uvwre ọwan?

¹³ Ukoko na ọ vuọnren rhẹ “aruẹ ihworho ephian” ri nẹ ekete sansan rhe. (1 Tim. 2:​3, 4) Arha jomarhotọre-e, oghalẹ ọnọ sabu rhirhiẹ uvwre ọwan fọkiẹ iroro ọwan ri vẹnẹren sekpahen osẹme ọrhẹ eheri, oborẹ e simi oma lele, yanghene iruẹn ọrhẹ ughe. (Rom. 14:4; 1 Cor. 1:10) Fọkime Osolobrugwẹ o yonirin ọwan ne vwo ẹgwọlọ kpahen owuowọnwan, no fori na jomarhotọre ne je rhe roro taghene iroro ọwan yọ mai gba ghwẹ ọrẹ awọrọ.—Phil. 2:3.

14. Me yo fori na rha damoma ruẹ, mesoriẹ?

¹⁴ Ana ji sabu kẹnoma rẹn oghalẹ uvuẹn ukoko na, nyoma ana rhuọnrhuọn awọrọ oma ji ha urhebro rẹn aye ọke ephian. (1 Thess. 5:11) Ẹgbukpe ezẹko rhe na, ihworho ri ha erhirhiẹ furhiemu yanghene re ti nẹ ukoko na bi, i rharhumu ghwẹrioma rhe ne. Oma ọ merhenren ọwan omamọ! (2 Cor. 2:8) Djokarhọ oborẹ ọ phia rẹn omizu ọmase owu rọ ha erhirhiẹ furhiemu ẹgbukpe ikpe, rọ rharhumu rhiẹ Aghwẹlẹ Uvie. Nọ tare, “Ihworho ephian i dabu rhiabọ dedi mẹ ji so mẹ obọ.” (Acts 3:19) Marhẹ uruemru esiri ọnana re djephia riẹn o ru hobọte yi? Nọ tare, “Ọ lẹrhere mẹ rhe taghene Jehova ọ sa mẹ erhumu, nẹ oma ọ rharhumu merhen mẹ.” Arha bọn ihworho ephian gbanhon, Kristi ọnọ sabu ha ọwan tiobọnu omẹrhuọnrhuọn rẹn ihworho “rẹ oma ọ rhọ ọrhẹ ihworho ohwan ọ bẹn.”—Matt. 11:​28, 29.

15. Izede ọrọrọ ọgo ye ne ru toroba okugbe? (Ji ni ifoto na.)

¹⁵ Izede ọrọrọ re ne toroba okugbe yẹ nyoma ẹmro ọwan. Job 12:11 nọ tare: “Erhọ na ọ vwọ damẹ ẹmro ro rhonrin jerẹ oborẹ ẹrẹnmo na ọ damẹ emaren?” Jerẹ oborẹ ọro sere emaren ọ dabu damẹ emaren na ji ruie no tiurhun bọmọke ọ ki sa ye rẹn awọrọ, o fori na dabu roro kpahen ẹmro ọwan bọmọke ana ki ta ye. (Ps. 141:3) O fori nẹ ẹmro ọwan ọ bọn awọrọ gbanhon, rhuọnrhuọn aye oma, ji “rhua erere vwe ihworho re rhon yi.”—Eph. 4:29.

16. Maido ayọmo yi na rha tẹmro urhebro?

¹⁶ Ọ ghanranren omamọ nẹ emiemọ ọrhẹ esa i rhe ni ẹmro aye sua, sẹ ọ bọn awọrọ gbanhan. (Col. 3:​19, 21; Titus 2:4) O ji fo nẹ ekpako ukoko i rhiẹ esiri urhebro ọrhẹ omẹrhuọnrhuọn harẹn igegede i Jehova. (Isa. 32:​1, 2; Gal. 6:1) Isẹ owu uvuẹn i Baibol na, nọ karorhọ ọwan: “Ẹmro ra tare ọke ro fori, orhomurun dẹn!”—Prov. 15:23.

DJE ẸGWỌLỌ PHIA “ỌRẸ IRUERUO ỌRHẸ URHOMẸMRO”

17. Marhẹ ene ru djephia taghene ẹgwọlọ re vwo kpahen imizu ọwan o nẹ ẹhẹn rhe?

¹⁷ Ọnyikọ John ọ ha urhebro rẹn ọwan taghene ẹgwọlọ ọwan o vwo rhiẹ “ọrẹ ẹmro yanghene ugbunu ọvo-o, ọrẹn ọrẹ irueruo ọrhẹ urhomẹmro.” (1 John 3:18) O fori nẹ ẹgwọlọ re vwo kpahen imizu na o nẹ ẹhẹn rhe. Marhẹ ene ru ruẹ omaran? Arha ghwọghọ ọke kugbe rhẹ imizu na, ne ne tikẹrẹ aye rhọ, ẹgwọlọ re ji vwo kpahen owuowọnwan nọ nọ gbanhonrhọ. Omarana, damoma ghwọghọ ọke kugbe rhẹ awọrọ—sẹ uvuẹn uyono ukoko yanghene owian aghwoghwo na. Damoma rha kọn bruẹ imizu na. Erhe ruẹ omaran, ne ne djephia taghene ‘Osolobrugwẹ o yonirin ọwan ne vwo ẹgwọlọ kpahen owuowọnwan.’ (1 Thess. 4:9) Na na mẹrẹnvwrurhe taghene “Orhomurun, ọ jeghwai merhoma omamọ, rẹ imizu ine rhirhiẹ ye ọrẹ okugbe!”—Ps. 133:1.