“Mi Joma Ha Obọ Ghwọghọ Akpenyerẹn Mẹ”

AKPENYERẸN MẸ BI

“Wu rha ghini guọlọ yono kpahen Osolobrugwẹ, ha Iseri Jehova ruẹ igbehian.” Ogberi mẹ unu ọke mie rhon ẹmro erana. Ọke ọrana, mie lele Iseri Jehova yono i Baibol na ne. Ọrẹn, ne wu sabu vwẹruọ oborẹ oma o ruru mẹ kpahen ẹmro ri ha oberun na, ji mẹ ta ibiesuọn kpahen oborẹ mi nyerẹn akpọ mẹ lele.

E vwiẹre mẹ uvuẹn Quezaltepeque, amwa rọ ha uvuẹn El Salvador. Mẹmẹ yẹ ọmọ ọrẹ erhan usuẹn emọ awan ikpesiorin. Eri vwiẹre mẹ i damoma aye ine yono mẹ ni mi rhiẹ ohworho urhomẹmro rọ ji huvwele. Habaye, omizu ọhworhare re se Leonardo ọrhẹ Iseri Jehova erọrọ e bru mẹ sa me yono mẹ i Baibol na. Ọrẹn nime mia damerhọ oborẹ mie yono na-a, ni mi brorhiẹn ri sọre. Ọke mia ha ẹgbukpe 14, ni mia da inyo ọrhẹ imwu egbogbanhon rhẹ igbehian mẹ obẹ isukuru. Aye ne nẹ isukuru ya homaba ẹko ilogbozighi, ni mi ji hẹrokele aye. Idumu nọyẹ ame e rhirhiẹ, rẹ ame a gba ihworho mie aye igho nẹ ame i sabu mẹrẹn igho e ruẹ ekwakwa buebun.

Ẹko na nọ họhọ ekrun mẹ. Mi vwo imwẹro taghene mi ne vi vwo atamwu kpahen aye. Jerẹ udje, owuọwan usuẹn ẹko mi havwọ rẹ imwu egbogbanhon e mwuẹ, nọ wọnrọn ọreva mẹ uvuẹn egodo mie rhirhiẹ. Ọke aye a wọnrọn, ọreva mẹ uvuẹn egodo mie rhirhiẹ na nọ gbanhon ghwẹ ọreva mẹ uvuẹn ẹko na, no ji se elọkpa. Ni mi tuekwẹre omamọ, jeghwai ha orhan ọghwaghwa ghwọghọ imoto yi, neneyo ọ sabu nyajẹ ọreva mẹ vwo. Ọrẹ mẹmẹ rhẹ ọye e gbe rhirhiẹ egodo na nọ rẹ mẹ ni mi jovwo, ọrẹn mie kwe kerhọ-ọ.

Ọke mie te ẹgbukpe 18, ẹko mi havwọ na ọrhẹ elọkpa ni vwo owọnren. Ọke mia guọlọ donron ibọmbu, nọ sa rhẹ obọ mẹ, mie rhe oborẹ ọ phia lele-e. Oborẹ mi ghwai karorhọ yẹ, mi mẹrẹn obọ mẹ ọke rọ ghwọghọ, ni mi dophie. Ọke mia rhọmọ uvuẹn ihọsipita, ni mi mẹrẹnvwrurhe taghene e bru obọrhe mẹ nie, mi vwa ji sabu rhon ẹmro rhẹ orhọ obọrhe mẹ-ẹ, mi ji joma tu ukẹro obọrhe mẹ.

Dedevwo mi konron omamọ, ni mi ji ghwẹrioma bru ẹko mẹ ọke mie nẹ ihọsipita hin. O jiri-i, elọkpa ni mwurun mẹ jeghwai fi mẹ rhẹ ekanron. Onyerẹnkugbe mẹ rhẹ eri ha uvuẹn ẹko mi havwọ na nọ gbanhanrhọ. Ame e ruẹ ekwakwa ephian kugbe, ame e phopho igbo ame a ki riẹ emaren urhiọke, ame a jeghwai phophie ame e ki semerhẹn.

OBORẸ I BAIBOL NA O WENE AKPENYERẸN MẸ LELE

Ọke mi ha uvuẹn ekanron, Leonardo no bruru mẹ rhe. Ọke ame a tẹmro, nọ rionbọrhọ i tattoo rọ ha obọrhe mẹ. Nọ nọren mẹ, Wu rhe oborẹ i tattoo esa enana i mevirhọ?” Ni mi tare, “Ee, o mevirhọ ehware, imwu egbogbanhon ọrhẹ akpẹriọ.” Ọrẹn, Leonardo nọ ta mẹ: “Ji mẹ ta wẹn, aye i mevirhọ ihọsipita, ekanron ọrhẹ uhwu. Wu riẹ ihọsipita ne, vwana wu ha uvuẹn ekanron. Wu rhe oborẹ ọ hẹrhẹre.”

Oborẹ i Leonardo ọ tare o teri mẹ ẹhẹn. Ẹmro rọ tare na ọgbare. Mi joma ha obọ ghwọghọ akpenyerẹn mẹ nyoma oborẹ mie nyerakpọ lele. Leonardo nọ ta mẹ ni mi rhe lelie yono i Baibol na, ni mi kweri. Oborẹ mi yonorin uvuẹn i Baibol na no mwurun mẹ ruẹ ewene uvuẹn akpenyerẹn mẹ. Jerẹ udje, Baibol na ọ tare taghene “orharhere okugbe o biomu omamọ uruemru.” (1 Corinthians 15:33) Riobarorhọ, usuẹn emru ukaro mi ne ruo, yẹ ọrẹ mi na guọlọ igbehian ekpokpọ. Omarana, mi vwe rhe riẹ esiyẹ ọrẹ ẹko na-a, ukpomaran, ni mie riẹ uyono Iseri Jehova re ruẹ uvuẹn ekanron na. Uvuẹn uyono na, ni mi mẹrẹn Andrés re ji fi rhẹ ekanron na, o bromarhame jeghwai rhiẹ Oseri Jehova ne uvuẹn ekanron na. Nọ ha use mẹ ni mi lelie riẹ emaren uvuẹn urhiọke. Omarana, mi vwa rha tuẹn ẹdẹ mẹ rhọ rhẹ igbo ephopho-o. Ukpomarana, mẹmẹ rhẹ Andrés na ta kpahen eghwẹmro i Baibol kurhiọke kurhiọke.

O kpọke-e, eri ha uvuẹn ẹko mi havwọ na ni mẹrẹn ewene mẹ vwrurhe. Omarana, owu usuẹn ere suẹn ẹko na nọ tare taghene ọ guọlọ leli mẹ tẹmro. O fẹn o mwurun mẹ. Mie rhe oborẹ ono ruo orho rhe kpahen orhienbro mẹ-ẹ, nime na ki sabu nẹ ẹko na ọbẹn omamọ. Nọ tare: “Ame i mẹrẹnvwrurhe taghene ukperẹ wu na rhiẹ esiyẹ ọwan, iyono Iseri Jehova nọyẹ wa nya. Me wa guọlọ ruẹ?” Ni mi ta riẹn taghene mi guọlọ rhe yono i BaiboI na, jeghwai wene akpenyerẹn mẹ. O gberi mẹ unu ọke rọ ta mẹ taghene ẹko ilogbozighi na ina họghọ rẹn orhienbro mẹ, orhianẹ mi sabu djephia taghene mi ghini guọlọ rhiẹ owuọwan usuẹn Iseri Jehova. Nọ tare: “Wu rha ghini guọlọ yono kpahen Osolobrugwẹ, ha Iseri Jehova ruẹ igbehian. Ame i fiẹrorhọ taghene wu ne tiobọnu ekwakwa ri sọre. Oma ọmerhenren mẹ kpahuọn. Wu ha uvuẹn izede rọ gbare. Iseri Jehova ine ghini sabu ha userhumu wẹn. Mi lelirẹ aye yono uvuẹn United States, ezẹko usuẹn ihworho ekrun mẹ Iseri Jehova. Wu vwa zofẹ-ẹn. Rhe yono.” Ofẹn o mwurun mẹ, ọrẹn oma ọ ji merhen mẹ. Mi kpẹmẹ i Jehova Osolobrugwẹ uvuẹn ọmudu mẹ. Ni mi họhọ afen re tiobọnu, ni mi ji vwẹruọ ẹmro i Jesu ọnana: “Are ine rhe urhomẹmro na, urhomẹmro na no no ru are rhiẹ emuvwiẹ.”​—John 8:​32.

Ezẹko usuẹn igbehian mẹ bi na dami mẹ nẹ rhẹ inyo egbogbanhon. Ọkezẹko mie se rhẹ ọdamuni na. Ọrẹn, bibiesuọn bibiesuọn nyoma ẹrhomo, ni mi sabu tiobọnu ọsoso iruemru ibiobiomu mẹ.​—Psalm 51:10, 11.

Ọke re tiobọnu mẹ, ihworho buebun ne roro taghene mi na ghwẹrioma riẹ akpenyerẹn ahwanren mẹ, ọrẹn mia ghwẹrioma-a. Ukpomaran, ni mi ghwẹrioma riẹ ekanron na jeghwai yono ereva mẹ kpahen oborẹ mi yonorin uvuẹn i Baibol na. Obẹtaye, aye ni mẹrẹnvwrurhe taghene mi ghini wene ne. Ọrẹ omemwurhọ, evwreghrẹn mẹ bi e rorie omara-an.

Ẹdẹ owu mẹmẹ rhẹ omizu owu e riẹ aghwoghwo, ẹko ilogbozighi erọrọ rẹ ame e lele wọnrọn bi, ni kpare ekwakwa ra ha wọnrọn me leli mẹ wọnrọn, aye i guọlọ kpe mẹ hwu. Ọreva mẹ no fiudugbere dje rẹn aye izede ọghọ taghene mia rha ha uvuẹn ẹko ilogbozighi ghwomara-an. Ọke ọrana, ni mi damoma vwo edirin. Ọke aye e kpe mẹ jeghwai ti mẹ orhọ taghene mi vwa ruẹ okogho ọrana ghwomara-an, aye ni nyajẹ ame vwo. Baibol na o ghini wene akpenyerẹn mẹ ne. Orho rhiẹ ọke bi, mane mia damoma ru aye kele. Ọrẹn vwana, mia huvwele urhebro i Baibol na rọ ha uvuẹn 1 Thessalonians 5:​15, rọ tare: “Are i rha damoma neneyo ohworho owuorowu ọ jọ rhọ ha ọdandan kwosa ọdandan rẹn owuorọwan, ọrẹn are i rhe ruẹ oborẹ orhomurun rẹn owuowọnwan ọrhẹ awọrọ.”

Avwọke mie rhiẹ Oseri Jehova ne na, ni mia damoma rhiẹ ohworho ra hẹrosua. Ọ lọhọ-ọ. Ọrẹn mi sabu fikparobọ nyoma userhumu i Jehova, urhebro rọ ha uvuẹn i Baibol na, ọrhẹ obẹhatua igbehian mẹ ekpokpọ. Mia guọlọ ghwẹrioma riẹ irueruo ahwanren mẹ-ẹ.​—2 Peter 2:​22.

ERERE MI MẸRẸN NE

Mẹmẹ ohworho rọ tuekwẹre omamọ bi. O mwurun mẹ ẹro taghene orhianẹ mie ji nyerẹn aruẹ akpọ ọrana vwana, manẹ mi hwu ne. Oborẹ mi yonorin uvuẹn i Baibol na o wenerin mẹ. Mi tiobọnu irueruo esọsọ mẹ ephian. Mi rhi mẹ vwo ufuoma rhẹ ihworho ri rhiẹ evwreghrẹn mẹ bi. (Luke 6:​27) Vwana, mia riamerhen obọdẹn onyerẹnkugbe ra ha userhumu mẹ vwo omamọ iruemru. (Proverbs 13:20) Mie nyerẹn obọdẹn akpọ ro vwo omamerhomẹ, jeghwai ga Osolobrugwẹ ro mwuegbe rọ nọ harhomu ọsoso edandan mẹ ephian.​—Isaiah 1:​18.

Uvuẹn ẹgbukpe 2006, ni mi riẹ isukuru ighwoghwẹmro Uvie na harẹn Ilele Kristi ri vwa ji rọnmọ. Ẹgbukpe ezẹko a vrẹn, ni mi rọnmọ ane mẹ, vwana ame i vwiẹ ọmọ ọgbọtọ owu rẹ ame a hẹrote. Mia ghwọghọ ọke buebun yono awọrọ kpahen iruemru-urhi Baibol ri ha userhumu mẹ. Mia ga ẹrhẹ ọkapako uvuẹn ukoko mi havwọ, mia ji damoma ha userhumu rẹn iphuphẹn nẹ aye i kẹnoma rẹn aruẹ erusọ mi ruru ọke mia ha edje aye. Ukperẹ mi na ha obọ ghwọghọ akpenyerẹn mẹ, mia damoma wian ne mi sabu riamerhen obọdẹn akpọ rẹ Osolobrugwẹ o vive kpahen uvuẹn i Baibol na.