Sọnde, November 2
A vwa merhẹn jerẹ oborẹ eri hẹrhẹre na e ruẹ-ẹ, ọrẹn, jenẹ ọwan i rhọmọ jeghwai sẹrorẹ iroro ọwan.—1 Thess. 5:6.
Ẹguọlọ ọghanranren omamọ orhianẹ a guọlọ rha dẹrẹ, ji sẹrorẹ iroro ọwan. (Matt. 22:37-39) Ẹguọlọ re vwo kpahen Jehova ọnọ ha userhumu rẹn ọwan vwo edirin uvuẹn owian aghwoghwo na, udabọ ebẹnbẹn ra na sabu mẹrẹn. (2 Tim. 1:7, 8) Fọkime e vwo ẹguọlọ kpahen ihworho ri vwe ji rhiẹ idibo i Jehova, ne vwobọrhọ owian aghwoghwo na, ji ghwoghwo rẹn ihworho nyoma ifonu ọrhẹ ileta. E vwo ifiẹrorhọ taghene ẹdẹ owu, ihworho re rhirhiẹ kẹrẹ ọwan ina ghwẹriẹ ji ruẹ oborẹ ọgbare. (Ezek. 18:27, 28) Ẹguọlọ re vwo kpahen ereva ọwan o ji sekpahen imizu ukoko na. Ọwan dje aruẹ ẹguọlọ ọrana phia nyoma ra “ha urhebro rẹn owuowọnwan, jeghwai bọn owuowọnwan gbanhan.” (1 Thess. 5:11) Jerẹ isodja re fiuvweri kugbe, ọwan a ha urhebro rẹn owuowọnwan. Ọwan i vwa ha arudo ruẹ oborẹ ono biomu imizu ukoko na evwa-an, yanghene ha ọdandan kwosa ọdanda-an. (1 Thess. 5:13, 15) E ji dje ẹguọlọ phia nyoma re mwuọghọ rẹn imizu ra kobaro uvuẹn ukoko na.—1 Thess. 5:12. w23.06 10 ¶6; 11 ¶10-11
Mọnde, November 3
[Jehova] ọrhọ ta kpahen emru, o vwo ruie?—Num. 23:19.
Izede owu ene ru ruẹ esegburhomẹmro ọwan gbanhonrhọ yẹ, ọrẹ ene roro kodo kpahen otan na. Otan na yẹ imwẹro taghene ive Osolobrugwẹ ephian ine rugba. Arha dabu roro kpahen oborẹ ọsoriẹ e tiobọnu otan na ọrhẹ oborẹ o surhobọmwu, ana sabu ruẹ esegburhomẹmro ọwan kpahen ive Osolobrugwẹ sekpahen akpọ ọkpokpọ na gbanhonrhọ. Mesoriẹ ana sabu ta omaran? Me yẹ otan na o surhobọmwu? Jehova o dje ọmọyen ọkpako ro vwo ẹguọlọ kpahen ro rhiẹ ugbehian yen rhiẹ otọrakpọ na no rhiẹ onyakpọ rọ gbare. Ọke i Jesu ọ ha otọrakpọ na, o vwo edirin aruẹ ebẹnbẹn ephian. Ọke oru, nọ rioja ji hwu. Osa ri Jehova ọ kware ọ doro omamọ! Orhianẹ akpọ ọkpokpọ na ọrẹ ibiọke, manẹ i Jehova ọ vwọ ha uphẹn rẹn Jesu nọ rioja ji hwu fọkiẹ ọwa-an. (John 3:16; 1 Pet. 1:18, 19) Fọkime Jehova o tiobọnu otan na, e rheri taghene ana sabu vwo arhọ i bẹmẹdẹ uvuẹn akpọ ọkpokpọ na. w23.04 27 ¶8-9
Tiusde, November 4
Omẹgbanhon ọnọ ne, O Uhwu? —Hos. 13:14.
Jehova o vwo oruru rọ nọ rhọmọ eri hwuru na? O vwo ẹfro-o, o vworie. O mwu ihworho ezẹko usuẹn eri ya i Baibol na, ya kpahen ive ẹrhọmọnuhwu uvuẹn obaro na. (Isa. 26:19; Rev. 20:11-13) Habaye, Jehova orho vive, ọke ephian yo ruie gba. (Josh. 23:14) Itiọrurhomẹmro, Jehova o vwo oruru ọgbogbanhon rọ nọ rhọmọ ihworho nuhwu. Roro kpahen ẹmro i Job ọ tare. O vwo imwẹro taghene orho hwu, Jehova o vwo oruru rọ nọ rharhumu mẹriẹn. (Job 14:14, 15, ekete ra djokarhọ) Jehova o ji vwo aruẹ oruru ọrana kpahen ọsoso ihworho ri hwu ne ri gariẹ. O vwo oruru rọ nọ rhọmọ aye nuhwu, nẹ aye i vwo omọkpokpọ ọrhẹ omamerhomẹ. Nẹ iduduru ihworho buebun ri hwu ne ri vwe vwo uphẹn aye yono urhomẹmro na kpahen Jehova vwo? Osolobrugwẹ ọwan ro vwo ẹguọlọ, ọ ji guọlọ rhọmọ aye. (Acts 24:15) Ọ guọlọre nẹ aye i vwo uphẹn aye ine rhiẹ igbehian yen, ji nyerẹn bẹmẹdẹ uvuẹn otọrakpọ na.—John 3:16. w23.04 9 ¶5-6