Emakashe i Ghwoghwo Uvwiẹ i Jesu

Ohworho ro sun i Rome rẹ odẹ ye o rhiẹ Caesar Augustus, no jurhi taghene ọsoso itu i Jew i ghwẹrioma riẹ amwa aye ya ya odẹ aye rhotọre. Omarana, Joseph ọrhẹ i Mary ni riẹ Bethlehem ro rhiẹ amwa i Joseph o nurhe. Evwan i Mary ọ joma gba ne.

Ọke aye e te i Bethlehem, ekete eranmo e rhirhiẹ ọvo nọ yọ havwiẹ. Avwaye, Mary no vwiẹ ọmọ ọhworhare, no se rie i Jesu. Nọ ha ewun fare ọmọ na, nọ kpare riẹ rhẹ ekete re fi odin eranmo a ria rhọ.

Ọke ọrana, isuingegede ezẹko a hẹrote igegede aye uvuẹn ekete rọ kẹrẹ i Bethlehem. Ogege, ọmakashe owu no mevi obaro aye, odidi Jehova no lo mwu aye. Ofẹn no mwu isuingegede na, ọrẹn, ọmakashe na nọ ta rẹn aye: ‘Are i vwa zofẹ-ẹn. Mi vwo omamọ iyẹnrẹn harẹn are. E vwiẹ i Messiah na obẹ i Bethlehem inyenana.’ Ogege, emakashe buebun ni homaphia uvuẹn ivwrevwrede na, aye na ta: ‘Odidi o rhirhiẹ ye rẹn Osolobrugwẹ obẹ odjuwu, ufuoma o rhirhiẹ ye uvuẹn otọrakpọ na.’ Ọke oru, emakashe na ni ranmiẹren. Me yẹ isuingegede na i ruru?

Isuingegede na, na ta rẹn owuowọnwan: ‘Jene riẹ Bethlehem ogege.’ Aye ni brokpakpa nyarhẹn, aye ni mẹrẹn Joseph ọrhẹ i Mary kugbe i Jesu uvuẹn oghwa eranmo e rhirhiẹ na.

No gbe kohworho kohworho unu, ọke aye e rhon kpahen oborẹ ọmakashe na ọ ta rẹn isuingegede na. Mary o roro kpahen ẹmro ọmakashe na omamọ, ẹmro na a ji sẹriẹ ẹro-o. Isuingegede na ni ghwẹrioma ya hẹrote igegede aye, aye na ji kpẹmẹ i Jehova fọkiẹ oborẹ aye i rhonrin jeghwai mẹrẹn na.