Ọmọ Ọmase uku ọ Rhọmọnuhwu

Uvwre ọke okaka na, Jehova nọ ta rẹn Elijah: ‘Nyarhẹn riẹ amwa re se Zarephath. Ọmase uku owu rọ ha avwaye ọnọ yọ emaren.’ Ọke Elijah o te anurẹsẹ amwa na, nọ mẹrẹn ọmase uku ro rhiẹ ovwiegbere rọ gbẹn erhan. Elijah nọ ta riẹn nọ yẹ ye ame nọ da. Ọke ọmase na ọ guọlọ ya sa ame rẹn Elijah, Elijah nọ ta riẹn: ‘Biko ji ha ibrẹdi ba rhe.’ Ọrẹn, ọmase uku na nọ ta riẹn: ‘Mie vwo ibrẹdi owuorowu mi na yọ-ọ. Ọfugbo ọrhẹ oborẹ mi na ha ru ibrẹdi rẹn omamẹ ọrhẹ ọmọ mẹ ọvo, yi mi vwori.’ Elijah nọ ta riẹn: ‘Jehova o veri taghene wu rha yẹ mẹ ibrẹdi, ọfugbo ọrhẹ oborẹ wa ha ru ibrẹdi na, o hiẹn bọmọke oso na ọnọ rhọ-ọ.’

Omarana, ọmase uku na no ru ibrẹdi rẹn Elijah ro rhiẹ ọmẹraro i Jehova. Jerẹ oborẹ i Jehova o vive yi, ọfugbo ọrhẹ oborẹ ọmase uku na ọ ha ru ibrẹdi na, o ghini hin bọmọke oso na ọ rhọ-ọ. Ọye ọrhẹ ọmọyen i ghini mẹrẹn emaren re.

Ọke oru, emru rọ miamoma nọ phia rẹn ọmase uku na. Ọmọ ọmase uku na no kpomurun nọ jeghwai hwu. Ọmase uku na nọ rẹ Elijah nọ ha userhumu riẹn. Elijah nọ kpare ọmọ na riẹ oghwa rọ ha oberun. Elijah nọ kpare ọmọ na semerhẹn, nọ nẹrhomo: ‘Jehova, biko jenẹ ọmọ ọnana ọ rharhumu nyerẹn.’ Wu rhe oborẹ ọsoriẹ ono rhiẹ emru igbevwunu, Jehova orho ruie nẹ ọmọ na ọ rharhumu nyerẹn? Emru igbevwunu, nime, o ji vwo ohworho ro hwuru rọ rharhumu nyerẹn dẹ ne ọke ọrana-a. Habaye, ọmase uku na ọrhẹ ọmọyen e nẹ ẹkwotọre Israel rhe-e.

Ọrẹn ọke oru, ọmọ na nọ ghini rharhumu nyerẹn. Elijah nọ ta rẹn ọmase uku na: ‘Nughe! Ọmọ ọnọ, ọ nyerẹn ne.’ Ọma ọ merhen riẹn omamọ, nọ ta rẹn Elijah: ‘Wẹwẹ ghini ọmẹraro Osolobrugwẹ. Mi rheri, nime wa ta oborẹ i Jehova ọ ta wẹn taghene wu ta.’