UYONO 6
Ihworho Ẹrẹnren yi Simirhọ ọke Ukude na
Noah ọrhẹ ekrun ọnẹyen kugbe eranmo na yi ruẹ owọ na. Jehova no kwurhu ighwe owọ na, oso na nọ tonrhọ. Oso na ọ doro omamọ te erhirhiẹ owọ na o volo oberun ame na. Ọke oru, ame no rhurhu otọrakpọ na ephian. Ọsoso ihworho ri vwa ruẹ owọ na ni hwuru. Ọrẹn, Noah ọrhẹ ekrun ọnẹyen ni simirhọ. Wu na sabu roro oborẹ oma ọnọ merhen aye te taghene aye i huvwele i Jehova?
Oso na nọ rhọre ẹdọke 40 ọrhẹ ason 40, ọ ki dobọji. Ọke oru, ame na no riotọre bibiesuọn. Owọ na no mevi oberun igbenu. Ọrẹn, ame ọ ji vuọn ekete ephian, omarana, Noah ọrhẹ ekrun ọnẹyen arha sabu ruẹ otafe ogege-e.
Ọke oru, ame na nọ kare. Noah ọrhẹ ekrun ọnẹyen i rhirhiẹ owọ na ghwẹ ẹgbukpe owu. Jehova nọ ta rẹn aye taghene aye ina sabu ruẹ otafe nẹ owọ na, akpọ na nọ họhọ akpọ ọkpokpọ. Oma ọ merhenren aye taghene Jehova o simi rẹ aye, aye ni ze izobo e dje ekpẹmẹ aye phia.
Oma ọ merhen i Jehova fọkiẹ izobo aye i zeri na. Jehova no vive harẹn aye taghene ọye ọ vwọ samọ ha ame ghwọghọ ekwakwa re nyerẹn uvuẹn akpọ na ghwomara-an. Nọ ha aphoro oso phia no rhiẹ emru oka harẹn ive ọnẹyen na. Wu mẹrẹn aphoro oso dẹ ne?
Jehova nọ ta rẹn Noah ọrhẹ ekrun ọnẹyen taghene aye i vwiẹ emọ vuọn otọrakpọ na.
“Noah ọ ki ruẹ owọ na, [ihworho a] djokarhọ ye-e, bọmọke Ukude na ọ ki rhe jeghwai ghwọghọ aye ephian.”—Matthew 24:38, 39