Ọke i Jesu ọ ha Uphuphẹn

Joseph, Mary, emọ aye ehworhare ọrhẹ egbọtọ kugbe i Jesu e rhirhiẹ Nazareth. Joseph ọ hẹrote ekrun ọnẹyen nyoma owian ikapita, ọ jeghwai yono aye Urhi Jehova. Joseph ọrhẹ ekrun ọnẹyen e riẹ synagogue na ọke ephian ya ha ẹga rẹn i Jehova, aye a jeghwai riẹ i Jerusalem ya riorẹ Ọnyavrẹn kẹgbukpe kẹgbukpe.

Ọke i Jesu ọ ha ẹgbukpe 12, ọye ọrhẹ ekrun ọnẹyen ni riẹ i Jerusalem jerẹ oborẹ aye e ruẹ bi. Ekete ephian ọ vuọnren rhẹ ihworho ri rhiẹ orẹ Ọnyavrẹn na. Ọke oru, Joseph ọrhẹ Mary na ghwẹrioma rie, aye ni rorori taghene i Jesu o lelirẹ aye. Ọrẹn, ọke aye a guọliẹ uvwre ekrun aye, aye arha mẹriẹ-ẹn.

Aye ni ghwẹrioma riẹ i Jerusalem, aye ni guọlọ i Jesu ọsoso ẹdọke esa. Ọke oru, aye ni riẹ oghwa ẹga na. Aye ni mẹrẹn i Jesu avwaye ro siyẹ erhẹrhẹ iyono na, ọ dabu kerhọ aye, ọ jeghwai nọ aye enọ. Oma nọ merhen iyono na kpahen i Jesu te erhirhiẹ aye a nọ i Jesu enọ. No gbe aye unu kpahen oborẹ i Jesu ọ kpahanrhọ enọ aye lele. Aye i mẹrẹnvwrurhe taghene i Jesu ọ dabu vwẹruọ Urhi Jehova.

Joseph ọrhẹ Mary e brudu kpahen i Jesu. Mary nọ tare: ‘Ọmọ mẹ, o jiri ne ame a guọluọ lele ekete ephian! Bọgo wu nyaren?’ Jesu nọ tare: ‘We rhe taghene mi ne rhirhiẹ oghwa Ọsẹ mẹ?’

Jesu no lele i Joseph ọrhẹ i Mary ghwẹrioma riẹ Nazareth. Joseph o yono i Jesu owian ikapita. Aruo ohworho ọgo wu rorori taghene i Jesu ọ havwọ ọke rọ ha uphuphẹn? Ọke i Jesu ọ ghwanran, no vwo ẹghwanren, nọ jeghwai vwo ekwerhọ Osolobrugwẹ ọrhẹ ituakpọ.