Ive Harẹn i Jehova

Uvwre ibiamo eva ọke emọ Israel e nẹ Egypt hin, aye ni te Ugbenu i Sinai, aye ni ronmoma avwaye. Jehova no se i Moses riẹ oberun ugbenu na, nọ ta riẹn: ‘Mi simi emọ Israel ne. Aye i rha huvwele mẹ jeghwai nyalele irhi mẹ, aye ni ne rhiẹ ihworho oghẹnrensan mẹ.’ Moses nọ ghwẹrioma bru emọ Israel, nọ ta rẹn aye oborẹ i Jehova ọ tare. Marhẹ aye i kpahenrhọ ye lele? Aye ni tare: ‘Ame ine ru ọsoso oborẹ i Jehova ọ tare taghene ame i ru.’

Moses nọ ghwẹrioma riẹ oberun ugbenu na ọgbọrọrọ. Jehova nọ ta riẹn: ‘Ẹdọke esa vwanran, mi na tẹmro wẹn. Ha orhetio rẹn ihworho na, nẹ aye i ja rha rhiẹ oberun Ugbenu i Sinai na.’ Moses nọ ghwẹrioma bru emọ Israel, nọ ta rẹn aye nẹ aye i mwuegbe rẹ aye ina kerhọ i Jehova.

Ẹdọke esa a vrẹn hin, emọ Israel ni mẹrẹn aruọke rọ braro, oberun ugbenu na no mwuokuku. Aye ni ji rhon edon agbranran ọrhẹ ukpori. Jehova nọ nyoma erhanren homaphia uvuẹn oberun ugbenu na. Ofẹn no mwu emọ Israel te erhirhiẹ aye a phariẹ. Ọsoso oberun ugbenu na no kpogho gbangbanhon, nọ jeghwai vuọn rhẹ iphirhi. Edon ukpori na nọ gbanhanrhọ gbanhanrhọ. Ọke oru, Osolobrugwẹ nọ tare: ‘Mẹmẹ i Jehova. Are i vwa ha ẹga rẹn isolobrugwẹ erọrọ-ọ.’

Moses nọ ghwẹrioma riẹ oberun ugbenu na, Jehova nọ yẹriẹ irhi vwe emọ Israel kpahen oborẹ aye ina ha ẹga riẹn lele ọrhẹ oborẹ aye ine nyerẹn lele. Moses nọ ya irhi na rhotọre, nọ jeghwai se irhi na harẹn emọ Israel. Aye ni veri: ‘Ame ine ru ọsoso oborẹ i Jehova ọ tare taghene ame i ru.’ Aye i vive rẹn Osolobrugwẹ ne. Ọrẹn, aye ine ru oborẹ aye i veri na?