Ekpako​—Yono nẹ Udje i Gideon

1. Lele oborẹ ọ ha 1 Peter 5:2, owian ọgo yẹ ekpako i vwori?

EKPAKO ukoko i vwo owian aye ina hẹrote idibo eghoghanren Jehova. Ehworhare enana ra homakpahontọre na, a ha ukẹro ọghoghanren ni uphẹn aye ina hobọtua imizu ukoko na, ji wian gbanhan nẹ aye i rhiẹ ‘iniruo . . . ra hẹrote igegede Osolobrugwẹ.’ (Jer. 23:4; se 1 Peter 5:2.) Oma ọ merhen ọwan taghene e vwo aruẹ ehworhare erana uvuẹn ukoko ọwan!

2. Edamuni ego yẹ ekpako ezẹko ina sabu dẹrughwaroghwu?

² Ekpako a dẹrughwaroghwu ebẹnbẹn buebun ọke aye a wian ewian aye. Fọkime, ekpako a wian gbanhan hẹrote ukoko na. Tony, ọkpako ukoko owu rọ ha United States, o yono oborẹ ono ru vwo uruemru dẹndẹn sekpahen uchunu owian rọ nọ sabu wian hin. Nọ tare: “Ọke emiamo i COVID-19 ọ tonrhọ, ni mia damoma wian ewian buebun, ọrẹ mi ne ruẹ ẹkwaphiẹrhotọre uyono ukoko ọrhẹ owian aghwoghwo na. Ọrẹn, o vwo oborẹ mi damoma te-e, ewian buebun i ji havwiẹ. Bibiesuọn bibiesuọn, isese i Baibol mẹ, uyono omobọ, ọrhẹ ẹrhomo ẹnẹ ne seriotọre.” Ilir, ọkpako rọ ha Kosovo, o rhiẹromẹrẹn aruẹ obẹnbẹn ọrọrọ. Ọke rọ ha ekete re fiuvweri, ọ bẹn riẹn rọ nọ nyalele ọkpọvi ukoko na. Nọ tare: “Uduefigbere mẹ o rhiẹromẹrẹn ọdamuni ọke oghọn ukoko na ọ yẹ mẹ owian mi na ha userhumu rẹn imizu ukoko ri ha ekete ro mwuofẹn. Ofẹn no mwu mẹ, habaye ọkpọvi na ọ họhọ oborẹ ana sabu nyalele-e.” Ọ bẹn rẹn Tim, ro rhiẹ imishọnari owu obẹ Asia, no ruẹ ekwakwa rọ guọlọ ru kẹdẹkẹdẹ. Nọ tare: “Ọkezẹko, oma ọ rhọ mẹ omamọ mi na ha userhumu rẹn imizu ukoko na.” Me yọ nọ sabu ha userhumu rẹn ekpako ra dẹrughwaroghwu aruẹ ebẹnbẹn erana?

3. Marhẹ ọwan ephian ine ru mẹrẹn erere ọke re yono kpahen udje Oguẹnzọn Gideon?

³ Ekpako ina sabu yono nẹ udje Oguẹnzọn Gideon. (Heb. 6:12; 11:32) Ọye ohworho ro simi ihworho i Jehova, ji sun aye. (Judg. 2:16; 1 Chron. 17:6) Jerẹ i Gideon, a ha ekpako mwu nẹ aye i hẹrote ihworho i Jehova uvwre ọke egbogbanhon. (Acts 20:28; 2 Tim. 3:1) Ana sabu yono nẹ uruemru dẹndẹn, omeriotọre ọrhẹ uvwele ẹha i Gideon. A damu edirien ni ọke rọ wian ewian ra yẹriẹ. Sẹ ọwan ekpako ukoko yanghene ọwan rhẹ ekpako-o, ana sabu dje ọdaremẹro phia kpahen ekpako na. Ana sabu hobọtua imizu enana ra wian gbanhan na.​—Heb. 13:17.

ỌKE ARHA DAMU URUEMRU DẸNDẸN ỌRHẸ OMERIOTỌRE ỌNỌ NI

4. Marhẹ i Gideon o ru dje uruemru dẹndẹn ọrhẹ omeriotọre phia?

⁴ Gideon ohworho ro vwo uruemru dẹndẹn ọrhẹ omeriotọre.b Ọke ọmakashe i Jehova ọ ta rẹn Gideon taghene a djẹriẹ ha no simi emọ Israel nẹ abọ itu i Midian ri gbanhonma, fọkiẹ omeriotọre nọ tare: “Ihworho mẹ yi mai kamo usuẹn emọ i Manasseh, habaye mie fiemru owuorowu uvuẹn oghwa ọsẹ mẹ-ẹ.” (Judg. 6:15) No roro taghene o mwuovwan owian ra yẹriẹ na-a, ọrẹn Jehova o rheri taghene o mwuovwan. Nyoma userhumu i Jehova, Gideon nọ sabu wian owian yen gba.

5. Marhẹ ene ru damu uruemru dẹndẹn ọrhẹ omeriotọre ọkpako ni?

⁵ Ekpako a damoma dje uruemru dẹndẹn ọrhẹ omeriotọre phia uvuẹn kemru kemru. (Mic. 6:8; Acts 20:18, 19) Aye i vwe dje omẹgbanhon aye ọrhẹ ekwakwa aye i ruru vrẹn ovwa-an; yanghene aye i vwa ha ukẹro sakamu ni oma aye fọkiẹ orusọ yanghene ovwiẹlẹme aye-e. Ọrẹn, ọkezẹko ọkpako ọnọ sabu dẹrughwaroghwu edamuni. Jerẹ udje, ọnọ sabu ha ewian buebun, ọrẹn orho ru, nọ bẹn riẹn ọnọ wian aye ephian. Yanghene ana sabu ghwọghwie fọkiẹ izede rọ wian aruẹ owian owu lele, yanghene jirie fọkiẹ izede rọ wian aruẹ owian ọrọrọ lele. Me yẹ ekpako ina sabu yono mie i Gideon, rọ nọ ha userhumu rẹn aye uvuẹn erhirhiẹ erana?

6. Me ye ekpako ina sabu yono mie i Gideon kpahen uruemru dẹndẹn? (Ni ifoto na.)

⁶ Nekpẹn userhumu. Ohworho ro vwo uruemru dẹndẹn o rheri taghene o vwo ekete omẹgbanhuiẹn o teri. Gideon o vwo uruemru dẹndẹn fọkime o mwuegbe rọ nọ nekpẹn userhumu mie awọrọ. (Judg. 6:27, 35; 7:24) Ekpako ri vwo ẹghwanren e ji ruẹ te omaran. Tony, ra hunute vrẹn ne, nọ tare: “Fọkiẹ oborẹ a mọrenren mẹ ghwanren lele, ni mie kwerhọ ewian buebun mi na ja sabu wian hin. Omarana, ni mi brorhiẹn mi ne yono kpahen uruemru dẹndẹn uvuẹn ogame ekrun, ji nọ ane mẹ oborẹ ọ djokarhọ. Ne mi ji ni ividio na Yono, Hẹroso, Wu Jeghwai Hẹ Omẹgbanhon Harẹn Awọrọ Jerẹ Oborẹ i Jesu Oruru rọ ha jw.org.” Tony nọ ha use rẹn awọrọ nẹ aye i ha userhumu riẹn wian ewian yen. Me yo nerhumie rhe? Tony nọ tare: “Na dabu wian owian ukoko na fiotọre, mi ji vwo ọke mia ha bọn omamẹ gbanhan uvuẹn ogame i Jehova.”

7. Marhẹ ekpako ine ru hẹrokele i Gideon ọke erhe ruẹ oborẹ o biomirin aye evwan? (James 3:13)

⁷ Kpahenrhọ dẹndẹn erhe ruẹ oborẹ o biomiruon evwan. Ọdamuni ọrọrọ ọ homaphia rẹn ekpako, ọke erhe ruẹ oborẹ o biomirin aye evwan. Ọgbọrọrọ, udje i Gideon ọnọ sabu ha userhumu rẹn aye. Fọkime o rhe kpahen ijẹgba enẹyen, nọ kpahenrhọ ye dẹndẹn ọke ehworhare i Ephraim a haye guẹnzọn. (Judg. 8:1-3) Gideon ọ kpahenrhọ ye ọrẹ ekwẹre-e. O dje uruemru dẹndẹn phia nyoma rọ kerhọ edamẹ aye, nọ ji ha ona kpọ erhirhiẹ na vi. Ekpako ri vwo ẹghwanren a hẹrokele i Gideon nyoma aye a dabu kerhọ, ji kpahanrhọ ye dẹndẹn ọke arha ha aye guẹnzọn. (Se James 3:13.) Nyoma ọrana, aye ne toroba ufuoma uvuẹn ukoko na.

8. Marhẹ ekpako ina kpahenrhọ ye lele ọke erhe jiri aye? Dje udje yi.

⁸ Ha ujiri ephian vwe i Jehova. Ọke re jiri Gideon fọkime o fiẹ itu i Midian kparobọ, nọ ha ujiri na vwe i Jehova. (Judg. 8:22, 23) Marhẹ ekpako ine ru hẹrokele i Gideon? O fori nẹ aye i ha ujiri vwe i Jehova fọkiẹ oborẹ aye i wianren. (1 Cor. 4:6, 7) Jerẹ udje, erhe jiri ọkpako fọkiẹ oborẹ ọ ha uyono phia, ọnọ sabu kpọ ujiri na riẹ esiri uyono na, nọyẹ i Baibol na yanghene uyono rẹ ukoko i Jehova o tiobọnẹ. Ọkezẹko, o ji fo nẹ ekpako i roro sẹ aye a ha ujiri rẹn oma aye. Roro kpahen udje ọkpako owu re se Timothy. Ọke ra haye mwu obọ, oma ọ merhen i Timothy rọ nọ ha ẹmro otu phia. Nọ tare: “Ni mia ha ẹmro ọtonrhọ iseseri ọrhẹ idje buebun ruiruo. Ọgbọ buebun, ihworho ne jiri mẹ fọkiẹ erana. Ọrẹ omemwurhọ, ọrana nọ lẹrhẹ otu na tẹnrovi mẹ ukperẹ ono rhiẹ Baibol na yanghene Jehova.” Ọke oru, Timothy nọ mẹrẹnvwrurhe taghene o fori no wene ona uyono yi, neneyo ọ jọ rhua ujiri na rẹn omayen. (Prov. 27:21) Me yo nerhumie rhe? Nọ tare: “Imizu sansan na ta mẹ kpahen oborẹ ẹmro mi haphia o ru ha userhumu rẹn aye nyerẹn ghele obẹnbẹn, vwo edirin ọdamuni yanghene tikẹrẹ i Jehova rhọ. Oma ọ merhen mẹ kpahen ẹmroma erana vwana ghwẹ ọke re jiri mẹ ẹgbukpe ri vrẹnren na.”

ỌKE ARHA DAMU UVWELE ẸHA ỌRHẸ UDUEFIGBERE ỌNỌ NI

9. Marhẹ e ru damu uvwele ẹha ọrhẹ uduefigbere i Gideon ni? (Ni ifoto obaro ọbe na.)

⁹ Ọke ra ha i Gideon mwu ẹrhẹ oguẹnzọn hin, o fori nọ huvwele ji dje uduefigbere phia. Na yẹriẹ owian ro mwuofẹn rọ nọ ghwọghọ agbarha i Baal ọsẹ ye o vwori. (Judg. 6:25, 26) Ọke oru, ọke ro koko isodja ye hin, na ta rẹn Gideon ọgbeva no ti nẹ uchunu isodja na. (Judg. 7:2-7) Ọrọkẹta, na ta riẹn nọ kparehaso ọko evwreghrẹn yen i jedọrhọ uvuẹn ason.​—Judg. 7:9-11.

10. Marhẹ ene ru damu oborẹ ọkpako ọ huvwele lele ni?

¹⁰ O fori nẹ ekpako i ‘mwuegbe aye ina huvwele.’ (Jas. 3:17) Ọkpako rọ huvwele, ọ homariotọre nyalele oborẹ i Baibol na ọ tare ọrhẹ ọkpọvi ro nẹ ukoko i Jehova rhe. Nyoma ọrana, no dje omamọ udje rẹn awọrọ. Ọrẹn, ana ji sabu damu oborẹ ọ huvwele lele ni. Jerẹ udje, ọnọ sabu bẹn riẹn ro no ru lele ọkpọvi ra yẹriẹ. Uvuẹn erhirhiẹ ezẹko, ọnọ sabu rhe roro sẹ ọkpọvi na ghini oborẹ ana sabu ha ruiruo yanghene ẹghwanren ọ havwiẹ. Yanghene ana sabu yẹ ye owian ro no fiẹ ugbomọphẹ ye rhẹ erhirhiẹ imwofẹn. Marhẹ ekpako ine ru hẹrokele uvwele ẹha i Gideon uvuẹn aruẹ erhirhiẹ erana?

11. Me yọ nọ sabu ha userhumu rẹn ekpako huvwele?

¹¹ Dabu kerhọ ọkpọvi ji haye ruiruo. Jehova ọ ta rẹn Gideon oborẹ ọnọ ghwọghọ agbarha ọsẹ ye lele, ekete rọ nọ bọn agbarha izobo ọkpokpọ ọrẹ i Jehova rhọ, ọrhẹ aranmo rọ nọ ha ze izobo. Gideon o vwo ẹhẹn eveva kpahen ọkpọvi na-a​—nọ ghwai nyalelie. Inyenana, ukoko i Jehova o tiobọnẹ ọkpọvi rẹn ekpako nyoma ileta, aghwoghwo ọrhẹ ọkpọvi sansan ri na lẹrhẹ ọwan tikẹrẹ i Jehova, ji hẹrote oma ọwan. Ame i vwo ẹguọlọ kpahen ekpako ra nyalele ọkpọvi Jehova. Ọsoso ukoko na ọ mẹrẹn erere.​—Ps. 119:112.

12. Marhẹ ekpako ine ru ha Hebrews 13:17 ruiruo, orhianẹ ukoko i Jehova o wene oborẹ o ruẹ ekwakwa lele?

¹² Mwuegbe wu ne ruẹ ewene. Karorhọ taghene Jehova ọ yẹ Gideon ọkpọvi no ti nẹ uchunu isodja ye omamọ. (Judg. 7:8) Manẹ ọ sabu roro: ‘A ghini guọlọ ewene ọnana? Ọnana ọnọ wian?’ Ọrẹn, Gideon nọ huvwele. Inyenana, ekpako a hẹrokele i Gideon nyoma aye a huvwele ọke ukoko na orho wene ọkpọvi rọ haphia. (Se Hebrews 13:17.) Jerẹ udje, uvuẹn ẹgbukpe 2014 Ugboma Usuon na no wene oborẹ a kwosa ebanbọn Aghwẹlẹ Uvie ọrhẹ Aghwẹlẹ Omẹvwa lele. (2 Cor. 8:12-14) Ikoko i vwa rha kwosa igho aye i momorin ra ha bọn ebanbọ-ọn. Ukpomaran, ikoko sansan uvuẹn akpọ na ne toro igho neneyo a sabu bọn eghwa ra na ha ruẹ ogame ọke ra guọliẹ, o toro sẹ ukoko na o vwo igho yanghene o vwo-o. Ọke i José o rhon kpahen ewene na, no vwo ẹhẹn eveva sẹ ọrana ọnọ sabu wian, no roro: ‘A tobọ bọn Aghwẹlẹ Uvie owu-u. Orhiẹ omana ye ruẹ ekwakwa obonẹ-ẹ.’ Mẹ yọ ha userhumu rẹn José hobọtua ọkpọvi na? Nọ tare: “Ẹmro ri ha Proverbs 3:5, 6 ni karorhọ mẹ taghene mi hẹroso i Jehova. Oborẹ o nerhumie rhe ọ merhoma omamọ! Vwana, ọwan a bọn Aghwẹlẹ Uvie buebun ne, ji yono ena sansan kpahen oborẹ ene ru toro itetoro neneyo igho na o te rẹn ukoko ephian.”

13. (a) Imwẹro ọgo yẹ Gideon o vwori? (b) Marhẹ ekpako ine ru hẹrokele i Gideon? (Ni ifoto na.)

¹³ Fiudugbere ruẹ ọhọre i Jehova. Gideon ọ huvwele i Jehova udabọ ofẹn ọrhẹ imwofẹn ri havwiẹ. (Judg. 9:17) Ọke i Jehova ọ yẹ ye imwẹro hin, Gideon no fiudugbere taghene Jehova ọnọ hobọtua ye, ọke rọ hẹrote ihworho Enẹyen. Ekpako re rhirhiẹ ẹkwotọre ra dobọ owian Uvie na ji, a hẹrokele i Gideon. Aye fiudugbere kobaro ruẹ ẹkwaphiẹrhotọre uyono ukoko ọrhẹ aghwoghwo udabọ ofẹn taghene ene mwu aye rhẹ ekanron, nọ aye enọ, ruẹ aye gbalogbalo, yanghene iruo aye ọnọ sabu va aye obọ.c Uvwre ukpokpogho rode na, ekpako ina guọlọ uduefigbere aye ine ru lele ọkpọvi ra yẹre aye​—o toro imwofẹn ri havwiẹ-ẹ. Ọkpọvi na ina sabu sekpahen ọrẹ ene ghwoghwo urhomu edje ri họhọ oso atita, ọrhẹ ọrẹ ene vwo usimi nẹ ẹkparehaso i Gog ọrẹ Magog.​—Ezek. 38:18; Rev. 16:21.

ỌKE ARHA DAMU EDIRIN ỌNỌ NI

14. Marhẹ e ru damu edirin Gideon ni?

¹⁴ Owian oguẹnzọn i Gideon, ọ guọlọ omẹgbanhon. Ọke itu i Midian a zẹ nẹ uvweri na uvuẹn ason, Gideon nọ hatua aye nẹ Ekete ro riotọre ọrẹ Jezreel ye te izede ro riẹ Urhie i Jordan na, ọkezẹko egbo ọrhẹ erhan i kinhariẹ ye. (Judg. 7:22) Gideon ọ domaji uvuẹn Jordan na? Ẹjo! Dedevwo oma ọ rhọriẹ ne, ọye ọrhẹ isodja ye ri te 300 ni danvrẹn ji hatua aye. Obẹtaye, aye ni mwu itu i Midian na, ji fiẹ aye kparobọ.​—Judg. 8:4-12.

15. Ọkiọgo ya na sabu damu edirin ọkpako ni?

¹⁵ Ọkezẹko, oma ọnọ sabu rhọ ọkpako fọkiẹ ewian sansan rọ nọ hẹrote ukoko na ọrhẹ ekruien. Uvuẹn aruẹ erhirhiẹ erana, marhẹ ekpako ine ru hẹrokele i Gideon?

16-17. Me yọ ha userhumu rẹn Gideon vwo edirin, imwẹro ọgo yẹ ekpako ina sabu vwo? (Isaiah 40:28-31) (Ni ifoto na.)

¹⁶ Hẹroso i Jehova taghene ono ruo gbanhon. Gideon ọ hẹroso i Jehova taghene ọnọ yẹ ye omẹgbanhon, Jehova nọ ghini yẹ ye. (Judg. 6:14, 34) Uvuẹn erhirhiẹ owu, Gideon ọrhẹ isodja ye i ha oghwẹ le irodje itu i Midian awanva, ọrẹn irodje na a ghwa ijaki. (Judg. 8:12, 21) Nyoma userhumu i Jehova, emọ Israel ni fikparobọ. Ekpako ina ji sabu hẹroso i Jehova, fọkime “oma ọ vwọ rhọye yanghene ghwọghiẹ-ẹ.” Ọnọ yẹ aye omẹgbanhon ọke aye a guọliẹ.​—Se Isaiah 40:28-31.

¹⁷ Roro kpahen oborẹ ọ phia rẹn Matthew, owuọwan usuẹn Hospital Liaison Committee. Me yọ ha userhumu riẹn vwo edirin? Matthew nọ tare: “Mi rhiẹromẹrẹn imwẹro rọ ha Philippians 4:13 ne. Ọgbọ buebun oma ọrhọ rhọ mẹ ne, ni mia nẹrhomo gbangbanhon, ji rẹ Osolobrugwẹ nọ yẹ mẹ omẹgbanhon mi guọlọre mi na hẹrote imizu ukoko na. Uvwre erhirhiẹ erana, mia mẹrẹn oborẹ i Jehova ọ yẹ mẹ ẹhẹn ọfuanfon na, ji ha userhumu mẹ vwo edirin.” Jerẹ i Gideon, ekpako ra wian gbanhan ina sabu vwo ebẹnbẹn ọke aye a hẹrote imizu ukoko na. Itiọrurhomẹmro, o fori nẹ aye i karorhọ taghene o vwo ekete omẹgbanhon aye ọ bare. Ọrẹn, aye ina sabu hẹroso i Jehova taghene ọnọ kpahenrhọ ẹrhomo aye, ji yẹ aye omẹgbanhon aye ine vwo edirin.​—Ps. 116:1; Phil. 2:13.

18. Ọrẹ ẹzẹkoko, marhẹ ekpako ine ru hẹrokele i Gideon?

¹⁸ O vwo ekwakwa buebun ekpako ina sabu yono mie i Gideon. O fori nẹ ekpako i dje uruemru dẹndẹn ọrhẹ omeriotọre phia uvuẹn uchunu owian aye ina sabu wian, ọrhẹ oborẹ aye a kpahanrhọ ye lele ọke erhe ruẹ oborẹ o biomirin aye evwan, yanghene erhe jiri aye. Aye ina vi huvwele ji dje uduefigbere phia, maido ọke akpọ ọnana o riẹ ehion ne na. O ji fo nẹ aye i vwo imwẹro taghene o toro ebẹnbẹn aye i rhiẹromẹrẹ-ẹn, Jehova ọnọ ye aye omẹgbanhon. Ọrẹ imwẹro, e vwo ọdaremẹro kpahen ekpako ra wian gbanhan, a ji “ha ukẹro ọghoghanren ni aye.”​—Phil. 2:29.