Rhe Mwuegbe Hẹrhẹ Ẹdẹ i Jehova

1. Me ye ne vi ru na sabu simirhọ uvuẹn ẹdẹ i Jehova na?

ỌKE i Baibol na ọ ta kpahen “ẹdẹ i Jehova,” ọ rionbọrhọ ọke i Jehova ọnọ ha evwreghrẹn yen guẹnzọn, ji simi ihworho yi. Uvuẹn ọke ahwanren, Jehova ọ ha ẹzeguon phia. (Isa. 13:1, 6; Ezek. 13:5; Zeph. 1:8) Uvuẹn ọke ọwan na, “ẹdẹ i Jehova” ọnọ tonrhọ rhẹ oghwọghọ i Babylon Ọrode na, ji vwoba uvuẹn uvweri Armageddon. Ne vwo usimi uvuẹn “ẹdẹ” ọrana, o fori ne mwuegbe vwana. Jesu o yonorin taghene a dabu mwuegbe hẹrhẹ “ukpokpogho rode” na, na ‘rha hẹrhiẹ’ ọke ephian.​—Matt. 24:21; Luke 12:40.

2. Mesoriẹ ana sabu mẹrẹn erere nẹ 1 Thessalonians?

² Uvuẹn ileta ọrukaro rẹ ọnyikọ Paul ọ ya vwe itu i Thessalonica, ọ ha idje sansan ruiruo ri na sabu ha userhumu rẹn Ilele Kristi mwuegbe hẹrhẹ ẹdẹ ẹzeguon i Jehova. Paul o rheri taghene ẹdẹ i Jehova ọ sa uvwre ọke ọrana-a. (2 Thess. 2:1-3) Udabọ ọrana, ọ ha orhetio rẹn imizu na nẹ aye i mwuegbe hẹrhẹ ẹdẹ ọrana kamẹriẹn ọ sa odẹrọsa, ọwan ina ji sabu ha urhebro ọrana ruiruo. Jene roro kpahen oborẹ o dje ekwakwa enana fiotọre lele: (1) oborẹ ẹdẹ i Jehova ọnọ rhe lele, (2) ihworho ri ne je vwo usimirhọ ẹdẹ ọrana, ọrhẹ (3) oborẹ ene ru mwuegbe na sabu simirhọ.

MARHẸ ẸDẸ I JEHOVA ỌNỌ RHE LELE?

3. Marhẹ ẹdẹ i Jehova ono ru rhe jerẹ ohi uvuẹn ason? (Ni ifoto na.)

³ “Ọ sa jerẹ ohi uvuẹn ason.” (1 Thess. 5:2) Ọnana yẹ idjedje ọrukaro usuẹn idjedje esa kpahen oborẹ ẹdẹ i Jehova ọnọ rhe lele. Ọgbọ buebun, ihi e so uvuẹn ason neneyo aye i sabu ruẹ ihworho ọrhan. Omaran ẹdẹ i Jehova ọnọ rhe kpregede, ro no gbe ihworho buebun unu. Ono gbe Ilele Kristi ezẹko unu kpahen oborẹ ekwakwa ina phia lele. Ọrẹn, ọrẹ ovẹnẹ rhẹ evwọkon na, a ghwọghọ ọwa-an.

4. Izede ọgo yẹ ẹdẹ i Jehova ọ họhọ omiamiamo uvwiẹ?

⁴ “Jerẹ oborẹ omiamiamo o rhirhiẹ ye rẹn ọmase rọ mẹrenvwan.” (1 Thess. 5:3) Ọmase rọ suvwiẹ, ọ vwọ sabu rhe ọke ro no vwiẹ-ẹ. Ọrẹn, o vwo imwẹro taghene ono vwiẹ. Orho ru, uvwiẹ na nọ phia kpregede, ọ miama, a vwa ji sabu dobọ ye jẹ-ẹ. Omaran ọ ji havwọ, ọwan e rhe ẹdẹ ọrhẹ unọke ẹdẹ i Jehova ọnọ tonrhọ-ọ. Udabọ ọrana, e vwo imwẹro taghene ọ sa, habaye ẹzeguon i Jehova kpahen evwọkon na ọnọ rhiọ kpregede, aye i ji vabọ ye-e.

5. Izede ọgo yẹ ukpokpogho rode na ọnọ họhọ igidurhiọke?

⁵ Jerẹ igidurhiọke. Udje ọresa ri Paul ọ ha ruiruo, nọ rharhumu hunute ihi re so uvuẹn ason. Ọrẹn, uvuẹn erhirhiẹ ọnana, Paul nọ ha ẹdẹ i Jehova dje igidurhiọke. (1 Thess. 5:4) Ihi re so uvuẹn ason, ina sabu so vrẹn ọke fọkiẹ ekwakwa aye so na. Ude urhiọke ọnọ sabu vwa aye, ji dje aye phia. Omaran ukpokpogho rode na ono ji ghwolo ihworho ra ha dje ihi ri ha okuku phia, fọkime aye vwobọrhọ ewian ri Jehova o vwo utuoma kpahen. Ọrẹ ovẹnẹ rhẹ aye, ana sabu mwuegbe nyoma ra na tiẹn irueruo ri Jehova o vwo utuoma kpahen, na hatua “aruẹ orhorhomu ọrhẹ irueruo ọvwata ephian ọrhẹ urhomẹmro.” (Eph. 5:8-12) Paul nọ ha idje eva erọrọ, e dje kpahen ihworho ri ne je simirhọ.

AYỌMO YI NA JA VABỌ ẸDẸ I JEHOVA?

6. Izede ọgo yẹ ihworho buebun a merhẹn? (1 Thessalonians 5:6, 7)

⁶ “Era merhẹn.” (Se 1 Thessalonians 5:6, 7.) Paul ọ ha ihworho ri ne je vwo usimirhọ uvuẹn ẹdẹ i Jehova na, e dje era merhẹn. Aye rhe kpahen ekwakwa ra phia kẹrẹ aye-e, yanghene oborẹ ọke ọ zẹ lele-e. Omarana, aye i vwa sabu vwẹruọ ekwakwa eghoghanren ra phia, ji kpahanrhọ ye-e. Ihworho buebun inyenana i họhọ era merhẹn. (Rom. 11:8) Aye vwo imwẹro kpahen ekwakwa ri djerie phia taghene ọwan e nyerẹn uvuẹn “ẹdẹ oba na” ne-e, taghene ukpokpogho rode ọnọ rhiọ phẹrẹkpẹ-ẹ. Ewene eduado i rha homaphia uvuẹn akpọ na, ọnọ sabu lẹrhẹ ihworho ezẹko dje ibiẹ omamerhomẹ phia kpahen iyẹnrẹn esiri na. Ọrẹn, buebun na rharhumu riẹ omerhẹn ukperẹ aye ina dẹrẹ. Ihworho ezẹko dede ri vwo imwẹro kpahen ẹdẹ ẹzeguon na, e roro taghene ọke na o ji jiri. (2 Pet. 3:3, 4) Ọrẹn kẹdẹkẹdẹ, nọ ghanran rhọ ra na ha urhebro ra na dẹrẹ ruiruo ọke ephian.

7. Marhẹ ihworho ri ne rhiẹromẹrẹn ẹzenguon i Jehova i ru họhọ idinyo?

⁷ “Era da inyo vrẹn oma.” Ọnyikọ Paul ọ ha ihworho ri Jehova ọnọ ghwọghọ dje idinyo. Ihworho ri dinyo vrẹn oma i vwa kiki djokarhọ oborẹ ọ phia kẹrẹ aye-e, aye ji brorhiẹn ri sọre. Omaran ọ ji havwọ, evwọkon na i vwa kpahanrhọ orhetio i Jehova-a. Aye a djẹ odjẹ ro suẹn riẹ oghwọghọ aye. Ọrẹn, a ta rẹn Ilele Kristi nẹ aye i sẹrorẹ iroro aye, nẹ aye i rhọmọ. (1 Thess. 5:6) Ọgba irherhe owu orho dje ẹrhọmọ ọnana rhiẹ “ohworho ro vwo iroro ọfọfọ ro vwo brudu, rọ dabu roro ekwakwa fiotọre vwẹre, neneyo ọ sabu brorhiẹn ri serhọ.” Mesoriẹ o fo ne vwo iroro ọfọfọ, ne je brudu? Neneyo e je vwobọrhọ irueruo usuon oseghe ọrhẹ ẹmro akpọ na. Ọhiẹn ra na homaba owuobọ uvuẹn ẹmro erana, ọnọ gbanhonrhọ ọke ẹdẹ i Jehova ọ tiẹkẹrẹ na. Ọrẹn, o fo ne brudu kpahen oborẹ ana kpahenrhọ ye lele-e. Ẹhẹn ọfuanfon i Jehova ọnọ ha userhumu rẹn ọwan vwo ẹhẹn ọfọfọ, ji brorhiẹn ri serhọ.​—Luke 12:11, 12.

ME YA NA SABU RU NE MWUEGBE HẸRHẸ ẸDẸ I JEHOVA?

8. Marhẹ 1 Thessalonians 5:8 o ru dje iruemru ri na ha userhumu rẹn ọwan dẹrẹ, ji sẹrorẹ iroro ọwan? (Ni ifoto na.)

⁸ ‘Ku ọsete udu . . . ọrhẹ . . . erhu ọgbogbanhon rhọ.’ Paul ọ harẹ ọwan dje isodja ra dabu dẹrẹ, ri ji ku owẹn uvweri rhọ. (Se 1 Thessalonians 5:8.) E fiẹrorhọ taghene isodja rọ ha owian, o mwuegbe hẹrhẹ uvweri ọke ephian. Omaran ọ ji havwọ rẹn ọwan. Ọwan a hẹrhẹ ẹdẹ i Jehova nyoma re ku ọsete udu ọrẹ esegburhomẹmro ọrhẹ ẹguọlọ rhọ, ji ha ifiẹrorhọ ruẹ erhu kuẹrhọ. Iruemru enana ina ha userhumu rẹn ọwan omamọ.

9. Marhẹ esegburhomẹmro ono ru sẹrorẹ ọwan?

⁹ Ọsete udu ọ sẹrorẹ ọmudu isodja. Omaran esegburhomẹmro ọrhẹ ẹguọlọ, ọ ji sẹrorẹ iroro ọwan. Iruemru erana a ha userhumu rẹn ọwan sabu ga i Jehova, ji nyalele i Jesu. Esegburhomẹmro ọ yẹ ọwan imwẹro taghene Jehova ọnọ kwosa rẹn ọwan fọkime a guọliẹ rhẹ ọsoso ọmudu ọwan. (Heb. 11:6) Ono mwu ọwan sẹrorẹ atamwu kpahen Osun ọwan, Jesu, orhianẹ a tobọ dẹrughwaroghwẹ ebẹnbẹn. Ana sabu ruẹ esegburhomẹmro ọwan gbanhon, ji nyerẹn ghele ebẹnbẹn akpọ na nyoma ra na djokarhọ idje Ilele Kristi ri sẹrorẹ atamwu aye udabọ ẹkparehaso, yanghene erhirhiẹ ọkanronmẹ. Ana ji sabu kẹnoma rẹn ufi ufiuvwele igho nyoma ra na hẹrokele idibo i Jehova ri ruẹ akpọ aye lọhọ, ji ha owian Uvie na karo.b

10. Marhẹ ẹguọlọ re vwo kpahen Jehova ọrhẹ ere rhirhiẹ kẹrẹ ọwan, o ru ha userhumu rẹn ọwan vwo edirin?

¹⁰ Ẹguọlọ ọ ji ghanren omamọ orhianẹ a guọlọ rha dẹrẹ, ji sẹrorẹ iroro ọwan. (Matt. 22:37-39) Ẹguọlọ re vwo kpahen Jehova ọnọ ha userhumu rẹn ọwan vwo edirin uvuẹn owian aghwoghwo na, udabọ ebẹnbẹn ra na sabu mẹrẹn. (2 Tim. 1:7, 8) Fọkime e vwo ẹguọlọ kpahen ihworho ri vwe ji rhiẹ idibo i Jehova, ne vwobọrhọ owian aghwoghwo na, tobọ ji ghwoghwo rẹn ihworho nyoma ifonu ọrhẹ ileta. E vwo ifiẹrorhọ taghene ẹdẹ owu, ihworho re rhirhiẹ kẹrẹ ọwan ina ghwẹriẹ ji ruẹ oborẹ ọgbare.​—Ezek. 18:27, 28.

11. Marhẹ ẹguọlọ re vwo kpahen imizu ukoko na o ru ha userhumu rẹn ọwan? (1 Thessalonians 5:11)

¹¹ Ẹguọlọ re vwo kpahen ereva ọwan o ji sekpahen imizu ukoko na. Ọwan dje aruẹ ẹguọlọ ọrana phia nyoma ra “ha urhebro rẹn owuowọnwan, jeghwai bọn owuowọnwan gbanhan.” (Se 1 Thessalonians 5:11.) Jerẹ isodja re fiuvweri kugbe, ọwan a ha urhebro rẹn owuowọnwan. Itiọrurhomẹmro, isodja owu ọnọ sabu kon isodja ọrọrọ ọke aye fiuvweri na, ọrẹn e rheri taghene ọ ha arudo ruie-e. Omaran ọ ji havwọ, ọwan i vwa ha arudo ruẹ oborẹ ono biomu imizu ukoko na evwa-an, yanghene ha ọdandan kwosa ọdanda-an. (1 Thess. 5:13, 15) E ji dje ẹguọlọ phia nyoma re mwuọghọ rẹn imizu ra kobaro uvuẹn ukoko na. (1 Thess. 5:12) Ọke i Paul ọ ya ileta ọnana, o ji te ẹgbukpe owu ra ha ukoko i Thessalonica mwu-u. Ọkezẹko, ekpako ra ha mwu na e ji te edje-e, aye ina ji sabu ruẹ orusọ ezẹko. Ọrẹn, o ji fo na họghọ rẹn aye. Ọke ukpokpogho rode na o tiẹkẹrẹ ne, ekpako yi ne rhe tiobọnu ọkpọvi buebun rẹn ọwan ọke ọrana. Ọkezẹko, a sabu mẹrẹn ọkpọvi mie Esiri Ukoko ọrhẹ Oghọn Ukoko-o; omarana, ọ ghanranren ne yono oborẹ ene ru vwo ẹguọlọ kpahen ekpako na ji mwuọghọ rẹn aye vwana. O toro oborẹ ọ phiare-e, jena sẹrorẹ iroro ọwan, a vwa tẹnrovi ijẹgba aye-e, ọrẹn a tẹnrovi oborẹ i Jehova ọ nyoma Kristi suẹn aye lele.

12. Marhẹ ifiẹrorhọ o ru sẹrorẹ iroro ọwan?

¹² Jerẹ oborẹ erhu ọgbogbanhon ọ sẹrorẹ urhomu isodja, omaran ifiẹrorhọ ọwan ọ sẹrorẹ iroro ọwan. Fọkiẹ ifiẹrorhọ ọgbogbanhon re vwori, e rheri taghene o vwo oborẹ akpọ na ọnọ sabu yẹ ọwa-an. (Phil. 3:8) Ifiẹrorhọ ọwan ọ ha userhumu rẹn ọwan sẹrorẹ ẹhẹn ọfọfọ. Ọrana yẹ oborẹ ọ phia rẹn Wallace ọrhẹ Laurinda, re rhirhiẹ Africa. Uvwre ikprughwre esa, ọsẹ i Wallace ọrhẹ izu i Laurinda ni hwuru. Fọkiẹ emiamo i COVID-19, aye a sabu riẹ oghwa ye kwomakugbe ekrun aye-e. Wallace nọ yare: “Ifiẹrorhọ ẹrhọmọnuhwu na ọ ha userhumu mẹ roro kpahen oborẹ aye ine rhirhiẹ uvuẹn ẹdẹ ọrukaro uvuẹn akpọ ọkpokpọ na, orhiẹ ẹdẹ ri kẹta aye i ki hwu-u. Ifiẹrorhọ ọnana ọ yẹre mẹ ẹhẹn ọfọfọ ọke mie mwuomarhọ, yanghene ọke ẹhẹn mẹ ọ tagha.”

13. Me ya na sabu ru ne vwo ẹhẹn ọfuanfon na?

¹³ “Are i vwe fuẹn erhanren ọrẹ ẹhẹn na-a.” (1 Thess. 5:19) Paul ọ ha ẹhẹn ọfuanfon na dje erhanren. Erhe vwo ẹhẹn ọfuanfon i Jehova, ne vwo oruru ọrhẹ omwemẹ re ne ruẹ oborẹ ọgbare, ọrhẹ omẹgbanhon ra na wian rẹn Jehova. (Rom. 12:11) Me ya na sabu ru ne vwo ẹhẹn ọfuanfon na? Ana sabu nẹrhomo ne vwo yi, yono i Baibol na, ji rhe riẹ uyono ukoko na. Erhe ruẹ omaran, ọnọ ha userhumu rẹn ọwan vwo “omamọ ẹhẹn ọfuanfon na.”​—Gal. 5:22, 23.

14. Me ya na vi kẹnoma riẹn na sabu rhe vwo ẹhẹn ọfuanfon i Jehova? (Ni ifoto na.)

¹⁴ Jehova ọrhọ yẹ ọwan ẹhẹn ọfuanfon na hin, o fori na jomarhotọre ne je “fuẹn erhanren ọrẹ ẹhẹn na.” Jehova ọ ha ẹhẹn ọfuanfon rẹn ihworho ra sẹrorẹ iroro ọrhẹ uruemru rọ fonron. Ọ yẹ ọwan ẹhẹn ọfuanfon na-a, orhianẹ e roro kpahen ekwakwa ri vwa fon, ji ruẹ lele aye. (1 Thess. 4:7, 8) Na sabu rhe vwo ẹhẹn ọfuanfon na, o ji fo na jomarhotọre na ja ha “ukẹro sakamu ni aruẹmẹrẹn sansan.” (1 Thess. 5:20) “Aruẹmẹrẹn sansan” o mevirhọ urhomu edje ri Jehova ọ yẹ ọwan nyoma ẹhẹn ọfuanfon na, tobọ te eri sekpahen ẹdẹ ẹzeguon yi ọrhẹ ọghanronmẹ ọke re nyerẹn te na. E vwe tiẹ ẹdẹ na nẹ ọmudu ọwa-an, ji roro taghene Armageddon ọ sabu phia uvuẹn ọke ọwa-an. Ukpomaran, e ruie nọ kpata​—nyoma ra dabu karorhọ ye​—nọyẹ, sẹrorẹ uruemru ro serhọ ji rhe dje “iruemru ọ ga Osolobrugwẹ” phia kẹdẹkẹdẹ.​—2 Pet. 3:11, 12.

“JENE EKWAKWA EPHIAN I DABU MWU ARE ẸRO”

15. Marhẹ ene ru kẹnoma rẹn iyẹnrẹn efian ọrhẹ iyono ikpodje? (1 Thessalonians 5:21)

¹⁵ Phẹrẹkpẹ, evwreghrẹn Jehova i se ghwoghwo: “Ufuoma ọrhẹ omefuon!” (1 Thess. 5:3) Iyẹnrẹn efian ikpodje na, ọnọ vuọn otọrakpọ na ji phiẹ ihworho buebun rhọ. (Rev. 16:13, 14) Nẹ ọwan vwo? A phiẹ ọwan rhọ-ọ, orhianẹ ‘ekwakwa ephian i dabu mwu ọwan ẹro [yanghene, a dabu “damu” aye ni].’ (Se 1 Thessalonians 5:21; ẹmro re dje fiotọre.) Ẹmro i Greek ra rhian rhẹ “dabu mwu are ẹro,” a hariẹ ruiruo sekpahen oborẹ a damu omamọ uteru lele. Omarana, o fori na damu oborẹ e rhon ọrhẹ oborẹ e se ni, no mwu ọwan ẹro sẹ ghini urhomẹmro. Ọrana emru ọghoghanren harẹn itu i Thessalonica, ono ji rhiẹ emru ọghoghanren rẹn ọwan ra dẹrughwaroghwu ukpokpogho rode na. Ukperẹ ana ghwai kwerhọ oborẹ awọrọ a ta, o fori na ha omẹgbanhon iroro ọwan ra dabu yono, ha vwanvwọn oborẹ e seri ọrhẹ oborẹ e rhonrin, rhẹ oborẹ ọ ha uvuẹn i Baibol na ọrhẹ oborẹ ukoko i Jehova e yono. Erhe ruẹ omaran, arha sabu phiẹ ọwan rhọ nyoma iyẹnrẹn efian ikpodje-e.​—Prov. 14:15; 1 Tim. 4:1.

16. Obọdẹn ifiẹrorhọ ọgo ye vwori, me ye ne ruo?

¹⁶ Jerẹ ẹko, idibo i Jehova ina vrẹn ukpokpogho rode na. Harẹn owuowọnwan, e rhe oborẹ odẹrọsa ọnọ rhua rhe-e. (Jas. 4:14) Udabọ ọrana, sẹ ọwan e ji nyerẹn ọke ukpokpogho rode na ọnọ rhe, yanghene e hwu ne, ene vwo arhọ i bẹmẹdẹ orhianẹ a sẹrorẹ atamwu ọwan. Era ha ẹhẹn ọfuanfon djẹha ine leli Jesu rhirhiẹ odjuwu. Igegede ereva na ine rhirhiẹ otọrakpọ i paradais. Jenẹ ọwan ephian i tẹnrovi obọdẹn ifiẹrorhọ re vwori, ji rhe mwuegbe hẹrhẹ ẹdẹ i Jehova!