UYONO 12
Me yọ nọ ha Userhumu wẹn Dabu Fiomarhọ Uyono i Baibol na?
A mẹrẹn erere buebun erhe yono i Baibol na. Ọrẹn, orhiẹ ọke ephian yọ lọhọ-ọ. Ọkezẹko, we roro sẹ wu na sabu rhe yono i Baibol na. Mesoriẹ wu na damoma neneyo wu je rhe fiobọrhotọre? Me yọ nọ ha userhumu wẹn fiomarhọ ye udabọ ebẹnbẹn?
1. Mesoriẹ uyono i Baibol ọghanren?
“Ẹmro Osolobrugwẹ o nyerẹn, ọ jeghwai vwo omẹgbanhon.” (Hebrews 4:12) Baibol na ọghanranren fọkime ọ ta rẹn ọwan kpahen iroro Osolobrugwẹ ọrhẹ ọdamẹ ro vwo kpahuọn. Ọnọ ha userhumu wẹn vwo irherhe, obọdẹn ẹghwanren ọrhẹ ifiẹrorhọ. Ọrọ mai ghanren, Baibol na ọnọ ha userhumu wẹn rhiẹ ugbehian i Jehova. We rhe yono i Baibol na, nu we kwe nẹ omẹgbanhon rọ havwiẹ ọ hobọte akpenyerẹn ọnọ.
2. Mesoriẹ o fo ne wu ha ukẹro ọghoghanren ni urhomẹmro i Baibol na?
Irhomẹmro ri ha uvuẹn i Baibol na i họhọ efe eghoghanren. Ọnana yẹ ọsoriẹ i Baibol na o jirie rẹn ọwan na ‘dẹ urhomẹmro na, ọrẹn, avwa rhẹ ye-e.’ (Proverbs 23:23) Arha karorhọ oborẹ urhomẹmro i Baibol na ọ ghanren te, na damoma fiomarhẹ uyono i Baibol na, dedevwo a dẹrughwaroghwu ebẹnbẹn.—Se Proverbs 2:4, 5.
3. Marhẹ i Jehova ono ru ha userhumu wẹn rhe yono i Baibol na?
Jehova ọ guọlọ ha userhumu wẹn ne wu yono kpahiẹn, fọkime ọye yẹ Ọmemama rode ọrhẹ Ugbehian ọnọ. Ọnọ sabu yọ ‘omwemẹ kugbe omẹgbanhon wu na ha ruiruo.’ (Se Philippians 2:13.) Omarana, wu rha guọlọ userhumu ne wu sabu yono, yanghene ha oborẹ wu yonorin ruiruo, ọnọ sabu ha userhumu wẹn. Orhianẹ wu guọlọ omẹgbanhon mie yi ne wu sabu fi ebẹnbẹn yanghene ẹkparehaso kparobọ, ono tiobọnie wẹn. Rha nẹrhomo vwe i Jehova ọke ephian nọ ha userhumu wẹn rhe yono i Baibol na.—1 Thessalonians 5:17.
YONO KODO RHỌ
Yono oborẹ wu ne ru sabu rhe yono i Baibol na dedevwo we vwo ọke-e, yanghene udabọ ẹkparehaso. Orho ru, gbe yono kpahen oborẹ i Jehova ono ru ha userhumu wẹn fiomarhọ ye.
4. Ha ukẹro ọghoghanren ni uyono i Baibol ọnọ
Ọkezẹko fọkiẹ ekwakwa buebun re ruẹ, nọ họhọre taghene e vwo ọke re ne yono i Baibol na-a. Me yọ nọ ha userhumu wẹn? Se Philippians 1:10, orho ru, are i gba kpahenrhọ enọ enana:
Me wu rorori taghene yẹ ekwakwa ri “mai ghanren” uvuẹn akpenyerẹn?
Marhẹ wu ne ru ni uyono i Baibol ọnọ ghanghanren?
Wu rha kwrọ eyẹn vuọn ukoroba, ji kwrọ itita rhọ ye, itita na i sabu gba ye-e
Ọrẹn, orhianẹ itita na ye wu kiki kwrọ rhọ ye, ne wu na sabu kwrọ joma ọsoso eyẹn na rhọ ye. Omaran ọ ji havwọ, wu rha ha “ekwakwa ri mai ghanren” karo uvuẹn akpenyerẹn ọnọ, wu ne fikparobọ, ji vwo ọke wu ne ruẹ ekwakwa erọrọ
Uyono i Baibol ọ ha userhumu rẹn ọwan yono kpahen Osolobrugwẹ, ọrhẹ oborẹ ana ga ye lele. Se Matthew 5:3, orho ru, are i gba kpahenrhọ onọ ọnana:
Erere ọgo ya na mẹrẹn arha ha uyono i Baibol ọwan ghanghanren?
5. Vwo erhionrin udabọ ẹkparehaso
Ọkezẹko, ihworho ezẹko ina damoma lẹrhẹ ẹhọn seriotọre neneyo wu je rhe yono i Baibol na. Djokarhọ udje i Francesco. Kporo IVIDIO na, orho ru, are i gba kpahenrhọ enọ enana.
Uvuẹn ividio na, marhẹ ekrun ọrhẹ igbehian i Francesco i kpahenrhọ ye lele ọke rọ ta rẹn aye kpahen oborẹ o yono?
Marhẹ o ru mẹrẹn erere nime o vwo erhionrin?
Se 2 Timothy 2:24, 25, orho ru, are i gba kpahenrhọ enọ enana:
Me yẹ ekruon ọrhẹ igbehian e roro kpahen oborẹ we yono na?
Sekpahen eghwẹmro enana, marhẹ wu na kpahenrhọ ye lele orhianẹ oma ọvwọ merhen ohworho taghene we yono i Baibol na-a? Mesoriẹ?
6. Hẹroso i Jehova taghene ọnọ ha userhumu wẹn
Erhe tiẹkẹrẹ i Jehova, ọdamẹ re ne ru oborẹ ọnọ merhiẹn oma nọ nọ gbanhonrhọ. Ọrẹn, ọnọ sabu bẹn ọkezẹko re ne ruẹ ewene uvuẹn akpenyerẹn ọwan na sabu nyamwu evwan enẹyen. Orhianẹ we rorie omaran, wu vwe fiobọrhotọre-e. Jehova ọnọ ha userhumu wẹn. Kporo IVIDIO na, orho ru, are i gba kpahenrhọ enọ enana.
Uvuẹn ividio na, ewene ego yi Jim o ruru neneyo ọ sabu rha lẹrhẹ oma merhen i Jehova?
Me yọ lẹrhẹ udje yi merhuọn oma?
Se Hebrews 11:6, orho ru, are i gba kpahenrhọ enọ enana:
Me yi Jehova ono ru rẹn ihworho “ra guọliẹ nẹ otọre ẹhẹn sa,” nọyẹ, eri guọlọ yono kpahiẹn, jeghwai ru oborẹ ọnọ merhiẹn oma?
Me yẹ ọnana o yoniruon kpahen oborẹ oma o ru i Jehova ọke rọ mẹrẹn omẹdamu ọnọ we yono i Baibol na?
OHWORHO ỌNỌ SABU NỌ: “Mesoriẹ we yono i Baibol na?”
Marhẹ wu na kpahenrhọ ye lele?
ME WU YONORIN?
Dedevwo ọ lọhọ-ọ, we rhe yono i Baibol na, ọnọ ha userhumu wẹn riamerhen akpenyerẹn bẹmẹdẹ. Rha hẹroso i Jehova, ọye nọ nọ ha ebrurhọ wẹn.
Ẹzẹkoko
Mesoriẹ irhomẹmro i Baibol na a ghanren ha wẹn?
Marhẹ wu ne ru “gbẹro rhẹ ekwakwa ri mai ghanren”?
Mesoriẹ o fo ne wu nekpẹn userhumu mie i Jehova ne wu sabu rhe yono i Baibol na?
GUỌLỌ IYẸNRẸN ERỌRỌ
Yono kpahen ena ẹne ri ha userhumu rẹn ihworho buebun ha ọke aye ruiruo rhẹ ẹghwanren.
“Oborẹ Wu Ne Ru Ha Ọke Ọnọ Ruiruo Rhẹ Ẹghwanren” (Awake!, February 2014)
Ni oborẹ i Jehova o ru ha userhumu rẹn ọmase owu, rẹ esa ye o vwo vwẹruọ oborẹ ọsoriẹ ọ ga Osolobrugwẹ.
Ni oborẹ ọhworhare owu o ru mẹrẹn erere fọkiẹ erhionrin rẹ aniẹ o djephia.
Ọkezẹko, e kperi Iseri Jehova taghene aye ya lẹrhẹ onyerẹnkugbe uvuẹn ekrun ghwọghọ. Ọrẹn, ọrana urhomẹmro?
“Iseri Jehova a Ghwọghọ Ekrun Gbinẹ Aye a Bọn Ekrun Gbanhan?” (Urhomu-ẹmro rọ ha uvuẹn itanẹti)