UYONO 40
Marhẹ Ene Ru Fon Uvuẹn Ukẹro Osolobrugwẹ?
Roro kpahen izu ro vwo ẹguọlọ, ro mwuegbe ọmọyen ọhworhare rọ guọlọ riẹ isukuru. Ọ damoma wọ ọmọ na, ji ruẹ ewun isukuruie fuan, ji fẹro. Ọnana nọ lẹrhẹ ọmọ na vwo omọkpokpọ, nọ ji lẹrhẹ awọrọ rhe taghene eri vwiẹriẹ a dabu hẹrote yi. Jerẹ oborẹ emiemọ i guọlọre nẹ emọ aye i fon, omaran Ọsẹ ọwan Jehova, ọ ji guọlọ nẹ ọwan i fon ọrẹ ugboma, ọrẹ uruemru, ọrẹ ẹmro ẹta, ọrhẹ irueruo ọwan. Ọwan i rha fon, a mẹrẹn erere, jeghwai brọghọ rhẹ i Jehova oma.
1. Marhẹ ọwan ine ru sabu fon ọrẹ ugboma?
Jehova ọ ta rẹn ọwan: “Are ina vi fon.” (1 Peter 1:16) Ne rhiẹ ihworho ri fonron, o mevirhọ taghene ana vi fon ọrẹ uruemru ọrhẹ ọrẹ ugboma. Ọwan ina sabu fon ọrẹ ugboma nyoma ra wọ ọke ephian, ọrhẹ ọra fọnrhọn iwun ọwan, ji ru idjighere, imotosaikoro ọrhẹ imoto ọwan fuan ọke ephian. Ana ji sabu hobọtua erufon ọrẹ Aghwẹlẹ Uvie ọwan. Ra na fon ọrẹ ugboma, o brọghọ rhẹ i Jehova oma.—2 Corinthians 6:3, 4.
2. Na sabu fon, iruemru ego ya na kẹnoma riẹn?
Baibol na o jiririe rẹn ọwan ne “ru oma ọwan fon nẹ i kemru kemru ri rhiẹ aghwa rẹn ugboma ọrhẹ ẹhẹn na.” (2 Corinthians 7:1) Omarana, na damoma ra na kẹnoma rẹn i kemru kemru ri na sabu suẹ ẹkuọn rẹn ugboma ọrhẹ iroro ọwan. O fori nẹ oborẹ e roro ọ lẹrhẹ oma merhen i Jehova, omarana, na damoma tiẹn iroro esọsọ. (Psalm 104:34) Ọwan a ji damoma tẹmro ri serhọ ọke ephian.—Se Colossians 3:8.
Emru ọrọrọ ọgo yọ nọ lẹrhẹ ọwan ja fon ọrẹ ugboma ọrhẹ ọrẹ uruemru? Ekwakwa ezẹko i havwiẹ ri na sabu suẹ ẹkuọn rẹn ugboma ọwan. Omarana, o fori na kẹnoma rẹn ekwakwa jerẹ itaba, igbo, ọrhẹ imwu ra ha ruiruo izede rọ sọre. Arha kẹnoma rẹn ekwakwa enana, ene vwo omọkpokpọ, ọwan ne ji djephia taghene e vwo ọdaremẹro kpahen ẹghẹlẹ ọrẹ arhọ. Ọwan a damoma na fon ọrẹ uruemru, nyoma ra wọnrọn hasuẹ iruemru ri vwa fon jerẹ irueruo ọfanrhiẹn ra bẹlẹ oma, ọrhẹ ifoto yanghene ughe ihworho ri banfirhọ. (Psalm 119:37; Ephesians 5:5) Ọnọ sabu bẹn re ne tiobọnu iruemru enana, ọrẹn, Jehova ọnọ ha userhumu rẹn ọwan tiobọnu aye.—Se Isaiah 41:13.
YONO KODO RHỌ
Yono kpahen oborẹ ọwan e ru brọghọ rhẹ i Jehova oma nyoma ra fuan izede ọrẹ ugboma, jeghwai mẹrẹn oborẹ ene ru tiobọnu irueruo ri vwa fon.
3. Ẹfuọn ọrẹ ugboma o brọghọ rhẹ i Jehova oma
Erhe se irhi i Jehova ọ yẹ agbamwa Israel, ne yono oborẹ ọsoriẹ ọ ghanren hariẹn nẹ ihworho yi i fon. Se Exodus 19:10 ọrhẹ 30:17-19, orho ru, are i gba kpahenrhọ enọ enana:
Me yẹ eghwẹmro enana i yonirin ọwan kpahen ukẹro i Jehova ọ ha ni ẹfuọn ọrẹ ugboma?
Me wu ne rhe ruẹ ne wu sabu fon ọrẹ ugboma ọke ephian?
Ọ ha ọke ọrhẹ omẹdamu na sabu fon ọrẹ ugboma. Ọrẹn, o toro ekete re rhirhiẹ-ẹ, sẹ ọwan ivwiegbere yanghene edafe, ana sabu ruie. Kporo IVIDIO na, orho ru, are i gba kpahenrhọ onọ ọnana.
Marhẹ ekwakwa ọwan re ruẹ fuan, ji fẹro, o ru brọghọ rhẹ owian aghwoghwo na?
4. Tiobọnu iruemru ibiobiomu
Jehova ọnọ sabu ha userhumu rẹn ọwan tiobọnu iruemru ibiobiomu
We rhe phopho isigẹti, yanghene ha imwu egbogbanhon nẹ ẹhẹn ọnọ ọ sabu totọre, wu ne rhe oborẹ ọ bẹn te re ne tiobọnie. Me yọ nọ sabu ha userhumu wẹn? Roro kpahen oborẹ uruemru na ọnọ hobọto lele. Se Matthew 22:37-39, orho ru, are i gba ta kpahen oborẹ itaba ẹha yanghene imwu ra ha ruiruo izede rọ sọre, o ru hobọte . . .
onyerẹnkugbe ohworho o vwori rhẹ i Jehova.
ekrun ọravwọ, ọrhẹ ereva ye.
Djiroro wu ne tiobọnu uruemru obiobiomu.a Kporo IVIDIO na.
Se Philippians 4:13, orho ru, are i gba kpahenrhọ onọ ọnana:
Marhẹ ẹrhomo ẹnẹ, uyono i Baibol, ọrhẹ uyono ẹnya ọke ephian, ono ru yẹ ohworho omẹgbanhon ro no tiobọnu uruemru obiobiomu?
5. Wọnrọn hasuẹ iroro ọrhẹ irueruo ri vwa fon
Se Colossians 3:5, orho ru, are i gba kpahenrhọ enọ enana:
Marhẹ ọwan i ru rhe taghene i Jehova o vwo utuoma kpahen ifoto yanghene ughe ihworho ri banfirhọ, ọrhẹ ọre dje iyẹnrẹn, ifoto yanghene ughe ihworho ri banfirhọ vwo ohworho, kugbe irueruo ọfanrhiẹn ra bẹlẹ oma?
Wu rorori taghene o dje ọhọ phia ri Jehova ọnọ guọlọ taghene ọwan i fon ọrẹ uruemru? Mesoriẹ?
Guọlọ otọre oborẹ ene ru wọnrọn hasuẹ iroro ri vwa fon. Kporo IVIDIO na.
Jesu ọ ha udje owu ruiruo, ro djephia taghene ana vi damoma vwo omwemẹ na sabu fon ọke ephian. Se Matthew 5:29, 30, orho ru, are i gba kpahenrhọ onọ ọnana:
Jesu ọvwọ haye ta taghene a ha ẹkuọn rẹn oma ọwa-an, ukpomaran, ọ guọlọre na kpare idjaghwẹ. Udjoghwẹ ẹghwanren ọgo yẹ ohworho ọnọ sabu kpare nọ sabu kẹnoma rẹn iroro ri vwa fon?b
Jehova o ni omẹdamu ọnọ ghanghanren, wa rha damoma ne wu tiobọnu iroro ri vwa fon. Se Psalm 103:13, 14, orho ru, are i gba kpahenrhọ onọ ọnana:
Wa rha damoma wu ne tiobọnu uruemru rọ vwọ fon, marhẹ ekete i Baibol ọnana o ru ha urhebro wẹn ne wu rha damoma rhọ?
Wu vwe fiobọrhotọre-e!
Ọnọ sabu lọhọ wu ne roro taghene, ‘Mi rharhumu se rhẹ ufi na ne, mi na ghwai fiobọrhotọre.’ Ọrẹn, gbe roro kpahen udje ọnana: Ohworho rọ zorhẹ ọrhọ kproghwẹ, jeghwai se, ọrana orho mevirhọ taghene o fiabọ uvuẹn orhẹzẹ na ne-e, yanghene nọ nọ ghwẹrioma ya rharhumu tuẹn orhẹ na rhọ-ọ. Omaran ọ ji havwọ, wu rha rharhumu se rhẹ ufi na, ọrana orho mevirhọ taghene wu rha sabu tiobọnẹ orharhere uruemru na-a. Habaye, oma ọnọ ji merhuọn taghene wa damoma ruẹ riaro. Wu vwe jenẹ ẹhẹn ọnọ o seriotọre omamọ, orhianẹ wu rharhumu se rhẹ ufi na-a. Wu vwe fiobọrhotọre-e! Rhẹ userhumu i Jehova, wu na sabu fi orharhere uruemru na kparobọ.
OBORẸ IHWORHO EZẸKO A TA: “Ọ rienrianren mẹ ne. Mi sabu dobọjẹ-ẹ.”
Ekete i Baibol ọgo ye wu na sabu dje rẹn ohworho taghene rhẹ userhumu i Jehova, ọravwọ ọnọ sabu tiobọnu orharhere uruemru?
ME WU YONORIN?
Ọwan a lẹrhẹ oma merhen i Jehova nyoma re ruẹ oma ọwan, iroro ọwan, ọrhẹ iruemru ọwan fuan ọke ephian.
Ẹzẹkoko
Mesoriẹ ọ ghanren na fon ọke ephian?
Marhẹ wu ne ru sabu fon ọrẹ ugboma?
Marhẹ wu ne ru sabu ru iroro ọrhẹ uruemru ọnọ fon ọke ephian?
GUỌLỌ IYẸNRẸN ERỌRỌ
Ekwakwa elolọhọ ego ye wu na sabu ru ne wu sabu fon ọrẹ ugboma, dedevwo we vwo igho bu-un?
Guọlọ otọre idjaghwẹ kirighwo wu na sabu kpare ne wu sabu dobọ isigẹti ephopho ji.
Yono kpahen oborẹ ifoto yanghene ughe ihworho ri banfirhọ ọ sua.
Se kpahen oborẹ ọhworhare owu ro vwo uruemru ro ni ifoto yanghene ughe ihworho ri banfirhọ, o ru sabu fiekparobọ.
“Mi Seri Ọgbọ Buebun mi ki Fikparobọ” (Oghwa Odẹrẹ Ikekele 4 2016)
a Urhomu-ẹmro na “Oborẹ Ene Ru Tiobọnu Isigẹti Ephopho,” rọ ha uvuẹn oghọn na Guọlọ Iyẹnrẹn Erọrọ, uvuẹn uyono ọnana, o dje kpahen idjaghwẹ ra na kpare na sabu tiobọnu iruemru ibiobiomu.
b Wu rha guọlọ userhumu wu ne tiobọnu irueruo ọfanrhiẹn ra bẹlẹ oma, se urhomu-ẹmro na “Marhẹ mi ne ru Tiobọnu Irueruo Ọfanrhiẹn ra Bẹlẹ Oma?” uvuẹn ọbe na Questions Young People Ask—Answers That Work, Ẹrhiọ 1, urhomu-ẹmro 25.