Marhẹ Ekrun Ọnọ Ono Ru Sabu Vwo Omamerhomẹ?

1. Mesoriẹ orọnmo orhiẹ oborẹ ọghanren harẹn omamerhomẹ ekrun?

Obẹ i Jehova Osolobrugwẹ rẹ oma ọmerhan, ọyẹ iyẹnrẹn esiri na o nurhe, rọ je guọlọ taghene ikrun i vwo omamerhomẹ. (1 Timothy 1:11) Ọye yẹ ọ ton orọnmo rhọ. Orọnmo re ru lele urhi ọghanren omamọ harẹn omamerhomẹ ekrun, nime ọ ha omefuon rẹn emọ na. Ilelikristi ena ha oma riotọrẹ rẹn urhi igomẹti ro se kpahen orọnmo.—Se Luke 2:1, 4, 5.

Ukẹro ọgo yẹ Osolobrugwẹ ọ ha nẹ orọnmo? Ọye ọguọlọre taghene esa rhẹ ane i nyerien bẹmẹdẹ. Jehova ọguọlọrẹ taghene esa rhẹ ane i fon-evwan harẹn owuowọnwan. (Hebrews 13:4) Ọye o vwo utuoma kpahen orọnmo ẹfan. (Malachi 2:16) Orẹn, ọ ha uphẹn rẹn Ilelikristi nẹ aye fan orọnmo, ji rharhumu rọnmọ ọrho rhirhiẹ taghene owu usun aye ọ gwọwẹ.—Se Matthew 19:3-6, 9.

2. Marhẹ esa rhẹ ane ine nyerẹn lele uvuẹn orọnmo?

Jehova ọ ma ehworhare rhẹ emẹse ne aye ha obọ tua owuowọnwan. (Genesis 2:18) Rẹ ọye o rhiẹ urhomu harẹn ekrun na, esa yẹ ọnọ kẹ obaro rọ nọ ha ekwakwa ugboma rẹn ekrun ọnẹyen, jeghwai yono aye kpahen Osolobrugwẹ. Ọye ono vwo ẹguọlọ okokodo kpahen aniẹ. Esa rhẹ ane i vwo ẹguọlọ kugbe ọghọ kpahen owuowọnwan. Rẹ esa rhẹ ane re rhiẹ ihworho re vwa gba na, ofori taghene aye iyono oborẹ a harhomẹ lele, neneyo omamerhomẹ orhirhiẹ orọnmo na.—Se Ephesians 4:31, 32; 5:22-25, 33; 1 Peter 3:7.

3. Ofori ne wu vẹnrẹn nẹ orọnmo ebẹnbẹn e havwọ?

Are rha mẹrẹn ebẹnbẹn uvuẹn orọnmo na, are awanva e damoma nyerẹn ọrẹ ẹguọlọ. (1 Corinthians 13:4, 5) Ẹmro Osolobrugwẹ o jirie taghene akwa rie nẹ orọnmo fọkiẹ ebẹnbẹ-ẹn.—Se 1 Corinthians 7:10-13.

4. Emọ, oka-akpọ ọgo yẹ Osolobrugwẹ ọ guọlọre nẹ are i nyerẹn?

Jehova ọguọlọre taghene oma ọmerhen are. Ọ yẹ rẹ are omamọ urhebro kpahen oborẹ are ine ru sabu mẹrẹn omamerhomẹ uvuẹn ẹrhẹ uphuphẹn are. Ọ guọlọre taghene are emẹrẹn erere nẹ ẹghwanren ese rhẹ izu are. (Colossians 3:20) Jehova ọ ji guọlọ taghene are emẹrẹn aghọghọ ọke are e ru oborẹ ọlẹrhẹ oma merhiẹn rhẹ Ọmọ yen.—Se Ecclesiastes 11:9–12:1; Matthew 19:13-15; 21:15, 16.

5. Emiọmo, marhẹ emọ are ine ru sabu vwo omamerhomẹ?

Are ena wian gbanhọn neneyo, emọ are i sabu mẹrẹn emarẹn re, oghwa aye ine rhirhiẹ rhẹ iwun aye ine kurhọ. (1 Timothy 5:8) Neneyo oma ọmerhen emọ dẹn, are ine ji yono aye nẹ aye vwo ẹguọlọ kpahen Osolobrugwẹ, ji yono mie yi. (Ephesians 6:4) Omamọ udje ẹguọlọ are i vwori kpahen Osolobrugwẹ rẹ aye amẹrẹn, ono ha obọ te ọmudu ọrẹ aye. Wu rha ha uyono na kpahen Ẹmro Osolobrugwẹ, ọnọ bọn iroro ọmọ gbanhon lele izede rọ phionren.—Se Deuteronomy 6:4-7; Proverbs 22:6.

We rhe jiri emọ, jeghwai fiudu rhọ aye aghwẹ, ọ lẹrhẹ oma merhen aye. Aye ji guọlọ ọkpọvi rhẹ ọghwọghwu. Iyono erena, ine simi aye nẹ iruemru re na sabu lẹrhẹ aye mwomarhọ. (Proverbs 22:15) Ọrẹn, ọghwọghwu o vwo rhiẹ ọrẹ i jojojo-o yanghene ọrẹ ọko-on.—Se Colossians 3:21.

Iseri Jehova i fomu ẹbe sansan re na sabu ha userhumu rẹn esẹ rhẹ izu kugbẹ emọ. A ya rẹ aye nẹ uvuẹn i Baibol na rhe.—Se Psalm 19:7, 11.