ARHA ta kpahen ẹrhomo, ẹga buebun e yono taghene oborẹ ana rhua oma lele ọrhẹ ẹmro ra na ha ruiruo yọ mai ghanren. Ọrẹn Baibol na ọ ha userhumu rẹn ọwan rhe oborẹ ọ mai ghanren, jeghwai ta kpahen onọ ọghoghanren ọnana, “Marhẹ yo fori na nẹrhomo lele?”

Baibol na ọ ta kpahen idibo Osolobrugwẹ ri nẹrhomo uvuẹn ekete ọrhẹ erhirhiẹ sansan. Aye i nẹrhomo uvuẹn ẹhẹn aye yanghene nẹrhomo phia, lele oborẹ erhirhiẹ na ọ havwọ. Aye i nẹrhomo kpare ughwaro rierun yanghene gburhomu rhotọre. Ukperẹ aye ina ha ema, itama, yanghene ọbe ẹrhomo ruiruo ọke aye a nẹrhomo, aye na nẹrhomo nẹ ẹhẹn sa rhẹ ẹmro omobọ aye. Mesoriẹ Osolobrugwẹ ọ kpahenrhọ ẹrhomo aye?

Jerẹ oborẹ a hunute uvuẹn urhomu-ẹmro rọ vrẹnren na, aye i nẹrhomo aye vwe Osolobrugwẹ ro rhiẹ i Jehova ọvo. O ji vwo iroro ọghoghanren ọrọrọ. Ọwan i rhe se uvuẹn 1 John 5:14 taghene: “Ọnana yẹ imwẹro ọwan i vwo kpahiẹn, taghene kemru kemru ra nekpẹn yen ro serhọ rhẹ ọhọre ọnẹyen, ọye ọnọ kpahenrhọ ye rẹn ọwan.” O fori nẹ ẹrhomo ọwan o serhọ rhẹ ọhọre Osolobrugwẹ. Me yẹ ọrana o mevirhọ?

Na sabu nẹrhomo no serhọ rhẹ ọhọre Osolobrugwẹ, o fori ne rhe ọhọriẹ vwẹre. Omarana erhe yono i Baibol na, ọnọ ha userhumu rẹn ọwan rhe oborẹ ana nẹrhomo kpahen. Ọnana nọ mevirhọ taghene ọwan erhe rhe i Baibol na-a, Osolobrugwẹ nọ nọ tiẹn ẹrhomo ọwan? Ẹjo, ọrẹn Osolobrugwẹ ọ guọlọre ne rhe ọhọriẹ, vwẹruọ ye, jeghwai ru lelie. (Matthew 7:21-23) O fori na nẹrhomo no serhọ rhẹ oborẹ ọwan e yono.

Ọke ọwan erhe yono kpahen Jehova ọrhẹ ọhọriẹ, esegburhomẹmro ọwan nọ dua rhọ, ro rhiẹ emru ọghoghanren ọrọrọ ra guọlọre uvuẹn ẹrhomo. Jesu nọ tare: “Ọsoso ekwakwa are i nekpẹn yen uvuẹn ẹrhomo, are i rhe vwo esegburhomẹmro, are ine vwo aye.” (Matthew 21:22) Ne vwo esegburhomẹmro o mevirhọ taghene, ene vwo imwẹro kpahen ekwakwa ri vwe rhiẹ urhomẹmro-o. Ukpomaran, o mevirhọ ọrẹ ene vwo ekwerhọ kpahen oborẹ a vwa mẹrẹn, takpu imwẹro ọgbogbanhon ọ havwiẹ. (Hebrews 11:1) Baibol na ọ vuọnren rhẹ imwẹro ri djephia taghene Jehova ra vwa mẹrẹn na o nyerẹn, ana sabu hẹrosuiẹ, o ji vwo omwemẹ rọ nọ kpahenrhọ ẹrhomo ihworho ri vwo esegburhomẹmro kpahiẹn. Habaye, ana sabu rẹ i Jehova no ruẹ esegburhomẹmro ọwan gbanhonrhọ, ọye ọnọ yẹ ọwan oborẹ a guọlọre.—Luke 17:5; James 1:17.

O ji vwo emru ọghoghanren ọrọrọ ro sekpahen oborẹ ana nẹrhomo lele. Jesu ọrhọ ta: “O vwo ohworho owuorowu rọ nọ sabu bru Ọsẹ na rhe-e, jokpanẹ nyoma mẹ.” (John 14:6) Nyoma i Jesu yẹ ọwan a sabu nẹrhomo vwe Ọsẹ na ro rhiẹ Jehova. Nọyẹ ọsoriẹ i Jesu ọ ta rẹn idibo yi nẹ aye i nẹrhomo nyoma odẹ ye. (John 14:13; 15:16) Ọrana o mevirhọ taghene a nẹrhomo vwe i Jesu-u. Ukpomaran, ọwan a nẹrhomo uvuẹn odẹ i Jesu, nime Jesu yẹ ohworho rọ lẹrhẹ ọwan sabu bruẹ Ọsẹ ọfuanfon na.

Idibo i Jesu ni ta riẹn: “Ọrovwori, yono ame oborẹ a nẹrhomo.” (Luke 11:1) Idibo na i vwa nọ kpahen ekwakwa ra ta kpahen vrẹn na-a. Nime aye i rhe ekwakwa buebun kpahen ẹrhomo ne, omarana aye na haye ta, ‘Me yo fori nẹ ame i nẹrhomo kpahen?’

ẸRHOMO ri Jesu o yono idibo yi re ji rhe rhẹ ẹrhomo Ọrovwori na, yẹ ẹrhomo rẹ Ilele Kristi ephian a mai nẹ. Ọrẹn aye e vwẹruọ ẹrhomo na-a. Iduduru ihworho a ha ẹmro ẹrhomo na ruiruo kẹdẹkẹdẹ, ọkezẹko ọgbọ buebun uvuẹn ẹdẹ. Ọrẹn, rhẹ omaran yi Jesu ọ guọlọre na ha ẹrhomo na ruiruo-o. Marhẹ ọwan i ru rhe?

Jesu ọ ki ha ẹrhomo ọrana phia, Jesu nọ tare: “Are arha nẹrhomo, are i vwa vwanriẹn ẹmro owu ọgbọ buebun.” (Matthew 6:7) Jesu nọ phia ihworho rhọ nyoma udje ọnana ro dje rhotọre na? Ẹjo! Ukpomaran, Jesu o yono ọwan oborẹ ana nẹrhomo kpahen, ọrhẹ oborẹ ana ha karo ọke ra nẹrhomo. Jenẹ a dabu ni oborẹ ọ tare na so. Ẹrhomo na ọ ha uvuẹn Matthew 6:9-13.

“Ọsẹ ame obẹ idjuwu, jene ru odẹ ọnọ fon.”

Jesu nọ haye karorhọ idibo yi taghene o fori nẹ aye i rha nẹrhomo vwe Ọsẹ ye ro rhiẹ Jehova ọvo. Ọrẹn wu rhe oborẹ ọsoriẹ odẹ Osolobrugwẹ ọ ghanren, ọrhẹ oborẹ ọsoriẹ o fo ne ruie fon?

Nẹ ọtonrhọ ikuegbe ituakpọ rhe, a ha efian gbe odẹ ọfuanfon Osolobrugwẹ ghwu. Ọvwreghrẹn Osolobrugwẹ ro rhiẹ Echu o se i Jehova ọmọrenfian, ji dje yi rhẹ orharhere Osun ro vwo vwo omẹgbanhon ro no suẹn emama Ọnẹyen. (Genesis 3:1-6) Ihworho buebun i homaba obọrẹ Echu ne, nyoma aye e yono taghene Osolobrugwẹ ọvwiẹlẹ, ọvwọkon, aye e ji yono taghene ọye rhẹ Ọmemama na-a. Ezẹko i tobọ kparehaso odẹ Osolobrugwẹ, nyoma aye e ti odẹ na Jehova nẹ uvuẹn erhianrhian i Baibol aye, ji ta rẹn ihworho taghene aye i vwa haye ruiruo-o.

Baibol na o djephia taghene Osolobrugwẹ ọnọ kwaphiẹ ọsoso ekwakwa ibiobiomu enana rhọ. (Ezekiel 39:7) Nyoma ọnana, nọ nọ kwaphiẹ ọsoso edamẹ ọrhẹ ebẹnbẹn enọ rhọ. Izede ọgo? Ẹmro rọ ha kpahiẹn uvuẹn ẹrhomo i Jesu na ọ kpahenrhọ ye.

“Jenẹ Uvie ọnọ rhe.”

Inyenana, otighri buebun ọ ha uvwre ilori ẹga kpahen Uvie Osolobrugwẹ. Ọrẹn ere leli Jesu i rhe kpahen Uvie na, nime emẹraro Osolobrugwẹ i mẹraro ọke jijiri taghene Messiah ro rhiẹ Osimi rẹ Osolobrugwẹ ọ djẹha, ono suẹn Uvie ro no wene akpọ na. (Isaiah 9:6, 7; Daniel 2:44) Ono ruẹ odẹ Osolobrugwẹ fon nyoma ro no ghwolo efian Echu phia, jeghwai ghwọghọ Echu ọrhẹ ewian yen. Uvie Osolobrugwẹ ono fiobarhọ ivweri, emiamo, erhọmo, tobọ te uhwu dede. (Psalm 46:9; 72:12-16; Isaiah 25:8; 33:24) Wa rha nẹrhomo nẹ Uvie Osolobrugwẹ ọ rhe, nọyẹ wa nẹrhomo nẹ ọsoso ive enana i rugba.

“Jene ru ọhọre ọnọ uvuẹn otọrakpọ na jerẹ oborẹ e ruie obẹ odjuwu.”

Ẹmro i Jesu i djephia taghene ọhọre Osolobrugwẹ ono rugba uvuẹn otọrakpọ na jerẹ oborẹ ọ havwọ obẹ odjuwu ro rhiẹ ekete Osolobrugwẹ o rhirhiẹ. A sabu dobọ ọhọre Osolobrugwẹ ji obẹ odjuwu-u; nime oboran yẹ Ọmọ Osolobrugwẹ o lele Echu ọrhẹ ikpodje yi fiuvweri, no leri aye rhiẹ otọrakpọ na. (Revelation 12:9-12) Jerẹ orẹ eva ra ta kpahen vrẹn ne, orẹ ọnana ọ ha userhumu rẹn ọwan tẹnrovi oborẹ ọ mai ghanren, nọyẹ ọhọre Osolobrugwẹ orhiẹ ọhọre ọwa-an. Ọhọre Osolobrugwẹ yọ rhua ebrurhọ eduado vwe emama yen ephian. Omarana, Jesu ro rhiẹ ohworho rọ gbare nọ ta rẹn Ọsẹ ye: “Orhiẹ ọhọre mẹ-ẹ, jenẹ ọhọre ọnọ o rugba.”—Luke 22:42.

“Yẹ ame emaren ọrẹ inyenana.”

Ẹmro i Jesu rọ ha kpahiẹn no djephia taghene rhẹ Osolobrugwẹ ọvo ya na nẹrhomo kpahe-en. Omarana, ọ sọ arha nẹrhomo vwe Osolobrugwẹ fọkiẹ edamẹ ọwan kẹdẹkẹdẹ-ẹ. Itiọrurhomẹmro, ọwan erhe ruẹ omaran, nọ karorhọ ọwan taghene Jehova yọ “yẹ ihworho ephian arhọ ọrhẹ ẹhẹn kugbe ekwakwa ephian.” (Acts 17:25) Baibol na o djephia taghene ọye Ọsẹ ro vwo ẹguọlọ ro vwo omamerhomẹ rọ nọ yẹ emọ ye oborẹ aye i guọlọre. Ọrẹn jerẹ ọmiọmọ ro vwo ẹguọlọ, ọ vwọ kpahanrhọ orẹ ri na ja sabu rhua erere vwe ọwa-an.

“Harhomu edandan ame.”

Wa ghini riosa Osolobrugwẹ? Wu guọlọre nọ harhomuo? Ihworho buebun inyenana e rhe oborẹ ọdandan o mevirhọ ọrhẹ oborẹ ọ ghwa te-e. Ọrẹn, Baibol na o yonorin taghene ọdandan yọ suẹ ebẹnbẹn ọwan ephian, ọye yọ ji suẹ uhwu rẹn ituakpọ. Nime ọdandan ye vwiẹ ọwan, ne ruẹ ọdandan phẹphẹrẹ, omarana ifiẹrorhọ ọwan re ne vwo arhọ i bẹmẹdẹ o sekpahen ẹharhomu Osolobrugwẹ. (Romans 3:23; 5:12; 6:23) Oma ọ merhenren ọwan taghene Baibol na ọ tare: “Wẹwẹ, O Jehova, omamọ ohworho, wu mwuegbe wu na harhomu.”—Psalms 86:5.

“Simi ame nẹ abọ ọvwọkon na.”

Wu ghini vwẹruọ oborẹ ọ ghanren te rẹ Osolobrugwẹ ọnọ sẹroruọ? Ihworho buebun e vwo imwẹro taghene ọvwọkon na ro rhiẹ Echu o nyerẹ-ẹn. Ọrẹn Jesu o yonorin taghene Echu o nyerẹn, ọ tobọ se yi “ọro suẹn akpọ ọnana.” (John 12:31; 16:11) Echu o biomu akpọ ọnana omamọ ne, o ji vwo omwemẹ ro no biomuo neneyo wu je rhe vwo onyerẹnkugbe rọ kpẹnkpẹnren rhẹ Ọsọ Jehova. (1 Peter 5:8) Ọrẹn, Jehova ọ gbanhon ghwẹ Echu dibidibi, o vwo omwemẹ rọ nọ sẹrorẹ ihworho ri vwo ẹguọlọ kpahiẹn.

Ibiẹ ẹzẹkoko ọnana ro sekpahen ẹrhomo ri Jesu o yono idibo yi na, ọ hunute ọsoso oborẹ ana sabu nẹrhomo kpahe-en. Karorhọ, 1 John 5:14 ọ ta rẹn ọwan kpahen Osolobrugwẹ: “Kemru kemru ra nekpẹn yen ro serhọ rhẹ ọhọre ọnẹyen, ọye ọnọ kpahenrhọ ye rẹn ọwan.” Omarana, wu vwe brudu taghene wu sabu ta rẹn Osolobrugwẹ kpahen ebẹnbẹn enọ-ọ.—1 Peter 5:7.

Nẹ ekete ọrhẹ ọke ra ha nẹrhomo vwo-o? Ọrana ọ ji ghanren?