Emọ Israel ni nẹ ugbenu i Sinai, aye ni nyavrẹn ato i Paran riẹ amwa re se Kadesh. Jehova nọ ta rẹn i Moses avwaye: ‘Dje ehworhare awan 12 nẹ uvwiẹ owuowu, nẹ aye i ye ni ẹkwotọre i Canaan re mi na harẹn emọ Israel na.’ Omarana, Moses nọ djẹ ehworhare awan 12, nọ ta rẹn aye: ‘Are i nyarhẹn ye ni otọre i Canaan sẹ otọre na ono rhomu emaren. Are i nie sẹ ihworho na i vwiẹlẹre yanghene aye i gbanhonma, sẹ aye e rhirhiẹ oghwọgbọ yanghene eghwa eduado.’ Idọrhẹ awan 12 na, ni riẹ ẹkwotọre i Canaan, Joshua ọrhẹ Caleb i ha usuẹn aye.

Ẹdọke 40 a vrẹn hin, idọrhẹ na ni ghwẹrioma rhe rhẹ emamọ sansan jerẹ i fig, pomegranate, ọrhẹ grape. Aye ni tare: ‘Otọre na orhorhomu, ọrẹn, ihworho na i gbanhonma omamọ, amwa na o vwo ugbomoghwa ri rierun omamọ.’ Ọrẹn, Caleb nọ tare: ‘Ọwan ina sabu fi aye kparobọ. Jenẹ a nyarhẹn ogege!’ Wu rhe oborẹ ọsoriẹ i Caleb ọ ta omaran? Nime ọye ọrhẹ Joshua, i hẹroso i Jehova. Ọrẹn, idọrhẹ awan ikpe ri hẹrhẹre na, ni tare: ‘Ẹjo! Ihworho na, eduaran! Ame i họhọ ebaka obaro aye.’

Ẹhẹn emọ Israel ni seriotọre. Aye ne brenu, aye na ta rẹn owuowọnwan: ‘Jenẹ a djẹ ohworho ọrọrọ ro no sun ọwan ghwẹrioma riẹ Egypt. Mesoriẹ ọwan ine riẹ avwaye ne kpe ọwan?’ Joshua ọrhẹ Caleb ni tare: ‘Are i vwa tiẹn uvwele i Jehova-a, are i vwa zofẹ-ẹn. Jehova ono simi ọwan.’ Ọrẹn, emọ Israel e kwe kerhọ-ọ. Aye na tobọ guọlọ kpe i Joshua ọrhẹ Caleb!

Me yi Jehova o ruru? Jehova nọ ta rẹn i Moses: ‘Udabọ ọsoso ekwakwa mi ruru rẹn emọ Israel na, aye e ji kwe huvwele mẹ-ẹ. Omarana, aye ina daji ato na te ẹgbukpe 40, aye ni ne ji hwu rhẹ ato na. Emọ aye ọvo, ọrhẹ i Joshua kugbe Caleb yi na ruẹ otọre ri mi ve rẹn aye na.’

Ọke emọ Israel a ha uvuẹn ato na, Korah, Dathan, Abiram ọrhẹ ehworhare ri te 250, ni kparehaso i Moses. Aye ni ta riẹn: ‘Ọnọ o te ne! Mesoriẹ wẹwẹ ọvo ine sun ame, nẹ Aaron orhiẹ orherẹn ọduado? Jehova ọrhẹ ame i gba havwiẹ, orhiẹ wẹwẹ ọrhẹ Aaron ọvo-o.’ Evwan ọ merhen i Jehova kpahen ọnana-a. Ọ hariẹ taghene ọye yẹ ihworho enana i kparehaso!

Moses nọ ta rẹn i Korah ọrhẹ ihworho re lelie: ‘Are i rhiẹ i tabernacle na odẹ rọ sa na, nẹ are i ha oborẹ a ha torhẹ ajijan lele oma rhe.’ Jehova ono dje ihworho rọ djẹre harẹn ọwan.’

Ẹdẹ ọreva ye, Korah ọrhẹ awan 250 na, ni bru i Moses nya uvuẹn egodo i tabernacle na. Aye ni torhẹ ajijan jerẹ oborẹ irherẹn e ruẹ. Jehova nọ ta rẹn Moses ọrhẹ Aaron: ‘Are i tioma are nẹ uvwre Korah ọrhẹ ihworho yi.’

Dedevwo, Korah o bru i Moses nya uvuẹn egodo i tabernacle na, Dathan, Abiram, ọrhẹ ekrun aye, e kwe nya-a. Jehova nọ ta rẹn emọ Israel nẹ aye i tiomanẹ oghwọgbọ i Korah, Dathan ọrhẹ Abiram. Ogege, emọ Israel ni tiomanẹ uvwre aye. Dathan, Abiram ọrhẹ ekrun aye ni mevi otafe oghwọgbọ aye. Ogege, otọre na nọ vare, aye ephian ni se rhẹ uvuien! Erhanren nọ homaphia uvuen egodo i tabernacle na, nọ torhẹ i Korah ọrhẹ ehworhare awan 250 na.

Jehova nọ ta rẹn i Moses: ‘Ha ukorọkpọ mie ohworho ro suẹn uvwiẹ owuowu, ne wu ya odẹ aye rhọ ye. Ọrẹn, ya odẹ Aaron rhẹ ukorọkpọ uvwiẹ i Levi. Fi ikorọkpọ na rhẹ uvuẹn i tabernacle na, ukorọkpọ ohworho mi djẹre, nẹ ọnọ mọ idodo.’

Ẹdẹ ọreva ye, Moses nọ ha ọsoso ikorọkpọ na phia, no djerẹ aye rẹn ihworho re suẹn na. Ukorọkpọ ọrẹ Aaron nọ mọ idodo ọrhẹ emamọ re se almond. Omarana, Jehova no djerie phia taghene Aaron yẹ ọye ọ djẹre no rhiẹ orherẹn ọduado.