Ekẹrẹkẹtẹ i Balaam ọ Tẹmro

Emọ Israel i nyaren uvuẹn ato na joma te ẹgbukpe 40 ne. Aye i fi amwa buebun ri vwo omẹgbanhon kparobọ ne. Vwarana, aye i te amwa re se i Moab rọ kẹrẹ Urhie i Jordan ne, o te ọke aye ina ruẹ Otọre Ive na ne. Ofẹn o mwu i Balak ro rhiẹ orodje i Moab, taghene emọ Israel ina ha otọre ọnẹyen mie yi. Omarana, no se ọhworhare owu re se Balaam no mo dumirhonrin rẹn emọ Israel.

Ọrẹn, Jehova nọ ta rẹn i Balaam: ‘Wu vwe dumirhonrin rẹn emọ Israel na-a.’ Omarana, Balaam orho kwe nya-a. Orodje Balak nọ rharhumu se i Balaam ọgbọrọrọ, nọ tare taghene ọnọ yẹ ye oborẹ ọ guọlọre ephian. Ọrẹn, Balaam o ji kwe nya-a. Osolobrugwẹ nọ ta riẹn: ‘Wu na sabu nyarhẹn, ọrẹn, oborẹ mi ta wẹn ọvo ye wu na ta.’

Balaam nọ ruẹ ekẹrẹkẹtẹ ye, no riẹ i Moab. Nọ djẹ iroro taghene ono dumirhonrin rẹn emọ Israel na, dedevwo, Jehova ọ ta riẹn taghene o vwo dumirhonrin rẹn aye-e. Ọmakashe i Jehova nọ homaphia ọgbọ esa uvuẹn izede na. Balaam ọ vwọ mẹrẹn ọmakashe na-a, ọrẹn, ekẹrẹkẹtẹ i Balaam ọ mẹriẹn. Ukukaro, ekẹrẹkẹtẹ na nọ nya ruẹ egbo. Ọgbọreva ye, ekẹrẹkẹtẹ na nọ ha oma hiẹn atita rọ ha okokọ izede, aghwẹ i Balaam nọ hiẹn atita na. Ọrọketa, ekẹrẹkẹtẹ na no semerhẹn erhẹrhẹ izede na. Ọrẹn, ọke ekwakwa enana ephian a phia na, Balaam ọ ha orhan ghwiẹ ekẹrẹkẹtẹ na.

Ọrẹ ọgbọresa na ọ vrẹn hin, Jehova no rurie nẹ ekẹrẹkẹtẹ na ọ sabu tẹmro. Ekẹrẹkẹtẹ na nọ ta rẹn i Balaam: ‘Mesoriẹ wa ghwiẹ mẹ?’ Balaam nọ tare: ‘Wa lẹrhẹ ihworho roro taghene mẹmẹ akpa. Orhianẹ mi vwo odan ọlọkọ, manẹ mie kpo hwu.’ Ekẹrẹkẹtẹ na nọ tare: ‘O jiri ne mia kparuọ riẹ ekete. Mi ru ruo omana dẹ ne?’

Omarana, Jehova nọ lẹrhẹ Balaam mẹrẹn ọmakashe na. Ọmakashe na nọ tare: ‘Jehova ọ ta wẹn taghene wu vwe dumirhonrin rẹn emọ Israel na-a.’ Balaam nọ tare: ‘Mi ru sọ. Mi na ghwẹrioma rie.’ Ọrẹn, ọmakashe na nọ tare: ‘Wu na sabu nyarhẹn riẹ i amwa i Moab, ọrẹn oborẹ i Jehova ọ ta wẹn ọvo ye wu na ta.’

Balaam o yono emru nẹ ọnana rhe? Ẹjo. Ọnana ọ vrẹn hin, Balaam nọ ji guọlọ dumirhonrin rẹn emọ Israel na ọgbọ esa, ukperẹ ono dumirhonrin rẹn emọ Israel na, Jehova no rurie nọ ha ebrurhọ rẹn emọ Israel na ọgbọ esa. Obẹta ye, emọ Israel ni fi amwa i Moab kparobọ, jeghwai kpe i Balaam hwu. Orhianẹ i Balaam ọ kerhọ i Jehova ọke ukukaro na, manẹ o vwo rhomu?