UYONO 29

Me yọ Phia Erhe Hwu?

Ọre Fomẹ Phia

Ohworho wu vwo ẹguọlọ kpahen o hwu va obọ dẹ ne? Uvwrọke ọnana we mwuomarhọ na, wu na sabu rhe roro: ‘Me yọ phia erhe hwu? E vwo ifiẹrorhọ taghene ana sabu rharhumu mẹrẹn ihworho re vwo ẹguọlọ kpahen ri hwuru?’ Uvuẹn uyono ọnana ọrhẹ ọrọ ha kpahiẹn, ana mẹrẹn ẹkpahenrhọ i Baibol na rọ bọn ọwan gbanhan.

1. Me yọ phia erhe hwu?

Jesu ọ ha uhwu dje omerhẹn okokodo. Ohworho rọ merhen omerhẹn okokodo, o vwo rhe oborẹ ọ phia uvuẹn ekete rọ havwọ-ọ. Marhẹ uhwu o ru họhọ omerhẹn okokodo? Ohworho orho hwu, o vwo rhiẹromẹrẹn omiamiamo owuorowu-u. O vwo roro taghene ọ ha uvuẹn erhirhiẹ kologho-o, ọrhọ tobọ rhianẹ o vwo ẹguọlọ kpahen ekruien ọrhẹ igbehian yen omamọ. Baibol na ọ tare taghene, “eri hwu ne, e rhe emru owuorowu ghwomara-an.” —Se Ecclesiastes 9:5.

2. Erere ego ya na mẹrẹn erhe rhe urhomẹmro na kpahen uhwu?

Ihworho buebun a zofẹn uhwu, aye a tobọ zofẹn eri hwu ne! Ọrẹn, wu na sabu mẹrẹn urhebro nẹ oborẹ i Baibol na ọ tare kpahen uhwu. Jesu nọ tare: “Urhomẹmro na no no ru are rhiẹ emuvwiẹ.” (John 8:32) Ẹga ezẹko e yono ihworho taghene o vwo oborẹ o vwo hwuẹ ohworho orho hwu ne, ọrẹn, ọnana orhiẹ oborẹ i Baibol na o yonori-in. Omarana, ohworho ọ vwọ rioja, orho hwu ne-e. Habaye, ra mẹriẹn taghene eri hwuru erhe rhe emru owuorowu-u, aye i sabu ha ẹkuọn rẹn ọwa-an. Omarana, o fo na ha ẹga rẹn ihworho ri hwuru yanghene vwobọrhọ ekwakwa ezẹko nẹ aye i ja rha tuekwẹre kpahen ọwa-an, o ji fo na nẹrhomo harẹn aye-e.

Ihworho ezẹko a ta taghene aye ina sabu lele eri hwuru tẹmro. Ọrẹn, ọ sabu phia-a. Jerẹ oborẹ e yono ne, eri hwuru “e rhe emru owuorowu ghwomara-an.” Ihworho re roro taghene aye ina sabu tẹmro rhẹ erẹ aye i vwo ẹguọlọ kpahen ri hwuru, a tẹmro rhẹ ikpodje re ruẹ jerẹ ihworho aye ri hwuru. Omarana, erhe rhe urhomẹmro na kpahen uhwu, ọ sẹrorẹ ọwan nẹ abọ ikpodje. Jehova ọ ha orhetio rẹn ọwan ne je rhe lele ihworho ri hwuru tẹmro, fọkime o rheri taghene ana mẹrẹn ẹkuọn erhe lele ikpodje tẹmro.—Se Deuteronomy 18:10-12.

YONO KODO RHỌ

Yono riaro kpahen oborẹ i Baibol na o yonorin kpahen uhwu, jeghwai ruẹ esegburhomẹmro ọnọ gbanhonrhọ kpahen Osolobrugwẹ ẹguọlọ rọ vwọ ha oja riẹ ihworho ri hwu ne.

Ọhworhare ọrhẹ emọyen emọvwerhe awanva ri siyẹ ibẹnshi ọke re ruẹ irueruo orinmi esion aniẹ na. Igbehian ọrhẹ ihworho ekruien ri mevi kinhariẹ ye ra yẹ aye urhebro, ji sa aye erhumu.

3. Yono kpahen erhirhiẹ ihworho ri hwuru i havwọ

Uvuẹn akpọ na ephian, ihworho sansan i vwo imwẹro rọ vẹnẹren kpahen oborẹ ọ phia erhe hwu. Itiọrurhomẹmro, orhiẹ ọsoso imwẹro enana yẹ urhomẹmro-o.

Imwẹro ọgo yẹ ihworho i vwori kpahen eri hwuru uvuẹn ekete we rhirhiẹ?

Ne wu mẹrẹn oborẹ i Baibol na o yonorin, kporo IVIDIO na.

IVIDIO: Erhirhiẹ Ọgo Yẹ ihworho Ri Hwuru Na E havwọ?—Ekete ezẹko vwọye (1:19)

Ifoto: Ekete ezẹko uvuẹn ividio na, ‘Erhirhiẹ Ọgo Yẹ ihworho Ri Hwuru Na E havwọ?—Ekete ezẹko vwọye.’ 1. Orinmi rọ ha uvuẹn ekpa uvuẹn ihọsipita. 2. Ọhworhare rọ merhẹn uvuẹn itreni, ọ ha erhẹrhẹ awanva.

Se Ecclesiastes 3:20, orho ru, are i gba kpahenrhọ enọ enana:

Lele oghwẹmro ọnana, me yọ phia ohworho orho hwu?
O vwo oborẹ o vwo hwuẹ uvuẹn ohworho ro hwu ne?

Baibol na ọ ta rẹn ọwan kpahen i Lazarus ro hwuru, ro rhiẹ ugbehian i Jesu rọ kpẹnkpẹnren. Ru we se i John 11:11-14, djokarhọ oborẹ i Jesu ọ tare kpahen erhirhiẹ i Lazarus ọ havwọ. Orho ru, are i gba kpahenrhọ enọ enana:

Me yi Jesu ọ ha uhwu dje?
Oborẹ i Jesu ọ ha dje yi na, me yọ ta rẹn ọwan kpahen erhirhiẹ eri hwuru i havwọ?
Marhẹ oma o ruo kpahen oborẹ i Baibol na ọ tare kpahen uhwu?

4. Ana mẹrẹn erere erhe rhe urhomẹmro na kpahen uhwu

Erhe rhe urhomẹmro na kpahen uhwu, ọrhọ lẹrhẹ ọwan zofẹn ihworho ri hwu ne-e. Se Ecclesiastes 9:10, orho ru, are i gba kpahenrhọ onọ ọnana:

Eri hwuru ina sabu ha ẹkuọn rẹn ọwan?

Erhe vwo imwẹro kpahen urhomẹmro i Baibol na, ọnọ sẹrorẹ ọwan nẹ efian na taghene o fori na lẹrhẹ oma merhen eri hwuru, yanghene ha ẹga rẹn aye. Se Isaiah 8:19 ọrhẹ Revelation 4:11, orho ru, are i gba kpahenrhọ onọ ọnana:

Ukẹro ọgo yi Jehova ọ ha ni ohworho rọ ha ẹga rẹn ọro hwuru, yanghene rọ guọlọ userhumu mie yi?

Ifoto: Irueruo ri surhobọmwu ọghọ ra harẹn eri hwuru. 1. Ọhworhare ro sighwẹ rọ nẹrhomo obaro usin rhẹ emaren rọ ha ze izobo avwaye. 2. Ehworhare awansa ri se aruẹ osẹme owu, re gbigbegbe. 3. Ẹko ihworho ra nya kugbe, ri jẹ ekwakwa rhẹ ughwaro ji kpare aruẹ ema eduado ezẹko uvuẹn Ẹdẹ Eri Hwuru. — Erhe rhe urhomẹmro na kpahen uhwu, ọ lẹrhẹ ọwan kẹnoma rẹn irueruo ra lẹrhẹ i Jehova tuekwẹre

5. Ẹhẹn ọwan o totọre erhe rhe urhomẹmro na kpahen uhwu

E yono ihworho buebun taghene aye i rhe hwu, aye ina rioja fọkiẹ ekwakwa ibiobiomu rẹ aye i ru vrẹn ne. Ọrẹn, oma ọmerhenren ọwan re rhe taghene ohworho ọ vwọ rioja orho hwu ne-e, ọrhọ tobọ vwobọrhọ ekwakwa ibiobiomu omamọ. Se Romans 6:7, orho ru, are i gba kpahenrhọ onọ ọnana:

Baibol na ọ tare taghene ohworho orho hwu, Osolobrugwẹ ọ vwọ rhọ mọrọn ọdandan ro ruru ba ye obọ-ọ, omarana, wu rorori taghene ohworho ro hwuru ọ rioja fọkiẹ ekwakwa ibiobiomu ro ru vrẹn ne?

Erhe yono kpahen i Jehova rhọ, na mẹrẹnvwrurhe taghene ọ vwọ ha oja riẹ ihworho ri hwuru-u. Se Deuteronomy 32:4 ọrhẹ 1 John 4:8, orho ru, are i gba kpahenrhọ enọ enana:

Osolobrugwẹ ro vwo iruemru enana ra hunute uvuẹn eghwẹmro enana, ono kwe ha oja riẹ ihworho ri hwuru?
Urhomẹmro wu yono kpahen ihworho ri hwuru, ọ yọ omefuon? Mesoriẹ?

OBORẸ IHWORHO EZẸKO A TA: “Mia zofẹn oborẹ ọnọ phia mẹ, mi rhe hwu.”