Ọke idọrhẹ na e te i Jericho, aye ni rhirhiẹ oghwa ọmase owu re se Rahab. Orodje i Jericho no rhon kpahen idọrhẹ na, no dje isodja ye ezẹko riẹ oghwa i Rahab. Rahab no ti idọrhẹ na nu oberun oghwa ye, no dje isodja na riẹ ada ọrọrọ. Rahab nọ ta rẹn idọrhẹ na: ‘Mi na ha userhumu rẹn are nime mi rheri taghene i Jehova ọrhẹ are i gba havwiẹ, mi jeghwai rhe taghene are ine fi amwa na kparobọ. Biko, are i vive mẹ taghene are ine simi mẹ ọrhẹ ekrun mẹ.’

Idọrhẹ na ni ta rẹn i Rahab: ‘Ame i vive wẹn taghene o vwo ohworho rọ daji uvuẹn oghwa ọnọ ro no hwuo-o.’ Aye ni ji ta: ‘Surhe ufi ọbobare ọnana rhẹ ivakpo oghwa ọnọ, wẹwẹ ọrhẹ ekrun ọnọ ni ne simirhọ.’

Idọrhẹ na ni nya ivakpo oghwa i Rahab ruẹ otafe rhẹ ufi rọ yẹrẹ aye. Aye ni riẹ oberun ugbenu na ye tiomanu ẹdọke esa, aye i ki ghwẹrioma rie. Emọ Israel ni davrẹn Urhie i Jordan, jeghwai mwuegbe rẹ aye ine fi amwa na kparobọ. Jericho ọyẹ amwa ọrukaro rẹ aye i fikparobọ. Jehova ọ ta rẹn aye taghene aye i nya kinhariẹ amwa na ọgbọ owu kẹdẹkẹdẹ ọsoso ẹdẹ erhan. Ẹdọke ọrẹ irhiruẹ ye, aye ni nya kinhariẹ amwa na ọgbọ irhiruẹ. Irherẹn na ni kporo ukpori aye, isodja na ne bunu. Ugbomoghwa amwa na nọ ghwọghọ totọre! Ọrẹn, oghwa i Rahab rọ ha ugbomoghwa amwa na, ọ ghwọghọ-ọ. Rahab ọrhẹ ekrun ọnẹyen i simirhọ, nime Rahab ọ hẹroso i Jehova.

Iyẹnrẹn kpahen oghwọghọ i Jericho no kerabọ lele emwa erọrọ ri ha uvuẹn i Canaan. Irodje emwa erana ni brorhiẹn rẹ aye ine kwomakugbe wọnrọn haso agbamwa Israel. Ọrẹn, itu i Gibeon ni djẹ iroro ọrọrọ. Aye ni ku ewun ebebẹrẹ rhọ, aye ni bru i Joshua, aye ni tare: ‘Amwa oseseri yẹ ame i nurhe. Ame i rhon kpahen oborẹ i Jehova o ru harẹn are uvuẹn Egypt ọrhẹ i Moab. Are i vive rẹn ame taghene are i lele ame wọnrọ-ọn, ame ni ne rhiẹ idibo are.’

Joshua o kwerhọ oborẹ aye i tare na, no veri taghene o lele aye wọnrọ-ọn. Ẹdọke esa a vrẹn hin, Joshua nọ mẹrẹnvwrurhe taghene itu i Gibeon na e nẹ amwa oseseri rhe-e. Aye i nẹ amwa i Canaan rhe. Joshua nọ nọ itu i Gibeon na: ‘Mesoriẹ are a mọrenfian rẹn ame?’ Aye ni tare: ‘Ofẹn o mwu ame! Ame i rheri taghene i Jehova Osolobrugwẹ are ọ wọnrọn harẹn are. Biko, are i vwe kpe ame-e.’ Joshua no ru lele ive ro veri na, orho kpe aye-e.

O jiri-i, irodje i Canaan awan isionrin ọrhẹ isodja aye, na djofẹn mwu itu i Gibeon. Joshua ọrhẹ isodja ye ni nyaren ọsoso ason owu ya ha userhumu rẹn itu i Gibeon. Owọnren na nọ tonrhọ igidi urhiọke ẹdẹ ọreva ye. Itu i Canaan na zẹ sa zẹ riẹ. Jehova nọ ha oso atita kpe aye ekete aye i zẹ nya ephian. Omarana, Joshua nọ rẹ i Jehova nẹ ọren na o mevi ekete owu. Mesoriẹ i Joshua ọ ta rẹn i Jehova no ru omaran, ra mẹriẹn taghene ọren na o ji mevi ekete owu dẹ-ẹ? Nime i Joshua ọ dabu hẹroso i Jehova. Ọke na orho se ọsoso ẹdẹ ọrana-a, bọmọke emọ Israel e fi irodje i Canaan ọrhẹ isodja aye kparobọ.