Oborẹ ene ru Vwrurhe Ilele Kristi Urhomẹmro

Ihworho buebun a ta taghene aye Ilele Kristi. Ọrẹn, aye e vwo imwẹro owu-u, habaye, aye i vwe nyerẹn mwu evwan owu-u. Omarana, marhẹ ene ru vwrurhe Ilele Kristi urhomẹmro?

1. Me yẹ Olele Kristi o mevirhọ?

Ilele Kristi, idibo yanghene era nyalele i Jesu Kristi. (Se Acts 11:26.) Marhẹ aye e ru djephia taghene aye idibo i Jesu? Jesu nọ tare: “Are i rha nyalele ẹmro mẹ, are ghini idibo mẹ.” (John 8:31) Ọnana o mevirhọ taghene Olele Kristi urhomẹmro, ọnọ vi nyalele iyono i Jesu. Jerẹ oborẹ i Jesu ọ bọn iyono enẹyen kpahen Eyaya Ọfuanfon na, omaran Ilele Kristi urhomẹmro a ji bọn imwẹro aye kpahen oborẹ ọ ha uvuẹn i Baibol na.—Se Luke 24:27.

2. Marhẹ Ilele Kristi urhomẹmro e ru dje ẹguọlọ phia?

Jesu ọ ta rẹn idibo yi: “Are i vwo ẹguọlọ kpahen owuowọnwan jerẹ oborẹ mi vwo ẹguọlọ kpahen are.” (John 15:12) Marhẹ i Jesu o ru djephia taghene o vwo ẹguọlọ kpahen idibo yi? O leli rẹ aye gbikun, ọ ha urhebro rẹn aye, ji sa aye erhumu. Ọ tobọ ha arhọ ye kpahontọre rẹn aye. (1 John 3:16) Omaran ọ ji havwọ, Ilele Kristi urhomẹmro i vwa tẹmro kpahen ẹguọlọ ọvo-o. Aye a nyoma ẹmro ọrhẹ irueruo aye djephia taghene aye i vwo ẹguọlọ kpahen owuowọnwan.

3. Owian ọgo yẹ Ilele Kristi urhomẹmro e fiomarhọ?

Jesu ọ yẹ idibo yi owian. ‘O dje rẹ aye nyarhẹn ye ghwoghwo Uvie Osolobrugwẹ.’ (Luke 9:2) Ilele Kristi erukaro i ghwoghwori uvuẹn ekete aye a ga, uvuẹn afiede ọrhẹ uvuẹn eghwa ihworho. (Se Acts 5:42; 17:17.) Omaran ọ ji havwọ, Ilele Kristi urhomẹmro e ghwoghwo urhomẹmro i Baibol na uvuẹn ekete aye a mẹrẹn ihworho ephian. Aye i vwo ẹguọlọ kpahen ereva aye, omarana, aye na ha ọke ọrhẹ omẹgbanhon aye e ghwoghwo iyẹnrẹn ifiẹrorhọ ọrhẹ urhebro rọ ha uvuẹn i Baibol na.—Mark 12:31.

YONO KODO RHỌ

4. Aye a guọlọ urhomẹmro rọ ha uvuẹn i Baibol na

Orhiẹ ihworho ephian ra ta taghene aye Ilele Kristi ye ni urhomẹmro i Baibol na ghanghanre-en. Kporo IVIDIO na, orho ru, are i gba kpahenrhọ onọ ọnana.

IVIDIO: Oborẹ e ru Biomu Ẹga Ilele Kristi (5:11)

• Me yẹ ishọshi re ruẹ jerẹ Ilele Kristi i ruru, nẹ ihworho i je rhe rhe kpahen iyono i Jesu?

Jesu o yono ihworho urhomẹmro rọ ha uvuẹn Ẹmro Osolobrugwẹ. Se John 18:37, orho ru, are i gba kpahenrhọ onọ ọnana:

• Jerẹ oborẹ i Jesu ọ tare, marhẹ ọwan ine ru vwrurhe Ilele Kristi ri “ha obọrẹ urhomẹmro na”?

5. Aye e ghwoghwo urhomẹmro i Baibol na

Bọmọke i Jesu o ki riẹ odjuwu, ọ yẹ idibo yi owian rọ ji havwiẹ me te inyenana. Se Matthew 28:19, 20 ọrhẹ Acts 1:8, orho ru, are i gba kpahenrhọ onọ ọnana:

• Marhẹ ana wian owian aghwoghwo na jiri te?

6. Aye e ruẹ lele oborẹ aye e ghwoghwo

Me yọ lẹrhẹ ọhworhare owu re se i Tom vwo imwẹro na taghene ọ mẹrẹn ẹga urhomẹmro na ne? Kporo IVIDIO na, orho ru, are i gba kpahenrhọ enọ enana.

IVIDIO: Mi Je Ẹga Ẹnya Vwo (5:20)

• Uvuẹn ividio na, mesoriẹ ẹga ẹnya ọ bẹn i Tom?

• Mesoriẹ o mwuien ẹro taghene ọ mẹrẹn urhomẹmro na ne?

Ihworho a djokarhọ oborẹ e ruẹ ghwẹ oborẹ a ta. Se Matthew 7:21, orho ru, are i gba kpahenrhọ onọ ọnana:

• Me yọ mai ghanren rẹn i Jesu, oborẹ ọwan i tare taghene e vwo imwẹro kpahen, gbinẹ oborẹ e djephia nyoma irueruo ọwan?

7. Aye i vwo ẹguọlọ kpahen owuowọnwan

Ilele Kristi i ghini fi arhọ aye rhẹ erhirhiẹ imwofẹn, nẹ aye i sabu nyalele i Jesu? Kporo IVIDIO na, orho ru, are i gba kpahenrhọ enọ enana.

IVIDIO: O Mwuegbe rọ nọ ha Arhọ ye Kpahontọre (2:55)

• Uvuẹn ividio na, me yo mwu Lloyd fi arhọ ye rhẹ erhirhiẹ imwofẹn fọkiẹ Omizu Johansson?

• Wu rorori taghene ọ kpare idjaghwẹ ro serhọ jerẹ Olele Kristi urhomẹmro?

• Marhẹ idibo i Jesu nọyẹ, (Ilele Kristi urhomẹmro) ine nyerẹn lele rhẹ ihworho ri nẹ agbamwa yanghene ẹkwotọre erọrọ rhe?

• Me yẹ aye ine ruo uvwrọke uvweri?

ME WU YONORIN?

Ilele Kristi urhomẹmro a nyalele oborẹ i Baibol na ọ tare, aye e dje obọdẹn ẹguọlọ phia, jeghwai ghwoghwo urhomẹmro i Baibol na.

Ẹzẹkoko

• Me yẹ Ilele Kristi urhomẹmro i bọn imwẹro aye kpahen?

• Marhẹ e ru vwrurhe Ilele Kristi urhomẹmro?

• Owian ọgo yẹ Ilele Kristi urhomẹmro a wian?

GUỌLỌ IYẸNRẸN ERỌRỌ

Yono riarorhọ kpahen ẹko ihworho ra damoma nyalele udje i Jesu ọrhẹ iyono yi.

Aruẹ Ihworho Ego Yẹ Iseri Jehova i Havwọ? (1:13)

Se kpahen oborẹ ọmase owu rọ vwọ rọnmọ neneyo ọ sabu ga Osolobrugwẹ, o ru mẹrẹn “Ilele Kristi urhomẹmro.”

“Aye i ha i Baibol na Kpahenrhọ Enọ mẹ Ephian!” (Oghwa Odẹrẹ, April 1, 2014)

Yono kpahen oborẹ Ilele Kristi urhomẹmro, e ru djẹ ẹguọlọ rẹn ereva aye ri guọlọ userhumu.

Ra ha Userhumu Rẹn Imizu Ọwan Ọke Oghwọghọ Kpregede—Ekete ezẹko vwọye (3:57)

Yono kpahen oborẹ Ilele Kristi urhomẹmro inyenana, e ru hẹrokele udje Ilele Kristi ọke ahwanren, ri Jesu ọ tare taghene ana ha vwrurhe Ilele Kristi urhomẹmro.

“Marhẹ e ru Vwrurhe Ilele Kristi Urhomẹmro?” (Oghwa Odẹrẹ, March 1, 2012)