Ọgbọrọrọ, emọ Israel ni sẹrerhumuji Jehova, aye na ha ẹga rẹn isolobrugwẹ efian. Ọke itu Ammon a wọnrọn haso emọ Israel, isolobrugwẹ efian rẹ emọ Israel a ga na, a sabu simi aye-e. Uvwre ẹgbukpe buebun, emọ Israel na rioja. Ọke o jiribẹn, aye ni ta rẹn i Jehova: ‘Ame i ru sọ ne. Biko simi ame nẹ abọ evwreghrẹn ame.’ Emọ Israel ni ghwọghọ ema aye, aye ni ghwẹrioma bru i Jehova. Jehova ọ guọlọ nẹ aye i rha rioja-a.

Na djẹ ọgba owọnren owu re se Jephthah, no sun ihworho na riẹ uvweri haso itu Ammon. Jephthah nọ ta rẹn i Jehova: ‘Wu rha sa ame erhumu fiuvweri ọnana kparobọ, mi veri taghene mi rha ghwẹrioma rhe, mi na yọ ohworho ukukaro rọ zẹ nẹ oghwa mẹ rhe.’ Jehova nọ kpahenrhọ ẹrhomo i Jephthah, aye ni fikparobọ uvuẹn uvweri na.

Ọke i Jephthah o te oghwa, ọmọyen ọgbọtọ nọ yo kiki zẹ bruie rhe, ọye ọvo yi Jephthah o vwiẹre. Ọmọyen ọgbọtọ na o gbe igbegbe jeghwai kporo akisẹ. Me yi Jephthah ono ruo? Jephthah nọ karorhọ ive ro ve rẹn i Jehova, nọ tare: ‘O, ọmọ mẹ! Wu lẹrhẹ ẹhẹn mẹ seriotọre ne. Mi vive rẹn i Jehova. Mi veri taghene wu na ya ga uvuẹn tabernacle rọ ha obẹ i Shiloh.’ Ọrẹn, ọmọyen nọ tare: ‘Ọsẹ mẹ, wu rhe vive rẹn i Jehova ne, biko nyalele ive ọnọ na. Biko yẹ mẹ ibiamo eva, neneyo mi lele igbehian mẹ egbọtọ ghwọghọ ọke kugbe uvuẹn oberun igbenu na, mi ki nyarhẹn.’ Ọmọ ọgbọtọ i Jephthah, nọ gare uvuẹn i tabernacle na ọsoso akpenyerẹn yen. Kẹgbukpe kẹgbukpe, igbehian yen na kọn bruie nya obẹ i Shiloh.

Orherẹn Ọduado re se Eli o vwo emọ ehworhare awanva ra ga uvuẹn tabernacle na. Edẹ aye yẹ Hophni ọrhẹ Phinehas. Aye i vwa nyalele irhi Jehova-a, aye na ha oja riẹ ihworho i Jehova. Ihworho i Jehova i rhe ye ze izobo rẹn i Jehova, Hophni ọrhẹ Phinehas na ha eranmo ri mai rhomu usuẹn izobo na. Eli o rhon kpahen oborẹ emọyen e ruẹ na, ọrẹn, o ru emru owuorowu kpahiẹ-ẹn. Jehova ọnọ nyajẹ emọ Eli vwo nẹ aye i rhe ru ekwakwa ibiobiomu uvuẹn i tabernacle na?

Dedevwo, Hophni ọrhẹ Phinehas i djerhe i Samuel omamọ, Samuel ọ hẹrokele aye-e. Oma nọ merhen i Jehova kpahen i Samuel. Ason owu, ọke i Samuel ọ merhẹn, ohworho owu no serie. Samuel no vẹnrẹnren, nọ zẹ bru Eli, nọ tare: ‘Mẹmẹ na!’ Ọrẹn, Eli nọ tare: ‘Rhẹ omẹmẹ yi seruo-o. Rharhumu ye semerhẹn.’ Samuel no yo semerhẹn. Ohworho na nọ rharhumu se yi. Ọke i Samuel o rhon uvwele na ọgbọresa ye, Eli nọ mẹrẹnvwrurhe taghene i Jehova yo se i Samuel. Eli nọ ta rẹn i Samuel taghene ọrhọ rharhumu rhon uvwele na, ọ kpahenrhọ riẹn, nọ ta: ‘Jehova, tẹmro. Odibo ọnọ ọ kerhọ.’

Samuel no yo semerhẹn. Nọ rharhumu rhon uvwele na ro se rie: ‘Samuel! Samuel!’ Samuel nọ kpahenrhọ: ‘Tẹmro nime odibo ọnọ ọ kerhọ.’ Jehova nọ ta riẹn: ‘Ta rẹn Eli taghene mi na ha oja riẹ ọrhẹ ekrun ọnẹyen. O rheri taghene emọyen e ru oborẹ obiomurun uvuẹn tabernacle mẹ, ọrẹn, o vwo ru emru owuorowu kpahiẹ-ẹn.’ Urhiọke ẹdẹ ọreva ye, Samuel no je ighwe i tabernacle na jerẹ oborẹ o ruẹ bi. Ofẹn no mwuie rọ nọ ta rẹn orherẹn ọduado na kpahen oborẹ i Jehova ọ tare. Ọrẹn, Eli no serie, nọ nọren: ‘Ọmọ mẹ, me yi Jehova ọ ta wẹn? Ta aye ephian mẹ.’ Omarana, Samuel nọ ta ọsoso ẹmro ri Jehova ọ ta riẹn na rẹn Eli.

Jehova ọrhẹ i Samuel i gba havwiẹ ọke rọ ghwanran. Uvuẹn ọsoso ẹkwotọre na, emọ Israel ephian ni rheri taghene Jehova ọ djẹ i Samuel no rhiẹ ọmẹraro ọrhẹ oguẹnzọn.