Jehova nọ ta rẹn i Samuel: ‘Nyarhẹn riẹ oghwa i Jesse. Owu usuẹn emọyen yọ nọ ha ẹrhẹ Orodje Saul.’ Omarana, Samuel no riẹ oghwa i Jesse. Ọke rọ mẹrẹn ọmọ ọkpako i Jesse, no rorori: ‘Ọmọ ọnana yo no rhiẹ orodje na.’ Ọrẹn, Jehova nọ ta rẹn i Samuel taghene rhẹ ọmọ ọrana yo no rhiẹ orodje na-a. Jehova nọ tare: ‘Mia mẹrẹn oborẹ ọ ha uvuẹn ọmudu ohworho, orhiẹ oborẹ ohworho na ọ havwọ ugboma ọvo-o.’

Jesse nọ ha emọyen awan erhan erọrọ vwe i Samuel. Ọrẹn, Samuel nọ tare: ‘Jehova ọ djẹ owuorowu usuẹn aye-e. We vwo emọ ehworhare erọrọ?’ Jesse nọ tare: ‘Mi ji vwo ọmọ ọhworhare owu, ọye yẹ ubrevwiẹ mẹ, odẹ ye i David. Ọ hẹrote igegede mẹ uvuẹn ikebi.’ Ọke i David ọ rhe, Jehova nọ ta rẹn i Samuel: ‘Ọye yo no rhiẹ orodje na!’ Samuel no rhie ọfugbo ra ha djẹ ohworho ha, rhẹ urhomu i David, nọ djẹriẹ ha no rhiẹ orodje Israel.

Ọke oru, itu Israel ne lele itu i Philistine fiuvweri, itu i Philistine na i vwo aduaran re se Goliath rọ wọnrọn harẹn aye. Goliath nọ ha emọ Israel djechẹẹ ọke ephian. Nọ ta rẹn aye: ‘Are i dje ohworho vwe mẹ, no leli mẹ wọnrọn. Orho fikparobọ, ame ine rhiẹ evrẹn are. Ọrẹn, mi rhe fikparobọ, are ni ne rhiẹ evrẹn ame.’

David nọ kpare emaren vwe imizie ri rhiẹ isodja uvuẹn ọko na. David no rhon oborẹ i Goliath ọ ta, David nọ tare: ‘Mi ne lelie wọnrọn!’ Orodje Saul nọ tare: ‘Wẹwẹ ibiẹ ọmọvwerhe.’ David nọ tare: ‘Jehova ọnọ ha userhumu mẹ.’

Saul nọ yẹ i David ekwakwa owọnrọn ọnẹyen, ọrẹn, David nọ tare: ‘Mi sabu wọnrọn rhẹ ekwakwa enana-a.’ David nọ ha ufi ọnẹyen, no riẹ usurhẹn. No fi itita isionrin rhẹ ẹkpa ye. David no bru i Goliath. Goliath nọ van: ‘Bru mẹ rhe, ibiẹ idama na. Mi na ha ru emaren rẹn efen ra dan oberun na ọrhẹ eranmo ra djoma uvuẹn egbo na.’ David ọ zofẹ-ẹn. Ukpomaran, David nọ van ghwie kele, nọ tare: ‘We bru mẹ sa rhẹ odan ọlọkọ ọrhẹ akarhẹ, ọrẹn, mie brosa rhẹ odẹ i Jehova. Rhẹ ame yi we lele wọnrọ-ọn; ọrẹn, Osolobrugwẹ yi we lele wọnrọn. Ọsoso ihworho ri ha ekete aran na, ina mẹrẹnvwrurhe taghene i Jehova o vwo omẹgbanhon ghwẹ odan ọlọkọ yanghene akarhẹ. Jehova ọnọ ha userhumu rẹn ame fi are kparobọ.’

David no fi atita owu rhẹ uvuẹn ufi ọnẹyen, no zurie omamọ. Rhẹ userhumu i Jehova, atita na no se dimi rhẹ aruikpẹn i Goliath. Goliath no sebru otọre. Itu i Philistine na ni zẹre. Wa hẹroso i Jehova jẹrẹ i David?

Ọke i David o kpe i Goliath hin, Orodje Saul nọ hariẹ mwu ẹrhẹ olotu isodja ye. David no fiuvweri buebun kparobọ, no titiri omamọ. David orho nẹ uvweri rhe ọke ephian, emẹse Israel na so ijoro jeghwai gbe igbegbe, aye na ta: ‘Saul o kpe uriusionrin buebun, ọrẹn, David o kpe oduduru buebun!’ Ọnana nọ lẹrhẹ i Saul rioma kpahen i David, nọ guọlọ izede ro no kpe yi.

David ọ dabu rhe oborẹ e kporo isorogu. Ẹdẹ owu, ọke i David o kporo isorogu na rẹn i Saul, Saul nọ ha akarhẹ ọnẹyen fi David. Ọrẹn, David nọ koma rẹn akarhẹ na, akarhẹ na orho te yi-i. Ọrana ọ vrẹn hin, Saul nọ ji damoma ro no kpe i David. David nọ zẹ ye tiomanu uvuẹn ato.

Saul nọ ha isodja ri te 3,000 lele oma ya guọlọ i David. Nọ guọlọ i David te ekete ọyẹ ọrhẹ ihworho yi, e tiomanu. Ehworhare re lele i David ni ta riẹn: ‘Ọnana uphẹn wu ne kpe i Saul.’ David nọ shọrọ te ekete i Saul ọ havwọ, no bru ibiesuọn nẹ ẹrorẹ ewun i Saul. Ọrẹn, Saul o rhe-e. Ọke oru, ẹhẹn i David no kpokpie taghene ọye ọ họghọ rẹn orodje ri Jehova ọ ha mwu-u. David o kwe nẹ ehworhare enẹyen i kpe i Sau-ul. Nọ tobọ ta rẹn i Saul taghene, ọye o vwo uphẹn ro no kpe yi, ọrẹn, o kpe yi-i. Ọnana ọ lẹrhẹ i Saul wene ẹhẹn kpahen i David?

Ẹjo. Saul ọ ji guọlọ kpe i David. Ason owu, David ọrhẹ ọmọ omizie re se Abishai, ni bẹbẹ riẹ ekete i Saul o jẹ edọn rhọ. Abner rọ tobọ rhiẹ ohworho rọ hẹrote i Saul, ọ merhẹn. Abishai nọ tare: ‘Ọnana uphẹn rẹn ọwan! Ji mẹ kpe yi.’ David nọ kpahenrhọ riẹn: ‘Jehova yọ nọ kwosa rẹn i Saul. Jenẹ a ha akarhẹ ye ọrhẹ oborẹ ọ ha da ame, na nyarhẹn.’

David no rheren riẹ oberun ugbenu rọ kẹrẹ ekete i Saul ọ havwọ. Nọ tare rhẹ uvwele gorigori: ‘Abner, mesoriẹ wu vwa hẹrote orodje ọnọ? Akarhẹ ọrhẹ oborẹ i Saul ọ ha da ame ne?’ Saul nọ mẹrẹnvwrurhe taghene i David yọ tẹmro, nọ tare: ‘Manẹ wu kperi mẹ ne, ọrẹn, we ruie-e. Mi rheri taghene wẹwẹ yi na ha ẹrhẹ orodje mẹ.’ Saul nọ ghwẹrioma rie. Ọrẹn, orhiẹ ekrun i Saul ephian yi vwo utuoma kpahen i Davidi-i.