Ọke i Solomon o rhiẹ orodje Israel ne, Jehova nọ nọriẹn: ‘Me wu guọlọre ni mi ha wẹn?’ Solomon nọ tare: ‘Mẹmẹ ọmọvwerhe, mie rhe ekwakwa buebu-un. Biko yẹ mẹ ẹghwanren ni mi sabu hẹrote ihworho enọ.’ Jehova nọ tare: ‘Fọkime wu nekpẹn ẹghwanren, mi ne ruo rhiẹ ohworho rọ mai vwo ẹghwanren uvuẹn otọrakpọ na ephian. Mi na jeghwai yọ efe buebun. Wu rha huvwele mẹ, ne wu ne nyerẹn jijiri uvuẹn akpọ na.’

Solomon nọ tuẹn ẹbọn oghwa ẹga na rhọ. Solomon ọ ha oro, idolo efuanfon, erhan, ọrhẹ atita re mai ghanren ha bọn oghwa ẹga na. Emẹse ọrhẹ ehworhare buebun ri tẹn ona, yi vwobọrhọ owian ra bọn oghwa ẹga na. Ọke ẹgbukpe irhiruẹ a vrẹn hin, na bọn oghwa ẹga na hin jeghwai haye kpahontọre rẹn i Jehova. Oghwa ẹga na o vwo agbarha izobo, e fiẹ izobo rhọ ye. Solomon no sighwẹ rhẹ obaro agbarha izobo na, nọ nẹrhomo: ‘O Jehova, oghwa ẹga ọnana ọ do te yanghene rhomu te ha wẹ-ẹn, ọrẹn, biko rhiabọ dede ẹga ame jeghwai kerhọ ẹrhomo ame.’ Me yi Jehova o roro kpahen oghwa ẹga na ọrhẹ ẹrhomo ri Solomon ọ nẹren na? Ogege i Solomon ọ nẹrhomo na hin, erhanren no nẹ oberun rhe, nọ torhẹ izobo rọ ha uvuẹn agbarha izobo na. Jehova o rhiabọ dede oghwa ẹga na. Ọke emọ Israel a mẹrẹn ọnana, oma nọ merhenrẹn aye omamọ.

E rhe Orodje Solomon rhẹ ohworho rọ mai vwo ẹghwanren uvuẹn agbamwa Israel ọrhẹ emwa erọrọ ri serabọ rẹn aye. Ihworho ne bru i Solomon nya, nọ ha userhumu rẹn aye, aye i rhe vwo ebẹnbẹn. Orodje ọmase ro nẹ i Sheba rhe, nọ rhe mọ nọ i Solomon enọ egbogbanhon, sẹ ọnọ sabu kpahenrhọ aye. Ọke i Solomon ọ kpahenrhọ enọ na, orodje ọmase na nọ tare: ‘Mie vwo imwẹro kpahen oborẹ ihworho i ta mẹ kpahuọn bi-i, ọrẹn vwana, mi mẹrẹnvwrurhe ne taghene wu tobọ vwo ẹghwanren ghwẹ oborẹ aye i ta kpahuọn na. Jehova ro rhiẹ Osolobrugwẹ ọnọ, ọ ha ebrurhọ wẹn.’ Ekwakwa ne serhọ rẹn emọ Israel, oma nọ merhen aye. Ọrẹn, ekwakwa ni wenerin ọke oru.

Uvwre ọke i Solomon ọ ga i Jehova, o vwo ufuoma uvuẹn agbamwa Israel. Ọrẹn, Solomon nọ rọnmọ emẹse buebun ri nẹ emwa erọrọ rhe, emẹse na a ga ema. Bibiesuọn bibiesuọn, emẹse na ni riẹriẹ i Solomon, nọ ha ẹga rẹn ema. Jehova nọ tuekwẹre kpahen i Solomon. Jehova nọ ta rẹn i Solomon: ‘Ana ha uvie na nẹ uvwioghwa ọnọ jeghwai ghaliẹ rhẹ akwava. Mi na ha obọrẹ ọ maido uvuẹn uvie na rẹn idibo enọ nẹ aye i sun, uvwioghwa ọnọ yo no sun obọrẹ ọ mai kamu.’

Jehova no dje orhienbro yi phia izede ọrọrọ. Owu usuẹn idibo i Solomon re se Jeroboam, nọ mẹrẹn ọmẹraro Ahijah, ọke rọ nya uvuẹn izede. Ahijah nọ bẹrẹ ewun ọnẹyen rhẹ akwa ikpereva, nọ ta rẹn i Jeroboam: ‘Jehova ọnọ ha uvie na nẹ uvwioghwa i Solomon jeghwai ghaliẹ akwava. Ha akwa ikpe usuẹn ewun mi bẹrẹre na, nime wu ne sun ivwiẹ ikpe.’ Ọke i Solomon o rhon ọnana, nọ guọlọ kpe i Jeroboam. Jeroboam nọ zẹ riẹ Egypt. Ọke oru, Solomon no hwuru, ọmọyen re se i Rehoboam no rhiẹ orodje. Jeroboam nọ ghwẹrioma riẹ Israel.

Ihworho ri kpako ne uvuẹn Israel, ni ta rẹn i Rehoboam: ‘Wu rha dabu rhe ihworho na sun, aye ine vwo atamwu kpahuọn.’ Ọrẹn, igbehian i Rehoboam ri rhiẹ iphuphẹn, ni ta riẹn: ‘O fori ne wu djoma kpahen ihworho na! Ru ewian aye gbanhonrhọ!’ Rehoboam nọ ha urhebro igbehian yen. Nọ djoma kpahen ihworho na, ọnana nọ lẹrhẹ ihworho na kparehasuiẹ. Aye ni ha i Jeroboam mwu ẹrhẹ orodje no suẹn ivwiẹ ikpe na, re me rhe rhẹ uvie ọrẹ Israel. Ne me rhe ivwiẹ eva re hẹrhẹre rhẹ uvie ọrẹ i Judah, ihworho ri Rehoboam o suẹn na, ni sẹrorẹ atamwu kpahiẹn. Nẹ ọke ọrana nyarhẹn, na ghalẹ uvwiẹ ikpereva ọrẹ Israel na rhẹ akwava.

Jeroboam ọ guọlọ nẹ ihworho yi, i ya ha ẹga rẹn i Jehova uvuẹn Jerusalem rẹ Rehoboam orho suẹ-ẹn. Wu rhe oborẹ ọsoriẹ? Ofẹn o mwu i Jeroboam taghene ihworho na ina nyaje vwo ya hobọtua i Rehoboam. Omarana, Jeroboam nọ ha oro ma emọ erhuẹn eva, nọ ta rẹn ihworho na: ‘Jerusalem o seri phan. Are ina sabu ga i Jehova obonẹ.’ Ihworho na ni sẹrerhumuji Jehova, aye na ha ẹga rẹn ema erhuẹn ri Jeroboam ọ maren na.