“Mi Vwa Rha Zofa Ghwomara-an”

AKPENYERẸN MẸ BI

E vwiẹre mẹ uvuẹn amwa i Ciudad Obregón, obọrẹ o rierun ẹkwotọre i Mexico, mẹmẹ ọmọ ọrẹ isionrin usuẹn emọ awan irhinrin. Ame e rhirhiẹ otafe amwa na, ro rhiẹ ekete ọsẹ mẹ o vwo ikebi ọkokamu owu rhọ. Ọnana omamọ ekete ra na sabu rhirhiẹ, habaye, ekrun mẹ e nyerẹn kuẹgbe ọrẹ omamerhomẹ. Ọrẹ omemwurhọ, ọke mie te ẹgbukpe isionrin, ogiribo ọgbogbanhon nọ ghwọghọ ikebi na, ọnana nọ lẹrherẹ ame kwa riẹ amwa ọrọrọ.

Akpọ nọ dabu rhomu rẹn ọsẹ mẹ avwaye. Ọrẹn, ọke ọrana, nọ da inyo vrẹn oma. Ọnana nọ hobọte ọsoso ekrun na. Mẹmẹ rhẹ imizu mẹ ekpako awanva ne phopho isigẹti, rẹ ame i so mie ọsẹ ame. Ọke mie te ẹgbukpe erhan, ni mi da inyo vrẹn oma, ọnana yẹ ọke ọrukaro. Ọke o ru, eri vwiẹre mẹ ni hẹriẹre, uruemru mẹ no biomurhọ ọke ọrana.

Izu mẹ nọ kpare ame leloma ọke ro yo lele ọhworhare ọrọrọ rhirhiẹ. O vwo kwe yẹ ye igho-o, habaye, igho izu mẹ ọ mẹrẹn o vwo te yi hẹrote ame-e. Omarana, mẹmẹ rhẹ imizu mẹ na wian ewian rẹ ame ina sabu wian, ọrẹn, ọ bẹn rẹ ame a mẹrẹn igho rẹ ame ina hẹrote oma ame. Mia pọlishi isabatu, ji rhẹ ibrẹdi, ẹbe rọ kpare iyẹnrẹn, ishingọmu, ọrhẹ ekwakwa erọrọ. Mia ji nyalele amwa guọlọ emaren rẹ edafe i tue fughwẹ uvuẹn ikoroba ra kwrọ ikweku rhọ.

Ọke mie te ẹgbukpe ikpe, ọhworhare owu nọ ha use mẹ ni mi lelie wian uvuẹn ekete re tue ikweku rhọ uvuẹn amwa na. Ni mi ha use na, ni mi nyaji isukuru vwo, jeghwai zẹ nẹ oghwa. Igho ro vwo bun te ₦170, yọ kwa mẹ obẹta ẹdẹ na, ọ ji yẹ mẹ emaren usuẹn emaren rẹ ame i mẹrẹnren uvuẹn ekete re tue ikweku rhọ na. Mie rhirhiẹ ibiẹ oghwa mi bọnren rhẹ ekwakwa re tue fughwẹ. Ihworho mie kwomakugbe a tẹmro ibiobiomu, aye e ji gbọfanrhiẹn. Buebun aye a da imwu egbogbanhon, ji da inyo vrẹn oma. Ọnana yẹ ọke mia mai rhiẹromẹrẹn obẹnbẹn uvuẹn akpenyerẹn mẹ, ni mia viẹ kason kason fọkime ofẹn o mwu mẹ. Fọkiẹ erhirhiẹ ogbere ọrhẹ isukuru mi vwa nya gbọriọ, ofa nọ ro mẹ. Mi rhirhiẹ ekete ra kwrọ ikweku rhọ joma te ẹgbukpe esa, bọmọke mi ki riẹ i Mexico. Uvuẹn i Mexico yi mia wian uvuẹn ikebi, ri mia rhọrọ idodo ọrhẹ ikọtini, mie koko ikwerhe, ji vuọn ipotato.

Ẹgbukpe ẹne a vrẹn, ni mi rharhumu riẹ Ciudad Obregón. Omizu ọsẹ mẹ ọmase ro rhiẹ ọbo ro simi ihworho, ọrẹn, urhi o kwenu riẹ-ẹn, nọ yẹre mẹ obuvun owu uvuẹn oghwa ye ni mi rhirhiẹ. Ni mia menemena ra lẹrhẹ ofẹn mwu mẹ ọke ephian, ẹhẹn mẹ no seriotọre te erhirhiẹ mie vwo iroro mi ne kpe omamẹ. Ason owu, ni mi nẹrhomo vwe Osolobrugwẹ: “Ọrovwori, orhianẹ we nyerẹn, mi guọlọ rhe owẹwẹ, ni mi na ga bẹmẹdẹ. Orho vwo ẹga urhomẹmro, mi guọlọ rhe yi.”

OBORẸ I BAIBOL NA O WENE AKPENYERẸN MẸ LELE

Mi guọlọ yono kpahen Osolobrugwẹ. Ọke mia ji kamu, mi riẹ ẹga sansan, ọrẹn, ẹhẹn mẹ no seriotọre kpahen ọsoso aye. O vwo owuorowu rọ dabu yono ihworho kpahen i Baibol na-a, yanghene ha userhumu mẹ yono kpahen Osolobrugwẹ-ẹ. Buebun i vwo ọdamẹ igho phan, habaye, erọrọ evwọfanrhiẹn.

Ọke mia ha ẹgbukpe 19, ọgọ mẹ owu nọ ta mẹ taghene Iseri Jehova i yoni rien oborẹ i Baibol na ọ ta kpahen ema rẹ ẹga a ha ruiruo. No se Exodus 20:​4, 5 ha mẹ. Avwaye na ọ tare taghene avwa vi jare ema-a. Oghwẹmro ọrẹ 5 ọrhọ ta: “Are i vwe vi gburhomu rhotọre harẹn aye yanghene a vwa riẹriẹ are ga aye-e, fọkime mẹmẹ, Jehova Osolobrugwẹ, Mẹmẹ Osolobrugwẹ rọ guọlọ ẹga ro fiotọre.” Omarana, ọgọ mẹ nọ nọren mẹ taghene, “Orhianẹ Osolobrugwẹ ọ ha ema ruẹ igbevwunu yanghene no kweri na ha aye ha ẹga riẹn, mesoriẹ o jurhi kpahiẹn?” Ọnana nọ lẹrhere mẹ roro kpahiẹn. Ọke o ru, ame ni ta kpahen irhomu-ẹmro buebun uvuẹn i Baibol na. Mi riamerhen ikuegbe erana omamọ, ame i ghwọghọ ọke ta kpahiẹn, ọrẹn nọ họhọre taghene ọke na o te rẹn ame-e.

Ọke o ru, nọ hare mẹ riẹ uyono Iseri Jehova. Oborẹ mi mẹrẹnren ji rhon oboran, ọmerhoma omamọ. Emọvwerhe e ji vwobọrhọ uyono na, aye a dabu tẹmro na fiotọre nẹ ubiukpe na. Ni mie roro, ‘Obọdẹn uyono yẹ ihworho enana e ghini yono aran!’ Udabọ ẹton mẹ iseseri ọrhẹ omẹhaphia mẹ ro vwo serhọ, aye i dabu dedi mẹ sasasa. Ekrun owu ọ ji ha use mẹ, ni mi lele aye riẹ emaren, uyono na orho fuen owuọwọn ọrana.

Ọke mie lele Iseri Jehova yono i Baibol na, mi yonorin taghene i Jehova Ọsẹ ẹguọlọ rọ hẹrote ọwan udabọ erhirhiẹ ọwan, ekete re nurhe, ophianroma ọwan yanghene ekete re riẹ isukuru te. Itiọrurhomẹmro, o vwo nẹ ohworho ruẹ-ẹ. (Acts 10:​34, 35) Obẹtaye, ni mi yono kpahen Osolobrugwẹ. Mie rhe mwuomarhọ jerẹ ohworho rẹ emru ọ va riẹ obọ-ọ.

ERERE MI MẸRẸN NE

Akpenyerẹn mẹ no rhomẹrhọ bibiesuọn! Ni mi dobọ isigẹti ephopho ji, inyo ẹda vrẹn oma, ọrhẹ erharhere ẹmro ẹta. Ekwẹre mia tua fọkiẹ ekwakwa ri vwe serhọ nẹ ọke ọmọvwerhe mẹ rhe, no riotọre bibiesuọn, omaran ji te emena ra lẹrhẹ ofẹn mwu mẹ. Mi vwe rhe ni omamẹ sakamu-u, ro rhiẹ oborẹ mie roro fọkiẹ ekwakwa mi rioja ye ọke mia kamu, ọrhẹ fọkiẹ isukuru mi vwa nya gbọriọ.

Mi rọnmọ obọdẹn ane ro vwo ẹguọlọ kpahen i Jehova, rọ dabu hobọtua mẹ. Vwana, mia ga ẹrhẹ oniruo okinhariẹ, ri mie rhiọpha ruẹ ikoko sansan ya ha urhebro rẹn aye, jeghwai yono aye kpahen i Jehova. Oma ọmerhenren mẹ kpahen omẹgbanhon ri Baibol na o vwori ọrhẹ obọdẹn uyono ri Jehova o tiobọnẹ rẹn ọwan, mi vwa rha zofa ghwomara-an.