Ihworho buebun i vwe rhe riẹ ẹga-a, fọkime aye vwa mẹrẹn omamọ urhebro-o yanghene ẹkpahenrhọ harẹn enọ ri sekpahen akpọ-enyerẹ-ẹn. Mesoriẹ wu ne riẹ ekete Iseri Jehova e ru iyono? Me yẹ wu na mẹrẹn avwaye?

Omamerhomẹ ọ havwiẹ wu rhe kwomakugbe ihworho ri vwo ẹguọlọ ra je hẹrote owuowọnwan. Ilelikristi ukukaro, i vwo ikoko rẹ aye erhe koko ha ogame harẹn Osolobrugwẹ, aye e yono i Baibol jeghwai ha urhebro harẹn owuowọnwan. (Hebrews 10:24, 25) Ekoko ọrẹ ẹguọlọ ọrana, nọ lẹrhẹ aye ha ye taghene aye ha uvuẹn erhẹrhẹ omamọ igbehian ri họhọ imizu. (2 Thessalonians 1:3; 3 John 14) Udje ọnana ye ame a nyalele, ame na jeghwai mẹrẹn aruo omamerhomẹ ọrana.

Erere rọ havwiẹ e yono oborẹ ene ru sabu ha iruemru-urhi Baibol wian. Jerẹ oborẹ ọ havwọ ọke ahwanren uvuẹn i Baibol, ehworhare, emẹse, ọrhẹ emọ, ekoko kugbe. Iyono ri mwuovwan a ha i Baibol na yẹ ọwan userhumu neneyo ọwan sabu ha iruemru-urhi Baibol wian uvuẹn akpọ-enyerẹn ọwan kẹdẹkẹdẹ. (Deuteronomy 31:12; Nehemiah 8:8) Ihworho ephian ena je sabu kpahenrhọ enọ a nọren, jeghwai so ijoro kugbe. Ọnana nọ lẹrhẹ ọwan dje ifiẹrorhọ ọwan i vwori jerẹ Ilelikristi phia.—Hebrews 10:23.

Ebrurhọ rọ havwiẹ wu na bọn esegburhomẹmro ọnọ kpahen Osolobrugwẹ gbanhon. Ọnyikọ Paul ọ ta harẹn ukoko owu uvuẹn ẹdẹ ọnẹyen: ‘Mi guọlọ mẹrẹn are, . . . neneyo ọwan vwo urhebro nyoma esegburhomẹmro owuowọnwan rhe, ọnẹmẹ rhẹ ọrẹ are.’ (Romans 1:11, 12) Uvuẹn uyono ame, ekwomakugbe imizu ame ọ bọn esegburhomẹmro ame gbanhan, ọrhẹ omwemẹ ene nyerẹn akpọ Olelikristi.

Wu na sabu rhiẹ uyono ame mọ mẹrẹn ekwakwa enana a tẹmro kpahen na? Wu rha sabu rhe ene dede owẹwẹ sasasa. Iyono na ephian ọphẹ, a vwa kwosa rhọ ye-e.

• Udje ọgo yẹ iyono ame a nyalele?

• Erere ego yẹ a mẹrẹn nẹ iyono ẹnya sa?

Orhianẹ aruọke na orhomu-u, yanghene izede na oseseri, ọ jeghwai biomu, ame e ji riẹ uyono ame ọke na ephian. Udabọ ebẹnbẹn akpọ-enyerẹn, ọrhẹ oma ẹghwọghọ fọkiẹ owian, mesoriẹ Iseri Jehova a je damoma kwomakugbe ereva aye?

Orhomu harẹn ame. Sekpahen ihworho ame rhẹ aye egbe kwomakugbe uvuẹn ukoko na, Paul ọrhọ ta, ‘Roro kpahen owuowọnwan.’ (Hebrews 10:24) Ẹmro ọnana omevirhọ taghene “a dabu roro kpahen,” nọ yẹ a dabu rhe owuowọnwan. Omaran na, Paul, nọ ha riẹ ru urhebro harẹn ọwan taghene ọwan erhe roro kpahen awọrọ. Ame erhe ti kẹrẹ ekrun Ilelikristi erọrọ, nẹ ame ena mẹrẹn vwrurhe taghene aye ji vwo ebẹnbẹn ezẹko re họhọ erẹ ame, rẹ aye ji fikparobọ ne. Aye ena sabu yẹ ame userhumu fi ebẹnbẹn erẹ ame kparobọ.

Ọ bọn igbehian ame gbanhan. Uvuẹn uyono ame, ame e koko rhẹ igbehian ri kpẹnkpẹn ren, rhẹ igbehian ghemeghe-e. Ọkezẹko ame e ji koko ru omamọ iruẹn kugbe. Erere ego yẹ ame a mẹrẹn nẹ enana sa? Ọ lerhẹ ame vwo ọdamẹ kpahen owuowọnwan, ọnana nẹ ọ bọn ẹguọlọ ame gbanhan. Ọke rẹ imizu ukoko ame i rhe vwo ebẹnbẹn, ame na sabu yẹ aye userhumu nime igbehian ame ọ dabu gbanhon ne. (Proverbs 17:17) Ame erhe kwomakugbe ọsoso ihworho re ha ukoko na, ame ne dje phia taghene ame ‘vwo ọdamẹ ọgbogbanhon kpahen owuowọnwan.’—1 Corinthians 12:25, 26.

Ame ha urhebro wẹn ne wu djẹ ihworho re ruẹ ọhọre Osolobrugwẹ e ru igbehian enọ. Wu na mẹrẹn eghẹnrẹn igbehian enana erhẹrhẹ Iseri Jehova. Biko, wu vwa lẹrhẹ emru owuorowu da-obọ ji ẹrhiọ iyono ame-e.

• Erere ego yẹ a mẹrẹn nẹ iyono ame sa?

• Ọke ọgo yẹ wu guọlọ ha rhiẹ uyono ame ne wu dabu rhe ame fiotọre?

Uvuẹn iyono Ilelikristi erẹ ukukaro, aye a so ijoro, nẹ ẹrhomo, jeghwai yono i Baibol na kugbe. (1 Corinthians 14:26) Omaran iyono ame ọ je havwọ.

Uyono na, a bọn riẹn kpahen i Baibol, a je sabu ha ye ruiruo. Kẹdidjala Kẹdidjala, ukoko owuowu ekoko ya kerhọ Ẹmro otu iminiti-30 ro dje kpahen oborẹ i Baibol na o ru sekpahen akpọ-enyerẹn ọwan ọrhẹ ọke ame i nyerẹn te na. A yẹ ọwan urhebro taghene e rhie i Baibol ọwan ọke e rhe se yi. Ẹmro otu na orho hin ne, Uyono i “Watchtower” unọke-owu nẹ ọnọ tonrhọ. Ihworho uvuẹn otu na ena sabu kpahenrhọ enọ ra nọren nẹ uvuẹn i Watchtower na rhe. Uyono ọnana, ọ yẹ ọwan userhumu ha uruemru-urhi Baibol na ha suẹn akpọ-enyerẹn ọwan. Watchtower owuọvo na yẹ e yono uvuẹn ekete akpọ na okeri te, uvuẹn ikoko ame rọ vrẹn 115,000.

Ọ lẹrhẹ ame sabu vwo ona re yono. Ame a je vwoma owọnwọn erhẹrhẹ ọkprughwre na ru uyono rẹ a ghalẹ rhẹ akwa-esa. Ọrukaro, yẹ Uyono i Baibol Ukoko iminiti-30, ọnana onọ rhẹ ẹkpahenrhọ, ọ sabu lẹrhẹ ame rhe iruemru-urhi ọrhẹ aro-ẹmẹrẹn i Baibol na fiotọre. Ọrọ ha kpahiẹn yẹ Uyono Isukuru Uvie na iminiti-30. Ọ tuanrhọ rhẹ ẹrhon-ẹmro ekete ra ha nẹ i Baibol na rhe, rẹ ihworho i mwegbe rhọ vẹrhẹ ne. Habaye, ihworho ri vwobọ rhẹ isukuru na, a ha ẹmro aye i mwegbe rhọ na phia kpekemu. Ọrọ hẹrote isukuru na nọ djoka rhẹ ekete ezẹko ọnọ sabu yẹ ọwan userhumu ne rhiẹ omamọ iyono. (1 Timothy 4:13) Ọrọkẹta, yẹ Uyono Iruo Uvie iminiti-30, nyoma ẹmro a haphia, idje, rhẹ erhonmie, ame ne yono oborẹ ame ine ru sabu yono ihworho erọrọ i Baibol na.

Wu rha rhiẹ iyono ame, o vwo ẹfro-o, wu na mẹrẹn omamerhomẹ nẹ omamọ uyono i Baibol rẹ ame a ha phia.—Isaiah 54:13.

• Me yẹ wu na sabu yono uvuẹn iyono Iseri Jehova?

• Uyono ame ọgo uvuẹn ọkprughwre na yẹ wu guọlọ nya?

Wu djoka rhọ ye taghene Iseri Jehova uvuẹn ifoto i broshọ ọnana e dabu heri ọke rẹ aye e riẹ uyono? Mesoriẹ ame a dabu damerhọ osẹme ọrẹ ame?

O dje ọghọ harẹn Osolobrugwẹ ame. Urhomẹmro, Osolobrugwẹ ọ vwọ tẹnrovi oborẹ ame e havwọ ọrẹ ugboma-a. (1 Samuel 16:7) Jọrẹn, ọke rẹ ame ekoko ha ogame riẹn, ọdamẹ ọrẹ ame yẹ, ọrẹ ame ine dje ọghọ ha riẹn kugbe ihworho ame rhẹ aye a gba ga kugbe. Orhianẹ ame mevi rhẹ obaro oguẹnzọn uvuẹn ẹghware, ame na damoma nẹ osẹme ame o dje ọghọ ha riẹn fọkiẹ ẹrhẹ ọye ọ havwọ. Omaran ọ je havwọ, osẹme ame a sẹ riẹ uyono ame, o dje ọghọ harẹn ‘Oguẹnzọn akpọ na ephian,’ Jehova Osolobrugwẹ, omaran ji te ekete ame a ha ogame ha riẹn.—Genesis 18:25.

O dje omamọ iruemru-urhi ame a nyalele. Baibol na ọ ha urhebro harẹn Ilelikristi taghene a sẹ osẹme ‘rẹ oserhọ rhẹ osasame ọrẹ ẹhẹn.’ (1 Timothy 2:9, 10) Eheri ‘rẹ oserhọ’ omevirhọ taghene ọwan e rha kẹnoma harẹn iwun ra ba oma vwan ọrhẹ erẹ ine rhie oma ọwan firhọ. Habaye, ene vwo ‘osasame ọrẹ ẹhẹn,’ ọ yẹ ọwan userhumu sabu djẹ omamọ iwun ri serhọ. Iruemru-urhi enana ọ yẹ ọwan uphẹn rẹ ọwan ena sabu djẹ odjẹ iwun ri serhọ harẹn omobọ ọwan. A rha tobọ tẹmro dede-e, omamọ osẹme rẹ o tiuhrun ro ji serhọ rẹ ọwan a sẹ, ‘o brọghọ rhẹ iyono ọrẹ Osimi ọwan’ ọ jeghwai ha ‘odidi vwo Osolobrugwẹ.’ (Titus 2:10; 1 Peter 2:12) Ame erhe herẹ riẹ uyono, ame na lẹrhẹ ihworho ha omamọ ukẹro nẹ ogame ọrẹ i Jehova.

Wu vwe je nẹ ewun da-obọ ji ẹrhiọ Kingdom Hall ame-e. Rhẹ iwun ọwan ena ghanren yanghene rhiẹ ọkpokpọ vwẹre-e, orhiẹ ọrẹ ọforon ọ jeghwai serhọ.

• Marhẹ omamọ osẹme ọrẹ ame ọghanren te ọke rẹ ame a ha ogame harẹn Osolobrugwẹ?

• Iruemru-urhi ego yẹ o suẹn ame djẹ odjẹ osẹme ro serhọ?

Orhianẹ wẹwẹ e yono i Baibol rhẹ Iseri Jehova, ọkezẹko wẹwẹ e mwegbe ẹbe ọnọ rhotọre bọmọke are e ki yono. Neneyo wu sabu mẹrẹn erere ọduado nẹ uyono ukoko na rhe, no fori taghene wu mwegbe vwẹre ne wu ki nya. We rhe ru omaran ọke na ephian, wu na mẹrẹn omamọ erere nẹ uvuien rhe.

Djẹ ọke ọrhẹ ekete wu ne yono. Ọke ọgo yẹ ọ mai serhọ ha wẹn wu ne yono? Igidi-urhiọke bọmọke we ki riẹ owian, gbinẹ owọnwọn emọ na e rha merhẹn ne? Orhianẹ wu sabu ha ọke ojijiri ru uyono na-a, gba kwaphiẹ ukiọke wu guọlọre rhọ, wu vwe je nẹ emru owuorowu fi ọgbanrhọ rhọ ye-e. Guọlọ ekete rẹ ọfọre, ne wu fuen ekpeti-ughe, ekpeti-agbaro, kugbe ifonu, jeghwai ti oma nẹ ikun-egbe ri vwe vwo erere, nẹ aye je rhiẹ ọgbanrhọ ha wẹn. Wu rha nẹ-ẹrhomo vwẹre wu ki tonrhọ ọnọ ha userhumu wẹn kpare iroro vrẹn ọfiamu ẹdẹ na, neneyo wu sabu tẹnrovi ẹmro Osolobrugwẹ.—Philippians 4:6, 7.

Djokarhọ ẹbe na, ne wu mwegbe wu na kpahenrhọ enọ. Kiki vwo ẹruọ oborẹ urhomẹmro na osekpahen. Roro kpahen urhomẹmro na, ji roro kpahen oborẹ ẹrhon-ẹmro owuowu o ru sekpahen urhomẹmro na. Habaye, roro kpahen oborẹ ifoto rhẹ enọ re ha uvuien e ha ẹrhon-ẹmro na phia. Gbe se udjoghwẹ owuowu, ne wu guọlọ ẹkpahenrhọ harẹn enọ ra nọren na. Gbe se ekete i Baibol rẹ a ha unu te, neneyo wu roro kpahen oborẹ aye i hobọtua urhomẹmro na lele. (Acts 17:11) Wu rha mẹrẹn ẹkpahenrhọ onọ na ne, gba djokarhọ ye ne wu sabu karorhọ ẹkpahenrhọ na ọke rẹ ana nọ enọ na uvuẹn uyono. Wu rhe te uyono, wu na sabu riẹn obọ ne wu kpahenrhọ enọ wu mwegbe rhọ na.

We rhe roro kpahen urhomẹmro sansan re yono kpahen uvuẹn ẹkprughwre owuowu, ‘oghwa efe’ irherhe i Baibol ọnọ nẹ ọnọ do riẹ aro.—Matthew 13:51, 52.

• Me yẹ wu ne rhe ruẹ ọke ephian ne wu dabu mwegbe rhẹ iyono?

• Marhẹ wu ne ru sabu mwegbe oma ọnọ neneyo wu sabu kpahenrhọ enọ uvuẹn uyono?

Nẹ ọke ahwanren rhe, Jehova ọguọlọre taghene ekrun owuowu e ghwọghọ ọke kugbe, nẹ aye bọn onyerẹnkubge aye rhẹ Osolobrugwẹ gbanhon, jeghwai bọn ekrun ọrẹ aye gbanhon. (Deuteronomy 6:6, 7) Ọnana yẹ ọsoriẹ Iseri Jehova e fi ọke rhotọre uvuẹn ẹkprughwre owuowu nẹ aye ru ogame ekrun kugbe, aye na ha omamọ ọke ọnana tẹmro ro nẹ i Baibol na rhe, ro sekpahen ọdamẹ ọrẹ aye. Orho rhianẹ wẹwẹ ọvo ye rhirhiẹ, wu na ji sabu ghwọghọ ọke ọrana kugbe rhẹ Osolobrugwẹ nyoma uyono i Baibol rhe.

Ogame ekrun, ọnana ọke re ti kẹrẹ i Jehova. ‘Ti kẹrẹ Osolobrugwẹ, ọye nẹ ono ti kẹrẹ owẹwẹ.’ (James 4:8) Ame e rhe i Jehova rhọ ọke rẹ ame e yono kpahen iruemru ọrhẹ irueru enẹyen nẹ uvuẹn i Baibol na sa. Izede ọlolọhọ owu wu na ton ogame ekrun ọnọ rhọ, yẹ are ena kwaphiẹ ọke kugbe se i Baibol na phia. Wu na sabu lele ekete i Baibol rẹ ene se uvuẹn Isukuru Uvie ọrẹ ọkprughwre na. Wu na sabu ghalẹ isese na harẹn owuowọnwan uvuẹn ekrun na, neneyo ihworho ephian uvuẹn ekrun na e sabu tẹmro kpahen oborẹ aye i yono nẹ i Baibol na rhe.

Ogame ekrun, ọnana ọke re ti kẹrẹ owuowọnwan uvuẹn ekrun na. Esa rhẹ ane, emiọmọ rhẹ emọ, a bọn onyerẹnkugbe ọrẹ aye gbanhan ọke rẹ aye e yono i Baibol kugbe jerẹ ekrun. Ọnana o rhiẹ ọke ufuoma rhẹ omamerhomẹ rẹ ihworho ephian uvuẹn ekrun na e fiẹrorhọ kọkprughwre kọkprughwre. Lele ẹgbukpe emọ na, emiọmọ ena sabu sanọ urhomẹmro ro fori nẹ i Watchtower rhẹ Awake rhe, yanghene nẹ uvuẹn iwẹbsaiti ame, jw.org rhe. Wu na je sabu tẹmro kpahen obẹnbẹn emọ na e mẹrẹnren uvuẹn isukuru kugbe oborẹ aye ine ru sabu fi obẹnbẹn na kparobọ. Wu na je sabu mwegbe ijoro ana so obẹ uyono. Jeghwai riẹ omamerhomẹ ibiẹ emaren ọke rẹ ogame ekrun na orho hin ne.

Omamọ ọke ọnana uvuẹn ọkprughwre owuowu rẹ a ha ogame vwe i Jehova kugbe na, ọnọ yẹ ekrun na userhumu mẹrẹn omamerhomẹ nẹ uvuẹn uyono Ẹmro ọrẹ Osolobrugwẹ rhe, Osolobrugwẹ nẹ ọnọ ha ebrurhọ ọduado harẹn omẹdamo are.—Psalm 1:1-3.

• Mesoriẹ ame a kwaphiẹ ọke rhọ e ru ogame ekrun?

• Me yẹ emiọmọ ena sabu ru neneyo ihworho ephian e sabu mẹrẹn omamerhomẹ nẹ ogame ekrun na rhe?

Mesoriẹ oma ọ merhen ihworho re ha uvuẹn ifoto enana? Aye e ha uvuẹn omẹvwa ame owu. Jerẹ oborẹ Osolobrugwẹ ọta harẹn idibo yi ọke ahwanren taghene aye i rhe koko ọgbọ esa uvuẹn ẹgbukpe, omaran ame e ji kwomakugbe uvuẹn omẹvwa ọrẹ ame. (Deuteronomy 16:16) Kẹgbukpe kẹgbukpe, ame i vwo emẹvwa esa: Omẹvwa okinhariẹ ẹdẹ owu re ruẹ ọgbọ eva ẹgbukpe, rhẹ omẹvwa ẹkwotọre ẹdọke esa. Marhẹ ame a mẹrẹn erere nẹ emẹvwa enana sa?

Emẹvwa a bọn onyerẹnkugbe ame rhẹ imizu ukoko ame gbanhan. Jerẹ oborẹ oma ọ merhen emọ Israel ọke rẹ aye e jiri Jehova ‘uvuẹn emẹvwa,’ ọmaran oma ọ je merhen ame ọke rẹ ame erhe kwomakugbe ha ogame riẹn uvuẹn emẹvwa ọrẹ ame. (Psalm 26:12; 111:1) Emẹvwa enana a yẹ ame uphẹn re kwomakugbe imizu ame ri nẹ ukoko yanghene ẹkwotọre erọrọ rhe. Erhẹrhuvo orho te ne, ame na riẹ emaren kugbe, ọnana otoro ba omamọ onyerẹnkugbe omẹvwa na. (Acts 2:42) Uvuẹn emẹvwa enana, ame a dabu mẹrẹn ẹguọlọ ‘okugbe imizu ame’ uvuẹn akpọ na ephian.—1 Peter 2:17.

Emẹvwa ọ yẹ ame userhumu vwo omamọ onyerẹnkugbe rhẹ Osolobrugwẹ. Emọ Israel i je mẹrẹn erere nime aye i vwo ‘eruo ẹmro’ i Baibol rẹ a dabu dje fiotọre harẹn aye. (Nehemiah 8:8, 12) Ame e ji dje ọdaremẹro kpahen oborẹ ame e rhon nẹ i Baibol na sa uvuẹn emẹvwa ame. Urhomẹmro omẹvwa owuowu a bọn riẹn kpahen i Baibol na. Nyoma ẹmro sansan, ifiẹmro, kugbe udje-ẹvwanriẹnru, ame ne yono kpahen oborẹ ene ru sabu ru ọhọre Osolobrugwẹ uvuẹn akpọ-enyerẹn ame. Ọke rẹ ame e rhon kpahen oborẹ imizu ukoko ame a sabu nyerẹn ghele ebẹnbẹn rẹ ene nyerẹn jerẹ Ilelikristi uvuẹn ọke ọgbogbanhon enana, nọ ji bọn ame gbanhan. Uvuẹn emẹvwa ẹkwotọre, ame a mẹrẹn iruẹn udje ra lẹrhẹ ame dabu rhe ikun-egbe i Baibol fiotọre, ro yono ọwan uyono ana sabu ha wian. Komẹvwa komẹvwa, o vwo ẹkwaphiẹrhotọre omebrurhame harẹn ihworho re guọlọ dje omẹhakpanhotọre ọrẹ aye harẹn Osolobrugwẹ phia.

• Mesoriẹ emẹvwa na e rhiẹ ọke omamerhomẹ?

• Marhẹ wu ne ru sabu mẹrẹn erere nẹ omẹvwa ẹnya rhe?

Bọmọke o ki hwu Jesu ọrhọ ta: ‘Ene ghwoghwo iyẹnrẹn esiri Uvie na lele ekete akpọ na okeri te no rhiẹ oseri harẹn egbamwa na ephian, oba na nẹ ọnọ rhe.’ (Matthew 24:14) Marhẹ owian aghwoghwo rẹ ono lele akpọ na ephian ono ru te orugba? Nyoma ẹnyalele udje i Jesu o djeri ọke rẹ ọye ọ ha akpọ na.—Luke 8:1.

Ame a damoma bru ihworho riẹ oghwa aye. Jesu oyono idibo yi nẹ aye ghwoghwo iyẹnrẹn eseri na nẹ oghwa riẹ oghwa. (Matthew 10:11-13; Acts 5:42; 20:20) Ilelikristi erẹ ukukaro, a ghalẹ ekete rẹ aye ine ghwoghwo harẹn aye. (Matthew 10:5, 6; 2 Corinthians 10:13) Inyenana, a je dabu kwaphiẹ owian aghwoghwo ame rhọ, ukoko owuowu i vwo ekete rẹ a ghalẹ harẹn aye. Ọnana nọ lẹrhẹ ame ha akama i Jesu te orugba ọrẹ ene ‘ghwoghwo harẹn ihworho na jeghwai se oseri ro fiotọre.’—Acts 10:42.

Ame a damoma ghwoghwo harẹn ihworho ekete a mẹrẹn aye ephian. Jesu o dje udje na ọke rẹ o ghwoghwo harẹn ihworho uvuẹn afiede, jerẹ okokọ urhie yanghene edje ọrẹ amwa. (Mark 4:1; John 4:5-15) Ame a je tẹmro harẹn ihworho kpahen i Baibol na ekete ana sabu mẹrẹn aye, jerẹ uvuẹn idumu, ekete arha so eyi, ekete arha ro imoto, yanghene nyoma ifonu. Ame e ji ghwoghwo harẹn erẹ ame rhẹ aye erhirhiẹ kugbe, wian kugbe, riẹ isukuru kugbe, ọrhẹ ituẹ ẹghwa ame, ọke rẹ uphẹn ye orho rhiefirhọ. Omẹdamo enana ephian nọ lẹrhẹ iduduru ihworho ekete akpọ na okeri te rhon ‘iyẹnrẹn esiri ọrẹ usimirhọ na.’—Psalm 96:2.

Wu na sabu roro kpahen ihworho wu ne ghwoghwo iyẹnrẹn esiri Uvie Osolobrugwẹ na riẹn, kugbe oborẹ iyẹnrẹn ọrana o mevirhọ uvuẹn obaro akpọ-enyerẹn ọrẹ aye? Ẹmro ẹroefirhọ ọnana wu vwa sẹroriẹ rhẹ oma ọnọ ọvo-o, ghwoghwo harẹn aye ogege rẹ uphẹn na o rhiefirhọ!

• ‘Iyẹnrẹn esiri’ ọgo yẹ ene vi ghwoghwo?

• Marhẹ Iseri Jehova a hẹrokele udje aghwoghwo i Jesu?

Ẹmro na “ọkobaro” omevirhọ ihworho ra guọlọ ekete ekpokpọ, jeghwai dje izede harẹn awọrọ. Jesu oghẹnren ọkobaro ọrana re dje rhiẹ otọrakpọ na, nọ ha aghwoghwo-arhọ phia neneyo o dje izede ro suẹn riẹ usimirhọ harẹn ihworho. (Matthew 20:28) Inyenana, erẹ a nyalelie a hẹrokele udje yi nyoma ọke buebun rẹ aye a ghwọghọ rhẹ owian re ‘ru idibo.’ (Matthew 28:19, 20) Ezẹko e sabu vwobọ rhẹ oborẹ ame e se iruo ọkobaro na.

Ọkobaro ọ yẹ oghwoghwẹmro ọke-vuọnvuọn. Iseri Jehova ephian ighwoghwẹmro iyẹnrẹn esiri na. Ọrẹn, ezẹko e sabu kwaphiẹ ọke aye rhọ nẹ aye sabu ga jerẹ ekobaro ọke-ephian, rẹ aye a wian unọke 70 ubiamo owuowu uvuẹn owian aghwoghwo na. Nẹ a sabu ru ọnana, buebun na wian owian uphrophro-ọke. A je sanọ ezẹko nẹ aye ga jerẹ ekobaro oghẹnrensan, uvuẹn ekete ra mai guọlọ ighwoghwẹmro Uvie na, aye a wian unọke 130 yanghene ghwẹ omaran uvuẹn owian aghwoghwo na ubiamo owuowu. Ekobaro na, aye e nyerẹn akpọ ọlolọhọ, rhẹ imwuẹro taghene Jehova ono ru ọdamẹ ọrẹ aye harẹn aye. (Matthew 6:31-33; 1 Timothy 6:6-8) Ihworho re vwa sabu ga jerẹ ekobaro ọke-vuọnvuọn ena sabu ga jerẹ ekobaro ibiọke, aye e rha sabu ru te omaran. Aye a wian unọke 30 yanghene 50 uvuẹn ubiamo.

Ẹguọlọ e vwo kpahen Osolobrugwẹ ọrhẹ ihworho yẹ o mwu ọkobaro. Jerẹ i Jesu, ame mẹrẹn vwrurhe taghene ihworho buebun e guọlọ rhe kpahen Osolobrugwẹ rhẹ egbemwu ro vwori harẹn ọwan. (Mark 6:34) Jọrẹn, ame vwo irherhe rẹ ọnọ yẹ aye userhumu ọke ọnana, rẹ ọnọ yẹ aye ifiẹrorhọ ọgbogbanhon kpahen obaro na. Ẹguọlọ rẹ ọkobaro o vwori kpahen ihworho yẹ o mwuie yẹ awọrọ userhumu e rhe iyẹnrẹn esiri na. (Matthew 22:39; 1 Thessalonians 2:8) Nyoma ọnana rhe, esegburhomẹmro ọkobaro na nọ gbanhanrhọ, ọye no ti kẹrẹ Osolobrugwẹ rhọ, nọ jeghwai mẹrẹn omamerhomẹ omamọ.—Acts 20:35.

• Ọrọmo yẹ ọkobaro?

• Me yẹ o mwu ihworho ezẹko rhirhiẹ ọkobaro ọke-vuọnvuọn?

E rhe Iseri Jehova rhẹ ihworho re ru isukuru uvie sansan. A kwaphiẹ iyono oghẹnrensan rhọ harẹn ihworho re homakpanhotọre harẹn owian aghwoghwo-Uvie na ọke vuọnvuọn, neneyo aye sabu ‘wian owian aghwoghwo na vuọnvuọn.’—2 Timothy 4:5.

Pioneer Service School. Ohworho ọrhọ ga jerẹ ọkobaro ọke-ephian te ẹgbukpe owu ne, nẹ ono riẹ isukuru ẹdọke erhan ọnana rẹ ana sabu ru uvuẹn Kingdom Hall rọ kẹrẹre. Isukuru ọnana ọ yẹ ọkobaro na userhumu e ti kẹrẹ i Jehova rhọ, neneyo o ji vwo ona rẹ ono vwobọ rhẹ eghọn aghwoghwo na ephian, jeghwai rha ga nyarhẹn ọrẹ esegburhomẹmro.

School for Kingdom Evangelizers. Isukuru ọnana ọ ha ibiamo eva, a kwaphieriẹ rhọ neneyo a ha ye e yono ekobaro ri tẹn-ona ne, ri vwo omwemẹ rẹ aye ine nẹ ekete rẹ aye e rhirhiẹ ya ga ekete re dje rẹ aye nya ephian. Aye a ha ye ta: ‘Mẹmẹ na, dje mẹ!’ ọrẹ a hẹrokele i Jesu Kristi, Oghwoghwẹmro rode na ro rhirhiẹ akpọ na dẹne. (Isaiah 6:8; John 7:29) Nẹ a kwa nẹ oghwa riẹ ekete oseseri ọ guọlọre taghene e ru erhirhiẹ akpọ-enyerẹn lọhọ omamọ. Oka uruemru, aruọke, rhẹ emaren ihworho na, ena sabu vẹnẹ ọnẹyen omamọ. Ọ rhọ ghanren omamọ ọnọ sabu yono edjadjẹ ọrọrọ. Isukuru ọnana ọ ha userhumu harẹn imizu emẹse rhẹ ehworhare re vwa je rọnmọ, ọrhẹ esa rhẹ ane ri vwe ji vwiẹ re ha uvwre ẹgbukpe 23 riẹ 65, neneyo aye vwo iruemru erẹ ẹhẹn kugbe ona sansan rẹ aye ena ha ruiruo uvuẹn ekete re dje rẹ aye nya, nẹ aye rhirhiẹ ihworho i Jehova rhẹ ukoko yi ena dabu ha ruiruo vuọnvuọn.

Watchtower Bible School of Gilead. Uvuẹn Hebrew, ‘Gilead’ omevirhọ ‘Otu Iseri.’ Nẹ ọke isukuru Gilead ọ tonrhọ uvuẹn ẹgbukpe 1943, ihworho ri vrẹn 8,000 i ruotọre nẹ isukuru na ne, e dje rẹ aye jerẹ i mishọnari ye se oseri ‘lele ekete akpọ na okeri te,’ erere buebun i nẹ uvuien rhe ne. (Acts 13:47) Ọke rẹ i mishọnari ekiki te ẹkwotọre re se Peru, o vwo ukoko owuorowu vwọ ye-e. Ọke ọnana ovwo ghwẹ 1,000 ne. Ẹkwotọre re se Japan, ọke rẹ i mishọnari e ji te yi, iseri re havwiẹ e te ikpe-e, ọke ọnana aye vrẹn 200,000 ne. Isukuru ọnana e ruẹ ibiamo-isiorin na, a ha ye dabu yono Ẹmro Osolobrugwẹ fiotọre. Ekobaro oghẹnrensan, yanghene fid mishọnari, iniruo okinhariẹ kugbe erẹ a wian uvuẹn oghọn ukoko yẹ e se riẹ isukuru ọnana, na dabu yono aye neneyo aye ha userhumu harẹn owian Uvie akpọ-ephian nẹ ọ dabu mevi gbanhon.

• Mesoriẹ a ha Pioneer Service School e mwu?

• Ayọmo yẹ ena sabu riẹ School for Kingdom Evangelizers na?