UYONO 58
Sẹrorẹ Atamwu ọnọ Kpahen i Jehova
Ilele Kristi inyenana i vwo omwemẹ rẹ aye ina ja lẹrhẹ emru yanghene ohworho owuorowu rhiẹ ukọ rẹn ogame aye a ha rẹn i Jehova. O vwo ẹfro-o, omaran ọ ji havwọ ha wẹn. Jehova o ni atamwu ọnọ ghanghanren. (Se 1 Chronicles 28:9.) Erhirhiẹ ego yi na sabu damu atamwu wu vwo kpahiẹn ni, marhẹ wu ne ru sabu fi aye kparobọ?
1. Marhẹ awọrọ ine ru sabu damu atamwu ọwan kpahen i Jehova?
Ihworho ezẹko ina sabu damoma rẹ aye ina dobọ ogame ọwan a ha rẹn i Jehova ji. Ayọmo yi na sabu ruie? Ihworho ezẹko ri nẹ ukoko na ne, a mọrenfian baren ukoko Osolobrugwẹ neneyo aye i sabu ghwọghọ esegburhomẹmro ọwan. E se aye inyikọ efian. Habaye, ilori ẹga ezẹko a mọrenfian barẹn ọwan, neneyo eri vwe rhe taghene aye a mọrenfian, i se nẹ urhomẹmro na. Emru imwofẹn orhianẹ ọwan a frẹfro rhẹ era kparahaso ọwan, se ẹbe aye, yanghene riẹ iwẹbsaiti aye, yanghene tobọ ni ividio aye dede. Sekpahen ihworho ra damoma rẹ aye ina lẹrhẹ awọrọ ja ga i Jehova, Jesu nọ tare: “Are i nyajẹ aye vwo. Aye ituẹro re suẹn ituẹro. Omarana, orhianẹ otuẹro o suẹn otuẹro ọrọrọ, aye awanva ine se rhẹ ọgọdọ.”—Matthew 15:14.
2. Orhienbro omobọ ego yi na sabu damu atamwu ọwan kpahen i Jehova?
Ẹguọlọ re vwo kpahen i Jehova ono mwu ọwan je rhe kwomakugbe ẹga efian. Omarana, o fo nẹ owian ọwan yanghene ikoko ra havwọ, yanghene kemru kemru re ruẹ, o surhobọmwu ẹga efia-an. Jehova ọ yẹrẹ ọwan orhetio ọnana: “Are i zẹ nẹ uvuien rhe [nọyẹ, Babylon Rode na], ihworho mẹ.”—Revelation 18:2, 4.
YONO KODO RHỌ
Yono oborẹ wu ne ru ja ha uphẹn rẹn ohworho owuorowu lẹrhẹ atamwu wu vwo kpahen i Jehova seriotọre. Ji mẹrẹn oborẹ wu ne ru dje atamwu phia, nyoma wu ne tiomanẹ Babylon Rode na.
3. Kẹnoma rẹn ere yono awọrọ iyono efian
Me ye ne ruo, erhe rhon iyẹnrẹn esọsọ kpahen ukoko i Jehova? Se Proverbs 14:15, orho ru, are i gba kpahenrhọ onọ ọnana:
Mesoriẹ ọwan a jomarhotọre ne je rhe vwo imwẹro kpahen iyẹnrẹn re rhonrin ephian?
Se 2 John 9-11, orho ru, are i gba kpahenrhọ enọ enana:
Marhẹ yo fori ne ruẹ inyikọ efian?
Ọrhọ tobọ rhianẹ e vwe lele inyikọ efian tẹmro-o, marhẹ iyono aye ono ru sabu riẹriẹ ọwan?
Marhẹ wu rorori taghene oma ono ru i Jehova, orhianẹ a kpomaviẹ rẹn ẹmro esọsọ rẹ ihworho a ta kpahiẹn ọrhẹ ukoko yi?
4. Sẹrorẹ atamwu ọnọ kpahen Osolobrugwẹ, orhianẹ omizu uvuẹn ukoko na o ruẹ ọdandan dede
Ọwan i rhe rhe taghene omizu uvuẹn ukoko na o ruẹ ọdandan ọghwaghwa, owian ọgo ye vwori? Yono kpahen uruemru-urhi owu uvuẹn Urhi Osolobrugwẹ ọ yẹ emọ Israel ọke ahwanren. Se Leviticus 5:1.
Jerẹ oborẹ ọ ha uvuẹn oghwẹmro ọrana, erhe rhe taghene omizu uvuẹn ukoko na o ruẹ ọdandan ọghwaghwa, o fori na ta rẹn ekpako na oborẹ e rheri. Ọrẹn, bọmọke ene ki ru ọrana, ene dje uruemru esiri phia nyoma ra na ta rẹn ọravwọ no bru ekpako na nya, nọ rhian ọdandan yen rẹn aye. Orho kwe nya-a, ofori nẹ atamwu re vwo kpahen i Jehova o mwu ọwan ya ta rẹn ekpako na oborẹ e rheri. Marhẹ ọnana o ru djephia taghene e vwo ẹguọlọ atamwu kpahen . . .
Jehova Osolobrugwẹ?
ohworho ro ruẹ ọdandan na?
awọrọ uvuẹn ukoko na?
Omizu uvuẹn ukoko na ọrhọ ha uvuẹn erhirhiẹ imwofẹn, ha userhumu riẹn!
5. Kẹnoma rẹn Babylon Rode na
Se Luke 4:8 ọrhẹ Revelation 18:4, 5, orho ru, are i gba kpahenrhọ enọ enana:
Odẹ mẹ ọ ji ha usuẹn ihworho ri ha uvuẹn ẹga efian owu?
Mi ha uvuẹn ukoko rọ wian kugbe rhẹ ẹga ọrọrọ?
Owian mẹ ọ hobọtua ẹga efian izede owuorowu?
O vwo irueruo erọrọ uvuẹn akpọ mẹ ri surhobọmwu ẹga efian, ro fori mi tiomanu?
Mi rha kpahenrhọ taghene ee rẹn owu usuẹn enọ erana, ewene ego yo fori mi ru?
Uvuẹn erhirhiẹ ephian, brorhiẹn rọ nọ lẹrhuọ vwo ẹhẹn obrorhiẹn rọ fonron obaro i Jehova, ro no ji dje atamwu wu vwo kpahiẹn phia.
Me wu ne ruo orhianẹ a ta wẹn ne wu nyoma itetoro ọnọ hobọtua ukoko ẹga efian ro ruẹ ẹghẹlẹ rẹn ihworho?
OBORẸ IHWORHO EZẸKO A TA: “Mi guọlọ rhe oborẹ inyikọ efian a ta kpahen Iseri Jehova, neneyo mi sabu chochọn urhomẹmro na.”
Ọrana o dje ọhọ phia? Me wu rorori? Mesoriẹ?
ME WU YONORIN?
Na sabu sẹrorẹ atamwu ọwan kpahen i Jehova, ana vi kẹnoma rẹn ihworho ra damoma rẹ aye ina phiẹ ọwan rhọ.
Ẹzẹkoko
Mesoriẹ o vwo fo na kerhọ iyẹnrẹn inyikọ efian?
Ọwan i rhe rhe taghene omizu uvuẹn ukoko na o ruẹ ọdandan ọghwaghwa, idjaghwẹ ọgo yo fori na kpare?
Marhẹ ene ru huvwele orhetio ra na zẹ nẹ ẹga efian?
GUỌLỌ IYẸNRẸN ERỌRỌ
Yono kpahen oborẹ wu ne ruo, ọke ihworho erhe kerabọ iyẹnrẹn efian kpahen Iseri Jehova.
“Wu rhe Ọsoso Iyẹnrẹn na Fiotọre?” (Oghwa Odẹrẹ, August 2018)
Marhẹ wu ne ru vwrurhe ikoko yanghene irueruo ra hobọtua i Babylon Rode na?
Me yẹ ihworho ezẹko ra kparahasuẹ ọwan i ru ne, nẹ aye i sabu lẹrhẹ esegburhomẹmro ọwan seriotọre?
Uvuẹn ikuegbe na “Mi Havwọ ẹ Guọlọ Osolobrugwẹ nẹ ọke Ọmọvwerhe mẹ rhe,” se kpahen orherẹn ẹga i Shinto ro tiomanẹ ẹga efian.