UYONO 60
Rhe Ruẹ Onyerẹnkugbe Ọnọ Rhẹ i Jehova Gbanhanrhọ
Wu yono ekwakwa buebun kpahen i Jehova uvuẹn ọbe ọnana ne. Oborẹ wu yonorin i lẹrheruọ vwo ẹguọlọ kpahiẹn omamọ ne, ọkezẹko ọ tobọ lẹrhuọ homakpahontọre riẹn, jeghwai bromarhame ne. Orhiomara-an, ọkezẹko we roro kpahen oborẹ wu ne ru sabu ruie obaro na. Ọrẹn, eruriaro ọnọ o toba wu rhe bromarhame hi-in. Wu na ji sabu rhe tiẹkẹrẹ i Jehova rhọ bẹmẹdẹ. Izede ọgo?
1. Mesoriẹ o fo ne wu rha bọn onyerẹnkugbe ọnọ rhẹ i Jehova gbanhanrhọ?
Ana vi wian gbanhon na sabu rha bọn onyerẹnkugbe ọwan rhẹ i Jehova gbanhanrhọ. Mesoriẹ? “Neneyo e je rhe beghe” nẹ abọ ye. (Hebrews 2:1) Me yọ nọ ha userhumu rẹn ọwan rha fuevwan ga i Jehova? Ọwan ina sabu rhe fiomarhẹ owian aghwoghwo na, jeghwai guọlọ izede erọrọ ra na sabu ga Osolobrugwẹ vuọnvuọn. (Se Philippians 3:16.) Ẹga ra harẹn i Jehova yẹ izede akpenyerẹn rọ mai rhomu!—Psalm 84:10.
2. Emru ọrọrọ ọgo yẹ wu ne ji rhe ruẹ?
Dedevwo, ọbe ọnana o toba ne, akpenyerẹn Olele Kristi ọnọ o ji toba-a. Baibol na ọ tare taghene ene vi “ku uruemru ọkpokpọ na rhọ.” (Ephesians 4:23, 24) Ru we yono Ẹmro Osolobrugwẹ rhọ, jeghwai riẹ iyono ukoko ne na, wu ne yono ekwakwa ekpokpọ kpahen i Jehova ọrhẹ iruemruie. Guọlọ izede wu ne ru sabu hẹrokele uruemru enẹyen rhọ uvuẹn akpenyerẹn ọnọ. Rhe ruẹ ewene ri fori ne wu sabu lẹrhẹ oma rha merhen i Jehova.
3. Marhẹ i Jehova ono ru ha userhumu wẹn ruriaro rhọ?
Baibol na ọrhọ ta: “Osolobrugwẹ . . . ọnọ ha uyono are te orugba. Ọnọ yẹ are omẹgbanhon, ono ru are gbanhon, ono ru are mevi gbangbanhon.” (1 Peter 5:10) Ọwan ephian a dẹrughwaroghwẹ ẹkparehaso. Ọrẹn, Jehova ọ yẹ ọwan oborẹ a guọlọre na sabu fi aye kparobọ. (Psalm 139:23, 24) Ọye o veri taghene ọnọ yọ omwemẹ ọrhẹ omẹgbanhon ne wu sabu fuevwan ga ye.—Se Philippians 2:13.
YONO KODO RHỌ
Yono kpahen oborẹ wu ne ru sabu rhe ruẹ riaro, ọrhẹ oborẹ i Jehova ono ru ha ebrurhọ wẹn.
4. Rhe lele obọdẹn Ugbehian ọnọ tẹmro
Ẹrhomo ọrhẹ uyono i Baibol na i ha userhumu wẹn rhiẹ ugbehian i Jehova ne. Ọrẹn, marhẹ aye ine ru sabu ha userhumu wẹn tikẹriẹ rhọ?
Se Psalm 62:8, orho ru, are i gba kpahenrhọ onọ ọnana:
Ne wu sabu ru onyerẹnkugbe ọnọ rhẹ i Jehova gbanhonrhọ, me wu ne ruo nẹ ẹrhomo ọnọ o mwidjẹn?
Se Psalm 1:2 ọrhẹ ekete ra djokarhọ, orho ru, are i gba kpahenrhọ onọ ọnana:
Ne wu sabu ru onyerẹnkugbe ọnọ rhẹ i Jehova gbanhonrhọ, me wu ne ruo, nẹ isese i Baibol ọnọ o rhomurhọ?
Me wu ne ruo, ne wu sabu mẹrẹn erere nẹ uyono omobọ ọnọ? Ne wu sabu mẹrẹn irorẹdjẹ ezẹko, kporo IVIDIO na, orho ru, are i gba kpahenrhọ enọ enana.
Irorẹdjẹ ego uvuẹn ividio na yẹ wu na sabu ha ruiruo?
Irhomu-ẹmro ego yẹ wu guọlọ yono kpahen?
5. Bru ẹkẹ te oma oborẹ wu ne ru ga i Jehova rhọ
Wu rhe bru ẹkẹ te oma uvuẹn ogame i Jehova, ọnọ ha userhumu wẹn rhe ruẹ riaro. Kporo IVIDIO na, orho ru, are i gba kpahenrhọ enọ enana.
Uvuẹn ividio ọnana, marhẹ i Cameron o ru mẹrẹn erere fọkiẹ ẹkẹ ro bru te oma uvuẹn ogame i Jehova?
Orhiẹ ihworho ephian yi na sabu ye ghwoghwo uvuẹn ẹkwotọre ọrọrọ-ọ. Ọrẹn, ọwan ephian ina sabu bru ẹkẹ ri mwidjẹn te oma. Se Proverbs 21:5, orho ru, are i gba ta kpahen ẹkẹ wu guọlọ bru te oma uvuẹn . . .
ukoko wu havwọ.
owian aghwoghwo na.
Marhẹ uruemru-urhi rọ ha uvuẹn oghwẹmro ọnana, ono ru ha userhumu wẹn nyamwu ẹkẹ wu bru te oma?
Ẹkẹ wu na sabu bru te oma
Rhe ruẹ ẹrhomo enọ rhomẹrhọ.
Se ọsoso i Baibol na hin.
Damoma ne wu rhe imizu uvuẹn ukoko wu havwọ fiotọre.
Tuẹn uyono i Baibol rhọ rhẹ ohworho, ji rhe ruie riaro.
Ga uvuẹn ẹrhẹ ọkobaro ibiọke yanghene ọkobaro ọke ephian.
Orhianẹ wẹwẹ omizu ọhworhare, ruriaro ne wu sabu rhiẹ odibo owian.
6. Riamerhen akpenyerẹn bẹmẹdẹ!
Se Psalm 22:26, orho ru, are i gba kpahenrhọ onọ ọnana:
Me wu ne ruo, ne wu sabu riamerhen akpenyerẹn vwana ọrhẹ bẹmẹdẹ?
ME WU YONORIN?
Rhe ruẹ onyerẹnkugbe ọnọ rhẹ i Jehova gbanhanrhọ, ji bru ẹkẹ te oma uvuẹn ogame ọnẹyen. Ọnana ọnọ sabu lẹrhuọ riamerhen akpenyerẹn bẹmẹdẹ!
Ẹzẹkoko
Mesoriẹ o fo ne wu fiudugbere taghene i Jehova ọnọ ha userhumu wẹn fuevwan ga ye?
Marhẹ wu ne ru sabu ru onyerẹnkugbe ọnọ rhẹ i Jehova gbanhonrhọ?
Marhẹ ẹkẹ wu bru te oma uvuẹn ogame i Jehova, ono ru ha userhumu wẹn ruriaro?
GUỌLỌ IYẸNRẸN ERỌRỌ
Ọgo yi Jehova ọ mai vwo ọdaremẹro kpahen, ọra ghwai djephia taghene ọye ya ga, gbinẹ ọra fuevwan ga ye rhẹ ọsoso akpenyerẹn ọwan?
Aghọghọ odibo i Jehova rọ fuevwan ga ye dede, ọnọ sabu zien ọkezẹko. Ni oborẹ ene ru rharhumu vwo yi.
Marhẹ wu ne ru sabu bru ẹkẹ te oma uvuẹn ogame i Jehova, jeghwai nyamwu aye?
“Ha Ẹkẹ wu Bru te Oma Uvuẹn Ogame i Jehova Jiri Ọmemama Ọnọ” (Oghwa Odẹrẹ, July 15, 2004)
Mesoriẹ ọghanren ne rhiẹ Olele Kristi rọ do tedje, marhẹ ene ru sabu ru te omaran?