Oborẹ Ọsoriẹ ọ Ghanren ne ni Osẹme Ọrhẹ Omẹhaphia Ọwan so

Ọwan ephian i guọlọ djẹ osẹme ọrhẹ omẹhaphia ro jerẹ ọwan. Arha nyalele iruemru-urhi i Baibol ezẹko, ọnọ lẹrhẹ ọwan djẹ osẹme ọrhẹ omẹhaphia ro jerẹ ọwan, rọ nọ ji lẹrhẹ oma merhen i Jehova. Jene yono kpahen ezẹko usuẹn iruemru-urhi enana.

1. Iruemru-urhi ego yi ne sun odjẹ ọwan kpahen osẹme ọrhẹ omẹhaphia ọwan?

O fori na djẹ “osẹme ro serhọ, rhẹ ẹhẹn dẹndẹn kugbe osasame ọrẹ ẹhẹn,” ji sẹrorẹ omẹhaphia rọ fonron, ro djephia taghene a “ga Osolobrugwẹ.” (1 Timothy 2:9, 10) Roro kpahen iruemru-urhi ẹne enana: (1) Osẹme ọwan ono vi “serhọ.” Jerẹ oborẹ wu djokarhọ uvuẹn iyono ukoko ne, idibo i Jehova i vwo ojemẹ sansan, ọrẹn, osẹme ọrhẹ oborẹ ame a rhua ẹton ame lele, o brọghọ rhẹ Osolobrugwẹ ame oma. (2) Ra na sẹ osẹme “rhẹ ẹhẹn dẹndẹn,” o mevirhọ taghene omẹhaphia ọwan ọ vwọ lẹrhẹ awọrọ vwo iroro ehware-e, yanghene lẹrhẹ aye vwo oniso kpahen ọwan pha-an. (3) Ọwan e dje “osasame ọrẹ ẹhẹn” phia, orhianẹ e vwe vwo ẹguọlọ kpahen aruẹ osẹme yanghene ẹton ro serhe ephia-an. (4) O fori nẹ omẹhaphia ọwan o djephia taghene a “ga Osolobrugwẹ,” neneyo awọrọ i rhe taghene a ga Osolobrugwẹ urhomẹmro na.—1 Corinthians 10:31.

2. Mesoriẹ o fo ne roro kpahen imizu ọwan arha guọlọ djẹ osẹme?

Dedevwo e vwo ugbomọphẹ ra na djẹ oborẹ ene kurhọ, o fori ne roro kpahen oborẹ omẹhaphia ọwan ọnọ hobọte awọrọ lele. Ọwan a damoma ne je rhiẹ ukọ rẹn awọrọ, ukpomaran, a “lẹrhẹ oma merhen ọreva [ọwan] fọkiẹ orhorhomu ọnẹyen, nọ bọn yen gbanhon.”—Se Romans 15:1, 2.

3. Marhẹ omẹhaphia ọwan ono ru lọrọ awọrọ rhiẹ ogame urhomẹmro?

Dedevwo a damoma sẹ osẹme ro serhọ ọke ephian, ọwan a dabu vwo oniso kpahen osẹme ọwan erhe riẹ iyono ukoko yanghene erhe vwobọrhọ owian aghwoghwo na. Ọwan a guọlọ rhiẹ ukọ rẹn ihworho rẹ ọwan e ghwoghwo iyẹnrẹn ọghoghanren riẹ-ẹn. Ukpomaran, a guọlọre nẹ omẹhaphia ọwan ọ lẹrhẹ ihworho vwo ẹguọlọ kpahen urhomẹmro na, ji “brọghọ rhẹ uyono Osolobrugwẹ ro rhiẹ Usimi ọwan.”—Titus 2:10.

YONO KODO RHỌ

4. Omẹhaphia ro rhomurun, o brọghọ rhẹ i Jehova oma

Iroro ọgo yọ mai ghanren rọ lẹrhẹ ọwan damerhọ omẹhaphia ọwan? Se Psalm 47:2, orho ru, are i gba kpahenrhọ enọ enana:

• Ra mẹriẹn taghene ọwan a ha odẹ i Jehova nya na, marhẹ ono ru hobọte oborẹ ọwan a sẹ osẹme lele?

• Wu rorori taghene o dje ọhọ phia orhianẹ ọwan a damerhọ osẹme ọwan erhe riẹ iyono yanghene erhe vwobọrhọ owian aghwoghwo na? Me wu rorori? Mesoriẹ?

5. Oborẹ ene ru brorhiẹn ri serhọ kpahen osẹme ọrhẹ omẹhaphia

Kporo IVIDIO na.

IVIDIO: “Ruẹ Kemru Kemru nọ ha Ujiri Vwe Osolobrugwẹ” (10:18)

Sẹ iwun ọwan i ghanranren yanghene aye i kuru, o fori nẹ aye i fon, jeghwai serhọ uvuẹn erhirhiẹ ra havwọ ephian. Se 1 Corinthians 10:24 ọrhẹ 1 Timothy 2:9, 10. Orho ru, are i gba ta kpahen oborẹ ọsoriẹ o fo na kẹnoma rẹn iwun . . .

• ri vwe fẹro, ri gberi, ọrhẹ eri vwe serhọ.

• ra ba oma, re dje oborẹ oma ohworho ọ havwọ phia, yanghene era lẹrhẹ awọrọ vwo iroro ehware.

Dedevwo orhiẹ Urhi i Moses yo suẹn Ilele Kristi vwana-a, aye ina sabu nyoma yen yono kpahen izede i Jehova o roro lele. Se Deuteronomy 22:5, orho ru, are i gba kpahenrhọ onọ ọnana:

• Mesoriẹ o fo na kẹnoma rẹn osẹme ọrhẹ omẹhaphia ra lẹrhẹ ehworhare họhọ emẹse, yanghene ra lẹrhẹ emẹse họhọ ehworhare?

Se 1 Corinthians 10:32, 33, ọrhẹ 1 John 2:15, 16, orho ru, are i gba kpahenrhọ enọ enana:

• Mesoriẹ o fo na damerhọ sẹ omẹhaphia ọwan ọ suẹ ukọ rẹn awọrọ uvuẹn amwa ọwan, yanghene uvuẹn ukoko ra havwọ?

• Aruẹ iwun ọrhẹ omẹhaphia ego ye wa mai mẹrẹn uvuẹn ekete we rhirhiẹ?

• Wu rorori taghene ezẹko usuẹn aye e serhọ rẹn Olele Kristi-i? Me wu rorori? Mesoriẹ?

ME WU YONORIN?

Erhe brorhiẹn ri serhọ kpahen omẹhaphia ọwan, ne djephia taghene e mwuọghọ rẹn i Jehova ọrhẹ awọrọ.

Ẹzẹkoko

• Mesoriẹ osẹme ọrhẹ omẹhaphia ọwan ọ ghanren rẹn i Jehova?

• Iruemru-urhi ego ya na ha ruiruo ọke ra guọlọ brorhiẹn kpahen omẹhaphia ọwan?

• Marhẹ omẹhaphia ọwan ono ru hobọte ukẹro awọrọ a ha ni ogame urhomẹmro?

GUỌLỌ IYẸNRẸN ERỌRỌ

Se kpahen oborẹ awọrọ ine sabu rhe roro kpahen osẹme ọnọ.

“Marhẹ Omẹhaphia mẹ ọ Havwọ?” (Urhomu-ẹmro rọ ha uvuẹn itanẹti)

Yono kpahen oborẹ ọsoriẹ ọ ghanren ne wu roro kpahen oborẹ ono nerhumie rhe vwẹre ne wu ki sin emru rhoma.

“Me yi Baibol na ọ ta Kpahen Ekwakwa re Siẹn Rhoma?” (Urhomu-ẹmro rọ ha uvuẹn itanẹti)

Yono kpahen iruemru-urhi erọrọ ri na ha userhumu rẹn ọwan brorhiẹn ri serhọ.

“Osẹme ọnọ ọ ha Odidi vwe Osolobrugwẹ?” (Oghwa Odẹrẹ, September 2016)

Marhẹ ọmase owu rọ guọlọ lẹrhẹ oma merhen Osolobrugwẹ, o ru yono oborẹ ono ru mwuọghọ rẹn orhienbro awọrọ kpahen osẹme aye?

“Osẹme Ọrhẹ Omẹhaphia Orhiẹ Ukọ Ha Mẹ” (Awake!, December 22, 2003)