Emọ Israel Ọke Ahwanren i Fiuvweri ​—Mesoriẹ Ọwan i Vwe Fiuvweri?

OLỌKPA i Nazi owu nọ vanghwu ẹko Iseri Jehova ezẹko uvwre uvweri Akpọ Ephian II, rọ ta: “Are erhe kwe wọnrọn haso France yanghene England na-a, are ephian ine vi hwu!” Dedevwo isodja i Nazi a hẹrhẹ aye okokọ, imizu na e kwe gbe urhi Jehova ghwu-u. Aye i ghini dje uduefigbere phia! Udje ọrana o dje kpahen ukẹro Iseri Jehova a ha ni uvweri: Ọwan i vwe vwobọrhọ ivweri akpọ na-a. Arha tobọ djofẹn uhwu mwu ọwan dede, ọwan i vwe vwobọrhọ usun oseghe akpọ na-a.

1. IHWORHO OSOLOBRUGWẸ EPHIAN I NẸ AGBAMWA OWU RHE

Ọke rọ vrẹnren na, Jehova o koko ihworho yi nẹ aye i rhiẹ agbamwa owu re se Israel. O se Emọ Israel na “emru rọ havwọ san usuẹn ihworho ephian.” (Ex. 19:5) Jehova ọ ji yẹ aye otọre kirighwo. Ọke i Jehova o jurhi nẹ Emọ Israel i fiuvweri rhẹ egbamwa erọrọ, aye i vwa wọnrọn yanghene kpe ihworho ra ga i Jehova-a.a

Inyenana, Ilele Kristi urhomẹmro i nẹ “egbamwa ọrhẹ ivwiẹ ọrhẹ ihworho kugbe edjadjẹ ephian rhe.” (Rev. 7:9) Orhianẹ ihworho i Jehova ine vwobọrhọ uvweri, nọyẹ aye ina rha wọnrọn haso omoma aye​—ji tobọ kpe​—ihworho ra ga Osolobrugwẹ.

2. JEHOVA YO JURHI RẸN EMỌ ISRAEL NẸ AYE I FIUVWERI

Ọke rọ vrẹnren na, Jehova yo brorhiẹn ọke ọrhẹ oborẹ ọsoriẹ Emọ Israel ine ye fiuvweri. Jerẹ udje, Osolobrugwẹ ọ ta rẹn Israel nọ wọnrọn nọ sabu ghwọghọ itu i Canaan, re rhe rhẹ ihworho re vwobọrhọ ogame ikpodje, irueruo ọfanrhiẹn aghwa, ọrhẹ ọrẹ a ha emọvwerhe ze izobo. Jehova no jurhi rẹn Emọ Israel nẹ aye i tiẹ irueruo ọkon nẹ otọre ro ve rẹn aye na. (Lev. 18:24, 25) Ọke Emọ Israel a ruẹ Otọre Ive na hin, Jehova nọ ta rẹn aye ọkezẹko nẹ aye i fiuvweri neneyo aye chochọn oma aye nẹ abọ evwreghrẹn aye. (2 Sam. 5:17-25) Ọrẹn, ọ ha uphẹn rẹn aye nẹ aye ọvo i brorhiẹn ọke aye ine riẹ uvweri-i. Ọke aye i vwa nyalele ọkpọvi Jehova, ekwakwa ibiobiomu ye nerhumie sa.​—Num. 14:41-45; 2 Chron. 35:20-24.

Inyenana, Jehova o jurhi rẹn ituakpọ nẹ aye i ye fiuvweri-i. Egbamwa a wọnrọn fọkiẹ oborẹ ituakpọ i guọlọre orhiẹ oborẹ Osolobrugwẹ ọ guọlọre-e. Aye ina sabu ye fiuvweri fọkime aye i guọlọ otọre erọrọ, igho buebun, yanghene fọkiẹ irueruo usun oseghe. Nẹ ihworho ra ta taghene aye a wọnrọn rẹn Osolobrugwẹ, yanghene aye e kpe evwreghrẹn yen vwo? Jehova ono simi idibo yi, jeghwai ghwọghọ evwreghrẹn yen uvuẹn uvweri rọ sa obaro na​—ro rhiẹ uvweri Armageddon. (Rev. 16:14, 16) Uvuẹn uvweri ọrana, egba uvweri Jehova ono rhiẹ emakashe na, o rhiẹ ituakpọ ra ga ye-e.​—Rev. 19:11-15.

3. EMỌ ISRAEL E KPE IHWORHO RI DJE ESEGBURHOMẸMRO PHIA HWU-U

Ọke rọ vrẹnren na, ọgbọ buebun, Emọ Israel e gbe arodọmẹ rẹn ihworho ri vwo esegburhomẹmro kpahen Jehova, ji kpe eri Jehova o brorhiẹn kpe taghene aye i fo uhwu. Djokarhọ udje eva. Dedevwo Jehova o jurhi na ghwọghọ i Jericho, Emọ Israel i simi arhọ Rahab ọrhẹ ekruien fọkiẹ esegburhomẹmro ọnẹyen. (Josh. 2:9-16; 6:16, 17) Ọke oru, ọsoso amwa i Gibeon ni simirhọ fọkime itu i Gibeon i họghọ okokodo rẹn Jehova.​—Josh. 9:3-9, 17-19.

Inyenana, egbamwa re fiuvweri i vwe simi arhọ ihworho ri dje esegburhomẹmro phia-a. Ọkezẹko, ihworho ri vwe ruẹ emru owuorowu e hwuẹ uvuẹn uvweri rọ havwiẹ uvwre egbamwa eva.

4. EMỌ ISRAEL I NYALELE IRHI JEHOVA KPAHEN UVWERI

Ọke rọ vrẹnren na, Jehova ọ guọlọre nẹ isodja Israel i fiuvweri na lele ọkpọvi ro tiobọnu. Jerẹ udje, ọkezẹko Jehova ọ ta rẹn aye nẹ aye i “guọlọ ufuoma” rhẹ amwa aye a guọlọ wọnrọn hasua na. (Deut. 20:10) Jehova ọ guọlọre nẹ isodja Emọ Israel i ruẹ ugboma aye fon, ji nyalele irhi Jehova kpahen uruemru rọ fonron. (Deut. 23:9-14) Ọgbọ buebun, ọke isodja egbamwa ereva na a gba emẹse gbọfanrhiẹn uvuẹn uvweri, Jehova ọ ha uphẹn rẹn Emọ Israel nẹ aye i ruẹ omara-an. Itiọrurhomẹmro, aye i sabu rọnmọ ọmase rọ ha erhirhiẹ ọvrẹ-ẹn, jokpanẹ ubiamo owu ọnọ vrẹn vwẹre nẹ ọke aye a ghwọghọ amwa aye i mwu ọmase na nurhe.​—Deut. 21:10-13.

Inyenana, ẹkwotọre buebun i fiobọrhọ ọbe taghene aye ina wọnrọn lele irhi ezẹko re sun uvweri. Dedevwo e jurhi enana nẹ aye i sabu simi eri vwe rhiẹ isodja, ọrẹ omemwurhọ, ọgbọ buebun aye i vwa nyalele irhi erana-a.

5. OSOLOBRUGWẸ O FIUVWERI RẸN AGBAMWA YEN

Ọke rọ vrẹnren na, Jehova ọ wọnrọn harẹn Emọ Israel, ji yẹ aye efikparobọ ọgbọ buebun. Jerẹ udje, marhẹ i Jehova o ru ha userhumu rẹn isodja Israel ghwọghọ amwa i Jericho? Nyoma ọkpọvi Jehova, ọke Emọ Israel e bunu “oviẹ uvweri ọgbogbanhon, igbeyẹn na ni se totọre,” rọ lẹrheriẹ phẹrẹ aye a sabu ghwọghọ amwa na. (Josh. 6:20) Marhẹ aye i ru fiẹ itu Amor kparobọ? “Jehova no tiobọnẹ oso atita nẹ oberun rhe no se bru aye . . . Itiọrurhomẹmro, ihworho rẹ oso atita na o kperi i bun ghwẹ erẹ emọ Israel i ha odan ọlọkọ kpe.”​—Josh. 10:6-11.

ILELE KRISTI URHOMẸMRO IHWORHO UFUOMA

Jerẹ oborẹ a mẹrẹn ne, erhirhiẹ ọwan inyenana, ọ vẹnẹ ọrẹ Emọ Israel omamọ. Ọrẹn, orhiẹ ovẹnẹ erana ọvo, yọ soriẹ ọwan i vwe fiuvweri-i. O ji vwo erọrọ. Jerẹ udje, Jehova ọ tare taghene uvuẹn ẹdẹ oba na, ihworho rọ yo yono, i rhe “yono uvweri ghwomara-an,” yanghene vwobọrhọ ye-e. (Isa. 2:2-4) Habaye, Kristi ọ tare taghene idibo yi, a ha “usuẹn akpọ na-a”; aye ina sẹrorẹ emevigbanhon aye sekpahen irueruo usun oseghe akpọ na.​—John 15:19.

Kristi ọ ji ta rẹn idibo yi nẹ aye i ru vrẹn omaran. Ọ ta rẹn aye nẹ aye i kẹnoma rẹn iruemru re suẹn riẹ eghrẹn, ekwẹre ọrhẹ uvweri. (Matt. 5:21, 22) Habaye, nọ ta rẹn aye nẹ aye i rhiẹ “ihworho ra guọlọ ufuoma,” ji vwo ẹguọlọ kpahen evwreghrẹn aye.​—Matt. 5:9, 44.

Marhẹ ene ruẹ ọrana lele? Ọkezẹko, ọwan e vwo ẹhẹn re ne fiuvweri-i, ọrẹn ana sabu roro taghene omizu owu uvuẹn ukoko na ọvwreghrẹn ọwan, rọ nọ lẹrhiẹ suẹ oghalẹ rhẹ ukoko na? Jena damoma tiẹ aruẹ iroro erana nẹ ẹhẹn ọwan.​—Jas. 4:1, 11.

Ukperẹ ana homaba uvweri egbamwa na, ọwan e toroba ufuoma, ji vwo ẹguọlọ kpahen owuowọnwan. (John 13:34, 35) Jene brorhiẹn ra na sẹrorẹ emevigbanhon ọwan, ọke ra hẹrhẹ ẹdẹ ri Jehova ono tiẹ uvweri ephian nie bẹmẹdẹ.​—Ps. 46:9.