Seenaa Baraa Isa Tokkoffaa
19 Boodas mootiin Amoonotaa Nahaash ni duʼe; ilmi isaas bakka isaa mootii taʼe.+ 2 Yeroo kanatti Daawit, “Abbaan isaa jaalala amanamaa waan anatti argisiiseef, anis Hanuun ilma Nahaashitti jaalala amanamaa nan argisiisa”+ jedhe. Kanaafuu, Daawit sababa duʼa abbaa isaatiif akka isa jajjabeessaniif ergamtoota gara isaatti ni erge. Haa taʼu malee, tajaajiltoonni Daawit Hanuuniin jajjabeessuuf yommuu gara biyya Amoonotaa+ dhufan, 3 bulchitoonni Amoonotaa Hanuuniin, “Daawit namoota si jajjabeessan gara keetti kan erge, abbaa kee kabajee sitti fakkaataa? Tajaajiltoonni isaa gara kee kan dhufan, biyyattii akka gaariitti qoruuf, siin garagalchuu fi biyyattii basaasuuf jedhanii mitii?” jedhan. 4 Kanaafuu, Hanuun tajaajiltoota Daawit irraa areeda isaanii haadee,+ akkasumas uffata isaanii mudhii isaaniitii gaditti irraa muree isaan erge. 5 Namoonni sun akka malee qaanaʼanii waan turaniif, Daawit waaʼee kanaa yommuu dhagaʼu yeruma sana namoota kan biroo gara isaaniitti erge; achiis mootichi, “Hamma areedni keessan deebiʼee guddatutti Yerikoo+ keessa turaa; sana booda deebiʼaa kottaa” isaaniin jedhe.
6 Yeroo booda Amoononni Daawit biratti akka waan xiraaʼaatti ilaalamuu isaanii ni hubatan; kanaafuu, Hanuunii fi Amoononni Mesophotaamiyaa,* Aaraam Maʼaakaa fi Zoobaadhaa+ gaariiwwan fardaa fi abbootii fardeenii mindeessuuf meetii taalaantii* 1,000 ni ergan. 7 Akka kanaan isaan gaariiwwan fardaa 32,000, mootii Maʼaakaa fi namoota isaa mindeeffatan. Achiis isaan dhufanii Medebaa+ fuuldura buufatan. Amoononnis magaalota isaanii keessaa baʼanii walitti qabamuudhaan, waraanaaf gad baʼan.
8 Daawitis waaʼee kanaa yommuu dhagaʼu, loltoota isaa warra ciccimoo taʼan dabalatee Yoʼaabii+ fi guutummaa raayyaa waraanaa isaa ni erge.+ 9 Amoononni gad baʼanii karra magaalattii duratti waraanaaf hiriiran; yeroo kanatti mootonni dhufan sun kophaa isaanii dirree keessa turan.
10 Yoʼaab fuulduraa fi duubaan loltoonni isatti dhufaa akka jiran yommuu argu, loltoota ciccimoo Israaʼel keessa jiran keessaa muraasa filatee warra Sooriyaa loluuf waraanaaf isaan hiriirse.+ 11 Namoonni hafan immoo ajaja* obboleessa isaa Abishaay+ jala taʼanii Amoonota waraanuuf akka hiriiran godhe. 12 Achiis akkana isaan jedhe: “Warri Sooriyaa+ yoo natti ciman ati dhuftee na gargaarta; Amoononni yoo sitti ciman immoo ani sin gargaara. 13 Saba keenyaaf, akkasumas magaalota Waaqa keenyaatiif jennee jabaachuu fi onnachuu qabna;+ Yihowaanis wanta isa duratti gaarii taʼe ni godha.”
14 Achiis Yoʼaabii fi namoonni isaa warra Sooriyaa waraanuuf isaanitti dhihaatan; isaanis isa duraa ni baqatan.+ 15 Amoononni warri Sooriyaa baqachuu isaanii yommuu argan, isaanis obboleessa isaa Abishaay duraa baqatanii gara magaalattiitti seenan. Sana booda Yoʼaab gara Yerusaalemitti deebiʼe.
16 Warri Sooriyaa, Israaʼeliin moʼamuu isaanii yommuu argan, warra Sooriyaa naannoo Lagichaatti*+ argaman waamuuf ergamtoota ergan; ajajaa raayyaa waraanaa Hadaadʼezeer kan taʼe Shofaak isaan geggeessaa ture.+
17 Daawitis waaʼee kanaa yommuu dhagaʼu, yeruma sana Israaʼelota hundumaa walitti qabee Yordaanosiin ceʼee gara isaanii dhaquudhaan akka isaan waraananiif tarree isaan galche. Daawit warra Sooriyaa waraanuuf tarree isaan galche; isaanis isaa wajjin wal waraanan.+ 18 Haa taʼu malee, warri Sooriyaa Israaʼel duraa ni baqatan; Daawitis warra Sooriyaa keessaa namoota gaarii fardaa oofan 7,000 fi loltoota lafoo 40,000 ni ajjeese; Shofaak isa ajajaa raayyaa waraanaa taʼes ni ajjeese. 19 Tajaajiltoonni Hadaadʼezeer Israaʼelotaan moʼamuu+ isaanii yommuu argan, yeruma sana Daawitii wajjin nagaa uumanii isaaf bitamuu jalqaban;+ warri Sooriyaas sana booda Amoonota gargaaruu hin barbaanne.