ଏଷ୍ଟର ନିଜ ଲୋକମାନଙ୍କୁ ରକ୍ଷା କଲେ

ଏଷ୍ଟର ଜଣେ ଯିହୁଦୀ ଝିଅ ଥିଲେ ଯିଏ ପାରସ୍ୟର ଶୂଶନ୍‌ ନାମକ ସହରରେ ରହୁଥିଲେ । ଅନେକ ବର୍ଷ ପୂର୍ବେ ନବୂଖଦ୍‌ନିତ୍ସର ତାଙ୍କ ପରିବାରକୁ ଯିରୂଶାଲମରୁ ନେଇ ଆଣିଥିଲେ । ଏଷ୍ଟରଙ୍କୁ ତାଙ୍କ କକା ମର୍ଦ୍ଦଖୟ ଲାଳନପାଳନ କରିଥିଲେ । ମର୍ଦ୍ଦଖୟ, ପାରସ୍ୟର ରାଜା ଅକ୍ଷଶ୍ୱେରଶଙ୍କ ଜଣେ ସେବକ ଥିଲେ ।

ରାଜା ଅକ୍ଷଶ୍ୱେରଶ ଜଣେ ନୂଆ ରାଣୀ ଚାହୁଁଥିଲେ । ତେଣୁ ତାଙ୍କ ସେବକମାନେ ଦେଶର ସବୁଠୁ ସୁନ୍ଦର ଝିଅମାନଙ୍କୁ ତାଙ୍କ ପାଖକୁ ଆଣିଲେ । ସେମଧ୍ୟରୁ ଏଷ୍ଟର ମଧ୍ୟ ଥିଲେ । ରାଜା ସମସ୍ତ ଝିଅମାନଙ୍କ ମଧ୍ୟରୁ ଏଷ୍ଟରଙ୍କୁ ରାଣୀ ବାଛିଲେ । ମର୍ଦ୍ଦଖୟ ଏଷ୍ଟରଙ୍କୁ କହିଲେ ଯେ ସେ କାହାରିକୁ ଜଣାନ୍ତୁ ନାହିଁ ଯେ ସେ ଜଣେ ଯିହୁଦୀ ଅଟନ୍ତି ।

ହାମନ୍‌ ନାମକ ଜଣେ ଅହଙ୍କାରୀ ବ୍ୟକ୍ତି ସମସ୍ତ ଅଧିପତିଙ୍କ ପ୍ରଧାନ ଥିଲା । ସେ ଚାହୁଁଥିଲା ଯେ ସମସ୍ତେ ତାʼ ଆଗରେ ପ୍ରଣାମ କରନ୍ତୁ । କିନ୍ତୁ ମର୍ଦ୍ଦଖୟ ଏପରି କରିବା ପାଇଁ ମନା କରିଦେଲେ । ହାମନ୍‌ ଏତେ ରାଗିଗଲା ଯେ ସେ ମର୍ଦ୍ଦଖୟଙ୍କୁ ମାରିଦେବା ପାଇଁ ଚାହୁଁଥିଲା । ଯେବେ ହାମନ୍‌କୁ ଜଣାପଡ଼ିଲା ଯେ ମର୍ଦ୍ଦଖୟ ଜଣେ ଯିହୁଦୀ ଅଟନ୍ତି ତେବେ ସେ ଦେଶର ସମସ୍ତ ଯିହୁଦୀଙ୍କୁ ମାରିଦେବା ପାଇଁ ଷଡ଼ଯନ୍ତ୍ର କଲା । ସେ ରାଜାଙ୍କୁ କହିଲା, ‘ଯିହୁଦୀ ଲୋକମାନେ ଆପଣଙ୍କ ପାଇଁ ବିପଦ ସୃଷ୍ଟି କରିପାରନ୍ତି । ତେଣୁ ଆପଣଙ୍କୁ ସେସମସ୍ତଙ୍କୁ ମାରିଦେବା ଉଚିତ୍‌ ।’ ଅକ୍ଷଶ୍ୱେରଶ କହିଲେ, ‘ତମ ଯାହା ଇଚ୍ଛା ତାହା କର ।’ ସେ ହାମନ୍‌କୁ ଗୋଟିଏ ନିୟମ ତିଆରି କରିବାର ମଧ୍ୟ ଅଧିକାର ଦେଲେ । ହାମନ୍‌ ଏହି ନିୟମ ତିଆରି କଲା ଯେ ଲୋକମାନେ ଅଦର ମାସର ତ୍ରୟୋଦଶ ଦିନରେ (୧୩ତମ ଦିନରେ) ସମସ୍ତ ଯିହୁଦୀଙ୍କୁ ମାରି ଦିଅନ୍ତୁ । ଯିହୋବା ଏସବୁ ଦେଖୁଥିଲେ ।

ଏଷ୍ଟର ସେହି ନିୟମ ବିଷୟରେ ଜାଣି ନ ଥିଲେ । ତେଣୁ ମର୍ଦ୍ଦଖୟ ତାର ଗୋଟିଏ ନକଲ ତାଙ୍କୁ ପଠାଇଲେ ଏବଂ କହିଲେ, ‘ତମେ ଯାଇ ରାଜାଙ୍କ ସହ କଥା ହୁଅ ।’ ଏଷ୍ଟର କହିଲେ, ‘ଯଦି କେହି ବିନା ଡାକରାରେ ରାଜାଙ୍କ ପାଖକୁ ଯାଏ ତେବେ ତାକୁ ମାରି ଦିଆଯାଏ । ରାଜା ମୋତେ ୩୦ ଦିନରୁ ଡାକି ନାହାନ୍ତି ! ତଥାପି ମୁଁ ଯିବି । ଯଦି ସେ ନିଜ ରାଜଦଣ୍ଡ ମୋ ଆଡ଼କୁ ବଢ଼ାନ୍ତି ତେବେ ମୁଁ ବଞ୍ଚିବି, ନହେଲେ ମୋତେ ମାରି ଦିଆଯିବ ।’

ଏଷ୍ଟର, ରାଜାଙ୍କ ଅଗଣାରେ ଗଲେ । ଯେବେ ରାଜା ତାଙ୍କୁ ଦେଖିଲେ ତେବେ ସେ ନିଜ ରାଜଦଣ୍ଡ ତାଙ୍କ ଆଡ଼କୁ ବଢ଼ାଇଲେ । ଏଷ୍ଟର ତାଙ୍କ ପାଖକୁ ଗଲେ ଏବଂ ରାଜା ତାଙ୍କୁ ପଚାରିଲେ, ‘ଏଷ୍ଟର, ମୁଁ ତମ ପାଇଁ କʼଣ କରିପାରିବି ?’ ଏଷ୍ଟର କହିଲେ, ‘ମୁଁ ଚାହେଁ ଯେ ରାଜା ଓ ହାମନ୍‌ ଏକ ଭୋଜିରେ ଆସନ୍ତୁ ।’ ଭୋଜିରେ ଏଷ୍ଟର ସେମାନଙ୍କୁ ଆଉ ଏକ ଭୋଜିରେ ଆସିବା ପାଇଁ କହନ୍ତି । ଦ୍ୱିତୀୟ ଭୋଜି ସମୟରେ ରାଜା ଏଷ୍ଟରଙ୍କୁ ପୁଣି ପଚାରିଲେ, ‘ମୁଁ ତମ ପାଇଁ କʼଣ କରିପାରିବି ?’ ଏଷ୍ଟର କହିଲେ, ‘କେହି ମୋତେ ଓ ମୋ ଲୋକମାନଙ୍କୁ ମାରିଦେବା ପାଇଁ ଚେଷ୍ଟା କରୁଛି । ଦୟାକରି ଆମକୁ ରକ୍ଷା କରନ୍ତୁ ।’ ରାଜା ପଚାରିଲେ, ‘କିଏ ତମକୁ ମାରିବା ପାଇଁ ଚାହେଁ ?’ ଏଷ୍ଟର କହିଲେ, “ଏହି ଦୁଷ୍ଟ ହାମନ୍‌ !” ଅକ୍ଷଶ୍ୱେରଶ ଏତେ ରାଗିଗଲେ ଯେ ସେ ତୁରନ୍ତ ହାମନ୍‌କୁ ମାରିଦେବା ପାଇଁ କହିଲେ ।

କିନ୍ତୁ ହାମନ୍‌ ଯେଉଁ ନିୟମ ତିଆରି କରିଥିଲା ତାହା କେହି ବି ରଦ୍ଦ କରିପାରି ନ ଥାʼନ୍ତେ, ରାଜା ବି ନୁହେଁ । ତେଣୁ ରାଜା ମର୍ଦ୍ଦଖୟଙ୍କୁ ଅଧିପତିମାନଙ୍କ ପ୍ରଧାନ ନିଯୁକ୍ତ କଲେ ଏବଂ ତାଙ୍କୁ ଏକ ନୂଆ ନିୟମ ତିଆରି କରିବାର ଅଧିକାର ଦେଲେ । ମର୍ଦ୍ଦଖୟ ଗୋଟିଏ ନିୟମ ତିଆରି କଲେ ଯାହା ଯୋଗୁଁ ଯିହୁଦୀମାନେ ନିଜର ରକ୍ଷା କରିପାରନ୍ତେ । ଅଦର ମାସର ତ୍ରୟୋଦଶ ଦିନରେ ଯିହୁଦୀମାନେ ଶତ୍ରୁମାନଙ୍କୁ ପରାସ୍ତ କଲେ । ସେସମୟଠାରୁ ପ୍ରତିବର୍ଷ ସେହି ଦିନ ଯିହୁଦୀ ଲୋକମାନେ ନିଜ ଜୟ ହାସଲ କରିବାର ଖୁସିରେ ଗୋଟିଏ ପର୍ବ ପାଳନ କରିବାକୁ ଲାଗିଲେ ।