ଶୟତାନ ଯୀଶୁଙ୍କୁ ପରୀକ୍ଷା କଲା

ଯୀଶୁଙ୍କ ବାପ୍ତିସ୍ମ ପରେ ପବିତ୍ର ଶକ୍ତି ତାଙ୍କୁ ପ୍ରାନ୍ତରକୁ ନେଇଗଲା । ଯୀଶୁ ୪୦ ଦିନ ଯାଏ କିଛି ଖାଇଲେ ନାହିଁ, ତେଣୁ ତାଙ୍କୁ ବହୁତ ଭୋକ ଲାଗିଲା । ସେସମୟରେ ଶୟତାନ ତାଙ୍କୁ ପ୍ରଲୋଭିତ କରିବା ପାଇଁ ଚେଷ୍ଟା କଲା । ସେ ଯୀଶୁଙ୍କୁ କହିଲା, ‘ଯଦି ତୁ ସତରେ ଈଶ୍ୱରଙ୍କ ପୁତ୍ର ଅଟୁ, ତେବେ ଏହି ପଥରଗୁଡ଼ିକୁ କହ ଯେ ଏଗୁଡ଼ିକ ରୁଟି ହୋଇଯାଉ ।’ କିନ୍ତୁ ଯୀଶୁ ତାକୁ ଉତ୍ତରରେ ଶାସ୍ତ୍ରର ଏହି କଥା କହିଲେ, ‘ଲେଖାଅଛି ମନୁଷ୍ୟ କେବଳ ରୁଟିରେ ବଞ୍ଚିବ ନାହିଁ ବରଂ ତାʼଠୁ ବି ଅଧିକ ଏହା ଜରୁରୀ ଯେ ସେ ଯିହୋବାଙ୍କ ପ୍ରତ୍ୟେକ କଥା ଧ୍ୟାନର ସହ ଶୁଣୁ ।’

ତାʼପରେ ଶୟତାନ ଯୀଶୁଙ୍କୁ କହିଲା, ‘ଯଦି ତୁ ସତରେ ଈଶ୍ୱରଙ୍କ ପୁତ୍ର ଅଟୁ, ତେବେ ମନ୍ଦିରର ସବୁଠୁ ଉଚ୍ଚ ଜାଗାରୁ ଡେଇଁ ପଡ଼ । କାରଣ ଲେଖାଅଛି ଈଶ୍ୱର ନିଜ ସ୍ୱର୍ଗଦୂତମାନଙ୍କୁ ପଠାଇବେ ଏବଂ ସେମାନେ ତତେ ଧରି ନେବେ ।’ କିନ୍ତୁ ଯୀଶୁ ପୁଣିଥରେ ଶାସ୍ତ୍ରର ଏହି କଥା ତାକୁ କହିଲେ, ‘ଲେଖାଅଛି ତମେ ଯିହୋବାଙ୍କୁ ପରୀକ୍ଷା କରିବ ନାହିଁ ।’

ତାʼପରେ ଶୟତାନ ଯୀଶୁଙ୍କୁ ଦୁନିଆର ସବୁ ରାଜ୍ୟ ଏବଂ ତାʼର ଐଶ୍ୱର୍ଯ୍ୟ ଦେଖାଇ କହିଲା, ‘ଯଦି ତୁ ଥରେ ମୋତେ ଉପାସନା କରିବୁ, ତେବେ ମୁଁ ଏହି ସବୁ ରାଜ୍ୟ ଏବଂ ଏହାର ଐଶ୍ୱର୍ଯ୍ୟ ତତେ ଦେଇ ଦେବି ।’ କିନ୍ତୁ ଯୀଶୁ କହିଲେ, ‘ଦୂର ହୋଇ ଯା ଶୟତାନ ! କାରଣ ଲେଖାଅଛି ତମେ କେବଳ ଯିହୋବାଙ୍କ ଉପାସନା କରିବା ଉଚିତ ।’

ତେବେ ଶୟତାନ ସେଇଠୁ ପଳାଇଗଲା । ତାʼପରେ ସ୍ୱର୍ଗଦୂତମାନେ ଆସି ଯୀଶୁଙ୍କୁ ଖାଇବାକୁ ଦେଲେ । ଏହାପରେ ଯୀଶୁ ଈଶ୍ୱରଙ୍କ ରାଜ୍ୟର ଖୁସିର ଖବର ଶୁଣାଇବାକୁ ଲାଗିଲେ । ତାଙ୍କୁ ଏହି କାମ କରିବା ପାଇଁ ପୃଥିବୀକୁ ପଠାଯାଇଥିଲା । ଲୋକମାନଙ୍କୁ ତାଙ୍କ କଥା ଶୁଣିବାକୁ ବହୁତ ଭଲ ଲାଗୁଥିଲା । ସେ ଯେଉଁଠି ବି ଯାଉଥିଲେ ଲୋକମାନେ ତାଙ୍କ ପଛେ ପଛେ ଆସୁଥିଲେ ।