ଯୀଶୁ ୧୨ ଜଣ ପ୍ରେରିତଙ୍କୁ ବାଛିଲେ

ପ୍ରାୟ ଦେଢ଼ ବର୍ଷ ପ୍ରଚାର କରିବା ପରେ, ଯୀଶୁଙ୍କୁ ଗୋଟିଏ ଜରୁରୀ ନିଷ୍ପତ୍ତି ନେବାର ଥିଲା । ତାଙ୍କୁ ବାଛିବାର ଥିଲା ଯେ କେଉଁମାନେ ତାଙ୍କ ସହିତ ରହି ପ୍ରଚାର କରିବେ । ଯୀଶୁଙ୍କୁ, ସେମାନଙ୍କୁ ଏହା ଶିଖାଇବାର ଥିଲା ଯେ ସେମାନେ କିପରି ଖ୍ରୀଷ୍ଟୀୟ ମଣ୍ଡଳୀର ନେତୃତ୍ୱ ନେବେ । ଯୀଶୁ ଚାହୁଁଥିଲେ ଯେ ଏହି ନିଷ୍ପତ୍ତି ନେବା ପାଇଁ ଯିହୋବା ତାଙ୍କୁ ସାହାଯ୍ୟ କରନ୍ତୁ । ତେଣୁ ସେ ଏକୁଟିଆ ଗୋଟିଏ ପାହାଡ଼ ଉପରକୁ ଗଲେ ଏବଂ ସେ ରାତି ସାରା ପ୍ରାର୍ଥନା କଲେ । ସକାଳେ ସେ କିଛି ଶିଷ୍ୟଙ୍କୁ ନିଜ ପାଖକୁ ଡାକିଲେ ଏବଂ ସେମାନଙ୍କ ମଧ୍ୟରୁ ୧୨ ଜଣଙ୍କୁ ପ୍ରେରିତ ବାଛିଲେ । ଆପଣଙ୍କୁ ସେମାନଙ୍କ ମଧ୍ୟରୁ କେଉଁମାନଙ୍କର ନାମ ମନେ ଅଛି ? ସେମାନଙ୍କ ନାମ ଥିଲା: ପିତର, ଆନ୍ଦ୍ରିୟ, ଯାକୁବ, ଯୋହନ, ଫିଲିପ୍ପ, ବାର୍ଥଲମୀ, ଥୋମା, ମାଥିଉ, ଆଲଫିଙ୍କ ପୁତ୍ର ଯାକୁବ, ଥଦ୍ଦୀୟ, ଶିମୋନ ଓ ଇଷ୍କାରିୟୋତୀୟ ଯିହୁଦା ।

ଏହି ୧୨ ଜଣ ପ୍ରେରିତ ଯୀଶୁଙ୍କ ସହ ଯାତ୍ରା କରୁଥିଲେ । ଯୀଶୁ ସେମାନଙ୍କୁ ଶିଖାଇଲେ ଯେ କିପରି ପ୍ରଚାର କରିବାର ଅଛି । ଏହାପରେ ସେ ସେମାନଙ୍କୁ ନିଜେ ପ୍ରଚାର କରିବା ପାଇଁ ପଠାଇଲେ । ଯିହୋବା ପ୍ରେରିତମାନଙ୍କୁ ଶକ୍ତି ଦେଲେ, ଯାହାଦ୍ୱାରା ସେମାନେ ରୋଗୀମାନଙ୍କୁ ଠିକ୍‌ କରିପାରିବେ ଏବଂ ଲୋକମାନଙ୍କଠାରୁ ଦୁଷ୍ଟ ସ୍ୱର୍ଗଦୂତମାନଙ୍କୁ ବାହାର କରିପାରିବେ ।

ଯୀଶୁ ୧୨ ଜଣ ପ୍ରେରିତମାନଙ୍କୁ ନିଜ ସାଙ୍ଗ କହୁଥିଲେ ଏବଂ ତାଙ୍କୁ ସେମାନଙ୍କ ଉପରେ ଭରସା ଥିଲା । ଫାରୂଶୀ ପ୍ରେରିତମାନଙ୍କୁ ଅଶିକ୍ଷିତ ଓ ସାଧାରଣ ଲୋକ ଭାବୁଥିଲେ । କିନ୍ତୁ ପ୍ରେରିତମାନଙ୍କୁ ନିଜ କାମ କିପରି କରିବା ଉଚିତ୍‌, ଏହାର ଶିକ୍ଷା ସେମାନଙ୍କୁ ଯୀଶୁ ଦେଇଥିଲେ । ସେମାନେ ଯୀଶୁଙ୍କ ଜୀବନର ସବୁଠୁ ମହତ୍ତ୍ୱପୂର୍ଣ୍ଣ ସମୟରେ ତାଙ୍କ ସହିତ ରହିଲେ, ଯେପରି ତାଙ୍କ ମୃତ୍ୟୁ ପୂର୍ବରୁ ଏବଂ ତାଙ୍କ ଜୀବିତ ହେବା ପରେ । ବାର ଜଣ ପ୍ରେରିତମାନଙ୍କ ମଧ୍ୟରୁ ଅଧିକାଂଶ ଯୀଶୁଙ୍କ ଭଳି ଗାଲିଲୀରୁ ଥିଲେ । ସେମାନଙ୍କ ମଧ୍ୟରୁ କିଛି ବିବାହ କରିଥିଲେ ।

ପ୍ରେରିତମାନେ ଅପରିପୂର୍ଣ୍ଣ ଥିଲେ ତେଣୁ ସେମାନଙ୍କ ଦ୍ୱାରା ଭୁଲଗୁଡ଼ିକ ହୋଇଯାଉଥିଲା । ବେଳେ ବେଳେ ସେମାନେ ବିନା ଭାବିଚିନ୍ତି କିଛି କହି ଦେଉଥିଲେ ଏବଂ ଭୁଲ ନିଷ୍ପତ୍ତିଗୁଡ଼ିକ ନେଉଥିଲେ । ଅନେକ ଥର ସେମାନେ ଧୈର୍ଯ୍ୟ ହରାଇ ବସୁଥିଲେ । ଏପରିକି ସେମାନେ ଝଗଡ଼ା କରୁଥିଲେ ଯେ ସେମାନଙ୍କ ମଧ୍ୟରୁ ସବୁଠୁ ବଡ଼ କିଏ । କିନ୍ତୁ ସେମାନେ ଭଲ ଲୋକ ଥିଲେ ଏବଂ ଯିହୋବାଙ୍କୁ ପ୍ରେମ କରୁଥିଲେ । ଯୀଶୁଙ୍କ ଯିବା ପରେ ସେମାନଙ୍କଠୁ ହିଁ ଖ୍ରୀଷ୍ଟୀୟ ମଣ୍ଡଳୀର ଆରମ୍ଭ ହେଲା ।