ଦରଦାମ୍ ବଢ଼ି ଚାଲିଛି
ବାସ୍ତବତାକୁ ସ୍ୱୀକାର କରନ୍ତୁ
ଯେବେ ଜିନିଷଗୁଡ଼ିକର ଦରଦାମ୍ ଧିରେ ଧିରେ ବଢ଼େ, ତେବେ ହୁଏତ ଆମକୁ ବେଶୀ ଫରକ ପଡ଼େ ନାହିଁ । ବିଶେଷ କରି ଯଦି ଆମ ରୋଜଗାର ବି ବଢ଼ୁଛି, ତେବେ ହୁଏତ ଆମକୁ ସେତିକି ଚିନ୍ତା ହେବ ନାହିଁ । କିନ୍ତୁ ଯେବେ ଜିନିଷଗୁଡ଼ିକର ଦରଦାମ୍ ଦ୍ରୁତଗତିରେ ବଢ଼େ ଆଉ ଆମ ରୋଜଗାର ଯେମିତିକୁ ସେମିତି ଥାଏ, ତେବେ ଆମେ ଚିନ୍ତାରେ ପଡ଼ିଯାଉ । ଆଉ ଯେବେ ଆମ ଉପରେ ପରିବାରର ଦାୟିତ୍ୱ ଥାଏ, ତେବେ ଆମ ଚିନ୍ତା ଆହୁରି ବଢ଼ିଯାଏ ।
ଏହା ଏକ ବାସ୍ତବ କଥା ଯେ ଆମେ ଦରଦାମ୍ ବୃଦ୍ଧିକୁ ରୋକିପାରିବା ନାହିଁ । ଯଦି ଏହି କଥାକୁ ଆମେ ମନେ ରଖିବା, ତାହେଲେ ଏଥିରୁ ଆମର ହିଁ ଲାଭ ହେବ ।
ଏପରି କରିବା କାହିଁକି ଜରୁରୀ ?
ଯେଉଁ ଲୋକମାନେ ଏହା ସ୍ୱୀକାର କରନ୍ତି ଯେ ସେମାନେ ଦରଦାମ୍ ବୃଦ୍ଧିକୁ ରୋକିପାରିବେ ନାହିଁ . . .
ସେମାନେ ଶାନ୍ତ ରହିପାରନ୍ତି । ଶାନ୍ତ ରହିବା ଯୋଗୁଁ ସେମାନେ ଭଲଭାବେ ଭାବିପାରନ୍ତି ଓ ସଠିକ୍ ନିଷ୍ପତ୍ତି ନେଇପାରନ୍ତି ।
ସେମାନେ ବେପରୁଆ ହୁଅନ୍ତି ନାହିଁ । ଯେପରି ବିଜୁଳି, ପାଣି, ଗ୍ୟାସ ଇତ୍ୟାଦିର ବିଲ୍କୁ ସଠିକ୍ ସମୟରେ ଦିଅନ୍ତି, ଆଉ ଅଯଥା ଖର୍ଚ୍ଚ କରନ୍ତି ନାହିଁ ।
ସେମାନେ ପଇସାକୁ ନେଇ ପରିବାରରେ ଝଗଡ଼ା କରନ୍ତି ନାହିଁ ।
ସେମାନେ ନିଜ ଜୀବନଶୈଳୀରେ ପରିବର୍ତ୍ତନ କରିବା ପାଇଁ ପ୍ରସ୍ତୁତ ଥାʼନ୍ତି । ସେମାନଙ୍କୁ ଜଣାଥାଏ ଯେ କେଉଁ ଜିନିଷଗୁଡ଼ିକ ପାଇଁ ଖର୍ଚ୍ଚ କରିବାର ଅଛି ଏବଂ କେଉଁ ଜିନିଷଗୁଡ଼ିକ ପାଇଁ ନୁହେଁ ।
ଆପଣ ଏହା କିପରି କରିପାରିବେ ?
ପରିବର୍ତ୍ତନ କରନ୍ତୁ । ଯେବେ ଜିନିଷଗୁଡ଼ିକର ଦାମ୍ ଦ୍ରୁତଗତିରେ ବଢ଼ି ଚାଲେ, ତେବେ ଆମେ ନିଜ ଖର୍ଚ୍ଚ କମ୍ କରିବା ବୁଦ୍ଧିମତ୍ତାର କାମ ହେବ । କିଛିଲୋକ ନିଜ ରୋଜଗାରଠାରୁ ଅଧିକ ଖର୍ଚ୍ଚ କରନ୍ତି । ସେମାନେ ନିଜ ପରିସ୍ଥିତିକୁ ନ ଦେଖି ଏବଂ ନିଜ ପାଖରେ ଯେତିକି ଅଛି ତାʼଠୁ ଅଧିକ ବିଳାସପୂର୍ଣ୍ଣ ଜୀବନ ବିତାଇବା ପାଇଁ ଚେଷ୍ଟା କରନ୍ତି । ଏହା ଏମିତି ହେବ ଯେମିତି ସେମାନେ ପ୍ରଖର ଗତିରେ ପ୍ରବାହିତ ହେଉଥିବା ନଦୀସ୍ରୋତର ବିପରୀତ ଦିଗକୁ ପହଁରିବା ପାଇଁ ଚେଷ୍ଟା କରୁଛନ୍ତି । ଏଥିରୁ ସେମାନଙ୍କୁ କିଛି ହାସଲ ହେବ ନାହିଁ ବରଂ ସେମାନେ ଥକି ଯିବେ । ଯଦି ଆପଣଙ୍କର ପରିବାର ଅଛି, ତେବେ ହୁଏତ ଆପଣଙ୍କୁ ତାଙ୍କ ଆବଶ୍ୟକତାଗୁଡ଼ିକ ପୂରା କରିବାର ଚିନ୍ତା ହେଉଥିବ । ଆଉ ଏମିତି ଚିନ୍ତା କରିବା ସ୍ୱାଭାବିକ । କିନ୍ତୁ ମନେ ରଖନ୍ତୁ, ଆପଣଙ୍କ ପରିବାରକୁ ସବୁଠୁ ବେଶୀ ଆପଣଙ୍କର ଆବଶ୍ୟକ ଅଛି । ତେଣୁ ତାଙ୍କ ଉପରେ ଧ୍ୟାନ ଦିଅନ୍ତୁ, ତାଙ୍କ ସହ ସମୟ ବିତାନ୍ତୁ ଏବଂ ତାଙ୍କୁ ପ୍ରେମ ଦେଖାନ୍ତୁ ।
ନିଜ ପାଖରେ ଯେତିକି ଅଛି ତାʼଠୁ ଅଧିକ ବିଳାସପୂର୍ଣ୍ଣ ଜୀବନ ବିତାଇବା ପାଇଁ ଚେଷ୍ଟା କରିବା, ପ୍ରଖର ଗତିରେ ପ୍ରବାହିତ ହେଉଥିବା ନଦୀସ୍ରୋତର ବିପରୀତ ଦିଗକୁ ପହଁରିବା ଭଳି ହେବ