ଭାଗ ୯
ଏକ ପରିବାର ଭାବରେ ଯିହୋବାଙ୍କ ଉପାସନା କରନ୍ତୁ
‘ଯିଏ ଆକାଶ ଓ ପୃଥିବୀ ସୃଷ୍ଟି କରିଛନ୍ତି, ତାହାଙ୍କ ଉପାସନା କରନ୍ତୁ ।’—ପ୍ରକାଶିତ ବାକ୍ୟ ୧୪:୭
ଯେପରି ଆପଣ ଏହି ପୁସ୍ତିକାରେ ଶିଖିଲେ, ବାଇବଲରେ ଏପରି ଅନେକ ସିଦ୍ଧାନ୍ତ ରହିଛି, ଯାହା ଆପଣ ଓ ଆପଣଙ୍କ ପରିବାରକୁ ସାହାଯ୍ୟ କରିବ । ଯିହୋବା ଚାହାନ୍ତି ଯେ ଆପଣ ଖୁସିରେ ରହନ୍ତୁ । ସେ ପ୍ରତିଜ୍ଞା କରନ୍ତି ଯେ ଯଦି ଆପଣ ତାହାଙ୍କ ଉପାସନାକୁ ନିଜ ଜୀବନରେ ପ୍ରଥମ ସ୍ଥାନ ଦିଅନ୍ତି, ତେବେ ଅନ୍ୟ “ସମସ୍ତ ବିଷୟ ମଧ୍ୟ ତୁମ୍ଭମାନଙ୍କୁ ଦିଆଯିବ ।” (ମାଥିଉ ୬:୩୩) ସେ ପ୍ରକୃତରେ ଚାହାନ୍ତି ଯେ ଆପଣ ତାହାଙ୍କ ମିତ୍ର ହୁଅନ୍ତୁ । ଈଶ୍ୱରଙ୍କ ସହିତ ନିଜ ମିତ୍ରତାକୁ ମଜବୁତ୍ କରିବା ପାଇଁ କୌଣସି ସୁଯୋଗକୁ ହାତଛଡ଼ା କରନ୍ତୁ ନାହିଁ । ଏହା ଜଣେ ବ୍ୟକ୍ତିକୁ ମିଳୁଥିବା ସବୁଠାରୁ ବଡ଼ ସମ୍ମାନ ଅଟେ ।—ମାଥିଉ ୨୨:୩୭, ୩୮.
୧ ଯିହୋବାଙ୍କ ସହିତ ନିଜ ସମ୍ପର୍କକୁ ମଜବୁତ୍ କରନ୍ତୁ
ବାଇବଲ କʼଣ କହେ: ଯିହୋବା କହନ୍ତି, “ମୁଁ ତୁମ୍ଭମାନଙ୍କର ପିତା ହେବି ଓ ତୁମ୍ଭେମାନେ ମୋ ପୁଅ ଓ ଝିଅ ହେବ ।” (୨ କରିନ୍ଥୀୟ ୬:୧୮, ଇଜି-ଟୁ-ରିଡ୍ ଭର୍ସନ) ଈଶ୍ୱର ଚାହାନ୍ତି ଯେ ତାହାଙ୍କ ସହିତ ଆପଣଙ୍କ ସମ୍ପର୍କ ଘନିଷ୍ଠ ହେଉ । ଏହାର ଗୋଟିଏ ଉପାୟ ହେଉଛି, ପ୍ରାର୍ଥନା କରିବା । ଯିହୋବା ଆମକୁ “ନିରନ୍ତର ପ୍ରାର୍ଥନା” ଅର୍ଥାତ୍ ନିୟମିତ ଭାବେ ପ୍ରାର୍ଥନା କରିବା ପାଇଁ ଆମନ୍ତ୍ରଣ କରନ୍ତି । (୧ ଥେସଲନୀକୀୟ ୫:୧୭) ସେ ଆପଣଙ୍କ ହୃଦୟରେ ରହିଥିବା ଭାବନା ଓ ଚିନ୍ତାଗୁଡ଼ିକୁ ଶୁଣିବା ପାଇଁ ବ୍ୟାକୁଳ ଅଟନ୍ତି । (ଫିଲିପ୍ପୀୟ ୪:୬) ଯଦି ଆପଣ ନିଜ ପରିବାର ସହିତ ମିଶି ପ୍ରାର୍ଥନା କରିବେ, ତେବେ ସେମାନେ ଦେଖିପାରିବେ ଯେ ଈଶ୍ୱର ଆପଣଙ୍କ ପାଇଁ କେତେ ବାସ୍ତବିକ ଅଟନ୍ତି ।
ଈଶ୍ୱରଙ୍କ ସହିତ କଥା ହେବା ସଙ୍ଗେ ସଙ୍ଗେ ଆପଣ ତାହାଙ୍କଠାରୁ ଶୁଣିବା ମଧ୍ୟ ଅତି ଜରୁରୀ ଅଟେ । ଆପଣ ତାହାଙ୍କ ବାକ୍ୟ ବାଇବଲ ଏବଂ ବାଇବଲ ଆଧାରିତ ପ୍ରକାଶନଗୁଡ଼ିକର ଅଧ୍ୟୟନ କରିବା ଦ୍ୱାରା ଏପରି କରିପାରିବେ । (ଗୀତସଂହିତା ୧:୧, ୨) ଆପଣ ଯାହା ଶିଖନ୍ତି, ତାʼ ଉପରେ ଚିନ୍ତନ କରନ୍ତୁ । (ଗୀତସଂହିତା ୭୭:୧୧, ୧୨) ଈଶ୍ୱରଙ୍କଠାରୁ ଶୁଣିବା ପାଇଁ ଏହା ମଧ୍ୟ ଜରୁରୀ ଯେ ଆପଣ ନିୟମିତ ଭାବେ ଖ୍ରୀଷ୍ଟିୟାନ ସଭାଗୁଡ଼ିକରେ ଉପସ୍ଥିତ ହୁଅନ୍ତୁ ।—ଗୀତସଂହିତା ୧୨୨:୧-୪.
ଯିହୋବାଙ୍କ ସହିତ ନିଜ ସମ୍ପର୍କକୁ ମଜବୁତ୍ କରିବାର ଅନ୍ୟ ଏକ ଗୁରୁତ୍ୱପୂର୍ଣ୍ଣ ଉପାୟ ହେଉଛି, ତାହାଙ୍କ ବିଷୟରେ ଅନ୍ୟମାନଙ୍କୁ କହିବା । ଯେତେ ଅଧିକ ଆପଣ ଏପରି କରିବେ, ସେତେ ଆପଣ ତାହାଙ୍କ ନିକଟବର୍ତ୍ତୀ ହୋଇପାରିବେ ।—ମାଥିଉ ୨୮:୧୯, ୨୦.
ଆପଣ କʼଣ କରିପାରିବେ:
ପ୍ରତିଦିନ ବାଇବଲ ପଢ଼ିବା ଏବଂ ପ୍ରାର୍ଥନା କରିବା ପାଇଁ ସମୟ ଠିକ୍ କରନ୍ତୁ
ଏକ ପରିବାର ଭାବରେ ଈଶ୍ୱରଙ୍କ ସେବା ସହ ଜଡ଼ିତ କାମଗୁଡ଼ିକୁ ମନୋରଞ୍ଜନ ଓ ଆରାମ କରିବାଠାରୁ ଅଧିକ ଗୁରୁତ୍ୱ ଦିଅନ୍ତୁ
୨ ନିଜ ପାରିବାରିକ ଉପାସନାର ଆନନ୍ଦ ନିଅନ୍ତୁ
ବାଇବଲ କʼଣ କହେ: “ଈଶ୍ୱରଙ୍କର ନିକଟବର୍ତ୍ତୀ ହୁଅ, ସେଥିରେ ସେ ତୁମ୍ଭମାନଙ୍କର ନିକଟବର୍ତ୍ତୀ ହେବେ ।” (ଯାକୁବ ୪:୮) ଆପଣ ନିୟମିତ ପାରିବାରିକ ଉପାସନା କରିବା ପାଇଁ ଏକ କାର୍ଯ୍ୟସୂଚୀ ତିଆରି କରିବା ଏବଂ ତାʼ ଅନୁଯାୟୀ କାମ କରିବା ଜରୁରୀ ଅଟେ । (ଆଦି ପୁସ୍ତକ ୧୮:୧୯) କିନ୍ତୁ କେବଳ ଏତିକି କରିବା ଯଥେଷ୍ଟ ନୁହେଁ । ଈଶ୍ୱର ଆପଣଙ୍କ ଦୈନନ୍ଦିନ ଜୀବନର ଏକ ଭାଗ ହେବା ଉଚିତ୍ । ‘ତୁମ୍ଭେ ଆପଣା ଗୃହରେ ବସିବା ବେଳେ, ପଥରେ ଚାଲିବା ବେଳେ, ଶୟନ କରିବା ବେଳେ ଓ ଉଠିବା ବେଳେ’ ଈଶ୍ୱରଙ୍କ ବିଷୟରେ କଥାବାର୍ତ୍ତା କରି ତାହାଙ୍କ ସହିତ ନିଜ ପରିବାରର ସମ୍ପର୍କକୁ ମଜବୁତ୍ କରନ୍ତୁ । (ଦ୍ୱିତୀୟ ବିବରଣ ୬:୬, ୭) ଯିହୋଶୂୟଙ୍କ ଭଳି ହେବାକୁ ଲକ୍ଷ୍ୟ ରଖନ୍ତୁ, ଯିଏ କହିଥିଲେ: ‘ମୁଁ ଓ ମୋହର ପରିବାର, ଆମ୍ଭେମାନେ ଯିହୋବାଙ୍କୁ ସେବା କରିବୁ ।’—ଯିହୋଶୂୟ ୨୪:୧୫.
ଆପଣ କʼଣ କରିପାରିବେ:
ପରିବାରର ପ୍ରତ୍ୟେକ ସଦସ୍ୟଙ୍କ ଆବଶ୍ୟକତାକୁ ଧ୍ୟାନରେ ରଖି ସେମାନଙ୍କୁ ନିୟମିତ ଭାବେ ତାଲିମ୍ ଦେବା ପାଇଁ ଏକ କାର୍ଯ୍ୟସୂଚୀ ତିଆରି କରନ୍ତୁ