ବାଇବଲ ଅଧ୍ୟୟନରେ ସାମିଲ ହେବା ପାଇଁ ପରିବାରର ସଦସ୍ୟମାନେ ସଂପୂର୍ଣ୍ଣରୂପେ କିପରି ସହଯୋଗ କରନ୍ତି
ସତ୍ୟ ଦ୍ୱାରା ଲୋକମାନେ ପାରିବାରିକ ଜୀବନର ପ୍ରକୃତ ଅର୍ଥ ଓ ଉଦ୍ଦେଶ୍ୟ ବୁଝିପାରନ୍ତି, କିନ୍ତୁ, ଏହାର ଅର୍ଥ ନୁହେଁ ଯେ ପରିବାର ଆପେ ଆପେ ଯିହୋବାଙ୍କୁ ସେବା କରିବାରେ ସଫଳ ହୋଇପାରିବ । ପରିବାରକୁ ଆଧ୍ୟାତ୍ମିକରୂପେ ଗଢ଼ିତୋଳିବାରେ ସମୟ ଓ ପ୍ରଚେଷ୍ଟାର ଆବଶ୍ୟକ ହୁଏ । ଏଥିପାଇଁ ପରିବାରର ସମସ୍ତ ସଦସ୍ୟଙ୍କୁ ଏକତ୍ରିତ ହୋଇ କାର୍ଯ୍ୟ କରିବାକୁ ହେବ । ତିନୋଟି ଲେଖା ମଧ୍ୟରୁ ପ୍ରଥମଟିରେ ବାଇବଲ ଅଧ୍ୟୟନ କରିବା ପାଇଁ ପରିବାରର ସଦସ୍ୟମାନେ କିପରି ସହଯୋଗ କରିପାରିବେ, ସେହି ବିଷୟରେ ଗୁରୁତ୍ୱାରୋପ କରାଯାଇଛି ।
୨ ପ୍ରତିଦିନ ବାଇବଲ ପଢ଼ିବା ଦ୍ୱାରା: ହିତୋପଦେଶ ୨୪:୫ ପଦ କହେ: “ବିଦ୍ୱାନ ଲୋକ ବଳ ବଢ଼ାଏ ।” ପ୍ରତ୍ୟେକ ଦିନ ପରମେଶ୍ୱରଙ୍କ ବାକ୍ୟ ପଢ଼ିଲେ ଜଣେ ବ୍ୟକ୍ତିର ଜ୍ଞାନ ଓ ଆନ୍ତରିକ ଶକ୍ତି ବୃଦ୍ଧିପ୍ରାପ୍ତ ହୁଏ । ଏହି ଶକ୍ତି ବଳରେ ସେ ତାʼର ଆଧ୍ୟାତ୍ମିକ ବିଷୟ ଉପରେ ଶୟତାନର ଆକ୍ରମଣକୁ ପ୍ରତିରୋଧ କରିପାରିବ । (ଗୀତ. ୧:୧, ୨) ଆପଣ ଆପଣଙ୍କ ପରିବାର ସହିତ ଏକତ୍ରିତ ହୋଇ ବାଇବଲ ପଢ଼ନ୍ତି କି? ଈଶତନ୍ତ୍ରୀୟ ପରିଚର୍ଯ୍ୟା ସ୍କୁଲର ତାଲିକାରେ ବର୍ଷକ ପାଇଁ ପ୍ରତ୍ୟେକ ସପ୍ତାହ ନିମିତ୍ତ “ଅତିରିକ୍ତ ବାଇବଲ ପଠନର ତାଲିକା” ଦିଆଯାଇଛି । ପ୍ରତ୍ୟେକ ଦିନ ଏହା ପଢ଼ିବା ପାଇଁ ଗୋଟିଏ ପରିବାରକୁ ଦଶ ମିନିଣ୍ଟ ସମୟର ଆବଶ୍ୟକ ହୁଏ । ପ୍ରାତଃକାଳୀନ ଭୋଜନ କିମ୍ବା ରାତ୍ରୀ ଭୋଜନ କିମ୍ବା ଶୋଇବା ପୂର୍ବରୁ ଆପଣ ଆପଣଙ୍କ ସୁବିଧା ଅନୁସାରେ ସମୟ ନିର୍ଦ୍ଧାରଣ କରି ପ୍ରତିଦିନ ଶାସ୍ତ୍ରବଚନର ପରୀକ୍ଷା ପୁସ୍ତକଟିରୁ ପାଠର ଆଲୋଚନା ଏବଂ ବାଇବଲ ପଠନ କରନ୍ତୁ । ଏହାକୁ ଆପଣଙ୍କ ପରିବାରରେ ପ୍ରତିଦିନର କାର୍ଯ୍ୟର ଅଂଶ ବୋଲି ମନେ କରନ୍ତୁ ।
୩ ପ୍ରତ୍ୟେକ ସପ୍ତାହ ଏକତ୍ରିତ ହୋଇ ପଢ଼ିବା ଦ୍ୱାରା: ପରିବାରରେ ପାରିବାରିକ ବାଇବଲ ଅଧ୍ୟୟନ ପ୍ରତ୍ୟେକ ସପ୍ତାହର ମୁଖ୍ୟ ବିଷୟ ହେବା ଉଚିତ୍ । ଏଥିରେ ଉତ୍ସାହର ସହିତ ସହଯୋଗ କରିବା ପରିବାରର ପ୍ରତ୍ୟେକ ସଦସ୍ୟଙ୍କ କର୍ତ୍ତବ୍ୟ । ଅଧ୍ୟୟନର ବିଷୟବସ୍ତୁ ବାଛିବା ସମୟରେ, ପରିବାରର ମୁରବି ତାଙ୍କର ପାରିବାରିକ ଆବଶ୍ୟକତା, ଦିନ ଓ ଅଧ୍ୟୟନ ପାଇଁ କେତେ ସମୟ ଆବଶ୍ୟକ ଇତ୍ୟାଦି ବିଷୟରେ ଧ୍ୟାନ ଦେବା ଉଚିତ୍ । ପାରିବାରିକ ଅଧ୍ୟୟନକୁ ସାପ୍ତାହିକ ତାଲିକାରେ ପ୍ରଥମ ସ୍ଥାନ ଦିଅନ୍ତୁ । କମ ଗୁରୁତ୍ୱପୂର୍ଣ୍ଣ ବିଷୟକୁ ଆପଣଙ୍କ ବାଇବଲ ଅଧ୍ୟୟନରେ ଅନ୍ତର୍ଭୁକ୍ତ କରନ୍ତୁ ନାହିଁ ।—ଫିଲି. ୧:୧୦, ୧୧.
୪ ବେଳେବେଳେ ଘରେ ଯଦି ଜଣେ ପିତା ବ୍ୟବସାୟ ଭିତ୍ତିକ ଟେଲିଫୋନ-କଲ ପାଉଛନ୍ତି, ତେବେ ତାଙ୍କୁ ପାରିବାରିକ ଅଧ୍ୟୟନ ସମୟରେ ଟେଲିଫୋନ ସଂଯୋଗ ଛିନ୍ନ କରିବା ଉଚିତ୍ । ଯଦି ଉକ୍ତ ସମୟରେ ଗ୍ରାହକମାନେ ଘରକୁ ଆସନ୍ତି, ତେବେ ସେମାନଙ୍କୁ ଅଧ୍ୟୟନରେ ସାମିଲ କରନ୍ତୁ କିମ୍ବା ଅପେକ୍ଷା କରିବାକୁ କୁହନ୍ତୁ । ପାରିବାରିକ ଅଧ୍ୟୟନ ସମୟରେ କୌଣସି ବିଷୟକୁ ହସ୍ତକ୍ଷେପ ନ କରାଇବା ପାଇଁ ଜଣେ ପିତା ଦୃଢ଼ ନିସ୍ପତି କରିଥିଲେ । ଏହି ବିଷୟ ତାଙ୍କର ପିଲାମାନଙ୍କ ଉପରେ ଗଭୀର ପ୍ରଭାବ ପକାଇଥିଲା ଏବଂ ବ୍ୟବସାୟ ମଧ୍ୟ ଧିରେ ଧିରେ ବୃଦ୍ଧି ପାଉଥିଲା ।
୫ ପରିବାରର ସଦସ୍ୟମାନେ ଆଧ୍ୟାତ୍ମିକ କାର୍ଯ୍ୟକଳାପରେ ସହଯୋଗ କରିବା ସମୟରେ କେତେ ଖୁସୀ ଲାଗେ ! ପାରିବାରିକ ବାଇବଲ ଅଧ୍ୟୟନରେ ସମ୍ପୂର୍ଣ୍ଣରୂପେ ସହଯୋଗ କରିବା ପାଇଁ ଯଦି ଆମେ ଚେଷ୍ଟା କରିବା, ତେବେ ଆମକୁ ଯିହୋବାଙ୍କ ଆଶୀର୍ବାଦ ମିଳିବ।