ଯିହୋବାଙ୍କ ପାଇଁ ଗୋଟିଏ ମନ୍ଦିର

ଶଲୋମନ ଇସ୍ରାଏଲର ରାଜା ହେବା ପରେ ଯିହୋବା ତାଙ୍କୁ ପଚାରିଲେ, ‘କୁହ, ମୁଁ ତମକୁ କʼଣ ଦେବି ?’ ଶଲୋମନ କହିଲେ, ‘ମୁଁ ଜଣେ ଯୁବା ଅଟେ, ମୁଁ ବେଶି କିଛି ଜାଣେ ନାହିଁ । ତେଣୁ ମୋତେ ଆପଣଙ୍କ ଲୋକମାନଙ୍କ ଦେଖାଶୁଣା କରିବା ପାଇଁ ବୁଦ୍ଧି ଦିଅନ୍ତୁ ।’ ଯିହୋବା କହିଲେ, ‘ତମେ ବୁଦ୍ଧି ମାଗିଛ, ତେଣୁ ମୁଁ ତମକୁ ଦୁନିଆର ସବୁଠୁ ବୁଦ୍ଧିମାନ ବ୍ୟକ୍ତି କରିବି । ମୁଁ ତୁମକୁ ବହୁତ ଧନସମ୍ପତ୍ତି ମଧ୍ୟ ଦେବି ଏବଂ ଯଦି ତମେ ମୋ ଆଜ୍ଞା ମାନିବ, ତାହେଲେ ତମେ ଅନେକ ବର୍ଷ ଯାଏ ବଞ୍ଚିବ ।’

ଶଲୋମନ ମନ୍ଦିର ତିଆରି କାମ ଆରମ୍ଭ କରିଦେଲେ । ସେ ବଢ଼ିଆ ସୁନା, ରୂପା, କାଠ ଓ ପଥରରୁ ଏହି ମନ୍ଦିର ତିଆରି କରାଇଲେ । ହଜାର ହଜାର ଦକ୍ଷ ପୁରୁଷ ଓ ମହିଳାମାନେ ଏହି କାମରେ ସହଯୋଗ କଲେ । ସାତ ବର୍ଷ ପରେ ଏହି ମନ୍ଦିର ତିଆରି ହୋଇଗଲା । ଏବେ ଏହି ମନ୍ଦିର ଯିହୋବାଙ୍କୁ ସମର୍ପିତ କରିବା ପାଇଁ ପ୍ରସ୍ତୁତ ଥିଲା । ମନ୍ଦିରରେ ଗୋଟିଏ ବେଦି ଥିଲା ଯେଉଁଥିରେ ବଳିଦାନଗୁଡ଼ିକ ରଖାଯାଇଥିଲା । ଶଲୋମନ ବେଦି ଆଗରେ ଆଣ୍ଠୁମାଡ଼ି ପ୍ରାର୍ଥନା କଲେ, ‘ହେ ଯିହୋବା, ଏହି ମନ୍ଦିର କିଛି ନୁହେଁ । ଏହା ଏତେ ବଡ଼ ନାହିଁ ଆଉ ନା ସୁନ୍ଦର, ତଥାପି ଯେବେ ଆମେ ଏଠାକୁ ଆସି ଆପଣଙ୍କ ଉପାସନା ଏବଂ ଆପଣଙ୍କୁ ପ୍ରାର୍ଥନା କରିବୁ, ତେବେ ଦୟାକରି ଆମ ପ୍ରାର୍ଥନା ଶୁଣନ୍ତୁ ।’ ଯିହୋବା ସେହି ମନ୍ଦିର ଓ ଶଲୋମନଙ୍କ ପ୍ରାର୍ଥନା ବିଷୟରେ କʼଣ ଭାବିଲେ ? ଶଲୋମନଙ୍କ ପ୍ରାର୍ଥନା ଶେଷ ହେବା ପରେ ହିଁ, ଆକାଶରୁ ନିଆଁ ବର୍ଷା ହେଲା ଓ ବେଦିରେ ରଖାଯାଇଥିବା ବଳିଦାନଗୁଡ଼ିକ ଜଳିଗଲା । ଏଥିରୁ ଯିହୋବା ଦେଖାଇଲେ ଯେ ସେ ମନ୍ଦିରରୁ ଖୁସି ଅଛନ୍ତି । ଯେବେ ଇସ୍ରାଏଲୀୟମାନେ ଏହା ଦେଖିଲେ ତେବେ ସେମାନେ ବହୁତ ଖୁସି ହେଲେ ।

ସାରା ଇସ୍ରାଏଲ ଏବଂ ଦୂର ଦୂର ଦେଶର ଲୋକମାନେ ଜାଣିଥିଲେ ଯେ ରାଜା ଶଲୋମନ କେତେ ବୁଦ୍ଧିମାନ ଅଟନ୍ତି । ଲୋକେ ନିଜ ସମସ୍ୟାଗୁଡ଼ିକ ନେଇ ତାଙ୍କ ପାଖକୁ ଆସୁଥିଲେ । ଥରେ ଶିବା ଦେଶର ରାଣୀ ଶଲୋମନଙ୍କ ବୁଦ୍ଧିର ପରୀକ୍ଷା କରିବା ପାଇଁ ଆସିଲେ । ସେ ଶଲୋମନଙ୍କୁ କଠିନ ପ୍ରଶ୍ନ ପଚାରିଲେ । ଯେବେ ସେ ଶଲୋମନଙ୍କ ଉତ୍ତର ଶୁଣିଲେ ସେ କହିଲେ, ‘ଯେବେ ଲୋକେ ମୋତେ ଆପଣଙ୍କ ବିଷୟରେ କହିଲେ ତେବେ ମୁଁ ଭରସା କରି ନ ଥିଲି । କିନ୍ତୁ ଏବେ ମୁଁ ଜାଣିଲି ଯେ ସେମାନେ ଆପଣଙ୍କ ବିଷୟରେ ଯାହା କହିଥିଲେ ଆପଣ ତାହାଠାରୁ ବି ଅଧିକ ବୁଦ୍ଧିମାନ ଅଟନ୍ତି । ଆପଣଙ୍କ ଈଶ୍ୱର ଯିହୋବା ଆପଣଙ୍କୁ ଆଶିଷ ଦେଇଛନ୍ତି ।’ ଇସ୍ରାଏଲ ରାଷ୍ଟ୍ରରେ ସବୁ କିଛି ବଢ଼ିଆ ଥିଲା ଏବଂ ଲୋକମାନେ ଖୁସି ଥିଲେ । କିନ୍ତୁ ଖୁବ୍‌ ଶୀଘ୍ର ଏସବୁ ବଦଳିବାକୁ ଯାଉଥିଲା ।