ଭାବିଚିନ୍ତି କଥା ହୁଅନ୍ତୁ

ପାଉଲ କʼଣ କଲେ ?

ଭିଡିଓ: ପାଉଲ ଆଥୀନୀର ଲୋକମାନଙ୍କୁ ସାକ୍ଷ୍ୟ ଦେଲେ

୧. ଭିଡିଓ ଦେଖନ୍ତୁ କିମ୍ବା ପ୍ରେରିତ ୧୭:୨୨, ୨୩ ପଢ଼ନ୍ତୁ । ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ବିଷୟରେ ଭାବନ୍ତୁ:

1. କ. ପାଉଲ ଯେବେ ଆଥୀନୀର ଲୋକମାନଙ୍କୁ ମୂର୍ତ୍ତିପୂଜା କରୁଥିବାର ଦେଖିଲେ, ତେବେ ତାଙ୍କୁ କିପରି ଲାଗିଲା ?—ପ୍ରେରିତ ୧୭:୧୬ ଦେଖନ୍ତୁ ।

2. ଖ. ଆଥୀନୀୟ ଲୋକମାନଙ୍କୁ ଭୁଲ ସାବ୍ୟସ୍ତ ନ କରି ପାଉଲ କିପରି ତାଙ୍କର ପ୍ରଶଂସା କଲେ ? ଏପରି କରିବାରୁ ସେ କିପରି ସେମାନଙ୍କୁ ସାକ୍ଷ୍ୟ ଦେଇପାରିଲେ ?

ପାଉଲଙ୍କଠାରୁ ଆମେ କʼଣ ଶିଖୁ ?

୨. ଯଦି ଆମେ କଥା ହେବା ପୂର୍ବରୁ ଭାବିବା ଯେ ଆମେ କʼଣ କହିବା, କିପରି କହିବା ଓ କେବେ କହିବା, ତେବେ ଲୋକମାନଙ୍କୁ ଆମ କଥା ଶୁଣିବା ଭଲ ଲାଗିବ ।

ପାଉଲଙ୍କ ଭଳି ଆମକୁ କʼଣ କରିବା ଉଚିତ୍‌ ?

୩. କହିବା ପୂର୍ବରୁ ଭାବନ୍ତୁ । ଯଦି ଆପଣ ଏପରି ବ୍ୟକ୍ତି ସହ କଥା ହେଉଛନ୍ତି ଯିଏ ବାଇବଲକୁ ମାନେନି, ତେବେ ଟିକେ ରହି ଭାବନ୍ତୁ ଯେ ଆପଣ ତାʼସହ ବାଇବଲ ବିଷୟରେ କିମ୍ବା ଯୀଶୁଙ୍କ ବିଷୟରେ କିପରି କଥା ହେବେ ।

୪. କାହାରି କଥା କାଟନ୍ତୁ ନାହିଁ । ତାଙ୍କୁ ମନ ଖୋଲି କଥା ହେବା ପାଇଁ ଦିଅନ୍ତୁ । ଯଦି ସେ ଏପରି କିଛି କହିଦିଏ ଯାହା ବାଇବଲ ଶିକ୍ଷାଗୁଡ଼ିକ ଅନୁସାରେ ନ ଥାଏ, ତେବେ ସେଠାରେ ହିଁ ତାକୁ ବୁଝାଇବା ପାଇଁ ଚେଷ୍ଟା କରନ୍ତୁ ନାହିଁ । କିଛି ସମୟ ଅପେକ୍ଷା କରନ୍ତୁ । (ଯାକୁ. ୧:୧୯) ଯଦି ଆପଣ ଧ୍ୟାନ ଦେଇ ତାʼ କଥା ଶୁଣିବେ, ତେବେ ଆପଣ ଭଲଭାବେ ବୁଝିପାରିବେ ସେ କʼଣ ମାନେ ।—ହିତୋ. ୨୦:୫.

୫. ଯଦି ସମ୍ଭବ ପ୍ରଶଂସା କରନ୍ତୁ । ହୋଇପାରେ ସେହି ବ୍ୟକ୍ତି ବିଶ୍ୱାସ କରେ ଯେ ସେ ଯାହା ମାନେ ତାହା ହିଁ ଠିକ୍‌ । ତେଣୁ ହୁଏତ ସେ ଆମ କଥାରେ ତୁରନ୍ତ ରାଜି ହୋଇ ନ ପାରେ । କିନ୍ତୁ ଏପରି ସମୟରେ ଏହା ଦେଖିବା ପାଇଁ ଚେଷ୍ଟା କରନ୍ତୁ ଯେ ଏପରି କେଉଁ କଥା ଅଛି ଯେଉଁଥିରେ ଆପଣ ଦୁହେଁ ସହମତ ଅଛନ୍ତି ଆଉ ସେହି କଥା ପାଇଁ ତାʼର ପ୍ରଶଂସା କରନ୍ତୁ । ତାʼପରେ ଧିରେ ଧିରେ ତାକୁ ବାଇବଲର କଥାଗୁଡ଼ିକୁ ବୁଝାଇବା ପାଇଁ ଚେଷ୍ଟା କରନ୍ତୁ ।