ସତ୍ୟର ରାସ୍ତାରେ ଚାଲିବା ଜାରି ରଖନ୍ତୁ

୧. ଆମକୁ ପରସ୍ପର ସହିତ ଏବିଷୟରେ କାହିଁକି କଥା ହେବା ଉଚିତ୍‌ ଯେ ଆମକୁ ସତ୍ୟ କିପରି ମିଳିଲା ?

“ଆପଣଙ୍କୁ ସତ୍ୟ କିପରି ମିଳିଲା ?” ଯେବେ ଆମେ କୌଣସି ଭାଇ କିମ୍ବା ଭଉଣୀକୁ ପ୍ରଥମ ଥର ଭେଟୁ, ତେବେ ଅନେକ ଥର ସେମାନଙ୍କୁ ଏହି ପ୍ରଶ୍ନ ପଚାରିଥାଉ । ହୁଏତ ଆପଣଙ୍କୁ ବି ଭାଇଭଉଣୀମାନେ ଅନେକ ଥର ଏହି ପ୍ରଶ୍ନ ପଚାରିଥିବେ । ଆମକୁ ଭାଇଭଉଣୀଙ୍କଠାରୁ ଏହା ଶୁଣିବା ବହୁତ ଭଲ ଲାଗେ ଯେ ସେମାନେ ଯିହୋବାଙ୍କୁ କିପରି ଜାଣିଲେ ଆଉ ତାଙ୍କୁ କାହିଁକି ଏତେ ପ୍ରେମ କରିବାକୁ ଲାଗିଲେ । ଆଉ ଆମକୁ ବି ସେମାନଙ୍କୁ ଏବିଷୟରେ କହିବା ପାଇଁ ଖୁସି ଲାଗେ ଯେ ଆମେ କାହିଁକି ସତ୍ୟକୁ ଏତେ ପ୍ରେମ କରୁ । (ରୋମୀ. ୧:୧୧) ଯେବେ ଆମେ ଭାଇଭଉଣୀଙ୍କ ସହିତ ଏବିଷୟରେ କଥା ହେଉ, ତେବେ ଆମକୁ ଅନୁଭବ ହୁଏ ଯେ ଯିହୋବାଙ୍କ ସାକ୍ଷୀ ହେବା କେତେ ବଡ଼ କଥା ଅଟେ ଆଉ ସତ୍ୟ କେତେ ବହୁମୂଲ୍ୟ ଅଟେ । ଏଥିରୁ ଆମର ନିଷ୍ପତ୍ତି ଦୃଢ଼ ହୋଇଯାଏ ଯେ ଆମେ ‘ସତ୍ୟରେ ଆଚରଣ କରୁଥାଉ’ ବା ସତ୍ୟର ରାସ୍ତାରେ ଚାଲିବା ଜାରି ରଖୁ । ତାʼ ଅର୍ଥ ଆମେ ଏପରି ଜୀବନ ଜୀଇଁବା ଉଚିତ୍‌ ଯେଉଁଥିରୁ ଯିହୋବା ଖୁସି ହେବେ ।—୩ ଯୋହ. ୪.

୨. ଏହି ଲେଖାରେ ଆମେ କେଉଁ ବିଷୟରେ ଚର୍ଚ୍ଚା କରିବା ?

^୨ ଏହି ଲେଖାରେ ଆମେ ଚର୍ଚ୍ଚା କରିବା ଯେ ଆମେ ସତ୍ୟକୁ କାହିଁକି ଏତେ ପ୍ରେମ କରୁ । ଆମେ ଏହା ବି ଜାଣିବା ଯେ ଯଦି ଆମେ ସତ୍ୟକୁ ବହୁମୂଲ୍ୟ ମନେ କରୁ, ତେବେ ଆମେ କʼଣ କରିବା ଜାରି ରଖିବା ଉଚିତ୍‌ । ଏବିଷୟରେ ଜାଣିଲେ ଆମେ ଯିହୋବାଙ୍କ ଆହୁରି କୃତଜ୍ଞ ହେବା ଯେ ସେ ଆମକୁ ନିଜ ପାଖକୁ ଆଣିଲେ ଆଉ ଆମେ ସତ୍ୟ ଜାଣିପାରିଲୁ । (ଯୋହ. ୬:୪୪) ଆଉ ଆମକୁ ମନ ହେବ ଯେ ଆମେ ଅନ୍ୟମାନଙ୍କୁ ସତ୍ୟ ବିଷୟରେ କହିବା ଜାରି ରଖିବା ।

ଆମେ ସତ୍ୟକୁ କାହିଁକି ପ୍ରେମ କରୁ ?

୩. ସତ୍ୟକୁ ପ୍ରେମ କରିବାର ସବୁଠୁ ବଡ଼ କାରଣ କʼଣ ?

^୩ ଆମେ ଅନେକ କାରଣରୁ ସତ୍ୟକୁ ପ୍ରେମ କରୁ । ତାʼର ସବୁଠୁ ବଡ଼ କାରଣ ହେଲା ଯେ ଆମେ ଯିହୋବାଙ୍କୁ ପ୍ରେମ କରୁ, ଯିଏ ଆମକୁ ସତ୍ୟ ଶିଖାଇଛନ୍ତି । ତାଙ୍କ ବାକ୍ୟ ବାଇବଲରୁ ଆମେ ଜାଣିଲୁ ଯେ ସେ କେବଳ ସାରା ଦୁନିଆର ସୃଷ୍ଟିକର୍ତ୍ତା ଅଟନ୍ତି ତାହା ନୁହେଁ, ବରଂ ସେ ଜଣେ ବାପାଙ୍କ ଭଳି ଆମର ବହୁତ ଚିନ୍ତା ମଧ୍ୟ କରନ୍ତି । (୧ ପିତ. ୫:୭) ସେ ‘ସ୍ନେହଶୀଳ ଓ କୃପାମୟ, କ୍ରୋଧରେ ଧୀର, ଦୟା ଓ ସତ୍ୟତାରେ ପରିପୂର୍ଣ୍ଣ ଅଟନ୍ତି ।’ (ଯାତ୍ରା. ୩୪:୬) ସେ ସବୁବେଳେ ନ୍ୟାୟ କରନ୍ତି । (ଯିଶା. ୬୧:୮) ଆମକୁ କଷ୍ଟରେ ଦେଖି ତାଙ୍କୁ ବି କଷ୍ଟ ହୁଏ ଆଉ ସେ ସେହି ସମୟର ଆଗ୍ରହର ସହିତ ଅପେକ୍ଷା କରୁଛନ୍ତି ଯେବେ ସେ ସବୁ ଦୁଃଖକଷ୍ଟକୁ ଦୂର କରିଦେବେ । (ଯିରି. ୨୯:୧୧) ଆମେ ବି ସେହି ସମୟର ଅପେକ୍ଷା କରୁଛୁ । ସତରେ, ଯିହୋବା ଆମକୁ କେତେ ପ୍ରେମ କରନ୍ତି । ଏହି କାରଣରୁ ଆମେ ବି ତାଙ୍କୁ ବହୁତ ପ୍ରେମ କରୁ ।

୪-୫. ପାଉଲ କାହିଁକି କହିଲେ ଯେ ଆମର ଆଶା ଲଙ୍ଗର ଭଳି ଅଟେ ?

^୪ ସତ୍ୟକୁ ପ୍ରେମ କରିବାର ଆଉ ଗୋଟିଏ କାରଣ ହେଉଛି ଯେ ଏହାକୁ ଜାଣି ଆମକୁ ବହୁତ ଲାଭ ହୋଇଛି । ଯେପରି ବାଇବଲରେ ଏହି ସତ୍ୟ ବିଷୟରେ କୁହାଯାଇଛି ଯେ ଭବିଷ୍ୟତରେ ଈଶ୍ୱର ଆମକୁ ଭଲ ଜୀବନ ଦେବେ । ଏ ବିଷୟରେ ପ୍ରେରିତ ପାଉଲ କହିଲେ, ‘ଏହି ଭରସା ଆମ୍ଭମାନଙ୍କ ଆତ୍ମାର ଲଙ୍ଗର ସ୍ୱରୂପ, ଯାହା ଦୃଢ଼ ଓ ଅଟଳ ଅଛି ।’ (ଏବ୍ରୀ ୬:୧୯) ଯେବେ ସମୁଦ୍ରରେ ଝଡ଼ ତୋଫାନ ଆସେ, ତେବେ ନାବିକମାନେ ଲଙ୍ଗର ପକାଇ ଦିଅନ୍ତି ଯାହାଫଳରେ ଜାହାଜ ସ୍ଥିର ରହେ । ସେହିପରି ଆମ ଜୀବନରେ ଯେବେ ଝଡ଼ ଭଳି ସମସ୍ୟା ଆସେ, ତେବେ ନିଜ ଆଶା ବିଷୟରେ ଭାବିଲେ ଆମେ ନିଜକୁ ସମ୍ଭାଳିପାରୁ ।

^୫ ପାଉଲ ଏହି କଥା ଅଭିଷିକ୍ତ ଖ୍ରୀଷ୍ଟିୟାନମାନଙ୍କୁ ଲେଖିଥିଲେ ଯେଉଁମାନଙ୍କୁ ସ୍ୱର୍ଗରେ ବଞ୍ଚିବାର ଆଶା ଥିଲା । କିନ୍ତୁ ଯେଉଁ ଖ୍ରୀଷ୍ଟିୟାନମାନଙ୍କୁ ଏହି ପୃଥିବୀରେ ବଞ୍ଚିବାର ଆଶା ଅଛି, ସେମାନଙ୍କ ପାଇଁ ମଧ୍ୟ ସେମାନଙ୍କ ଆଶା ଲଙ୍ଗର ଭଳି ଅଟେ । (ଯୋହ. ୩:୧୬) ଏହି ଆଶା ଯୋଗୁଁ ଆମକୁ ବଞ୍ଚିବାର ଉଦ୍ଦେଶ୍ୟ ମିଳିଯାଇଛି ।

୬-୭. ସତ୍ୟ ଜାଣି ଭଉଣୀ ଇୱାନକୁ କʼଣ ଲାଭ ହେଲା ?

^୬ ଇୱାନ ନାମକ ଜଣେ ଭଉଣୀଙ୍କ ଅନୁଭବ ଉପରେ ଧ୍ୟାନ ଦିଅନ୍ତୁ । ତାʼ ବାପାମାଆ ଯିହୋବାଙ୍କ ସାକ୍ଷୀ ନ ଥିଲେ । ଯେବେ ସେ ଛୋଟ ଥିଲା, ତେବେ ସେ ମୃତ୍ୟୁକୁ ବହୁତ ଡରୁଥିଲା । ଥରେ ସେ ଗୋଟିଏ ବହିରେ ପଢ଼ିଲା, ‘ଦିନେ ସବୁକିଛି ଶେଷ ହୋଇଯିବ ।’ ଏହି କଥାକୁ ସେ ନିଜ ମୁଣ୍ଡରୁ ବାହାର ହିଁ କରିପାରୁ ନ ଥିଲା । ସେ କହେ, ‘ରାତି ସାରା ମୁଁ ଏ ବିଷୟରେ ଚିନ୍ତା କରୁଥିଲି ଯେ କାଲି କʼଣ ହେବ । ଆଉ ମୁଁ ଭଲରେ ଶୋଇପାରୁ ନ ଥିଲି । ମୁଁ ଭାବୁଥିଲି, “ଜୀବନ ଏତେ ଛୋଟ ହୋଇପାରିବନି । ଆମକୁ କାହିଁକି ସୃଷ୍ଟି କରାଯାଇଛି ?” ମୁଁ ମରିବା ପାଇଁ ଚାହୁଁ ନ ଥିଲି ।’

^୭ ଯେବେ ଇୱାନ ୧୮-୧୯ ବର୍ଷର ଥିଲା, ତେବେ ସେ ପ୍ରଥମ ଥର ଯିହୋବାଙ୍କ ସାକ୍ଷୀଙ୍କୁ ଭେଟିଲା । ବାଇବଲରୁ ସେ ଜାଣିଲା ଯେ ଦିନେ ଏହି ପୃଥିବୀ ବହୁତ ସୁନ୍ଦର ହୋଇଯିବ । ଆଉ ସେ ସେଠି ସବୁଦିନ ଯାଏ ବଞ୍ଚିପାରିବ । ଧିରେ ଧିରେ ଏହି କଥା ଉପରେ ତାʼର ଭରସା ବଢ଼ିବାକୁ ଲାଗିଲା । ସତ୍ୟ ଜାଣି ତାକୁ କʼଣ ଲାଭ ହେଲା ? ସେ କହେ, ‘ଏବେ ମୁଁ ରାତିରେ ଶାନ୍ତିରେ ଶୋଇପାରେ । ମୋତେ ମୃତ୍ୟୁକୁ ଡର ଲାଗେ ନାହିଁ ଆଉ ମୁଁ ଏବିଷୟରେ ଚିନ୍ତା କରେ ନାହିଁ ଯେ କାଲି କʼଣ ହେବ ।’ ସତ୍ୟ ଜାଣି ଇୱାନର ଜୀବନ ବଦଳିଗଲା । ସତ୍ୟ ତାʼ ପାଇଁ ବହୁମୂଲ୍ୟ ଅଟେ । ଆଉ ସେ ଅନ୍ୟମାନଙ୍କୁ ବି ଏହି ଆଶା ବିଷୟରେ କହେ ଯେ ଆଗକୁ ଯାଇ ସମସ୍ତେ ଭଲ ଜୀବନ ଜୀଇଁପାରିବା । ଆଉ ଏପରି କରି ତାକୁ ବହୁତ ଖୁସି ମିଳେ ।— ୧ ତୀମ. ୪:୧୬.

୮-୯. (କ) ଯୀଶୁଙ୍କ ଉଦାହରଣରେ କୁହାଯାଇଥିବା ଲୋକ ପାଇଁ ସେହି ଗୁପ୍ତ ଧନ କେତେ ମହତ୍ତ୍ୱ ରଖୁଥିଲା ? (ଖ) ଆପଣଙ୍କ ପାଇଁ ସତ୍ୟ କେତେ ମହତ୍ତ୍ୱ ରଖେ ?

^୮ ବାଇବଲରେ ଈଶ୍ୱରଙ୍କ ରାଜ୍ୟ ବିଷୟରେ ଖୁସିର ଖବର ମଧ୍ୟ ଦିଆଯାଇଛି । ଯୀଶୁ କହିଲେ ଯେ ଏହି ସତ୍ୟ ଜମିରେ ପୋତା ଯାଇଥିବା ଗୁପ୍ତ ଧନ ଭଳି ଅଟେ । ସେ କହିଲେ, “ସ୍ୱର୍ଗ ରାଜ୍ୟ କ୍ଷେତ୍ରରେ ଗୁପ୍ତ ହୋଇଥିବା ଧନ ସଦୃଶ । ଜଣେ ଲୋକ ତାହା ଦେଖି ଗୋପନ କରି ରଖିଲା ଓ ଆନନ୍ଦରେ ଯାଇ ଆପଣାର ସର୍ବସ୍ୱ ବିକ୍ରୟ କରି ସେହି କ୍ଷେତ୍ରକୁ କ୍ରୟ କଲା ।” (ମାଥି. ୧୩:୪୪) ସେହି ଲୋକ ସେହି ଗୁପ୍ତ ଧନ ଖୋଜୁ ନ ଥିଲା । କିନ୍ତୁ ଯେବେ ତାକୁ ତାହା ମିଳିଲା, ତେବେ ସେ କʼଣ କଲା ? ସେ ଜାଣିଥିଲା ଯେ ସେହି ଗୁପ୍ତ ଧନ କେତେ ମୂଲ୍ୟବାନ ଅଟେ । ତେଣୁ ତାକୁ ପାଇବା ପାଇଁ ସେ ନିଜ ସବୁକିଛି ଛାଡ଼ିବା ପାଇଁ ପ୍ରସ୍ତୁତ ଥିଲା । ସେ ସେହି ଜମି କିଣିବା ପାଇଁ ନିଜ ସବୁକିଛି ବିକି ଦେଲା ।

^୯ କʼଣ ସତ୍ୟ ଆପଣଙ୍କ ପାଇଁ ବି ଏତେ ମହତ୍ତ୍ୱ ରଖେ ? ନିଶ୍ଚୟ ରଖୁଥିବ । ଆଜି ଆମକୁ ଯିହୋବାଙ୍କ ସେବା କରିବାରୁ ବହୁତ ଖୁସି ମିଳେ ଓ ଈଶ୍ୱରଙ୍କ ରାଜ୍ୟରେ ଆମକୁ ସବୁଦିନ ବଞ୍ଚିବାର ଆଶା ଅଛି । ଦୁନିଆର ବଡ଼ରୁ ବଡ଼ ଜିନିଷ ମଧ୍ୟ ଏହି ଆଶିଷଗୁଡ଼ିକ ଆଗରେ କିଛି ବି ନୁହେଁ । ଏହା ଆମ ପାଇଁ ବହୁତ ବଡ଼ କଥା ଅଟେ ଯେ ଆମେ ଯିହୋବାଙ୍କ ନିକଟକୁ ଆସିପାରିଛୁ, ତାଙ୍କ ସହିତ ଗୋଟିଏ ସମ୍ପର୍କ ଗଢ଼ିପାରିଛୁ । ଆଉ ଏହାକୁ ବଜାୟ ରଖିବା ପାଇଁ ଆମେ ନିଜ ସବୁକିଛି ଛାଡ଼ିବା ପାଇଁ ପ୍ରସ୍ତୁତ ରହୁ । ଯେତେ ଖୁସି ଆମକୁ ‘ଯିହୋବାଙ୍କୁ ସନ୍ତୁଷ୍ଟ କରିବାରୁ’ ମିଳେ, ସେତେ ଖୁସି ଆମକୁ ଅନ୍ୟ କୌଣସି ଜିନିଷରୁ ମିଳେନାହିଁ ।—କଲ. ୧:୧୦.

୧୦-୧୧. ମାଇକେଲ କାହିଁକି ଗୋଟିଏ ବହୁତ ବଡ଼ ପରିବର୍ତ୍ତନ କରିପାରିଲା ?

^୧୦ ଆମ ମଧ୍ୟରୁ ଅନେକ ଲୋକ ଯିହୋବାଙ୍କ ହୃଦୟକୁ ଖୁସି କରିବା ପାଇଁ ବହୁତ କିଛି ଛାଡ଼ିଛନ୍ତି । ହୁଏତ ଆମର ଦୁନିଆରେ ଏକ ଭଲ ନାମ ଥିଲା, ଭଲ କ୍ୟାରିଅର ଥିଲା କିମ୍ବା ଆମେ ବହୁତ ପଇସା ରୋଜଗାର କରୁଥିଲୁ । କିନ୍ତୁ ଯେବେ ଆମେ ଯିହୋବାଙ୍କ ବିଷୟରେ ଜାଣିଲୁ, ତେବେ ଆମେ ସବୁକିଛି ଛାଡ଼ିଦେଲୁ । କିଛି ଲୋକ ନିଜ ଜୀବନ ବିତାଇବାର ଶୈଳୀ ମଧ୍ୟ ବଦଳାଇ ଦେଲେ । ମାଇକେଲ ମଧ୍ୟ ଏପରି ହିଁ କଲା । ସେ ଆରମ୍ଭରେ ସତ୍ୟ ଜାଣି ନ ଥିଲା । ଯେବେ ସେ ଯୁବା ଥିଲା ତେବେ ସେ କରାଟେର ଟ୍ରେନିଙ୍ଗ୍‌ ନେଲା । ସେ କହେ, “ମୁଁ ନିଜକୁ ଫିଟ୍‌ ରଖିବା ପାଇଁ ଦିନରାତି ବ୍ୟାୟାମ କରୁଥିଲି । ଅନେକ ଥର ମୋତେ ଲାଗୁଥିଲା ଯେ କେହି ମୋତେ ହରାଇ ପାରିବେନି ।” ତାʼପରେ ସେ ଯିହୋବାଙ୍କ ସାକ୍ଷୀମାନଙ୍କ ସହିତ ଅଧ୍ୟୟନ କରିବାକୁ ଲାଗିଲା ଆଉ ସେ ଜାଣିଲା ଯେ ଯିହୋବା ହିଂସାକୁ କେତେ ଘୃଣା କରନ୍ତି । (ଗୀତ. ୧୧:୫) କିନ୍ତୁ ମାଇକେଲ କହେ, ‘ଯେଉଁ ସ୍ୱାମୀ ସ୍ତ୍ରୀ ମୋର ଅଧ୍ୟୟନ କରୁଥିଲେ, ସେମାନେ ମୋତେ କେବେ କହିଲେନି ଯେ ମୋତେ କରାଟେ ଛାଡ଼ି ଦେବା ଉଚିତ୍‌ । ବରଂ ସେମାନେ କେବଳ ମୋତେ ବାଇବଲର ସତ୍ୟଗୁଡ଼ିକୁ ଶିଖାଇବା ଜାରି ରଖିଲେ ।’

^୧୧ ମାଇକେଲ ଯିହୋବାଙ୍କ ବିଷୟରେ ଶିଖିବା ଜାରି ରଖିଲା ଓ ଯିହୋବାଙ୍କୁ ଆହୁରି ପ୍ରେମ କରିବାକୁ ଲାଗିଲା । ଯେବେ ସେ ଜାଣିଲା ଯେ ଯିହୋବା ନିଜ ଲୋକମାନଙ୍କୁ କେତେ ପ୍ରେମ କରନ୍ତି ଏବଂ ସେ ତାଙ୍କର କେତେ ଚିନ୍ତା କରନ୍ତି, ତେବେ ଏହି କଥା ତାʼ ହୃଦୟକୁ ଛୁଇଁଗଲା । କିଛି ସମୟ ପରେ ସେ ବୁଝିଗଲା ଯେ ତାକୁ କରାଟେ ଛାଡ଼ିବାକୁ ପଡ଼ିବ । କିନ୍ତୁ ଏଥିରୁ ତାʼ ଜୀବନ ପୂରା ବଦଳିଯାʼନ୍ତା । ସେ କହେ, “ଏହା ମୋ ଜୀବନର ସବୁଠୁ କଠିନ ନିଷ୍ପତ୍ତି ଥିଲା । କିନ୍ତୁ ମୁଁ ଜାଣୁଥିଲି ଯେ ଏଥିରୁ ଯିହୋବା ଖୁସି ହେବେ । ତାଙ୍କୁ ଖୁସି କରିବା ପାଇଁ ଏବଂ ତାଙ୍କ ସେବା କରିବା ପାଇଁ ମୁଁ କିଛି ବି ଛାଡ଼ିବା ପାଇଁ ପ୍ରସ୍ତୁତ ଥିଲି ।” ମାଇକେଲ ବୁଝିଯାଇଥିଲା ଯେ ସତ୍ୟ ବହୁତ ମୂଲ୍ୟବାନ ଅଟେ । ଏହି କାରଣରୁ ସେ ଏତେ ବଡ଼ ପରିବର୍ତ୍ତନ କରିପାରିଲା ।—ଯାକୁ. ୧:୨୫

୧୨-୧୩. ବାଇବଲର ସତ୍ୟଗୁଡ଼ିକ କିପରି ମାଇଲିର ଜୀବନରେ ଆଲୁଅ ଭଳି କାମ କଲା ?

^୧୨ ବାଇବଲରେ ଏହା ବି କୁହାଯାଇଛି ଯେ ସତ୍ୟ ଆଲୁଅ ଭଳି ଅଟେ ଯାହା ଅନ୍ଧାରରେ ଆମକୁ ଠିକ୍‌ ରାସ୍ତା ଦେଖାଏ । (ଗୀତ. ୧୧୯:୧୦୫; ଏଫି. ୫:୮) ଯେବେ ମାଇଲି, ଯିଏ ଅଜରବାଇଜାନ୍‌ରେ ରହେ, ବାଇବଲରୁ ସତ୍ୟ ଜାଣିଲା, ତେବେ ତାକୁ ବି ଲାଗିଲା ଯେ ତାକୁ ଅନ୍ଧକାର ଦୁନିଆରେ ଆଲୁଅ ମିଳିଯାଇଛି । ମାଇଲିର ବାପା ମୁସଲିମ୍‌ ଥିଲେ ଓ ମାଆ ଯିହୁଦୀ । ସେ କହେ, “ମୋ ମନରେ କେବେ ବି ଏହି ପ୍ରଶ୍ନ ତ ଆସି ନ ଥିଲା ଯେ ଈଶ୍ୱର ଅଛନ୍ତି ନା ନାହିଁ, କିନ୍ତୁ ମୋ ମନରେ ଅନ୍ୟ ପ୍ରଶ୍ନଗୁଡ଼ିକ ଆସୁଥିଲା । ମୁଁ ଭାବୁଥିଲି ଯେ ଈଶ୍ୱର ମଣିଷମାନଙ୍କୁ କାହିଁକି ସୃଷ୍ଟି କରିଛନ୍ତି । କʼଣ ସେ ଏହା ଚାହାନ୍ତି ଯେ ସେମାନେ ଜୀବନସାରା ଦୁଃଖ କଷ୍ଟ ଭୋଗନ୍ତୁ ଓ ମରିବା ପରେ ନର୍କରେ ଯାଇ ଯନ୍ତ୍ରଣା ଭୋଗନ୍ତୁ । ଲୋକେ କହନ୍ତି ଯେ ସବୁକିଛି ଈଶ୍ୱରଙ୍କ ଇଚ୍ଛାରେ ହିଁ ହୁଏ । ସେଥିପାଇଁ ମୁଁ ଭାବୁଥିଲି, ‘କʼଣ ଈଶ୍ୱର ମଣିଷମାନଙ୍କୁ ନିଜ ଇସାରାରେ ନଚାନ୍ତି ଆଉ ତାଙ୍କ ଉପରେ ଯାହା ଘଟେ ତାକୁ ଦେଖି ସେ ମଜା ନିଅନ୍ତି ?’”

^୧୩ ମାଇଲି ନିଜ ପ୍ରଶ୍ନଗୁଡ଼ିକର ଉତ୍ତର ଖୋଜିବା ଜାରି ରଖିଲା । ତାʼପରେ ସେ ବାଇବଲ ଅଧ୍ୟୟନ କରିବାକୁ ଲାଗିଲା ଆଉ ଯିହୋବାଙ୍କ ସାକ୍ଷୀ ହୋଇଗଲା । ସେ କହେ, ‘ମୁଁ ବାଇବଲରେ ଯାହା ବି ପଢ଼ୁଥିଲି, ତାହା ବିଲକୁଲ୍‌ ଠିକ୍‌ ଲାଗୁଥିଲା । ମତେ ନିଜ ସବୁ ପ୍ରଶ୍ନଗୁଡ଼ିକର ଉତ୍ତର ମିଳିବାକୁ ଲାଗିଲା, ଏବେ ମୋ ମନରେ କୌଣସି ସନ୍ଦେହ ନାହିଁ । ମୋତେ ବହୁତ ଶାନ୍ତି ମିଳିଲା ଆଉ ମୁଁ ଖୁସିରେ ରହିବାକୁ ଲାଗିଲି ।’ ମାଇଲି ଭଳି ଆମେ ବି ବହୁତ ଖୁସି ଯେ ଯିହୋବା ଆମକୁ “ଅନ୍ଧକାରରୁ ଆପଣା ଆଶ୍ଚର୍ଯ୍ୟ ଆଲୋକ ମଧ୍ୟକୁ ଆହ୍ୱାନ କରିଅଛନ୍ତି ।”—୧ ପିତ. ୨:୯.

୧୪. ଆମେ ବାଇବଲର ସତ୍ୟଗୁଡ଼ିକ ପାଇଁ ନିଜ ପ୍ରେମ କିପରି ବଢ଼ାଇ ପାରିବା ? (“ବାଇବଲର ସତ୍ୟଗୁଡ଼ିକ ଆଉ କାହା ଭଳି ଅଟେ ?” ନାମକ ବକ୍ସ ଦେଖନ୍ତୁ ।)

^୧୪ ବାଇବଲର ସତ୍ୟଗୁଡ଼ିକ ବହୁତ ବହୁମୂଲ୍ୟ ଅଟେ ଓ ଏଥିରୁ ଆମକୁ ବହୁତ ଲାଭ ହୁଏ । ଯେପରି ଆମେ ଦେଖିଲୁ, ଏହା ଗୋଟିଏ ଲଙ୍ଗର, ଗୁପ୍ତ ଧନ ଆଉ ଆଲୁଅ ଭଳି ଅଟେ । ବାଇବଲରେ ସତ୍ୟର ତୁଳନା ଆହୁରି ଅନେକ ଜିନିଷ ସହ କରାଯାଇଛି । ତାହେଲେ କʼଣ ଆପଣ ନିଜ ପରବର୍ତ୍ତୀ ବ୍ୟକ୍ତିଗତ ଅଧ୍ୟୟନରେ ଏବିଷୟରେ ଟିକେ ଅନୁସନ୍ଧାନ କରିପାରିବେ ଓ ଭାବିପାରିବେ ଯେ ଆପଣ ଆଉ କେଉଁ କାରଣରୁ ସତ୍ୟକୁ ପ୍ରେମ କରନ୍ତି ? ଏପରି ଭାବେ ବାଇବଲର ସତ୍ୟଗୁଡ଼ିକ ପାଇଁ ଆପଣଙ୍କ ପ୍ରେମ ଆହୁରି ବଢ଼ିଯିବ । ଆଉ ଯେବେ ଆମର ପ୍ରେମ ବଢ଼ିବ, ତେବେ ଆମେ କʼଣ କରିବା ?

ଯଦି ଆପଣ ସତ୍ୟକୁ ପ୍ରେମ କରନ୍ତି, ତେବେ ଆପଣ କʼଣ କରିବେ ?

୧୫. ଯଦି ଆପଣ ସତ୍ୟକୁ ପ୍ରେମ କରନ୍ତି, ତେବେ ଆପଣ କʼଣ କରିପାରିବେ ?

^୧୫ ଯଦି ଆମେ ସତ୍ୟକୁ ପ୍ରେମ କରୁ, ତେବେ ଆମେ ଲଗାତାର ବାଇବଲ ଓ ବାଇବଲ ଆଧାରିତ ବହି ଓ ପତ୍ରିକାଗୁଡ଼ିକୁ ଅଧ୍ୟୟନ କରିବା । ଆମକୁ ସତ୍ୟରେ ଆସିବାର ଯେତେ ବି ବର୍ଷ ହେଉ ନା କାହିଁକି, ଆମେ ଲଗାତାର ଅଧ୍ୟୟନ କଲେ ସବୁବେଳେ ନୂଆ ନୂଆ କଥା ଶିଖିପାରିବା । ପ୍ରହରୀଦୁର୍ଗର ସବୁଠୁ ପ୍ରଥମ ସଂଖ୍ୟାରେ କୁହାଯାଇଥିଲା, ‘ଦୁନିଆ ଏକ ଜଙ୍ଗଲ ଭଳି ଅଟେ ଯେଉଁଠି ମିଛ ଜଙ୍ଗଲୀ ବୁଦାଗୁଡ଼ିକ ଭଳି ସବୁଆଡ଼େ ଭରି ରହିଛି । କିନ୍ତୁ ସତ୍ୟ ଗୋଟିଏ ଛୋଟ ଫୁଲ ଭଳି ଅଟେ, ଯାହା ଏହି ଜଙ୍ଗଲୀ ବୁଦାଗୁଡ଼ିକ ମଝିରେ ଲୁଚି ରହିଛି । ସବୁଠୁ ପ୍ରଥମେ ତ ଆପଣଙ୍କୁ ତାକୁ ଧ୍ୟାନର ସହିତ ଖୋଜିବାକୁ ହେବ ଆଉ ଯେବେ ତାହା ମିଳିଯାଏ, ତେବେ ଆପଣଙ୍କୁ ତଳକୁ ନଇଁ ତାକୁ ବାହାର କରିବାକୁ ପଡ଼ିବ । କିନ୍ତୁ ସତ୍ୟର କେବଳ ଗୋଟିଏ ଫୁଲରୁ ହିଁ ସନ୍ତୁଷ୍ଟ ହୋଇଯାʼନ୍ତୁ ନାହିଁ । ଆହୁରି ବି ଫୁଲ ଖୋଜିବା ଜାରି ରଖନ୍ତୁ, ତାକୁ ଏକାଠି କରିବା ଜାରି ରଖନ୍ତୁ ।’ ଯଦି ଆପଣ ମନ ଦେଇ ଅଧ୍ୟୟନ କରିବେ, ତାʼ ହେଲେ ଆପଣଙ୍କୁ ନିଶ୍ଚୟ ନିଜ ପରିଶ୍ରମର ଫଳ ମିଳିବ ।

୧୬. ଆପଣଙ୍କୁ ଅଧ୍ୟୟନ କରିବାର କେଉଁ ଉପାୟ ପସନ୍ଦ ? (ହିତୋପଦେଶ ୨:୪-୬)

^୧୬ ହୁଏତ ଆମ ମଧ୍ୟରୁ ସମସ୍ତଙ୍କୁ ପଢ଼ିବା ଓ ଅଧ୍ୟୟନ କରିବା ପସନ୍ଦ ଲାଗେ ନାହିଁ । କିନ୍ତୁ ଯିହୋବା ଚାହାନ୍ତି ଯେ ଆମେ ବାଇବଲର ସତ୍ୟଗୁଡ଼ିକୁ ଆହୁରି ଭଲଭାବେ ବୁଝିବା ପାଇଁ ଲଗାତାର ‘ଖୋଜୁ’ ଓ ସେଗୁଡ଼ିକୁ “ଅନ୍ୱେଷଣ” କରୁ । (ହିତୋପଦେଶ ୨:୪-୬ ପଢ଼ନ୍ତୁ ।) ଏପରି କଲେ ଆମକୁ ବହୁତ ଲାଭ ହେବ । କୋରି ନାମକ ଜଣେ ଭାଇ କହେ ଯେ ସେ ବାଇବଲ ପଢ଼ିବା ସମୟରେ ଗୋଟିଏ ଗୋଟିଏ କରି ପ୍ରତ୍ୟେକ ପଦକୁ ବୁଝିବା ପାଇଁ ଚେଷ୍ଟା କରେ । ସେ କହେ, ‘ପ୍ରଥମେ ମୁଁ ପଦର ପ୍ରତ୍ୟେକ ଫୁଟନୋଟ୍‌କୁ ପଢ଼େ । ତାʼପରେ ତାʼ ସହିତ ଜଡ଼ିତ ଅନ୍ୟ ପଦଗୁଡ଼ିକୁ ଦେଖେ ଆଉ ଯଦି ସେହି ପଦ ବିଷୟରେ କୌଣସି ପ୍ରକାଶନରେ ଦିଆଯାଇଛି, ତେବେ ସେଗୁଡ଼ିକୁ ବି ପଢ଼େ । ଏପରି ଭାବେ ମୁଁ ବହୁତଗୁଡ଼ିଏ ନୂଆ ନୂଆ କଥା ଶିଖିପାରେ !’ ଆମେ ଯେ କୌଣସି ଉପାୟରେ ବି ଅଧ୍ୟୟନ କରୁ ନା କାହିଁକି, ଯେବେ ଆମେ ଅଧ୍ୟୟନ କରିବା ପାଇଁ ସମୟ ବାହାର କରୁ ଓ ପରିଶ୍ରମ କରୁ, ତେବେ ଏଥିରୁ ଜଣାପଡ଼େ ଯେ ଆମେ ସତ୍ୟକୁ କେତେ ପ୍ରେମ କରୁ ।—ଗୀତ. ୧:୧-୩.

୧୭. ସତ୍ୟ ଅନୁସାରେ ଜୀଇଁବାର ଅର୍ଥ କʼଣ ? (ଯାକୁବ ୧:୨୫) 

^୧୭ ବାଇବଲର ସତ୍ୟଗୁଡ଼ିକର ଅଧ୍ୟୟନ କରିବା ଜରୁରୀ ଅଟେ । କିନ୍ତୁ କେବଳ ଏତିକି କରିବା ଯଥେଷ୍ଟ ନୁହେଁ, ଆମକୁ ଆହୁରି କିଛି କରିବାକୁ ହେବ । ଆମକୁ ସତ୍ୟ ମୁତାବକ ଜୀଇଁବାକୁ ହେବ । ଏହାର ଅର୍ଥ ଯେଉଁ ସତ୍ୟଗୁଡ଼ିକ ଆମେ ଶିଖିଛୁ, ତାହା ମାନିବାକୁ ହେବ, ତାହେଲେ ଆମେ ପ୍ରକୃତରେ ଖୁସିରେ ରହିପାରିବା । (ଯାକୁବ ୧:୨୫ ପଢ଼ନ୍ତୁ ।) କିନ୍ତୁ କିପରି ଜାଣିପାରିବା ଯେ ଆମେ ସତ୍ୟ ମୁତାବକ ଜୀଉଁଛୁ ନା ନାହିଁ ? ଜଣେ ଭାଇ କହନ୍ତି ଯେ ଆମେ ଭାବିପାରିବା ଯେ ଆମେ କେଉଁ ମାମଲାଗୁଡ଼ିକରେ ସତ୍ୟ ମୁତାବକ ଚାଲୁଛୁ ଓ କେଉଁ ମାମଲାଗୁଡ଼ିକରେ ଆମକୁ ସୁଧାର କରିବାର ଆବଶ୍ୟକତା ଅଛି । ପ୍ରେରିତ ପାଉଲ ମଧ୍ୟ ଏପରି ହିଁ କିଛି କରିବାକୁ କହିଥିଲେ । ସେ କହିଲେ, “ଆମ୍ଭେମାନେ ଯିଏ ଯେତେ ପର୍ଯ୍ୟନ୍ତ ଅଗ୍ରସର ହୋଇଅଛୁ, ସେହି ଅନୁସାରେ ଆଚରଣ କରୁ ।”—ଫିଲିପ୍‌. ୩:୧୬.

୧୮. ଆମକୁ କାହିଁକି ସତ୍ୟର ରାସ୍ତାରେ ଚାଲିବା ପାଇଁ ପୂରା ଚେଷ୍ଟା କରିବା ଉଚିତ୍‌ ?

^୧୮ ଟିକିଏ ଭାବନ୍ତୁ, ଯେବେ ଆମେ ‘ସତ୍ୟରେ ଆଚରଣ କରୁ’ ଅର୍ଥାତ୍‌ ସତ୍ୟର ରାସ୍ତାରେ ଚାଲିବା ପାଇଁ ପୂରା ଚେଷ୍ଟା କରୁ, ତେବେ ଆମକୁ କେତେ ଲାଭ ହୁଏ ! ଆମେ ଏକ ଭଲ ଜୀବନ ଜୀଇଁପାରୁ, ଯିହୋବାଙ୍କ ହୃଦୟ ଖୁସି କରିପାରୁ ଆଉ ଏଥିରୁ ଭାଇଭଉଣୀଙ୍କୁ ବି ଖୁସି ମିଳେ । (ହିତୋ. ୨୭:୧୧; ୩ ଯୋହ. ୪) ତେବେ ଆସନ୍ତୁ ଆମେ ସମସ୍ତେ ସତ୍ୟକୁ ପ୍ରେମ କରିବା ଆଉ ତାʼ ମୁତାବକ ଜୀଇଁବା !