ଆପଣ କୌଣସି ଯିହୋବାଙ୍କ ସାକ୍ଷୀଙ୍କୁ ଜାଣିଛନ୍ତି କି ? ଆମ ମଧ୍ୟରୁ ହୁଏତ କେହି ଆପଣଙ୍କ ପଡ଼ୋଶୀ ହୋଇଥିବେ, ସାଙ୍ଗରେ କାମ କରୁଥିବେ, କିମ୍ବା ସ୍କୁଲ କଲେଜରେ ପଢ଼ୁଥିବେ । ହୁଏତ କେହି ଆପଣଙ୍କ ସହିତ ବାଇବଲରୁ ଚର୍ଚ୍ଚା କରିଥିବେ । ବୋଧ ହୁଏ, ଆପଣ ଜାଣିବାକୁ ଚାହିଁବେ ଯେ ଆମେ ପ୍ରକୃତରେ କିଏ ଏବଂ ଆମେ କାହିଁକି ଅନ୍ୟମାନଙ୍କୁ ନିଜ ବିଶ୍ୱାସ ବିଷୟରେ କହିଥାଉ ?

ଆମେ ଆପଣଙ୍କ ପରି ସାଧାରଣ ଲୋକ ଅଟୁ । ଆମେ ସମାଜର ବିଭିନ୍ନ ସମ୍ପ୍ରଦାୟରୁ ଆସିଛୁ ଏବଂ ଅଲଗା ଅଲଗା ପରିବେଶରେ ବଢ଼ି ଆସିଛୁ । ଆମ ମଧ୍ୟରୁ କେତେକ ପୂର୍ବେ ଅନ୍ୟ ଧର୍ମକୁ ମାନୁଥିଲେ ଏବଂ କେତେକ ଈଶ୍ୱରଙ୍କୁ ବିଶ୍ୱାସ ମଧ୍ୟ କରୁ ନ ଥିଲେ । କିନ୍ତୁ ଆମ ମଧ୍ୟରୁ ପ୍ରତ୍ୟେକେ ବାଇବଲର ଶିକ୍ଷାଗୁଡ଼ିକୁ ଗଭୀର ଭାବେ ଅଧ୍ୟୟନ କଲୁ । (ପ୍ରେରିତ ୧୭:୧୧) ଯେତେବେଳେ ଆମକୁ ବିଶ୍ୱାସ ହେଲା ଯେ ଆମେ ଯାହା ଶିଖୁଛୁ ତାହା ହିଁ ସତ୍ୟ ଅଟେ, ସେତେବେଳେ ଆମେ ନିଜେ ଯିହୋବାଙ୍କ ଉପାସନା କରିବା ପାଇଁ ନିଷ୍ପତ୍ତି ନେଲୁ ।

ଆମକୁ ବାଇବଲ ଅଧ୍ୟୟନରୁ ଲାଭ ମିଳେ । ଅନ୍ୟମାନଙ୍କ ପରି ଆମକୁ ମଧ୍ୟ ସମସ୍ୟାଗୁଡ଼ିକର ସାମନା କରିବାକୁ ପଡ଼େ ଏବଂ ଆମ ଦୁର୍ବଳତା ସହିତ ଲଢ଼ିବାକୁ ହୁଏ । କିନ୍ତୁ ଆମେ ଦେଖିଛୁ ଯେ ପ୍ରତିଦିନ ବାଇବଲର ସିଦ୍ଧାନ୍ତଗୁଡ଼ିକୁ ଲାଗୁ କରିବା ଦ୍ୱାରା ଆମ ଜୀବନରେ ବହୁତ ପରିବର୍ତ୍ତନ ଆସିଛି । (ଗୀତସଂହିତା ୧୨୮:୧, ୨) ଆମେ ବାଇବଲର ଭଲ କଥାସବୁ ଅନ୍ୟମାନଙ୍କୁ କହିବାର କାରଣଗୁଡ଼ିକ ମଧ୍ୟରୁ ଏହା ଗୋଟିଏ କାରଣ ଅଟେ ।

ଆମେ ଈଶ୍ୱରଙ୍କ ସ୍ତର ଅନୁସାରେ ଚାଲୁ । ବାଇବଲରେ ଥିବା ସ୍ତର ଅନୁସାରେ ଚାଲିବା ଦ୍ୱାରା ଆମ ଶରୀର ଏବଂ ମନ ସୁସ୍ଥ ରହେ । ଏହି ସ୍ତର ଆମକୁ ଅନ୍ୟମାନଙ୍କୁ ସମ୍ମାନ ଦେବା ଏବଂ ସଚ୍ଚୋଟତା ଓ ଦୟା ଭଳି ଗୁଣ ବଢ଼ାଇବା ପାଇଁ ସାହାଯ୍ୟ କରେ । ଏହି ସ୍ତର ସାହାଯ୍ୟରେ ଆମେ ଭଲ ମଣିଷ ହୋଇପାରୁ, ଯାହାଦ୍ୱାରା ସମାଜର ଲାଭ ହୁଏ । ତାʼ ସହିତ, ଏହା ପରିବାରଗୁଡ଼ିକୁ ଭାଙ୍ଗିବାଠାରୁ ରକ୍ଷା କରେ ଏବଂ ଶୁଦ୍ଧ ଚାଲିଚଳନ ଶିଖାଏ । ଆମେ ସାରା ଦୁନିଆରେ ଭାଇ ଭାଇ ପରି ଏକତାରେ ରହୁ । ଆମ ଧାର୍ମିକ ବିଶ୍ୱାସ ସମାନ ଅଟେ ଏବଂ ଆମେ ଦେଶ ଏବଂ ଜାତି ନାମରେ ଭାଗ ଭାଗ ହୋଇ ନ ଥାଉ । କାରଣ ‘ଈଶ୍ୱର ଭେଦଭାବ କରନ୍ତି ନାହିଁ’ ବୋଲି ଆମେ ମାନିଥାଉ । ଆମେ ସାଧାରଣ ଲୋକ ହୋଇଥିଲେ ମଧ୍ୟ ଏକ ସମୂହ ଭାବରେ ଅନ୍ୟମାନଙ୍କଠାରୁ ସମ୍ପୂର୍ଣ୍ଣ ଅଲଗା ଅଟୁ ।—ପ୍ରେରିତ ୪:୧୩; ୧୦:୩୪, ୩୫.

• ଯିହୋବାଙ୍କ ସାକ୍ଷୀମାନଙ୍କ ଏବଂ ଅନ୍ୟ ଲୋକମାନଙ୍କ ମଧ୍ୟରେ କʼଣ ସମାନତା ରହିଛି ?

• ବାଇବଲର ଅଧ୍ୟୟନରୁ ଯିହୋବାଙ୍କ ସାକ୍ଷୀମାନେ କେଉଁ ସ୍ତରଗୁଡ଼ିକୁ ମାନିବା ଶିଖିଛନ୍ତି ?

ଅନେକ ଲୋକ ଭାବନ୍ତି ଯେ ଯିହୋବାଙ୍କ ସାକ୍ଷୀ ଏକ ନୂଆ ଧର୍ମ ଅଟେ । କିନ୍ତୁ ବାଇବଲରୁ ଜଣାପଡ଼େ ଯେ ଆଜିଠାରୁ ପ୍ରାୟ ୨,୭୦୦ ବର୍ଷ ପୂର୍ବେ ଏକମାତ୍ର ସତ୍ୟ ଈଶ୍ୱରଙ୍କ ଉପାସକମାନଙ୍କୁ “ସାକ୍ଷୀ” ବୋଲି କୁହାଯାଇଥିଲା । (ଯିଶାଇୟ ୪୩:୧୦-୧୨) ଆମେ ୧୯୩୧ ମସିହାରେ ଯିହୋବାଙ୍କ ସାକ୍ଷୀ ନାମ ଧାରଣ କଲୁ । ଏହା ପୂର୍ବରୁ ଆମେ ବାଇବଲ ବିଦ୍ୟାର୍ଥୀ ନାମରେ ପରିଚିତ ଥିଲୁ । ଯିହୋବାଙ୍କ ସାକ୍ଷୀ ନାମ ଆମେ କାହିଁକି ଧାରଣ କଲୁ ?

ଏହି ନାମରୁ ଜଣାପଡ଼େ ଯେ ଆମେ କେଉଁ ଈଶ୍ୱରଙ୍କୁ ଉପାସନା କରୁ । ପ୍ରାଚୀନ ହସ୍ତଲିପିଗୁଡ଼ିକ ଅନୁସାରେ ଈଶ୍ୱରଙ୍କ ନାମ ଯିହୋବା ବାଇବଲରେ ପ୍ରାୟ ୭,୦୦୦ ଥର ଆସେ । କିନ୍ତୁ ବାଇବଲର ଅନେକ ଅନୁବାଦରେ ଏହି ନାମ ପରିବର୍ତ୍ତେ ସଦାପ୍ରଭୁ କିମ୍ବା ଈଶ୍ୱର ଭଳି ଉପାଧିଗୁଡ଼ିକ ବ୍ୟବହାର କରାଯାଇଛି । କିନ୍ତୁ ପ୍ରାଚୀନ ସମୟରେ ଯେତେବେଳେ ସତ୍ୟ ଈଶ୍ୱର ନିଜ ନାମ ଯିହୋବା ବୋଲି ମୋଶାଙ୍କୁ ପରିଚୟ ଦେଲେ, ସେ କହିଲେ: “ଆମ୍ଭର ଏହି ନାମ ଅନନ୍ତକାଳସ୍ଥାୟୀ ।” (ଯାତ୍ରାପୁସ୍ତକ ୩:୧୫) ଏହିପରି ଭାବରେ ଯିହୋବା ନିଜକୁ ଅନ୍ୟ ମିଥ୍ୟା ଦେବତାଙ୍କଠାରୁ ଅଲଗା କଲେ । ଈଶ୍ୱରଙ୍କ ପବିତ୍ର ନାମ ଧାରଣ କରୁଥିବାରୁ ଆମେ ନିଜକୁ ଗର୍ବ ଅନୁଭବ କରିଥାଉ ।

ଏହି ନାମରୁ ଆମ ଉଦ୍ଦେଶ୍ୟ ବିଷୟରେ ଜଣା ପଡ଼େ । ପ୍ରାଚୀନ ସମୟରୁ ଅନେକ ଲୋକ ଯିହୋବାଙ୍କ ଉପରେ ନିଜ ବିଶ୍ୱାସ ବିଷୟରେ ପ୍ରଚାର କରିଆସୁଛନ୍ତି । ନମ୍ର ହେବଲ ଏହାର ଆରମ୍ଭ କରିଥିଲେ । ତାʼପରେ ନୋହ, ଅବ୍ରହାମ, ସାରା, ଦାଉଦ ଏବଂ ଆହୁରି ଅନେକେ ଏହି “ବୃହତ୍‌ ମେଘ ତୁଲ୍ୟ ସାକ୍ଷୀମାନଙ୍କ” ମଧ୍ୟରେ ସାମିଲ୍‌ ହେଲେ । (ଏବ୍ରୀ ୧୧:୪–୧୨:୧) ଯେପରି ନିର୍ଦ୍ଦୋଷ ବ୍ୟକ୍ତିଙ୍କ ସପକ୍ଷରେ ସାକ୍ଷ୍ୟ ଦେବା ଜଣେ ସାକ୍ଷୀର କର୍ତ୍ତବ୍ୟ ଅଟେ, ଠିକ୍‌ ସେହିପରି ଆମ ଈଶ୍ୱର ଯିହୋବାଙ୍କ ପକ୍ଷରେ ସାକ୍ଷ୍ୟ ଦେବା ଆମର କର୍ତ୍ତବ୍ୟ ଅଟେ । ଆମେ ଦୃଢ଼ ସଂକଳ୍ପ କରିଛୁ ଯେ ଯିହୋବାଙ୍କ ବିଷୟରେ ଲୋକଙ୍କୁ ସତ୍ୟ କହିବାରେ ପଛଘୁଞ୍ଚା ହେବୁ ନାହିଁ ।

ଆମେ ଯୀଶୁଙ୍କୁ ଅନୁକରଣ କରୁଛୁ । ବାଇବଲ ଯୀଶୁଙ୍କୁ “ବିଶ୍ୱସ୍ତ ଓ ସତ୍ୟ ସାକ୍ଷୀ” କହେ । (ପ୍ରକାଶିତ ବାକ୍ୟ ୩:୧୪) ଯୀଶୁ ନିଜେ କହିଥିଲେ, ‘ମୁଁ ଈଶ୍ୱରଙ୍କ ନାମ ଜଣାଇଛି’ ଏବଂ ଈଶ୍ୱରଙ୍କ ବିଷୟରେ “ସତ୍ୟ ପକ୍ଷରେ ସାକ୍ଷ୍ୟ ଦିଏ ।” (ଯୋହନ ୧୭:୨୬; ୧୮:୩୭) ସେ ଯିହୋବାଙ୍କ ସବୁଠାରୁ ବଡ଼ ସାକ୍ଷୀ, ତେଣୁ ଯୀଶୁଙ୍କ ପ୍ରକୃତ ଶିଷ୍ୟମାନଙ୍କୁ ଯିହୋବାଙ୍କ ନାମ ଧାରଣ କରିବା ଏବଂ ଅନ୍ୟମାନଙ୍କୁ ଏହି ନାମ ବିଷୟରେ କହିବା ଉଚିତ୍‌ । ଯିହୋବାଙ୍କ ସାକ୍ଷୀମାନେ ଏହା ହିଁ କରିବାକୁ ଚେଷ୍ଟା କରନ୍ତି ।

• ବାଇବଲ ବିଦ୍ୟାର୍ଥୀମାନେ ଯିହୋବାଙ୍କ ସାକ୍ଷୀ ନାମ କାହିଁକି ଧାରଣ କଲେ ?

• ଯିହୋବାଙ୍କ ସେବକମାନେ କେବେଠାରୁ ତାଙ୍କ ବିଷୟରେ ସାକ୍ଷ୍ୟ ଦେବା ଆରମ୍ଭ କଲେ ?

• ଯିହୋବାଙ୍କ ସବୁଠାରୁ ବଡ଼ ସାକ୍ଷୀ କିଏ ?

ବାଇବଲରେ ଭବିଷ୍ୟତବାଣୀ କରାଯାଇଥିଲା ଯେ ଯୀଶୁଙ୍କ ମୃତ୍ୟୁ ପରେ ଖ୍ରୀଷ୍ଟିୟାନମାନଙ୍କ ମଧ୍ୟରେ ମିଥ୍ୟା ଶିକ୍ଷକମାନେ ଦେଖା ଦେବେ, ଯେଉଁମାନେ ବାଇବଲର ସତ୍ୟ ପରିବର୍ତ୍ତେ ବିପରୀତ କଥାଗୁଡ଼ିକ ଶିଖାଇବେ । (ପ୍ରେରିତ ୨୦:୨୯, ୩୦) ସମୟକ୍ରମେ ତାହା ହିଁ ହେଲା । ଏହି ଶିକ୍ଷକମାନେ ଯୀଶୁଙ୍କ ଶିକ୍ଷାରେ ମିଥ୍ୟା ଧର୍ମର ଶିକ୍ଷାସବୁ ମିଶାଇବାକୁ ଲାଗିଲେ ଏବଂ ଏକ ମିଥ୍ୟା ଖ୍ରୀଷ୍ଟିୟାନ ଧର୍ମର ଆରମ୍ଭ ହେଲା । (୨ ତୀମଥି ୪:୩, ୪) ତେଣୁ ଆମେ କିପରି ନିଶ୍ଚିତ ହୋଇପାରିବା ଯେ ବାଇବଲ ଆମକୁ ଯାହା ଶିଖାଏ, ତାʼ ବିଷୟରେ ସଠିକ୍‌ ଜ୍ଞାନ ଆଜି ଆମ ପାଖରେ ଅଛି ?

ସତ୍ୟରେ ଆଲୋକ ଦେବା ପାଇଁ ଯିହୋବାଙ୍କ ସମୟ ଆସିଲା । ଯିହୋବା ପୂର୍ବରୁ କହିଥିଲେ ଯେ ‘ଶେଷ କାଳରେ ଜ୍ଞାନର ବୃଦ୍ଧି ହେବ ।’ (ଦାନିୟେଲ ୧୨:୪) ତାହା ହିଁ ହେଲା । ୧୮୭୦ ମସିହାରେ ସତ୍ୟକୁ ଖୋଜୁଥିବା ଏକ ଛୋଟ ସମୂହ ଜାଣିପାରିଲା ଯେ ଗୀର୍ଜାର ଅନେକ ଶିକ୍ଷାଗୁଡ଼ିକ ବାଇବଲ ଆଧାରିତ ନ ଥିଲା । ତେଣୁ ସେମାନେ ଏହା ଖୋଜିବାକୁ ଲାଗିଲେ ଯେ ବାଇବଲ ପ୍ରକୃତରେ କʼଣ ଶିଖାଏ ଏବଂ ଯିହୋବା ସେମାନଙ୍କୁ ବାଇବଲର ସଠିକ୍‌ ଜ୍ଞାନ ହାସଲ କରିବା ପାଇଁ ସାହାଯ୍ୟ କଲେ ।

ସଚ୍ଚୋଟ ଲୋକମାନେ ଗଭୀର ଭାବରେ ବାଇବଲ ଅଧ୍ୟୟନ କଲେ । ସେହି ବାଇବଲ ବିଦ୍ୟାର୍ଥୀମାନେ ଆଜି ଯିହୋବାଙ୍କ ସାକ୍ଷୀ ନାମରେ ପରିଚିତ । ସେମାନେ ଅଧ୍ୟୟନର ଏମିତି ଏକ ପଦ୍ଧତି ବ୍ୟବାହାର କଲେ, ଯାହା ଆଜି ମଧ୍ୟ ଆମେ ବ୍ୟବାହାର କରୁଛୁ । ସେମାନେ ଗୋଟିଏ ବିଷୟ ବାଛୁଥିଲେ ଏବଂ ବାଇବଲରୁ ତାହା ଉପରେ ଚର୍ଚ୍ଚା କରୁଥିଲେ । ଯେତେବେଳେ ବାଇବଲର କିଛି ଭାଗ ସେମାନଙ୍କୁ ବୁଝିବା ପାଇଁ କଷ୍ଟ ହେଉଥିଲା, ତାହାକୁ ଠିକ୍‌ ଭାବରେ ବୁଝିବା ପାଇଁ ଅନ୍ୟ ପଦଗୁଡ଼ିକ ଦେଖୁଥିଲେ । ଯେତେବେଳେ ସେମାନେ କୌଣସି ସିଦ୍ଧାନ୍ତରେ ପହଞ୍ଚୁଥିଲେ, ଯାହା ବାଇବଲର ଅନ୍ୟ ପଦଗୁଡ଼ିକ ସହିତ ମେଳ ଖାଉଥିଲା, ସେମାନେ ତାହା ଲେଖି ରଖୁଥିଲେ । ଏପରି ଭାବରେ ସେମାନେ ବାଇବଲକୁ ଭଲ ଭାବରେ ବୁଝିବା ପାଇଁ ବାଇବଲର ହିଁ ସାହାଯ୍ୟ ନେଉଥିଲେ । ଏପରି କରିବା ଦ୍ୱାରା ସେମାନେ ବାଇବଲର ସତ୍ୟଗୁଡ଼ିକୁ ପୁଣିଥରେ ଖୋଜି ପାଇଲେ, ଯେଉଁଗୁଡ଼ିକ ଅନ୍ଧାରରେ ଲୁଚି ଯାଇଥିଲା । ଯେପରି ସେମାନେ ଈଶ୍ୱରଙ୍କ ନାମ ଓ ତାଙ୍କ ରାଜ୍ୟ, ମଣିଷମାନଙ୍କ ଓ ପୃଥିବୀ ପାଇଁ ତାଙ୍କ ଉଦ୍ଦେଶ୍ୟ, ମରିଯାଇଥିବା ଲୋକଙ୍କ ଅବସ୍ଥା ଏବଂ ସେମାନେ ପୁଣିଥରେ ଜୀବିତ ହେବା ବିଷୟରେ ସତ୍ୟ ବୁଝିପାରିଲେ । ଏହି ଅନୁସନ୍ଧାନରୁ ସେମାନେ ଅନେକ ମିଥ୍ୟା ଶିକ୍ଷା ଏବଂ ମିଥ୍ୟା ରୀତିନୀତିରୁ ମୁକ୍ତ ହୋଇପାରିଲେ ।—ଯୋହନ ୮:୩୧, ୩୨.

୧୮୭୯ ଖ୍ରୀଷ୍ଟାବ୍ଦ ଆସୁ ଆସୁ ବାଇବଲ ବିଦ୍ୟାର୍ଥୀମାନେ ବୁଝିଗଲେ ଯେ ବର୍ତ୍ତମାନ ସାରା ପୃଥିବୀରେ ସତ୍ୟର ପ୍ରଚାର କରାଯିବାର ସମୟ ଆସି ଯାଇଛି । ସେଥିପାଇଁ ସେମାନେ ସେହି ବର୍ଷରୁ ଏକ ପତ୍ରିକା ଛାପିବା ଆରମ୍ଭ କଲେ, ଯାହା ଆଜି ପର୍ଯ୍ୟନ୍ତ ଛପାଯାଉଛି । ଏହା ହେଉଛି, ପ୍ରହରୀଦୁର୍ଗ ଯିହୋବାଙ୍କ ରାଜ୍ୟର ଘୋଷଣା କରେ । ଆଜି ଆମେ ୨୪୦ଟି ଦେଶ ଓ ଦ୍ୱୀପଗୁଡ଼ିକରେ ଏବଂ ୭୫୦ରୁ ଅଧିକ ଭାଷାରେ ଲୋକମାନଙ୍କୁ ବାଇବଲର ସତ୍ୟ ପହଞ୍ଚାଇ ପାରୁଛୁ । ପ୍ରକୃତରେ, ସତ୍ୟର ଜ୍ଞାନ ବହୁତ ବଢ଼ିଯାଇଛି !

• ଯୀଶୁଙ୍କ ମୃତ୍ୟୁ ପରେ ବାଇବଲରେ ଥିବା ସତ୍ୟର କʼଣ ହେଲା ?

• ଆମେ କିପରି ଈଶ୍ୱରଙ୍କ ବାକ୍ୟରେ ଥିବା ସତ୍ୟକୁ ପୁଣିଥରେ ଖୋଜି ପାଇଲୁ ?

ଯିହୋବାଙ୍କ ସାକ୍ଷୀମାନେ ଅନେକ ଦଶନ୍ଧି ଧରି ବାଇବଲର ଭିନ୍ନ ଭିନ୍ନ ଅନୁବାଦ ଛାପିଲେ, ବାଣ୍ଟିଲେ ଏବଂ ବ୍ୟବହାର କଲେ । କିନ୍ତୁ ପରେ ଆମେ ଏକ ନୂଆ ଅନୁବାଦର ଆବଶ୍ୟକତା ଅନୁଭବ କଲୁ, ଯାହା ଲୋକଙ୍କୁ “ସତ୍ୟ ସମ୍ବନ୍ଧରେ ଜ୍ଞାନ” ପାଇବା ପାଇଁ ଆହୁରି ସାହାଯ୍ୟ କରିବ, କାରଣ ସମସ୍ତଙ୍କ ପାଇଁ ଈଶ୍ୱରଙ୍କ ଏହା ହିଁ ଇଚ୍ଛା ଅଟେ । (୧ ତୀମଥି ୨:୩, ୪) ତେଣୁ ୧୯୫୦ରୁ ଆମେ ଭିନ୍ନ ଭିନ୍ନ ଭାଗରେ ଇଂରାଜୀର ନୂତନ ଜଗତ ଅନୁବାଦ ବାହାର କରିବା ଆରମ୍ଭ କଲୁ । ଏଥିରେ ଆମ ସମୟରେ ପ୍ରଚଳିତ ଭାଷା ବ୍ୟବହାର କରାଯାଇଛି । ଏହି ବାଇବଲର ଅନୁବାଦ ୧୩୦ରୁ ଅଧିକ ଭାଷାରେ କରାଯାଇଛି ଏବଂ ଅନୁବାଦ କିପରି ନିର୍ଭୁଲ ହୋଇପାରିବ, ତାହା ପ୍ରତି ବିଶେଷ ଧ୍ୟାନ ଦିଆଯାଇଛି ।

ଏପରି ଏକ ବାଇବଲ ଆବଶ୍ୟକ ଥିଲା, ଯାହା ସହଜରେ ବୁଝି ହେଉଥିବ । ସମୟ ସହିତ ଭାଷା ମଧ୍ୟ ବଦଳିଥାଏ । ବାଇବଲର ଅନେକ ଅନୁବାଦ ବହୁତ ଆଗରୁ କରାଯାଇଥିଲା । ସେଥିପାଇଁ ସେଗୁଡ଼ିକର ଭାଷା ପୁରୁଣା ହୋଇଯାଇଥିଲା ଏବଂ ଅନେକ ଶବ୍ଦ ବୁଝି ମଧ୍ୟ ହେଉ ନ ଥିଲା । ତାʼ ସହିତ, ବାଇବଲର ଆହୁରି ଅନେକ ପ୍ରାଚୀନ ହସ୍ତଲିପି ମିଳିଲା, ଯେଉଁଗୁଡ଼ିକ ବାଇବଲର ମୂଳ-ହସ୍ତଲିପି ସହିତ ସଠିକ୍‌ ଭାବରେ ମିଶୁଥିଲା । ଏହି ହସ୍ତଲିପିଗୁଡ଼ିକ ସାହାଯ୍ୟରେ ସେହି ସମୟର ଏବ୍ରୀ, ଆରାମୀ ଏବଂ ଗ୍ରୀକ୍‌ ଭାଷାକୁ ଆହୁରି ଭଲ ଭାବେ ବୁଝି ହେଲା, ଯେଉଁ ସମୟରେ ବାଇବଲ ଲେଖାଯାଇଥିଲା ।

ଏପରି ଏକ ବାଇବଲ ଆବଶ୍ୟକ ଥିଲା, ଯେଉଁଥିରେ ଈଶ୍ୱରଙ୍କ ବାକ୍ୟରେ କୌଣସି ପରିବର୍ତ୍ତନ କରାଯାଇ ନ ଥିବ । ଈଶ୍ୱରଙ୍କ ପ୍ରେରଣାରେ ଲେଖାଯାଇଥିବା ବାକ୍ୟରେ ମନଇଚ୍ଛା ପରିବର୍ତ୍ତନ କରିବା ପରିବର୍ତ୍ତେ ବାଇବଲ ଅନୁବାଦକମାନଙ୍କୁ ପୂରା ସଚ୍ଚୋଟତାର ସହିତ ମୂଳ-ହସ୍ତଲିପିର ସଠିକ୍‌ ଅନୁବାଦ କରିବା ଉଚିତ୍‌ । କିନ୍ତୁ ଅଧିକାଂଶ ଅନୁବାଦଗୁଡ଼ିକରେ ଈଶ୍ୱରଙ୍କ ନାମ ଯିହୋବାକୁ କାଢ଼ି ଦିଆଯାଇଛି ।

ଏପରି ଏକ ବାଇବଲ ଆବଶ୍ୟକ ଥିଲା, ଯାହା ବାଇବଲର ପ୍ରକୃତ ଲେଖକ ଅର୍ଥାତ୍‌ ଯିହୋବାଙ୍କୁ ମହିମା ଦେବ । (୨ ଶାମୁୟେଲ ୨୩:୨) ବାଇବଲର ସବୁଠାରୁ ପୁରୁଣା ହସ୍ତଲିପିଗୁଡ଼ିକରେ ଯିହୋବାଙ୍କ ନାମ ପ୍ରାୟ ୭,୦୦୦ ଥର ଆସେ ଏବଂ ନୂତନ ଜଗତ ଅନୁବାଦରେ ସେହି ସମସ୍ତ ଜାଗାଗୁଡ଼ିକରେ ଏହି ନାମ ପୁଣିଥରେ ଲେଖାଯାଇଛି । ତଳେ ଠିକ୍‌ ସେମିତି ଏକ ହସ୍ତଲିପିର ଚିତ୍ର ଦିଆଯାଇଛି । (ଯାତ୍ରା ପୁସ୍ତକ ୬:୩) ବର୍ଷ ବର୍ଷର ପରିଶ୍ରମ ଓ ଗବେଷଣା ପରେ ନୂତନ ଜଗତ ଅନୁବାଦ ବାଇବଲ ପ୍ରସ୍ତୁତ କରାଯାଇଛି । ଏହାକୁ ପଢ଼ି ବହୁତ ଖୁସି ମିଳେ, କାରଣ ଏହା ଆମକୁ ଈଶ୍ୱରଙ୍କ ଚିନ୍ତାଧାରା ବିଷୟରେ ସଠିକ୍‌ ଭାବରେ କହିଥାଏ । ଆପଣଙ୍କ ପାଖରେ ନିଜ ଭାଷାରେ ନୂତନ ଜଗତ ଅନୁବାଦ ଥାଉ କିମ୍ବା ନ ଥାଉ, ଆମେ ଆପଣଙ୍କୁ ଉତ୍ସାହିତ କରୁ ଯେ ପ୍ରତିଦିନ ଯିହୋବାଙ୍କ ବାକ୍ୟ ପଢ଼ିବାର ଭଲ ଅଭ୍ୟାସ ଜାରି ରଖନ୍ତୁ ।—ଯିହୋଶୂୟ ୧:୮; ଗୀତସଂହିତା ୧:୨, ୩.

• ଆମକୁ ବାଇବଲର ଏକ ନୂଆ ଅନୁବାଦ କାହିଁକି ଆବଶ୍ୟକ ହେଲା ?

• ଯଦି କେହି ଈଶ୍ୱରଙ୍କ ଇଚ୍ଛା ଜାଣିବାକୁ ଚାହାନ୍ତି, ତାଙ୍କୁ ପ୍ରତିଦିନ କʼଣ କରିବାକୁ ହେବ ?